عشق الضواري

البارت 44

لا تنسو الضغط على النجمة للتصويت
ومتابعة حسابي لقراءة باقي القصص
🌹⁦❤️⁩🌹

2550كلمة اني مستمرة ع كلامي كلما تتفاعلون وتصوتون اطول البارت اكثر وحبابون اريد تتفاعلون وتعلقون ابين الفقرات 🌹⁦❤️⁩
.
.
.

شيخة بتوتر : لاا حبيبة زيد ما انجبر عليها . . زيد فكر بعقله ووزنها وماتزوجها الا علمود ما يطيحون اخوانها بالغلط ويدخلون السجن ونصير علج بحلوك الناس وو . . وسالفتها تعذريني ماكدر احجيها عود زيد هوه يسولفلجياهه .

جمانة بزعل مصطنع : لاا حبابة احجيلي ، ترة اني والله ما اطلع حجاية ابد واسالي ماما اذا متصدكيني .

شيخة بابتسامة : اسولفلج والله بس بعد مايوافق زيد لان سالفة ماسة محد يدري بيها بس جدي وزيد وامها وانه وعمي عبد الله وعمتي فيحاء يعني بس احنه الست نفرات ندري بسالفتها ، والبقية كلهم بعوايلهم محد يدري ولحد الان مستغربين زواج زيد منها والكل يدرون بيه رايدج من الزغر وانصدمو بزواجه من ماسة وبطريقة حيرتهم لا عرس لا زفة ولا بدلة مجرد لبست فستان ابيض وزفنها النسوان من بيت اهلها لهنا ومحد اجه غريب يعني بس احنه وجدي سوه هالشي بس حتى محد يحجي من الناس اذا درو وتحجج بموتة ابن عمه وياهو اليسال يكله علمود ابن عمي ماسوينا عرس ويفر السالفة . . وهسة عوفج من ماسة الخناسة واسمعيني زين ، انتي خيتي يجونة وماريدج تنظلمين وتتاذين وهنا اذا ما تعاملينهن بالمثل وتسكتيلهن ياكلنج عدنه بناتنه نصهن فقيرات ونصهن عرمات الفقيرات عدهن ابو وام يدافعولهن ومنهن المخطوبة لواحد من ولد عمها وهوه ياخذلها حكها ويصكر البقيه بس المثلج امج فقيرة وماتحجي ومريضة بعد گلبي وانتي هم مالج صوت هيج ياكلنج بكشورج ، صدك جدي محذر الكل محد يندك بيج واكثر من مرة يكلج اي احد يغثج تعاي كليلي وادري بيه مايقصر وياج بس اكو شغلات مثل مشاكل النسوان التصير يعني ع الشغل والطبخ وهاي السوالف جدي مايتدخل بيها ولا واحد من الولد يتدخل ، فهاي السوالف لازم انتي تعرفين تدبرين امرج بيها وتردين التعيل بيج وتاخذين حكج بايدج ، صح انتي على ذمة زيد بس هم لا تنسين زواجكم محد يدري بيه وزيد مايكدر يدافعلج بالزغيرة والجبيرة ويجيبلج الشبهة والحجاية المو زينة بحقج فانه اريدنج تصيرين سباعية ولا تسكتين لوحده رديهن بدون مشكلة من البداية لازم تثبتين نفسج وحضورج ، وهسه يبعد گلب اخوي وچلاوية لازم افهمج على نظام الشغل هنا .

ضحكت جمانة على اخر كلام كالتة شيخة وهزتلها راسها ، فكملت شيخة كلامها بابتسامة .

شيخة : شوفي مثل ماتدرين انتي بعد صارت غرفة ابوج وامج هية غرفتج وغرفة زيد بصفج والي هية غرفة ابوه وامه سابقا هذن عليج انتي تنضفينهن وترتبيهن لان زيد مايحب واحد يدخل ينضف غرفته لو انه لو اخته زمرد واظن انتبهتي لزمرد شگد فاهية بالشغل لو بالحجي همها بطنها والنوم وما تنتبه للتفاصيل الزغيرة بالتنضيف يعني تفوت بس تكنسها وتمسحها لا ترتب غراض ولا تغير الجراجف ولا شي وهو يتسودن اذا الفرشة مالت الجرباية تبقى تلث ايام لو اربعه ومحد مغيرها ومن تزوج الخناسة كام يطلب مني كل يومين ابدلها لو مرات كل يوم ابدلها لان صخيمة تروحله نصاص الليالي تنام ع جربايته وهوه خطية يضطر ينام لو بالكاع لو ع القنفه .