عشق الضواري

بارت 23

روزة بخوف: لاا هندة لاا . . منكدر نشرد لأن يلكونة ويرجعونة وهالمرة مراح يكتفي بأذيتي هالمرة انتي رح تتأذين واني مستحيل اخلي احد يأذيج بابا قبل مايتوفى وصاني بيج تتذكرين كال روز ديري بالج على اختج الزغيرة لتخلين احد يأذيها هيه مو مثلج تدافع عن نفسها وتطالب . . هندة اياج تفكرين هيج . . تتذكرين قبل تلث سنوات لمن شردت من البيت ليلة كاملة وهمه يدورون عليه تتذكرين شسوه بيه هيبت لمن لكوني هوه وجماعته . . احتار شلون يكتلني وشلون يأذيني . . هندة تره رجل امنا يشتغل بالممنوعات الي عرفته خلال هالسنوات انه هوه مهرب لكلشي حبوب شرب وحتى بنات ولج تتذكرين لمن اخذ محمد وامير اثنينهم وكال راح اوديهم يم عمتهم يعيشون قبل فترة سمعته يحجي ويه ضياء صديقة يكله لو بعد جميلة تخلفلي واحد وابيعه بنفس السعر . . يعني هذا ميهمه اذا جانو جهاله لو جهال غيره .

شهكت شاهندة وهيه تخلي ايدها على صدرها بخوف .

شاهندة: مستحيل لاا لاا حمودي . . امير . . ليش . . شلوون هيج يسوي ذول اخواننه وولده من دمه ولحمه . . روزة . . روزة . . احنه هم يبيعنا . . خلينه نشرد . . خلينه نشرد .

روزة وهيه تكتم على حلك اختها: هندة اسكتي اسكتي رح تفضحينه ويسمعنه هيبت . . اششش . . فدوة اهدي اني اسفه حبيبتي انسي الحجيته . . انسيه . . باوعيلي اني مستحيل اخلي احد يأذيج . . ابقي هنا اقفلي باب الغرفة واني دقايق واجيج . . ولو طولت عليج ابد لا تطلعين هندة اذا طلعتي اعوفج وحدج . . فاهمه تبقين وحدج واني اروح .

هزت شاهندة راسها توافق اختها والخوف واضح على ملامحها وجسمها يرجف بفرع وقهر على اخوانها الزغار محمد الي عمره سنتين ونص وامير سنه واربع اشهر . . طلعت روزة وبسرعة قفلت الباب هندة وره اختها وكفت وراه انتجت عليه وهيه تتذكر اخوانها الزغار الي مالين البيت بهوستهم ولعبهم وتتذكر شكد جانو متعلقين بيهن لان امهن تطلع وتعوفهم وهنه الي ربنهم واعتنن بيهم . . تذكرت لمن اجه هيبت فرحان من بره وهو يدخل لغرفتهن وياخذ الاطفال منهن وهمه نايمين ولمن كعد محمد وبقه يبجي على روزة يريدها ميحب ابوه عكس امير جان ميفتهم وبقه نايم رغم صوت بجي محمد وماسكت الا لمن شالته روزة طلع هيبت ورجع وره دقايق بدون امير لكه محمد هستوه راجع نايم اخذه من ايد شاهندة غصب وهيه تتوسله وتسأله وين راح يوديه كاللها لأخته ياخذهم يعيشون عد عمتهم لأنه ماعاد يكدر يعيشهم . . ضربت على راسها بقهر وهيه تتذكرهم تحس گلبها ينعصر عصر لمن عرفت بيه باعهم . . يعني بعد متشوفهم . . متعرف مصيرهم وين . . والمن باعهم . . لتجار اعضاء . . لناس موزينين . . هسه همه مرتاحين لو ديأذوهم . . بعدهم اطفال ميفتهمون شي من الدنيا ولو واحد منهم تأذى من شي ميعرف يعبر عنه غير بس بالبجي . . ياترى الي اخذهم راح يراعيهم لو مراح يتحمل بجيهم ويضربهم . . لو يبيعون اعضائهم . . صفنت وهيه تتذكر مرة طلعو على قناة من القنوات العراقية الاستخبارات مسوين كمين لمرا جانت متفقة ويه ناس حتى تبيعلهم بتها الي عمرها سنتين ونص بعمر محمد . . صارت تبجي وشهكاتها تعلى بقهر وخوف من المجهول ومن الي راح يسويه بيهن هيبت بالأيام الجاية . . باوعت على ايديها وهيه ترفعهن كدامها وتشوف رجفتهن القوية حست بقوة انبثت بكلبها متدري منين اجتها كامت برجلين ترجف وكفت بثقة مزيفه وهيه تقوي بنفسها وتحث روحها على التحلي بالشجاعة شدت عزمها على ان تشرد هيه واختها والي يصير خلي يصير تذكرت كلام ابوها قبل مايتوفى كال الهن وهنه واكفات يمه وهو متمدد على السرير بالمستشفى " لتخافن اذا ضاگت بيچن الدنيا ودير بالچن تلتجأن لطريق السوء دايما خلن ابالجن يابوية شما تضيگ تفرج وكله اختبار من ربجن حتى يشوف العبد المؤمن بيه وتذكرن لا يكلف الله نفسا الا وسعها يعني على كد قوتجن وصبرجن الله يختبرجن بس يبقى الي نفسه طيبة وذاته نضيف يتحمل ويصبر ويجاهد والي نفسه ردية وذاته وصخ بسرعه يستسلم ويختار طريق السوء . . يابوية لا تسكتن ع الباطل . . واذا فد يوم شفتن نفسجن انجبرتجن على شي يغضب الله وماعدجن خيار غير الموت . .  اختارن الموت اليموت بشرف احسن من اليموت بعار" . . بقت كلمات ابوها ترن براسها باوعت لأيديها بعدهن يرجفن كامت وبكل قوتها ضربت نفسها راشدي وصارت تضرب على ايديها بقوة لحد ماصار لونهن احمر شوية انتبهت راحت الرجفة منهن بقت بشي خفيف . . كعدت تفكر بطريقة تشرد بيها هيه واختها وخلال ماهيه تفكر طبت روزة باوعتلها شافت خدها عليه اثر وايديها حمر ولأن بشرتهن لونها ابيض شاحب يبين الاثر عليها .