• #خريف المحبه ..........
• الحلقه الخامسه عشر ....
• في الليل عند ساره وهدي .......
• ساره ....اهاا الحيوان وايهدد معاها وورفع حتي يده يبي يضرب
• هدي ....حي علينا ربي يفكنه منا ان شاء الله شن انديرو هذا واحد حشاش ويكير كان ايدير فينا حاجه
• ساره ...متخافيش ماقدرش ايدير شي المهم انت انتبهي علي روحك وخلي ديما تليفونك معاك
• وهنا يحكن سمعن تخبيط خفيف علي باب الشقه وكانه حد ايحاول يبي يفتحه
• هدي .... حي علينا ياساره من زعما
• ساره ....متخافيش وتعالي نكر انا وياك الكرسي نحطوه علي الباب بسرعه وهنا يبن يطلعن ويسمعن باب الشقه انقفع بالقوه وهدي عيطت من قوةالصوت
• بسرعه جت ساره سكرت الباب ودفت السرير عليه
• وهدي . . قعدت تبكي حي علينا ياساره شن انديرو
• ساره...... وهيا قلبها بيوقف من الخوف متخافيش يارب يارب شن اندير وشويه سمعن حد جاء جيهة الدار والمنيلا اتحرك وهنا خلاص من الخوف هدي قعدن ادموعها ينزلن بغزاره وكاتمه عيطتها بيدها وساره حاضنتها وكارسات في التركينه ويدعن يارب يارب
• ساره ..... التلفون وين ياهدي
• هدي ..... علي الرف انضني
• ساره .... وهيا ترعش عدت جابت التلفون والباب ايخبط عليهن بس محد حكي معاهن
• ساره ... وهيا خايفه وقريب تبكي وايديها يرعشن قعدت ادور علي رقم معين ورنت عليه
• *************************
• عند فيلا الحاج عبدالله.......
• احمد .......شن صار في موضوعك شن قررت
• وليد ..... انا مقرر اساسا ومغيرتش رايي
• احمد .... معناها حتقبل غصبا عنك لان امي حاطاتك في راسها ويمكن اتعدي تخطبلك من غير ماتعرف
• وليد ......بعدها كان ماهجيت وسيبتها لها بكل
• احمد ...تعصب منا بكل تاكنك يارا معقوله وحدة #####
• زي هذي اتاثر فيك
• وليد ..... سكرلي علي الموضوع يا احمد
• احمد .. مش ساكت اصحى لروحك شوف روحك وين ماشي اثرت فيك سنه وسيبت البلاد بكل قلنا ماشي ممكن تنفعه المشيه واهو الحمد لله تخرجت بس لعند هنا وخلاص ورن تليفونه وهو مش فاطنله ويحكي مع وليد ومنفعل
• وليد ....انت مش فاهمني انا والله ماني علي #####انا خلاص كرهت الزواج وخايف نظلم اللي نبي ناخذها معاي
• ا حمد ....انت جرب بس وبعدها ساهل ورن تليفونه وهو مش فاطنله وكمل كلامه جرب انت بس اخطب وشوفها وبعدها ساهل ومازال تليفونه ايرن فطنله شافه لقاه رقم مش عارف ليش قلبه حسه انها هيا ايوه
• *************************
• عند ساره وهدي .............
• ساره .... وهيا علي اعصابها رد رد الله ايربحك وهياتحكي بصوت واطي وصوتها يرعش من الخوف
• هدي ..شن صار ردعليك
• ساره ....اشويه ياهدي مازال ايرن هيا الله ايربحك رد وبحتت في هدي ايوه دكتور احمد انا ساره الحقني في حد خاش للشقه
• احمد .... شن انت وين وطلع يجري ولحقه وليد
• ساره ...نحنا في الدار سكرنا علي ارواحنا
• احمد .... ساره ردي بالك تفتحي الباب مهما صار وانا جاي في طريق اها كيف ماقتلك متخافيش ا
• وليد ....اوووي وين طالع تجري شن صاير
• احمد ... مش وقت كلام اركب بسرعه وطلع بسياره يجري
• ساره.... جت وراء الباب عارفه انك عمران وحنبلغ عليك والاوراق لو تموت ماحتوصلهن
• عمران ... يبقي حنوصل فيك انت توه وحتشوفي من عمران ومش حتلقي من ايساعدك وغصبا عنك حطلعي الاوراق وقعد ايدف في الباب يبي يكسره
• ساره وهدي فتحن اعيونهن علي الاخر وهدي خلاص من الخوف لعند قعدت تنزل مع الساس ولمت كرعيها وترعشوتبكي بصوت وتبحث في اختها
• ساره .... قعدت اتدور علي اي شي حاد يحميهن منا لانها فهمت قصده واشويه رن تليفونها ردت عليه ايوه وعلت صوتها مقصوده
• احمد ......وهو بيموت من خوفه عليها انا اشويه ونوصل شن الوضع عندك
• ساره.....والرعشه في صوتها قاعد ايحاول يفتح الدار علينا
• احمد ...اصحك سكري الباب اكويس علي روحك انا اوصلت تمام تمام
• ساره ... تمام اهو قاعد ايحاول يفتح علينا الباب تعال بسرعه
• عمران .... درتيها وبلغتي وديني انوريك يا ####### وطلع بسرعه
• وصل احمد ودرس قدام العماره بسرعه وركب يجري هو وليد
• وليد ... يارا فهمني لمن جايين
• احمد ..... وصل لباب الشقه بحت لقاه مفتوح وقف وبحت في وليد خليك هنا لو اسمعت صوت خش تمام
• وليد ...... شن تعال هنا كان في حد جوا دارلك حاجه
• احمد .... خلاص زي ماقتلك وخش بالشويه ايشوف من في قعد ايبحت مالقا حد في الشقه وكل مره يوصل في دار ويفتحها مالقي حد فيهن لعند اوصل لدار اللي فيها ساره وهدي جرب يفتحها لقاها مسكره
• احمد .... ساره انت هنا
• ساره ... جت تجري يالا الباب وتنهدت براحه لما سمعت صوته اهاا يا دكتور
• احمد ... افتحي الباب مافي حد في الشقه ماتخافيش
• ساره.... تمام هي ثواني بس هدي تعالي ساعديني انحول السرير
• هدي... مقمعزه وتبكي ومش قادره اتصبي من خوفها وقهرها علي انهن قعدن بلا سند
• ساره ......جت بسرعه حضنتها متخافيش حبيبتي انا معاك الحمد لله ماصار شي
• هدي .... كيف حنديرو توه شن ايصير فينا حنقعدو طول عمرنا بالا حد يحمينا وينخاف منه
• ساره.....صدقيني تفرج ربي معانا معرفتكش ضعيفه هك
• هدي ... حضنت اختها وعلا صوت بكاها
• ساره ....حضنت اختها بالقوه ودموعها نزلن لانها حست قديش مكسورات وكل من هب ودب طامع فيهن باعدت هدي عنها ومسحت ادموعها لازم اتكوني قويه ياهدي هذي الحياه لو نبو ننكسرو من توه كيف حنواجهو اللي جاي ومدام انا معاك متخافيش وباذن الله تفرج
• كل الكلام اللي انقال كله سمعه احمد وجعه قلبه عليها وزاد تاكد من قراره من اول ماشاف عمران رافع يده عليها
• ساره .. صبي معاي حطي علي راسك حاجه عشان نفتح للدكتور مازال واقف ويرجي بره
• هدي .... مسحت ادموعهاوتنهدت تمام
• اشويه وحركن السرير وفتحن الباب
• ساره... طلعت لقت احمد قدام الباب شكر وااااج
• احمد .... تتزوجيني
• ساره .... فتحت اعيونها من الصدمه هيا وهدي ومستوعبتش الكلمه
• ساره ....شن
• احمد ... تقبلي تتزوجيني
• ساره ..تغيرن ملامح وجها من الصدمه للغضب مش معني اني رنيت عليك اتجي اتقولي الكلام هذا
• احمد ..... مش حناقشك توه ولا حنخليك اتقولي كلام يجرحني ولا يجرحك اللي حنقوله لك طلبي هذا لاله علاقه بوضعك ولا ايقولك خاطرك انه شفقه ابدااا والله يمكن اللي صار توه سرع الموضوع صح بس عمري مافكرت بالتفكير هذا واضن انك سبق وعرفتي من الدكتور احمد وتوه اللي طالبه منك فكري في كلامي اكويس
• ساره ... معش عرفت ماترد من الكلام اللي قاله ومكانش في بالها الكلام هذا اساسا ولا خطر علي بالها انه ممكن يخطبها حد في وضعها هضا
• احمد ... توه خلينا من الكلام هذا خشي خوذي لبستين واطلعن معاي بدون اعتراض حتقعدن عند هلي اليوم
• ساره .... مستحيل انت كفيت وفيت شكرا علي جيتك وشهامتك ومعروفك مش حننساه لك بس اسفه مش طالعه بره من الشقه
• احمد ... معناها انا قاعد هنا لعند الصبح ومش متحرك وحنقعد قدام الشقه وبعدين شوفي اختك كيف خايفه والرعشه مأثره فيها فارجوك هيا معاي لاني مستحيل انسيبكن هنا برواحكن وبالنسبه لهلي حنقول خوات صاحبي طلعتله سفره مستعجله ومعندكش وين تقعدي تمام
• هدي ....بحتت في ساره بترجي لانها خايفه بكل وخصوصا بعد سمعت كلام عمران وخافت علي اختها منا وحست ان احمد صادق مع ساره فمافيش حل الا انهن يمشن ممكن اتريح اشويه
• ساره ...تنهدت وبحت في هدي شنو نمشو
• هدي ...اهاا ياريت الليله وبعدها نردو
• ساره....بحتت في احمد وهيا مش راضيه تمام ارجانا اشويه لوسمحت
• احمد ...خوذي راحتك انا قاعد قدام الشقه وبرم وطلع
**********************
• في فيلا الحاج عبدالله ......
• الحاجه فاطمه ... يا وداد يازوبه تعالي وحده منكن يابنات
• وداد ....نعم ياماما جيت هي
• الحاجه فاطمه .... كلمني احمد قالي جايات خوات صاحبه توه بيتات عندنا
• وداد ...من غريبه توه الساعه اقريب 12 توه
• الحاجه فاطمه ...مابيتش انكثر عليه اسائله قالي صاحبه جاه شغل بره بنغازي ومايبيش ايخليهن بروحهن في الشقه وهنا ماعندهن حد
• وداد ...اهاا خلاص تو انشوف البنات وانقوللهن
• الحاجه فاطمه .. حتي انا نرجاهن عيب ايجن يلقني راقده متجيش
• ****************
• عند هلي..........
• محبه ......اهاا والله تفاجانه كلانا والله مكنش متوقعينها بكل
• خالد .... ههههه صار كمال خطب رحمه اكيده دارت كم حركه استعباط بعدك هيا شاطره فيهن
• معاذ ..... اكيده هذي عارف يوم اللي يغسلن في الفرش خشت للمربوعه وهيا فاصله وقعدت والعه تقول زامطه شريط وكمال قاعدمعاي وهيا ماتندري عليه بكل وعلي مافنصت شي لابت تفهم
• خالد .....ههههههه 😂شكله انضرب في عباطتها الهبله
• محبه.... ههههه حرام عليكم ولو اتشوف لجين كيف مركبه عليها لعند انفصلت وتمت تبكي
• معاذ ...هههههه تهذي كيف يبو ايجوزوها
• خالد ...... ههههه بس طاحت امصبيه ماشاء الله
• محبه ..... ههههه عطك الهنا نق عليها خلي يرفض علي بعدها
• معاذ .... لالا مستحيل يرفض كمال وهو يبي ايتريح عليهن
• محبه ... ان شاء الله انا خلاص نعست نبي انصبي نرقد ورايا وعيه بدري بكرا هي تصبحو علي خير
• خالد معاذ .. وانت من اهل الخير
• *****************
• عند رغد ........
• عزيز .... رغد وينك
• رغد ....هنا في دار افطومه
• عزيز ....خش عليهن سلام
• افطومه ... هيااااااأ بابا جاء مش قتلك ياماما حيجي اليوم وناضت تعلقت فيه وحضناته
• رغد ...بحتت في عزيز وبعدها بحتت في افطومه وابتسمت
• عزيز....اوبااا حبيبت بابها كيف حالك يا سمحه
• افطومه... اتويسه بس انا زعنانه منت بتل راه
• عزيز .... ليش يابابا
• افطومه ....تل يوم نلجا فيت وانت متجيش والصبح انا نوعا منلداتش
• عزيز .....وهو يتنهد وايبحت في رغد حقك عليا يا عسولتي بس انا جايبلك معاي حاجه سمحه اللي اتحبيها
• افطومه .... شنو شكلاته تندر
• عزيز .....اها ههههه شكلاطه كندر هاه
• افطومه ....حضنته انت احلي بابا في الدنيا
• عزيز ..ونجك ليا ياسمحه توه ارقدي باهي وتنوضي بكري وتلقيني قاعد تمام
• افطومه .... باساته علي خده تمام تثبح علي حير
• عزيز ...وانت من اهل الخير وحطها في سريرها وغطاها وباسها وطلع
• عزيز .....رغدتعالي شويه وطلع ...
• رغد ...لحقاته نعم انحطلك اتعشاء
• عزيز ....اهاا علي بين ما دوشت وصليت
• رغد ... تمام وعدت للمطبخ
• عند البنات ......
• اسراء.... زعما من هذين اللي جايتنا توه اكيدانضر شن صاير معاهن انا متاكده
• مروه ...شن يبي ايصير يعني قالك خوات صاحبه شن يبي يكذب عليك
• زوبه ... احمد هذا بذات منصدقش معقوله بيحطهن صاحبه خواته قريب الساعه 12 يعني معندهمش اقارب بكل
• وداد ....حي عليكن راه تحكن قدام ماما واا يالا البنات حاجه بعدك احمد حاجه شوره ماينقرب فيها بكل
• زوبه ..والنبي من اللي من خوتي ينقرب بس اسمله علي رغد كيف متحمله فصلات عزيز
• مروه ...لانها تحبه واللي ايحب حيتحمل الشخص الثاني بعيوبه
• زوبه وداد ...بحتن فيها بنص عيين قلتيلي اللي ايحب صار
• مروه ....ارتبكت من نضرتهن نحكيلكن علي رغد انا
• اسراء .... حي شكلهن جن الباب ايدق طالعه نفتح انا
• عند ساره وهدي
• بعد احمد اصر عليهن انهن يمشن معاه وساره مش راضيه بكل وماشيه عشان هدي لانها خايفه خذن بجامه ولبسه كل وحده وطلعن لقنا واقف يالا الباب ومعاه وليد
• احمد ... هذا وليد خويا
• ساره .. بحتت فيه ومدت يدها سلمت عليه تشرفنا
• احمد ... هذي ساره وهذي هدي
• وليد... بجوده بيكن
• ساره وهدي ...تسلم
• احمد ..شنو خلاص نمشوا
• ساره ...اهاا ان شاء الله
• احمد..... تمام هيا
• وطلعو كلهم وركبو في السياره واشويه وصلن للفيلا
• هدي ....تبحت مندهشه كانت اتهبببل والجنان منسق وحلو بكل وفيه قعدات حلوات بكل
• احمد ... امي وخواتي يرجن فيكن وقلتلهن انكن خوات صاحبي تمام وبحت في المرايه ولقا ساره اتبحت في
• ساره ...بحتت في احمد من المرايه ومنزلتش عيونها من عليه وهيا اتفكر في اللي قاله لها لعند فطنت لروحها وانحرجت وخدودها قعدن حمر
• احمد .... عرفها انحرجت قعد مبتسم وحاط يده علي فمه عشان متبانش ضحكته
• وليد ...فتح الباب ونزل وقاللهن تفضلن الباب من علي اليمين وتباعد ...
• نزلن هنا الاثنين وساره سبقت هدي متبيش تحط عينها في عينه وهدي وراها
• هدي برمت علي احمد وبحتت فيه
• هدي ....شكرا بجد لانك طلعت في حياتها وان شاء الله ايكون طلبك منها بجد مش انك شافقك عليها وحابه انقولك ان عمران هو اللي هد عادلينا ومش ناوي علي خير لولا جيتك الله اعلم شن كان صار
• احمد .... عقد حواجبه وقلبه انعصر عليها وزاد كرها لعمران وحمد ربي انها كلماته وبحت في هدي بنظره ثقه كوني واثقه اني بحد رايدها ونبي منك تقنعيه اتوافق لاني حتي لو ماوافقتش مستحيل اني انسيبها في حالها واعتبريني خوك ياهدي من اللحظه هذي
• هدي ... هيا فرحانه من كلامه وحساته انا صادق ابتسمتله وقالته نوعدك اني انخليها اتوافق بس عشان هيا ترتاااح سلام توه وسمعت ساره اتضبح عليها
• ساره ...بحتت وراها لقتها واقفه معاه ضبحت عليها هدي
• هدي ... نعم جايه هي وعدتلها بخطوات سريعه
• ساره .. شن حكي معاك وانت شن كنت اتقوليله
• هدي ...تو انقولك بعدين خلينا انخشو توه
• ساره ...تنهدت تمام ورنن الجرس اشويه وانفتح الباب
• اسراء ... اهلين وسلمت عليهن تفضلن
• ساره وهدي شكرا دام فضلك
• اسراء ....مشت قدامهن لعند الصاله تفضلن
• الحاجه فاطمه .. خيرياحنه كيف حالكن
• ساره ... خير ياعميمه كيف حالك وكيف حال صحتك
• الحاجه فاطمه ...الحمد لله بخير انستن تفضلن
• وسلمن علي باقي البنات وقمعزن
• ساره ... سامحونا جينكم هالوقت
• الحاجه ... لا يبتي مرحبتين بيكن في اي وقت
• ساره ... تسلمي ياعميمه
• الحاجه .فاطمه ..شن سماك ربي
• ساره ...انا ساره واختي اسمها هدي
• الحاجه فاطمه.... بالجوده بيكن ياحنه وهذين بناتي هذي وداد وبعدها زوبه وهذي مروه واسراء وعندي كنه وحده في حوشها بكرا ان شاء الله اتشوفنها
• ساره ...وهيامبتسمه حست بتالف العيله اللي فقدتها ربي يحفظهن لك ويحفظك لهن ياعميمه
• الحاجه فاطمه ... ويحفظلك احبابك يارب
• زوبه ...شن اخبارك هدي ا
• هدي.... تمام الحمد لله بخير
• اسراء ....شنو سنه كم تقري شكلك زي حالاتي مازلتي ثانويه
• هدي ... اهاا ثالثه ثانوي
• مروه ..مشاء الله شهاده السنه معناها شدي حيلك بالنجاح ان شاء الله
• وداد ... وانت ساره شنو تقري والا مكمله
• ساره ....لا والله موقفه قيدي ونشتغل فممرضه في مستشفي ........دوام نصف يوم
• زوبه بحتت في مروه قصدك تشتغلي مع احمد في نفس المستشفي
• ساره ...اهاا الدكتور احمد هو اللي حصلي التعين بارك الله فيه
• زوبه ...اهااا وهيا تبحت في اسراء ومروه
• الحاجه فاطمه ......تصبحن علي خيروخوذن راحتكن ماتحشمنش واهن البنات يالاكن
• ساره ...وانت من اهل الخير تسلمي ياعميمه
• احمد ....وداد ياوداد
• الحاجه فاطمه ...نعم وداد جوا يالا البنات خش مافي حد هنا
• احمد ...اهاا كلميها لياياامي
• الحاجه فاطمه .....خشت عليهن وداد تعالي يبيك احمد
• ساره ...بعد سمعت اسمه ارتبكت وقلبها دق
• وداد ..هي تو انشوفه كنه وطلعت نعم يااحمد
• احمد ...قتلك شنو الجو مش ناقص شي ردن بالك شي وحده تحرجهن
• وداد....ابتسمت وهياتبحت في احمدكيف يحكي عليهن باهتمام تمام متخافش انسجمن وجوهن تمام حصلن زوبه شن ايسكتها
• احمد ...تمام معناهاخلاص ماشي نرقد وقوليلهن قالكن خوكن مش جاي لعند العشيه حيجي ايشيلكن بروحه للحوش
• وداد .... تمام تو انقوللهن تصبح علي خير
• احمد ...وانت من اهل الخير
• وخشت قالتلهن اللي قاله لها احمد وساره اضايقت وفهمت انه يبي ايحطهن تحت الامر الواقع قدام هله عشان مايروحنش
• *************************
• عند رغد .....
• عزيز .... واقف في بابا المطبخ وايشوف فيها تغسل في تباسي العشاء بحت فيها وتنهد رغد ممكن اتسيبي الي في يدك وتلحقيني نستنا فيك
• رغد ...برمت بحتت فيه لقاته طالع غسلت ايديها وحطت عصير ومكسرات وطلعت لقاته مقمعزفي الصاله ويرجافيها حطت الصفره وقمعزت مقابلته
• عزيز .. ساوا تقمعيزته قربي لهدرجه مش طايقتيني
• رغد ... جت قمعزت جنبه وتبحت القدام
• عزيز .... مش عارف شن انقول والله انا اسف سامحيني والله تفكيري كله في العمل والقصه اللي طلعت ومتريحت لعند حليتها والله ومجش في بالي اني تغيرت او اهملتك وهذا اكبر غلط وردي بالك ايجي شي تاني في بالك ان في وحده ثانيه والله مستحيل انفرط فيك والا نبدلك مهما كان
• رغد ...بحتت فيه وادموعها علي خدها
• عزيز ..حضنهاوايبوس علي راسها.شن قايل من قبل علي دموع انا اسكتي معش تبكي ورفع وجها وقعد يمسح في دموعها بصوابع ايديه وبعدين شن السماحه هذي
• رغد .....وهي مبتسمه مشكلتي منقدرش نزعل منك بمجرد مانشوفك نرضا
• عيز ....نجك لياحبيبي وعلي كلامك السمح هذا تعالي نبيك في الدارو وقف صبها معاه
• رغد ...ردت قمعزت مايصير شي للاسف
• عزيز..... لا متقوليهش الله ايربحك قصدك ماصارشي
• رغد ...وهيا مبتسمه للاسف
• عزيز ..... يا عليك هم انا عارف حظي م#####
• رغد .... هههههه كنك انفصلت يعني مش اول مره
• عزيز .... لوسمحتي خليني فيحالي وصبي فزي غيري اللي لابستيه وبعدها تعالي
• رغد ....متفاجئه وتضحك كنك ياحاله شن صارلك
• عز يز...تبي انوضي من قدام وجهي والاانفز انا ننخمد
• رغد .....لاحول ولا قوه الا بالله مش كنت اتراضي فيا حلنه تراضينا علشان تنفصل
• عزيز ...استغفرالله العظيم ..باهي عدي جيبي بطانيه وتعالي ارتزعي جنبي
• رغد ....وهيا تضحك هههههههه حاضر
• وفات اليوم علي كل ابطالنا وجاء صباح جديد علي امل للكل حد انه حيكون احلي من اليوم اللي قبله
• *********************
• عند محبه ........
• محبه......صباح الخيريا امي
• سالمه ....صباحك مبروك عدوك مهلوك ان شاء الله شنو معندكش جامعه اليوم
• محبه ....اهاا راحه عندي اليوم عدي تريحي تو انديرالفطور وانجيبه لعندك
• سالمه ....الله ايربحك يا بنيتي ويفرحني بيك يارب
• علي نزلةايمان..... صباح الخير
• سالمه .....صباح النور يا بنيتي
• ايمان .....محبه طلعت للجامعه
• سالمه ....لا قاعه جوه ادير في الفطور
• ايمان ... اهااخليني انعدي نساعدها
• *****************
• عند عمتي زهره
• كمال ....ها شن صار ماردوش عليك يامي
• عمتي زهره ...لا نرجي للعشيه كان ماردتش انكلمها انا
• كمال .تمام سلام انا طالع تبي شي
• عمتي زهره ... قتلك خطيب اختك قال جي العشيه قلت انقولك ويبقي عندك علم
• كمال تو انشف مجدي يقعد معاه لان انا مش جاي
• عمتي زهره....... وباهي براحتك
• كمال ....هي السلام عليكم
• عمتي زهره .....وعليكم السلام
• *******************
• عند البنات في الفيلا ........
• زوبه...... امتي تبي طلعي انت وتاخذي لبسه خلاص العشيه جاي الراجل
• وداد.... تو نشوف منير اكيده فاضي ايشيلنا
• زبه .......تمام معناها
• ساره .... صباح الخير
• زوبه وداد ...صباح النور
• وداد ...ان شاء الله تريحتي في النوم
• ساره ...لا تمام الحمد لله
• وداد ....خليني انشوف منير قبل لايطلع وهيا متوتره
• ساره ...كنها وداد حسيتها مرتبكه
• زوبه.... عندها مقابله مع العريس اللي جايها اليوم
• ساره ...صاح الف مبروك ان شاء الله وربي ايتمم علي خير
• زوبه ...الله ايبارك فيك والعقبه عندك ان شاء الله
• وداد ...هيا زوبه قالي طالع طاق مشوار انحطكن في المول وبعد انكمل انرد عليكن
• زوبه.. تمام هي
• وداد ...ساره هيا تشمي معانا انت وهدي
• ساره ... لاشكرا بارك الله فيك نحنا اشويه ومروحات عدي وقت عليك
• وداد ....تمام عطيني رقمك معناها عشان نتواصلو مع بعضنا
• ساره ...اهو سجلي عندك ******092
• وداد.... تمام رنيت عليك خزنيه هذا رقمي
• وخشن مع بعضهن وهنا ايهدرزن وداد تبي تلبس عشان يطلعن
• زوبه ....يا وداد منير من امبدري يرجا هيا تو ينفصل
• وداد ...تمام سلام هي نتلاقو
• هنا.... سلام
• وحطهن منير في المول وعدي
• زوبه .... هيا تعالي مادام قال ساعه ان شاء الله غير انلحقو
• وخشن لكم محل ومعجبهن شي
• وداد .. شن هالبضاعه اللي دره الكبد حي عليا زوبه شن نبي نلبس توه هي
• زوبه ...وسعي بالك بس انت مازال في محلات واجد المول تو نلقو اكيده خشي هنا اكيده عنده حاجه شكله حاجاته حلوات
• وخشن ايشوفن وقعدن ايدورن اشويه ولقن بدله حلوه بكل سروال اسود واسع معاه بلوزه بيضه مخططه بالرصاصي والاسود وكمها منفوخ وفيها حزام اسود
• زوبه ...حلوه بكل هذي وداد تمشي معاك بما انك تبيش لون فاتح
• وداد ..حلوه بكل حتي انا عجبتني منضرها انيقه وبسيطه
• زوبه خلاص معناها ناخذوها معليش نزلي من هذي 38
• ويبرم عليها صاحب المحل نعم
• زوبه منصدمه ومعش قدرت اتحرك من اللي شافاته
• يتبع ..........
• بقلم.....أحلام
