• #خريف المحبه........
• الحلقه الثانيه.........
• خالد .. يعني لعند امتي حتقعدي هكي محبه ..كيف يعني هكي مفهمتش
• خالد ..يعني عاجبتك حياتك هكي ماشيه كل يوم في المطبخ وحوسه الحوش وين محبه القويه اللي نعرفها وين محبه الطموحه ليش من اول ماتوفي باتي وانت قعدتي وحده تانيه وبعد وفات معز
• محبه ...اسسسكت منبيش نسمع منبيش نسمع انا حره مش مطره اني نعجب حد انا هك متريحه
• خالد.. تعصب منها شن عجابتك هك هذي حياه اللي عايشتيها توه لاتبي تطلعي لاتخشي حتي خواتك كم مره عزمنك وانت تفوتي فيهن وشنو يعني حتموتي لو درتي هكي حتلحقيهم معز والعيال انتقلو لرحمه ربي ووهذا قضاء وقدر تقدري اتغيريه اكيده لا ليش مش راضيه بحكمته
• محبه.. تبكي وخلاص وساكته
• خالد ..عاجبك حال امك هكي ماشفتيش كيف محمد مش قادر ايتريح وانت هكي انت ماتشوفيش والا شنو مش مركزه ان عادل اجل فرحه علي شانك لعند السنه الجايه والا خواتك اللي بطلن وهنا ايجن عشان ايغيرلك جوك و متضايقش وكان جن تطلعي اتسلمي وتخشي يا اللدار ياتحوسي علي وكالهن هذا اللي قدرك عليه ربي يعني لعند وين تبي توصلي بنفهم بس عارف انها مصيبه والله وحاس بيك لكن لازم الحياه تستمر تولهم اقريب سنه وانت نفس الحال
• محبه .. انت متخيل كيف حياتي كانت كنت اسعد وحده في الدنيا ربي عطاني عيله وراجل اللي نبيه نلقاه وفي غمضه عين ايريحو والا كانهم كانو موجودين بكل كيف تبوني ننسي سماطة مصعب علي مرام والا اهبله لما يقعد معز يحضن ويبوس في خواته عشان ايغيضه وايجيني مصعب يحضن ويبوس لعند ايغارو منا وايجوني كيف تبيني ننسي سعادتي وحيااااتي كلها والا ننسي معز اللي القيت فيه حنان باتي اللي فقدته مش حتفهمني ولا حتحس بالنار اللي جو تاكل فيا
• خالد ...يعني فاهمه امي كيف اتحس وهيا اتشوف فيك كيف تذبلي كل يوم حتي ايمان اللي كانت ماتركبش لشقتها الا في الليل خليتيها معش تنزل هيا والعيال عشان اتشوف في نظرتك لهم
• كان محمد وعادل ومعاذ واقفين بره الصاله ويسمعو في كلامهم ومحمد مش عارف شن ايدير عشان ايطلعها من اللي هيافيه
• محبه ... تسمع فيه وتبكي كان كلامه كله صح بس مش قادره اطبق منه ولا حرف الحزن خذاها والالم مش عارفه كيف تعايش معاه
• خالد...ردي لجامعتك ادفني روحك في حاجه فيها فايده لك انت مازلتي اصغيره والحياه قدامك مازال تخرجي واشتغلي ابني كيان تاني جديد عليك تو اتريحي
• محبه ...تمسح في دموعها حنحاول والله بس نبي وقت انتو متضغطوش عليا
• خالد.... وقف وجاء قمعز يالاها وحضنها وهيا حضناته
• محبه .... ربي ايخليكم ليا وانا بلاكم مش عارفه شن كان صارلي
• خالد .... ولا يحرمنا منك ياربي عدي تريحي وفكري في كلامي اكويس وتو تصبحي علي خير
• محبه .... وانت من اهل الخير
• رغد ... سارحه وتفكر وساكته
• عزيز ...رغودي وين سارحه ايوي نحكي معاك
• رغد ....ها سرحت اشويه والله محبه شاغلتني تغيرت بكل حتي عليا معش اترد علي التلفون ولا قدرت نمشيلها
• عزيز... ربي ايكون في عونها ويصبرها هيا توه تبي من ايطلعها من اللي هيا فيه انت حاولي معاها ومتسيبهش هيا محتاجاتك توه اكثر من قبل
• رغد ...امييين ان شاء الله عارفه والله بس هيا ماتبي حد ايجيها ولا يحكي معاها عندها انا نحنا شافقين عليها والله اوحلت معاها كيف نصرف معش عرفت ربي يصبرها ان شاءالله
• رغد .....شنو امتي جاي وليد
• عزيز ... الاسبوع الجاي ان شاء الله لعند ايكمل اموره كلهن غادي قال
• رغد ....يوصل طيب ان شاء الله
• عزيز.... كنك بعيده يا سموحي 😍تعالي قربي
• رغد .....هههههه ها هكي اكويس
• عزيز ....لالا تعالي هنا في حضني اصلا انت صقعانه وانا نبي اندفيك وغمزلها
• رغد ههههههه صاح ننقانه صقع بكل
• عزيز .... نعاليا انا انموت في اللي فاهمني 😍
• عند البنات
• مروه ... زوبه نبي جاكتك الكحليه بنعدي بيها بكري
• زوبه ...في عينك مافيش
• مروه... حرام عليك خوذي جاكتي البيج تطلع عليك احلي مني ورس زوبه ضروري نبيها
• زوبه بحتت فيها زييين انت كنك ساكنه تبيها شن في من وراي قوليلي خير مانفضحك
• مروة... وهيا متوتره شن ساكنه خلاص ماتبيش تعطي خلاص معش نبيها
• زوبه ... خوذيها لكن تو تدوري اتدوري واتجيني تحكي
• مروه ...نطت عليها نجك ليا ياحنونه
• زوبه ...حيدي غادي والله في وراك موال عارفه انا الفرحه هذي مش بلاش
• مروه ...وهي اتغير في الموضوع وين اسراء
• زوبه ...يالا ماما تكتبلها في الحاجات اللي نبوهن علي جيت وليد
• مروه ...واخيرا يبي ايجي ونشبعو منا رايفت عليه بكل كله من الحقيره مراته كرهاته في الصبايا والبلاد كلها
• زوبه ...المهم بيروح فكينا من سيرتها النكد وتعالي نطلعو نقمعزو يالا ماما
• مروه ....هي لاحقتك اشويه خليني نطلع لبستي امتاع بكري
• عادل ..رن فونه وكانت خطيبته
• عادل... ايوه يا سوسو
• سحر ...خيرات ياعيوني وينك نرجي فيك من امبدرى
• عادل.... اهلين يا قلبي هذي وصلتي وكيف طلعت من الحمام كنت تو نبي انرن عليك والله بس سبقتيني
• سحر .... ربي يعاونك يا قلبي شن جوك وكيف حال محبه
• عادل.... تنهد تمام يا سمحتي اليوم لما روحت القيت خالد يحكي معاها وان شاء الله ترد لجامعتها وتلهي سامحيني ياحبي لو ماصارش اللي صار كنتي توه في حضني وانبحت في عويناتك السماح
• سحر ... كله مكتوب ياغلاي المهم محبه توه تقعد اكويسه وكله ايجي
• عادل ... نجك ليا ياقلبي اصلا شن امصبرني الا كلامك العسل 😍😍ربي ايقدرني ونعوضك علي كل يوم فات وانت منغيري
• عندي انا وانا انفكر في كلام خالد عارفه روحي كثرت عليهم وكلامه كله صح قعدت انفكر في كلامه كله ونضت توضيت وصليت ركعتين وقعدت ندعي في ربي انا ايصبرني ويبرد ناري وايقوني علي محنتي وانكون قد الامتحان اللي حطني فيه وسلمت ونضت حطيت راسي علي المخده واول يوم من يوم مافقدتهم نرقد وانا متريحه وحاسه اني انزاح حمل ثقيل من قلبي
• صباح يوم جديد كان علي عيلته محبه يوم زي اي يوم عادي بس الجديد فيه ان نفسيته محبه تغيرت اشويه من اللي هيا فيه
• محمد ...نزل ومعاه سومه وحوده صباح الخير ياغاليه وحب علي راسها
• امي ...صباح النور يا حميده كنهم واعين بدري العيال نزلين بتوتهم
• محمد ....والله ايمان مريضه اشويه نبي انشيلها للعياده
• امي.... كنها لاباس عليها
• محبه..... صباح الخير كنكم ان شاء الله خير غريبه العيال واعيين
• امي ....ايمان مريضه شايلها للعياده قال
• محبه ....صاااح كنها نركب انشوفها
• احميده... بحت في امي وابتسم
• ومحبه.... برمت عليه توكل ولع سيارتك وما عليك فيهم العيال خليهم شوري تو انغيرلهم و نفطرهم
• امي ... فرحانه وماتبيش اتبين الله ايربحك يابنيتي خلاص عدي شوفيها وقوليلي
• محبه اركبت تشوف فيها كنها
• عند نورا ........
• مراد ...... قولي لفرخه رحمه ولجين هيا راه مش مراجيهن طالع ماشي لخوالي يبيني معاذ
• نورا .....رحمه لجييين اطلعن بسرعه مراد يرجي فيكن مش فاضي
• لجين ... طبعا عاد مراد الكيبده وكلا نحنا نعنا مانردو
• رحمه ....اطلعي فكيني من لسانك علي الصبح لعند ايحطك في المدرسه وانا يدوب يلحق ايوصلني للجامعه مافيش وقت اصلا
• نورا.....يا بنات بسرعه هيا دورن من ايشيلكن كان ايعدي
• لجين.... ايعدي عينه هذك والله انحرش فيه بابا بعده علي من عابي يحساب روحه كان صوته تغير وطلعتله لحيه قعد يتحكم امشي نعن داء
• نورا .....بتسكري فمك والا نجي انوريك علي هالصبح
• لجين.... طلعت اتمم وراقيتلها
• رحمه ... خلاص ياماما متحرفيش دمك انت عارفتيها
• نورا ....تمام عارفه السانها شي يوم ايوريها عليه
• رحمه.... سلام توه
• نورا.... في امان الله
• #######
• مروه ...حي عليا ياساميه فكيني منا منبيش نمشي شن هالشكل هذا لالا
• ساميه صاحبتها.....كنه ايهبببل كان علي لبسته الشباب كلهم يلبسو فيه الجو هذا كله
• مروه... فكيني منا الجو هذا انا شن اللي خلاني انسايرك وانوافق صلا
• ساميه ...خلاص منحسابكش خوافه هكي بكل كنك انت اهو جاي شورنا اشويه وانردو من وين ماجينا
• مروه.... خلاص خايفه ونادمه انها سايرت صاحبتها
• هو ..خيرات يا سميوا
• ساميه ..شن جوك يا بوفا
• هو .. عرفينا علي صاحبتك
• ساميه ... اها هذي مروه وهذا بوفا
• هو .... مد يده ايسلم خير ميرو
• مرو ه ...تبحت في يده متبيش اتسلم اهلا
• هو... رقيتله ان مسلمتش عليه بحت فيها كيف منعجبوش والا شنو
• وهنا مروه خلاص خافت بكل وبحتت في ساميه انا ماشيه شنو تمشي والا نعدي وتلحقيني
• هو.... لا وين يا سمحه ماشيه مش بالساهل ياحلوه
• خلاص مروه قعدت قريب تبكي وتبحت في ساميه وخايفه موت بس متبيش اتبين
• مروه... لوسمحت حيد من قدامي نبي نمشي مافيش داعي للشوشره ويسمع الامن
• هو ...لا وين تمشي خليك مازال ماشبعت من شوفتك
• هنا هيا عرفت انها طاحت في مكان مش لها وقريب اطيح من طولها من الخوف
• مروه .....ساميه هيا مش حنقعد اكثر من هكي قوليلا يبعد عني انا لاجيت شوره فالوسمحت خليني نمشي وتصطفل منك ليها وبحتت في ساميه وقالتلها اوكي علي هالفصل مش ناسيته لك
• جت بتمش جا قدامها ومسك شنطتها و هنا هيا خلاص فقدت السيطره علي اعصابها بر مه عليه نزل يدك ياحيوان
• معاذ ...اهاا يافتوحه معش صار منا وتخرجنا مسكرها في وجهنا الاستاذ الحصله هذ ويتلفت ويشوف شاب ماسك بنت من شنطتها وقف حي علما هذا كانه معاها لما شافها تبكي عرف ان غصب عليها ماسكها وعدالها بسرعه يجري
• مروه.... قتلك سيبي يابهيم انت متفهمش
• معاذ ....هيه كنك معاها ياشاب سيب البنت في حالها
• بوفا ...وانت شن دخلك حل من هنا احسلك
• معاذ ..... توكلي معلش وسيبها قتلك
• بوفا....من جدك نحسابك اتبصر
• معاذ... بهت فيها قتلك توكلي انا
• مروه عدت تجري واخيرا حصلت كيف تطلع من هالورطه اللي حطت روحها فيها
• معاذ ....لو انشوفك مقربلها تشوف اللي عمرك ماشفته وانا حذرتك
• مفتاح صاحب معاذ ....خلاص فوته ياراجل فكك منا
• بوفا ....داير فيها راجل تعال وريني ياباشا
• معاذ اهاااا راجل وغصبا عنك اخري وفقد اعصابه وقعدو يضاربو وساميه هربت من اول ماكبرت القصه وجو الامن ايحزو فيها وشالوهم جوا
• مروه ...خلاص انهارت تبكي وخايفه لايجيبو سيرتها ويسمعوها هلها وهنا هيا استوعبت شن دارت واستحقرت روحه اللي حطت نفسها في موقف زي هذا
• طلعو معاد والشاب وهو يتحلف انه ايوريه معاذ مش مدوره بكل
• فتحي .... رد بالك منا هذا واحد وسخ مرات ايجيك علي خونه
• معاذ ... مش امدوره انا ايملح
• فتحي .. وبعدين منين تعرفها البنت انت اللي عديت تجري
• معاذ.... لانعرفه لاشي شرط يعني اني انساعد بنت من واحد زيه تعرضلها وهيا شكلها محترمه ومش امتاع الوجيج هذا كله
• فتحي ....حصل خير المهم رد بالك من روحك بس
• معاذ ....ان شاء الله مافي شي
• عندي انا .....بدلت للعيال وفطرتهم وقعدو ايتفرجو علي التلفزيون وانا كملت حوسه وكنت حاسه براحه في قلبي غير كل الايام اللي فاتن وخطرت عليا رغد عارفه اني قصرت معاها وبعدتها عني بس مستحيل نبعد عنها واتصلت بيها
• رغد ...الو خيراااااات ياقلبي كيف حالك يا محبتي
• محبه... اهلين يا سمحه شن اخبارك انا تمام الحمد لله
• رغد .... كيف خطرت علي بالك
• محبه ...قلت انشوفك لو قاعده نبي انشوف واحد من خوتي ايجيبني عندك
• رغد ...وهيا فرحانه اكيده ياقلبي قاعده ونرجا فيك
• محبه..... ولو صارلي حناكدلك اني جايه
• رغد ....تمام معناها نستني فيك سلام توه
• محبه... سلام
• رغد ..... ايوه عزيز قتلك نبي نبعتلك اشويه حاجات نبيك اتحيبهن ليا محبه جايه عندي بعدين
• عزيز.... تمام دزيهن وانا مروح نجيبهن
• رغد .....خلاص سلام معناها خليني نكتبهن ونبعتهن لك
• عزيز ...مش ناسيه شي بكل
• رغد.... وهيا تضحك معليش والله انسيت من فرحتي بمحبه خلاص ولاتزعل احلي بوسه لاحلي زيزو امووووواه
• عزيز ...الواحد ايسكر توه وهو رايق
• رغد ههههههههه يسلمليي الرايق
• مروه قعدت ترجي في معاذ علشان اتاسفله علي الموقف اللي انحطت فيه وهي مركزه علي الباب لعند حقاته طالع تريحت وجت تبي تمشيه جاه صاحبه ومشا معاه قعدت اتبع فيه بعيونها لعند وقف تحت شجره وقعد ايهدرز هو وصاحبه فتره اشويه وبعدها عدي فتحي وقعد ابروحه هيا قربت منا
• مروه ....السلام عليكم
• معاذ ....كان لاهي في تليفونه ولماسمح صوتها رفع راسه وعليكم السلام
• مروه .. متوتره مش عارفه كيف تبدا بجد شكرا واجد لانك وقفت معاي واسفه اني حطيتك في موقف زي هذا
• معاذ .. ولا ايهمك مافيش مشكله حصل خير بس تباعدي عن الاشكال زي هذي انت باين عليك محترمه
• مروه ... وهيا خلاص من الحشم مش عارفه ماترد ونرد وانقولك اسفه وبارك الله فيك
• معاذ.. ولا يهمك
• مروه ..سلام وعدت
• معاذ... قعد ايبحت فيها لعند اختفت ورد ايبحت في تلفونه
• محمد خش ومعاه ايمان ومركبه مجمع شفتهم طلعت انا وامي
• محبه ..شنو كيف حالك توه مني وشن قالولك
• ايمان .. اكويسه الحمد لله احسن من امبدري وقالي الدكتور هبوط حاد مش حاجه اتخوف اهله
• محبه ...لاوين ساهله ردي بالك من صحتك وكولي اي حاجه مقويه اكيده هامله روحك ومتاكليش
• امي ....لاباس عليك يابنيتي عدي تريحي وغداكم تو اندزه مع واحد من خوتك يامحمد ركب مراتك وعدي
• محبه .... حمادي قتلك
• احميده برم عليا وهو فرحان نعم
• محبه... الله ينعم عليك نبيك لو فاضي اتحطني عند رغد بعدين والا نشوف واحد من خوتي
• احميده تمام اصلا طالع طالع توانحطك انا متقوليش لحد
محبه... تمام معناها انكلمها انأكد عليها
• انفتح الباب وخش معاذ
• امي هيييييييي شنو هذا
• معاذ .......
• يتبع .........
• بقلم......أحلام
