لكن الي غير تفكير فيان الايجابي وقطع أملها بتحسن صحة جدها هو لمن سمعت الصوت الي أنتشر يمها بالمطبخ جان صوت جهاز الأنذار الي مخلية منه واحد بغرفة جدها وواحد تاخذه وياها وين متروح حتى تكون على أطلاع بحالة جدها وتسمع جهاز القلب عن بعد تحسبآ لأي طارئ .
الصوت چان يدل على توقف القلب جمدت فيان بمكانها من الصدمة إما الممرضة الخاصة بجدها فركضت للغرفة وهيه تتصل على الدكتور الخاص بيه ،بعد ما أستوعبت فيان الي صار ركضت لغرفة جدها وهيه تتعثر بخطواتها طبت شافته عيونه مفتوحه ووجهه أصفر كامت تقترب منه بخطوات بطيئة وصلت لسريره مدت أيدها تلزم أيده حركته ماتحرك وياها حاجته بصوت مهزوز كله الم .
فيان: جدوو .. حبيبي .. حاجيني .. حتى لو بس ترمشلي بعيونك .. فدوة أروحلك لتعوفني وحدي .. منو الية من بعدك.. هاا..منو لبنتك .. جدو لتفاركني مامتعودة على غيابك .. حاجيني جدو الزم أيدي لتعوفها .. جدو لتيتمني مرة ثانية .. فدوة حاجيني .
تقربت منها الممرضة تحاول تهديها وتبعدها عن جثة جدها بين مايوصل الطبيب مع الاسعاف حتى ينقلون الجثة للمشفى تقربت الممرضة من الجثة وجرت الغطى على وجه الجد رافد بعد ما غمضت عيونه وبمجرد ما أنتبهتلها فيان صرخت بيها ووخرتها من يم جدها وبعدت الغطى عن وجه جدها وهيه تمسد على شعره بحنية ودموعها تنزل وشهكاتها مابطلت ولا وكفت .
بعد مرور عدة ساعات على وصولها للمستشفى مع جثة جدها وصل المحامي صديق جدها ووياه أبنه سلام وأبن عم جدها فائض الي چان يشتغل بوحدة من شركات جدها أقترب منها المحامي ابو سلام
وهو يباوعلها بنظرات الشفقة والحزن وعيونة تلمع بسبب الدموع الي تجمعت بيها على فقده لصديق عمره حاجاهه مرة ومرتين لكن ما چانت منتبهه عيونها تباوع للفراغ وصايرة حمرة ومنفوخة من البجي وخشمها صاير احمر وماينسمع غير صوت شهكاتها بسبب بچيها المكتوم لحد ما مد أيده وحرك جتفها بخفة جفلت بسبب حركته وانتبهت عليه يحاجيها گامت بسرعة من مكانها حضنته تشهك وتبجي أختنكت ببجيها لحد ما هدأها وكعد يحجيلها على وصايا جدها الها .
ابو سلام: كافي بجي يابنتي ..تذكري وصية جدج وصيري قوية .. تدرين قبل اربع ايام لمن زرته چان يسولف بيج وبقوة صبرج وتحملج چان فخور بيج ويگول بنتي قوية أني ربيتها وادري بيها قوية ماتنكسر بسهولة وادري بيهه تحبني ومارح تضعف وتأذي نفسها بغيابي أعرفها اكثر من نفسي .. طول الوكت چان يسولف بيج وهذا سلام شاهد على كلامي هوه جان موجود وياية .
هزت راسها بموافقة وهي تتذكر كلام جدها الها طول الشهر ونص الفاتت هوه يقوي بيها ويشجعها تصير قوية وماتضعف وتكون فريسة سهلة للي حواليها خاصة وهي صارت يتيمة من صدك هسه بعد ماتوفى سندها وحاميها الي جان ميخلي احد يقترب منها هي واختها ودوم يرعاهن ويبعد عنهن المخادعين والطماعين .. فكرت بنفسها وبأختها لازم تكون قوية حتى محد يكدر يأذيها لازم متبين كسرتها وخسارتها لأحد
الحزن رح يبقى بقلبها شي اكيد لكن ماراح تخلي اي واحد يشوف انكسارها وضعفها لازم تعتمد على نفسها وتدير بالها على
اختها .
أنت تقرأ
عشق الضواري
Storie d'amoreالرواية الاولى من سلسلة "عشق أسود الرافدين" تتكلم القصة عن توأمتين تعيشان تحت رعاية جدهما برفاهية ودلال حتى يحين وقت وفاته لتنتقلا للعيش في بيت زوج والدتهما فتبدأ حياتهما في بيت زوج والدتهما فهل سيتغير حالهم للأفضل ام سيكون ماتبقى من حياتهما جحيم؟...
