• الحلقه السادسه عشر......
• وخشن المحل ايشوفن وقعدن ايدورن اشويه ولقن بدله حلوه بكل سروال اسود واسع معاه بلوزه بيضه مخططه بالرصاصي والاسود وكمها منفوخ وفيها حزام اسود
• زوبه ...حلوه بكل هذي وداد تمشي معاك بما انك تبيش لون فاتح
• وداد ..حلوه بكل حتي انا عجبتني منضرها انيقه وبسيطه
• زوبه .......خلاص معناها ناخذوها معليش نزلي من هذي 38
• ويبرم عليها صاحب المحل وهو متفاجئ نعم
• زوبه .....منصدمه وقعدت واقفه وتبحت فيه
• رافع ... تفضلي ياابله شن تبي
• وداد ...وهي تمسك في يدها وبصوت واطي زوبه كنك تنحتي يابنت
• زوبه .... احمم احممم ممكن 38من هذي
• رافع.... . وهو مبتسم ويبحت فيها تمام هذي
• وداد... اهاا تمام تعالي هيا انشوفو مش تبي تاخذي
• زوبه ....اهاا هي تعالي انشوف غادي وقعدن ايشوف وخذن اللي يبنه
• وداد .... هي تعالي نسلك وقت طولنا بكل
• زوبه......تمام انت سلكي وانا خليني انرن علي منير
• وداد.... تفضل شوفلي علي كم هذين
• رافع .....تفضلي واصل حقن
• وداد .... معليش كيف هكي قولي علي كم والا حنطلع وانسيبهن
• رافع ... لا والله تفضلي اربحي مش بينا
• وداد ... زوبه تعالي مايبيش ياخذ حقهن قال
• زوبه ... شن عنجد هذي معليش ممكن اتقول حقهن كم
• رافع ... والله ماهي صايره قلت خوذي الحاجات وتفضلي نحنا اهل مش بينا
• زوبه .... خذت البدله شافت كم الرقم اللي مسجل عليها وحطتها في الكيس وطلعت حقها وحطاته فوق الطاوله هذا حقها والباقي رده ومسكت يد وداد وطلعت
• رافع ......وهو مبتسم وعجباته ردتها نعليا انا الواعره تهبلي وحق ربي بس هذين حتاخذيهن وغصبا عنك
• *************** ***************
• عند ساره وهدي ........
• ساره .....مع السلامه ياعمتي وسامحينا ثقلنا عليكم
• الحاجه فاطمه....لايبتي عيب الكلام هذا تفضلن في اي وقت انتن كيف ابنياتي
ساره وهدي .....تسلمي يارب انشوفوك طيبه يا عمتي وسلمي علي البنات وربي ايتمم علي خير لوداد ان شاء الله
• الحاجه فاطمه ....سلمك يا بنيتي والعقبه عندك ان شاء الله
• وطلعن قعدن يمشن لعند وصلن الرئيسي
• هدي .... تنهدت شن انديرو ساره وين حنقعدو
• ساره .... وين يعني للشقه دغري وانت مش تبي تشتغلي خلاص معناها انحطك في المحل مع طلعتي وتروحي بروحك وتو بعدين انتكو علي محل تليفونات تاخذي واحد بدال اللي انكسر
• هدي .... من ويلك انت يادوب نحطوهن اللي عندك حق ايجار الشقه
• ساره ....التلفون توه ضروري بعد اللي صار وارد اي شي هدي نبيك اتديري بالك علي روحك وافطني لكل حركه اتصير معاك
• هدي .... ان شاء الله والله بديت انخاف يارب قوينا وصبرنا علي اللي جاي
• ساره.... يارب هيا خليني نوقف تكسي ايوصلنا وبعدها ايصير خير
• **************************
• عند محبه في الجامعه ......
• اريج ...... شن درتي في البحث اللي طلبه الدكتور
• محبه .... اهاا اتمام مازالي اشويه ونكمله ونسلمه له ان شاء الله
• اريج.... انا درته لكن شوفيه ليا تمام هكي والا شن رايك
• محبه ...هاتيه انشوفه تمام بكل بس شنو نظميه اشويه بس وسلميه
• اريج.... تمام تو انشوفه بعدين خلينا نمشو للكفتيريا نبي نسكافيه راسي صدااااع بكل
• محبه ....هيا نبي حتي انا ممكن انصحصح اشويه
• خشن للكفيتيريا والقن الدكتور وليد مقمعز هو والدكتور منذر وايهدرزو
• اريج ...اهو الدكتور قاعد بسرعه اشويه وايخش معش ايخلي حد ايخش بعده
• عدت خذت اثنين نسكافيه وهنا طالعات خبطت محبه في وحده وانكبت عليها النسكافيه
• محبه ..... هيييييي واللي في الكفتيريا كلهم ايبحتو وليد مركز معاها
• منذر ....اووووي نحكي انا انت وين مشيت
• وليد ....معاك معاك وردايبحت في محبه
• البنت ..... معليش اسفه والله ماحقيتك وانا جايه مستعجله سامحيني
• محبه ... وهيا متنرفزه حصل خير مش مشكله بس مره اخري بحتي قدامك
• البنت ... اسفه والله ماقصدي
• محبه ... مش مشكله خلاص والله
• اريج .... حي اشربك كله تعبا عليك قصه
• محبه .... نبي نمشي للحمامات وانت عدي المدرج يالله تلحقي قبل لا تبدا المحاضره
• اريج ...وانت كيف ايصير فيك
• محبه ....حنغسل وانجي ندق واناوحظي عاد
• اريج.... تمام نمسكلك جنبي معناها وعدت للمدرج اشويه وجاء الدكتور
• الدكتوروليد ..... صباح الخير حنبدا اليوم بتست فيه سؤال واحد وكل حد حيختاره وايحله في ورقه وحنعتمد كل فتره علي التست هذا ودق الباب
• دكتور منذر . ..معلش وليد اشويه نبيك
• وليد ...تمام وطلع قدام المدرج وقعد يحكي مع منذر
• محبه ...جت لقاته قدام المدرج تحسابه مازال ماخش خشت بسرعه وقمعزت
• اريج .... باهي اللي جيتي وكيف خشيتي
• محبه.... القيته بره واقف يحكي مع الدكتور منذر خشيت قبله
• اريج ...مشاء الله عندك حظ كان هنا راه خش وضبح عليه الدكتور طلع
• محبه ...صاح يستر الله مافطنلي وايحطني في موقف توه
• اريج .... هييي زعمالالا ان شاء الله لا ماحتي فطنلك بعد خطرها يبي ايدير تست توه قال في المحاضره اللي فاتت سؤال واحد
• محبه .... صااااح حي يستر الله ان شاء الله نحل عليك اسلوب متبعه اول مره ايقابلني واحد زيه
• دكتور وليد ...وين كنا اهاا علي فكره كل حد خش بعد طلعتي عارفه واحد واحد وهالمره منبيش اندقق وانطلع فاياريت امتحطوش ارواحكم في مواقف بايخه وبعدها تحطو الحق عليا وكان ايبحت في محبه كانه يوضحلها اني عارفك
• محبه ..... توترت بكل وتنرفزت من اسلوبه وغروره اللي يتعامل بيه وفهمت انه وجه ليها الرساله قصدا
• *************************
• عندفيلا الحاج عبدالله ........
• رغد ......شنو يا بنات وتيتن كل حاجه
• مروه....... اهاا تمام كله واتي
• رغد ...وريني اللبسه اللي خذيتيها
• وداد ...اهيا شن رايك
• رغد ...اتهبببل وحتطلع عليك اللون هضا يطلع عليك حلو بكل
• وداد ...نجك ليا طمنتيي
• اسراء .... اصلا هو يبيك كيف مااانتي حتي تطلعيله سرافه عادي مفيش فرق
• زوبه .....ههههههههه عطك حبه ضحكتيني
• وداد .....براده علي فكره راه
• اسراء.... الحق عليا اللي نرفعلك في معنوياتك
• وداد ... لا ترفعي لاتنزلي خطيني وسيبني في حالي هكي نبي انزيد نرتبك بكل
• زوبه ... خلاص هيا تعالي انديرلك ميكاب خفيف وبعدها اتغيري وقت اصلا
• وداد .....هيا تعالي
• الحاجه فاطمه .....علي مامسكت فيهن شي مابن قالت عندي شغل منقدرش انقعد
• احمد ...اهاا تمام تو انشوفهن قتلك يا امي شن رايك فيها الكبيره ساره
• الحاجه فاطمه ...مشاء الله عليها سماحه وشعر اتقول حرير وادب واخلاق والواحد ينعرف شن معدنه ابنيه نظيفه نيه عليش تسال عليها
• احمد .....واعيونه يلمعن من الفرحه شن رايك تخطبيها ليا
• الحاجه فاطمه .....والفرحه مش سايعتها هضا الساعه السعيده والنهار المبروك يا غالي وكاني مانخطبها لك وين تلقي زيها صلي عالنبي عليها تقول اغزيل شكلك عينك منها يا وليدي
• احمد .... وهو منحرج والله هيا تشتغل معايا في المستشفي وشفت اخلاقها وسالت عليها بنيه مشاء الله
• الحاجه فاطمه ..... ساع ناخذو منهم موعد خلي هالايام بس وبعدها ايصير خير باهي شنو وليد مالانش بكل هالموضوع اللي حكيته له
• احمد ....والله اخر مره حسيته لان اشويه لكن يبي من ايزر عليه
• الحاجع فاطمه .... غير انكمل موضوعك وحياتك غصبا عنه حنخطبله كان ماوافق من غير مايندري
• احمد..... تنهد بحت في امه يستر الله وخلاص انت ماديري شي لعند اتقوليلي
• الحاجه فاطمه .....ان شاء الله وانت طيب ايييه بعد خطرها اليوم مقابله وداد
• احمد ... اهاا قالها ليا وليد امبدري انا اشويه وطالع خلي واحد من الشباب يقعد منقدرش انا عندي مستشفي
• الحاجه فاطمه ....لا قاعد وليد قالي انا ننبي نقعد
• احمد ... تمام معنها
• ******************
• عند ساره وهدي .......
• ساره ....هيا هدي نبي نطلع بدري عشان الزحمه
• هدي.... خلي العصر ياذن قبل باهي
• ساره ...علي بين ماوتيتي روحك ياذن انصلو ونطلعو معش مازال عليه شي
• هدي ... تمام علي فكره محكينش علي دكتور احمد
• ساره ...ولا حنحكو موضوع ميحتاجش انفكرفيه اساسا
• هدي شن الكلام هذا انت مقتنعه قصدك بكلامك هذا متكذبيش علي روحك وتصدقيها ممكن تفاجأتي بطلبه ويمكن الطريقه اللي طلبك بيها هيا اللي معجباتكش بس ديري في حسابك انه ايحبك انا شفت الحب في عيونه والله وحتي لو من باب الشفقه راجل كيف هذا ماينردش والله حيكون لنا سند يوقف في وجه عمران واللي زيه ارجوك ساره فكري اكويس قبل لا ترفضي علشان مصلحتنا قبل كل شي لو هو مش اكويس كنت قتلك متوافقيش بس هو اكويس بكل ومع هذا كله يمكن هذا رحمه ربي لينا وهذا الخير اللي داسه ربي ليك علي كل اللي عانيتيه بعد وفاه بابا وتوه
• ساره ... وهيا تسمع في كلام هدي وتفكرفي كلامه وحست ان كلامها لمس قلبها بحتت فيها وتنهدت وسكتت
• هدي .....حنقولك راي باهي أنت توه صلي استخاره وشوفي روحك وعليها تقرري انا بجد قعدت خايفه بعد كلام عمر اللي قاله والله
• ساره ... ان شاء الله خير متخافيش وباذن الله مايصير شي هيا عطلتيني العصر اذن وانت مازال تحكي
• هدي .... ههههه تمام ماشيه انغير مش حنطول
• ********************************
• عند فيلا الحاج عبدالله
• وداد ....يابنات متوتره بكل حي عليا كيف نبي انخش هكي باللبسه هذي
• زوبه ... خلاص البسي عبايه واطلعي مادام مش عارفه اتخشي كنك هبله لبستك حلوه ومحترمه ولابسه ايشرب شن تبي اخري
• وداد ... عارفه لكن اهو
• رغد ...تعالي هيا خليني انديرو القهوه هيا
• وداد ....تمام هيا
• وليد ... هي اشويه انشوف القهوه وانجيك
• توفيق ....تمام خوذ راحتك
• وليد .... هيا خفن بالقهوه وانت وداد بسرعه جيبيها وتعالي الراجل يستني
• وداد ...كنه وليد كانه راقيتله زعما متفاهمش معاه
• رغد .... لالا تلقيه علي حاجه اخري متفكريش هك
• وداد ....ان شاء الله
• رغد .....هيا بسرعه خوذي القهوه وخشي
• زوبه ... ان شاء الله بالنجاح ههههههههههه
• اسراء .....بعدك استاذ اكيده واعر هههههههه
• واداد ... حيوانات عارفات ارواحكن صح
• زوبه ......توكلي رك تلتقطي بالسفره اه راه حذرتك
• وداد...وديني نلتقط يومك اسود خزي بدال مايهدني يسمطن
• مروه ...فوتيهن هيا وخشي وسمي بسم الله
• زوبه ....وهيا اتصفق سمي بسم الله وخشي في حوش الزينين تمشي ههههههه
• وداد .... خذت صفره القهوه وعدت للمربوعه وصلت احممم السلام عليكم
• وليد ....خشي ياوداد
• توفيق .....وعليكم السلام ايبحت اشويه واينزل في عيونه
• وداد ...وصلت لعنده وقدمتله القهوه تفضل
• توفيق .... رفع راسه وبحت فيها ومبتسم وعيونه يلمعن شكرا
• وداد... العفو ومدت الفنجان الاخر لوليد وقمعزت مقابله توفيق
• وليد ... طالع اشويه خوذو راحتكم
• توفيق ... تمام تفضل كيف حالك
• وداد ...وهيا ترعش تمام الحمد لله
• توفيق ....وانا الحمد لله بخير وضحك هههه
• وداد ....هههههه
• توفيق .....احممم ممكن مستغربه طلب المقابله وقلتي غريبه
• وداد ...وهيا مبتسمه اهااا
• توفيق ...حبيت نحكيلك بعلم هلك ومانبيش حد ايطلع عليك اي كلمه بسببي ونبيك تعرفي عليا عن طريقي انا فامنبيش تسمعي من حد ثاني وبما ان موافقين مبدائيا فحاب تعرفي اول شي كيف ما انت عارفه انا اكبرواحد في خوتي وعندي خوين اصغار تمام و اربع بنات اثنين متجوزات وحده مخطوبه والا خيره شباب تمام
• وداد .. مبتسمه تمام
• توفيق.. طبعا شرطي الوحيد انك اتعاملي امي كيف امك لاني قريب منها واجد فهيا حتكون متعبه بنسبه لك وكلامي هذا مش انخوف فيك بالعكس عطيتك حريه الاختيار ولاني كنت خاطب وسبب انفصالي عليها انه متفاهمنش اولا وكل مره اتجيبي في سيره امي انها ضايقتهاومن هال الكلام
• وداد ...تفاجأت بعد عرفاته كان خاطب
• توفيق.... طبعا خطبتي شهرين وفسخنه وكانت ارواده امي بس طبعا انت غير وانتمني اتوافقي بعد الكلام اللي قلته وانت شن شروطك
• وداد ... اولا شغلي منبيش انسيبه وثاني حاجه اهلي واقاربي نمشيلهم ومنقطعهمش
• توفيق ...هذين تمام ومعنديش مانع حقك
• وداد ... حنسالك سؤال وعلي اجابتك حيكون قبولي والا رفضي
• توفيق ...تفضلي اسائلي وهو متوتر
• وداد ...بالنسبه للماضيك منقدرش انحاسبك عليه امابالنسبه لامك تمام وقلت انها ممكن اتعبني اشويه لانك وحيدها وانت طبعا مترضاش فيها الزله تمام
• وداد ...سؤالي .لو صار سوء تفاهم بيناتنا وهيا غلطت فيا واجد حتاخذلي حقي والا اتقولي تحملي علي شاني وهذي امي منقدرش انزعلها مع العلم اني نعامل فيها اكويس
• توفيق .... وهو مبتسم حنقولها لك حنكون مع الحق ومستحيل انجي علي حساب حد دون حد مهما كانت مكانته لان كل واحد ياخذ حقه سواء غالط ولا مضلوم
• وداد ...وهيا مبتسمه تمام وصلتني اجابتك وقفت سلام توه
• توفيق ....يعني شنو باهي
• وداد ...ابتسمت وجت تبي تحكي خش وليد هيا طلعت
• وليد ....شنو ان شاء الله تفاهمتو
• توفيق ...تمام الحمد لله بس مش عارف عاد شوف ارواحكم وردوعلينا وان شاء الله خير
• وليد ...تمام .معناها اشويه وانجيك وخش جوا
• وداد ...خشت وهيا فرحانه ومبتسمه
• مروه ...ها شنو اتفقتو
• وداد ...وهيا تضحك يا نعليا ايهبببل بكل
• زوبه ..... حي حي مشاء الله خشت شكل طلعت بشكل ثاني
• رغد ...يعني شنو موافقه
• وداد ...اكيده اها ههههههههه
• علي خشة وليد ..ها شنو وداد الراجل يرجي شنو انقوله
• وداد ...وهيا متحشمه ...تمام موافقه
• وليد ...ابتسم تمام مبروك ان شاء الله وطلع
• اسراء .... نجك لياوحضنتها وتضحك مبروك عليك توفيق يادودي
• وداد ....ههههههه الله ايبارك فيك
• الحاجه فاطمه .....خشت عليهن شنو ياوداد اتفقتو خلاص
• زوبه ...اها ياماما العقبه لنا ان شاء الله
• الحاجه فاطمه ...ريت المستعجله مبروك يابنيتي والعقبه ان شاء الله نفرح بيكن وبخوتكن ان شاء الله
• البنات .....ان شاء الله ياماما
• ***************************
• عند ساره وهدي
• ساره... هيا انزلي وشوفي اللي تبيه تمام منبيش نحكي واجد في المحل
• هدي... تمام خلينا انشوفو الاسعار وبعدها ساهل ونزلن
• ساره ...السلام عليكم .
• خالد ...وعليكم السلام تفضلي
• ساره .. نبي تلفون هكي ايكون يوصله نت وحقه مش غالي واجد بس ايكون اصلي
• خالد .....تمام في عندك هضا عملي وسريع في النت ب500وفي هضا 450وهضا اقل منهن جوده 300
• ساره ....بحتت في هدي هاشنو اين واحد
•
• هدي... خذتها علي جنب اشويه ولا واحد مش واخذه غاليات نحنا كل قرش توه مستحقاته وردت لمكانها وطلعت تلفونها الاول المكسور
• خالد .....وهو ايبحت فيهن وافهم انه مايقدرنش علي حقهن
• هدي ....ممكن اتشوفلي هضا يصلح والا لاومدتله التلفون
• خالد .....وقعد ايشوف في التلفون تمام يصلح بس شاشه في حدود الميه
• هدي ...بحتت في ساره وردت بحتت فيه تمام معناها صلحه امتي انجي ناخذه
• خالد ...بكرا زي توه ان شاء الله تلقيه واتي
• ساره ....تمام شكرا بارك الله فيك
• يتبع ............
• بقلم .....أحلام
