باوعتلة جمانة بحاجب معقود وهيه مو فاهمه شي من الي يكوله لحد ما فزت على صوت شهكة عالية اجتي من وراهه ، اندارت لكت امها واكفة وهيه مصدومة من منظر بتها الي واكفة مقابيل زيد وهو لازم ايدها الي بيها المكناسة ليفوك ، الي يشوفها يظن انها جانت تحاول تضربة بيها ، فهم زيد نظرات امها للموقف وحب يغيض جمانة ويستغل الموقف لجانبه .
زيد: هيج يبت عمي تتهجمين على خطارج وتطردينه .
بمجرد ما امها سمعت هالكلام مشت بسرعة تجاههم وسحبت جمانة من ايدها الثانية وهيه ترزل بيها وتطلب منها تعتذر من ابن عمها الماكر ، كل هذا وجمانة جانت صافنه بوجه زيد ومصدومة من مكره وشلون تهمها بالتهجم عليه وطرده ، باوعت لأمها بنظرات واثقة وكالتلها .
جمانة: يوم صدكيني ما صار مثل ماهوه يكول اني جنت دا احجي وياه وبدون قصد مني رفعت المكناسه ليفوك وهوه لزمها بس لا طردته ولا ضربتة .
زيد وهو يدعي الحزن : يا عمتي انه متعني وجاي من العماره لهنا والطريق طويلة وتعب بس حتى اشوفكم واتطمن على احوالكم وتجي "جونة" تطردني وتشيل المكناسة بوجهي ، جاهل انه . . بعمرها . . ع العموم هاج هذا المصرف واني هم يالا الحگ ارجع .
خلال الوكت الي چان يحجي بيه وهو يدعي الحزن والتأثر ، جمانة جانت فاتحه عيونها وحلكها بصدمة وهيه تشوف هذا الثعلب الماكر شلون يخدع امها ، حاولت تبرر لأمها ، لكن واجهتها امها بالصد وطلبت منها تطلع وتعوفهم ، وبعد ماطلعت اقتربت ام جمانة من زيد الي ابتسم بوجهها وهيه تحضنه وهو يبوسها من جبينها .
اسيل: حبيبي امي صار هواية مشايفتك
اشتاقيتلكم وللعزيزة امك وبيبيتك . . وحتى جدك . . شلونكم حبيبي شخباركم جدك بيبيتك اهلك .
لزمها زيد من ايدها وهو يقودها ويكعدها بصفة ع التخم ، وعلى وجهه ابتسامة
هادئة .
زيد: كلهم بخير وبلغوني اوصلج سلامهم واشتياقهم . . وخاصة امي . . بسس .
اسيل بتساؤول: بس شنو لا تقلقني فدوة لقلبك .
زيد: لا لتخافين الموضوع مو يمهم . . الموضوع انه اريد احجي وياج بشغلة بس اريدج تحجين الصراحه وتخلين ثقتج بيه وانه اطيج كلمتي، الحجي الي راح يصير ابيناتنه ماراح يطلع لاحد .
زاد قلق اسيل وتوترها وهزت راسها بموافقة وهيه تنطيه الضوء الأخضر حتى يسأل سؤاله بدون تردد .
تنهد زيد بحيرة وهو يسألها .
زيد: عمة صراحه اني من يوم الي انكطع جدي عن زيارتكم وهو يوصينه من نوصل الكم المصرف نكعد وياج ونشوفج اذا محتاجه شي ،مرتاحه لا ، مغثوثة من شي، بالبداية جان عمي عمار هو الي كلفه جدي يجيبلكم المصرف ويتطمن عليكم بس كام كلما يجي ويرجع وهو ضايج ومتنرفز وبكل مرة يرجع بيها من بغداد يصير حجي هوه وجدي . . هوه يكله بعد ماروح شوفلك احد غيري وجدي يرفض ويكله مرت اخوك تعزك وترتاحلك اكثر واحد وهو يكله . . ليش كلما اروح ماترضه تطلع تقابلني اذا صدك تعزني، وحتى حرمتنه من شوفة بنت المرحوم حارث ،
كام جدي كله بعد ماتروح انته وصار بكل مرة واحد من عدنه يجي ياهو اليكدر وماعده شغل ملتزم بيه يزرگ لبغداد يجيب مصرفكم، وصانه جدي كلنه كال لحد يلح على شوفتهن بس اسألو خال جمانه على وضعهن وصحتهن وانطوه مصرفهن وتعالو ، ومن يومها واحنه نسوي مثل ماكال جدي بس الخلاني اشك بموضوع رفضج لشوفتنه هو لمن اجيت بوحده من الجيات وصلت للباب وگبل ما ادگهه سمعت صوت جمانة وهيه تصرخ وتتوسل بمرت خالهه حتى تعوفهه ،ما انكر الحرگه والغضب الي حسيت بيه بساعتهه، ردت اكسر الباب واطبلهه ،بس ماكدرت لان مو من اخلاقنه ندخل بيوت الناس غفل لو غصب، انتبهت اكو شرخ زغيرون بالباب باوعت منه لكيتهه لازمتهه من شعرهه وتجر بيهه وخالهه واكف ماحجه ولا كلمة بس ابن خالهه . . نسيت اسمه . . هوه الدافعلهه وفرغهه من ايد امه وهم ما سكتولة وكامو امه وابوه يغلطون عليه ويرزلون بيه دكيت الباب بعصبية بدون قصد مني ،طلعلي اخوج ومن شافني انخطف لونه وكام يتلعثم بالكلام ،انه بدون اي مقدمات كتله اريد اشوف عمتي ام جمانة كال مو هنا طالعه للدكتور كتله اريد اشوف جمانه كال راحت وياهه من شفته حجه هيج كلت لازم اروح ابلغ جدي ولازم نلتقي بيج ونحجي وياج ونعرف منج الجاي يصير وياجن شنو ، وليش خالهه يشوف مرته تمد ايدهه عليهه ومايحجي وياهه ويردهه ، بعد ما حاجيت جدي واتفقنه نجي انه وياه حتى اذا نكر اخوج انه شاهد وشفت بعيني كلنه خاف يهددجن وماتحجن وتطن بيه ، بس صارت عدنه مشكلة واضطريت اعوف كلشي واسافر خارج العراق بقيت مدة تلث سنوات بالخارج اسمع اخباركم من جدي وعرفت منه ، خلال هاي التلث سنوات هوه جاي بالخمس مرات وطالب يشوفج ويحجي وياج وانتي ماراضية تقابلينه لحد ما باخر جية اله اخوج مسمعه تسجيل الج انتي كايله بيه " شيخ ضاري اني وبنتي نريد نعيش حياتنه بعيد عنكم وعن ظلمكم وياريت بعد ماتجونه لان منريد نشوفكم ولا نقابلكم ولا نسمع اخباركم . . رجاءآ يا شيخ عوفنا بحالنا مثل ما اني وفيت بوعدي وماتزوجت وكرست نفسي لبنتي انته هم اوفي بوعدك وعوفنا بحالنا . . بوگتهه جدي راجع وطايح مريض اسبوع كامل بالفراش بسبب الخيبة وعدم التقدير من قبلكم لأن شيخ مثل جدي محد يردله كلمة والناس تحترمه وتستشيرة يجي خمس مرات وعلمود مصلحت٠ن ومن خوفه عليجن ، وبكل مره يكعد يترجاكم حتى يشوف حفيدته وتالي يرجع خايب ومكسور الخاطر ، من سمعت بهالحجي من جدي بعد ماتحسنت صحته وخابرته بقيت افكر طول ما اني بالخارج ،وصار عدي شك بالموضوع ،لحد مارجعت للعراق قبل اسبوع وكلت هالمره اني اجيبلكم مصرفكم وما اروح الا اقابلج وافتهم منج الجاي يصير ،بس حجي جمانة قبل شوية خلاني اتأكد من شكوكي وكلشي صار واضح گدامي .
اسيل: وشنو الي حجته جمانة .
زيد بتفكير: ماحجت شي مو زين . بس جانت تلومنا وتحملنا مسؤولية الي صار عبالها احنه الي مانريد نشوفكم ومبتعدين عنكم . . وحتى قبل اسبوع لمن اجينه اني وجواد والتقى بيها بالشارع ،هم سمعته نفس الحجي ، وهالشي يثبتلي انه اخوج ياعمة هو سبب هاي المجافاة البيناتنه ، بسس الشغل بالي ومالكيتله تفسير التسجيل السمعه جدي . . ماعرفت ليش انتي هيج حجيتي وشنو الاسباب ، بس لازم تعرفين ان جدي لحد هاي اللحضة مقهور من ذاك الحجي .
اسيل بحسرة: ما اعرف شأكولك يا ابني ، بعد كل الي سمعته افتهمت هواية شغلات وتوضحلي كُلشي احنه هم مثلكم يجينه الحجي انه انتم متردون تقابلونه ومتردون تشوفونه وانه المصرف مجبورين تجون توصلوه بنفسكم لان هيثم موصيكم بهالشي
بسس صدكني التسجيل جنت مضطرة اسجله واحجي ذاك الحجي للشيخ واعترفلكم اني انخدعت بكلام اخوي الي جان يوصلياه . . ولو ما الموضوع يمس بنتي ماجان قبلت اسجله وادزه بيده للشيخ .
زيد: اتمنى تحجيلي كلشي وماتضمين عليه حتى اعرف اتصرف . . الله يشهد عليه من يوم السمعتهه تصرخ وتستنجد ومرت خالهه تضربهه بلا رحمه لحد اليوم وانه افكر ومامرتاح ،فكرة تجيبني وفكرة توديني، شلون احنه عايشين بترف ومرتاحين وبت عمي اليتيمة الي المفروض تتدلل وتعيش اميرة بجال جدهه وعمامهه ،تنكتل وخالهه واكف وما يرد مرته ، الله يعلم شصاير من ورانه وشلون مسودين عيشتهه لجونة .
اسيل بقهر: اني راح احجيلك بس اتمنى مثل ماكلت هالكلام يبقى ابيناتنا ، اني حتى جمانة محاجيتلها بخصوص هالموضوع ، لان جمانة من النوع الي تشيل بكلبها وصرااحه تندمت من حجيتلها سبب ابتعادنا والي صار قبل ما نجي لبغداد ، جانت دوم تلح عليه حتى نرجعلكم لكن من لمن حجيتلها قبل اسبوعين لحد اليوم وهيه شايلة بكلبها وتلوم بجدها وعمامها ، لذلك يا ابني اني وبصراحه احجيلكياهه ميهمني غير جمانة، ماريدها تعرف بالي راح احجيه اخاف تشيل بكلبها عليكم اكثر وتاخذ نضرة مو حلوة عن ولد عمامها .
. . . يتبع . . .
لا تنسو الضغط على النجمة للتصويت
ومتابعة حسابي لقراءة باقي القصص
🌹❤️🌹
أنت تقرأ
عشق الضواري
Любовные романыالرواية الاولى من سلسلة "عشق أسود الرافدين" تتكلم القصة عن توأمتين تعيشان تحت رعاية جدهما برفاهية ودلال حتى يحين وقت وفاته لتنتقلا للعيش في بيت زوج والدتهما فتبدأ حياتهما في بيت زوج والدتهما فهل سيتغير حالهم للأفضل ام سيكون ماتبقى من حياتهما جحيم؟...
