• #خريف المحبه .........
• الحلقه العاشره ......
• محبه ....معاذ تبي قهوه نحسبك معاي
• معاذ... اهاا وحتي محمد قاعد جوا مع امي في الصاله
• محبه ..صاح خليني نسأله حتي هو
• محمد ...امي قتلك في عرب جايين لمحبه
• امي... مشاء الله وهيا فرحانه من طرف منو
• محمد ... فؤاد ولد عمت ايمان وهو مطلق وعنده بنيه وعمتها شافتها في فرح عادل وعجبتها انت شن رايك انقولو لمحبه
• محبه وهيا جايه للصاله سمعت كلامهم كله
• محبه .... قعدت مصبيه عالباب ومش عارفه اتخش والا لا وعيونها مليانات ادموع ومصدومه مكانتش مفكره انها ممكن في يوم حد ايجي يخطبها لان الفكره هذي مش في بالها اساس كان كل تفكيرها انها خلاص حظها من الدنيا خذاته ومستحيل اتحب ولا تجوز غير معز
• معاذ ....كنك مصبيه هنا
• محبه ... بحتت فيه وهيا تبكي
• معاذ ...محبه كنك كنتي اكويسه
• محمد ...سمع صوت معاذ قدام الصاله وبحت في امي وبرم وجها وشاف محبه مصبيه ودموعها علي خدها
• محمد ....كنكم شن صاير
• معاذ ..جت تبي تسالكم تشربو قهوه اشويه جيت القيتها واقفه هنا وتبكي
• محمد ....بحت فيها وتنهد تعالي يامحبه وامسحي ادموعك وخشي
• محيه ... خشت قمعزت يالا امها وادموعها تنزل ومش قادره تشد بكيتها
• سالمه..... تبحت فيها وساكته وقلبها محروق ومش عارفه شن ادير
• محمد ... اكيده اسمعتي شن كنت انقول لامي وعارف ان الموضوع صعب عليك بس الحياه تمشي ولازم اتعيشي حياتك مش حتقعدي طول عمرك هكي
• محبه ...وهيا تبكي.وانامنبيش ولو سمحت سكر علي الموضوع وياريت ترد عليهم بالرفض
• امي .... يا بنيتي فكري قبل ليش اتلطي علي روحك انا مش دايمتلك وخوتك كل واحد يلهي في حياته وبعد ايفوت الوقت حتندمي صدقيني وافقي اللي جايك راجل اكويس ميرتفضش سلم بنتي
• محبه .... وانا منقدرش انتجوز وندير عيله بعد عيلتي ونصيبي خذيته من الدنيا
• محمد ..ونحنا مش حنغصبوك علي شي واللي تبيه حيصير بس انت خوذي وقتك وفكري وصلي استخاره وبعدها ردي علينا
• محبه ....وانا قلت مش مووافقه وهذا قراري النهائي لو تبو اتريحوني سكرو علي الموضوع وطلعوه من روسكم وياريت لو ايصير مره اخري تنهوه من عندكم وصبت تصبحو علي خير
• محمد ....بحت في امه وتنهد كنت عارف رد فعلها
• معاذ ... انتم عارفين رد فعلها مفروض كنتو سكرتو الموضوع من عندكم
• امي .. ولعند امتي ترد في اللي ايجيها وهيا مازالت اصغيره محمد ماتقولش لايمان شي خليني انشوف خالد وعادل ممكن اياثرو عليها وتغير رايها
• محمد ...مش عارف يا امي بس ماضنيش اتغير رايها
• ********************
• صباح يوم جديد .......
• ساره .....خلاص انزلي توه وبعدنروح انتفاهمو
• هدي ....تمام هي سلام ونزلت
• ساره ....سلام اشويه ورن تليفونهابحتت لقاته رقم المستشفي
• ساره ...ايوه السلام عليكم
• الممرضه ....ايوه ساره خيرات انا مفيده
• ساره. اهلين مفيده ان شاء الله خير
• مفيده ... قتلك الدكتور طارق طالبك عشان حالة خوك
• ساره ... وهي خايفه تمام مسافه الطريق
• مفيده.... تمام حنبلغه
• ساره .... وهيا قريب تبكي وخايفه يارب اخبار اكويسه يارب
• ************************
• عند نورا ......
• رحمه ..... ماما والنبي ماتنزلي عند جدتي وعارفتيهن جايات فوتيهن وخليهن هن اللي ايحطن الغداء انزلي بعد الظهر
• نورا ...يصير خير عدي لجامعتك وكلمي اختك مراد يرجي من امبدري تو ينفصل عليكن
• رحمه ...لجين بسرعه مراد رن
• لجين ...هيا هي طالعه
• *****************************
• محبه .... صباح الخير يا ماما
• امي ..صباح النور معاذ طالع من الصبح قالي قوليلها اتشوف واحد من خوتي
• محبه .... خالد طلع والا قاعد
• امي .... راقد مازال ماناض
• محبه..... خلاص وتو انوعيه وانشوفه
• ايمان ....صباح الخير
• العيال جو ايبوسو في يد وراس جدتهم صباح الخير ياجديده
• امي ....صباح النور
• ايمان ...كنها ياعمتي محبه شكلها باكيه لعند خلاص
• امي ...مش عارفه مقالتش كنها وانا منبيش نسالها
• ايمان... لاحول ولاقوه الا بالله شنو ياعمتي قالك احميده علي الموضوع
• امي ...اهاا نكلم عادل ونشوف خوتها وبعدها انقولوها لها
• ايمان ...اهااا ان شاء الله ربي يفرحك بيها يارب
• امي ....ان شاء الله ان شاء الله
• محبه ... خلاص ياماما انا ماشيه محمد يرجي فيا
• امي .....مربوحه مع السلامه
• ************************
• عند فيلا الحاج عبدالله .....
• زوبه ....غريبه اليوم قاعده
• مروه ... الا ستاذه معتذره الحمد لله باهي اللي حصلت يوم راحه
• زوبه.... شن صار في رامبو متاعك
• مروه.... بحزن معش شفته بكل ولا لمحته حتي اللمح
• زوبه .... خلاص معش اتفكري فيه حتلقيه قدامك
• مروه ...شن صار في موضوع وداد شن رد بابا
• زوبه ... قالتلي ماما قال بابا مازال نسالو عليه قبل وبعدها ساهل
• مروه ... اهااا تعالي انديرو كيكه نشربو بيها القهوه بعدين خاطري في كيكه باونتي
• زوبه .. تعالي بس بشرط انا انديرها وانت اتلمي الحوسه
• مروه ....اوووف منك يا تنباله هيا كلها حطت الماعين في الغساله واتنبلي فيها
• زوبه .....مش شورك هيا بس امشي قدامي
• **********************
• عند ساره .........
• وصلت للمستشفي وعدت لريسبشن مفيده وين نلقاه الدكتور طارق
• مفيده ....في قسم العنايه هو والدكتور احمد
• ساره .....تمام ركبت وهيا خايفه بكل وتدعي في سرها يارب يكون معاي يارب قويني يارب
• ساره ..... معلش قولي للدكتور طارق الممرضه ساره جت
• الممرضه.... تمام اشويه وطلعلها احمد
• جاته ساره تجري خير يادكتور كنه عمر
• احمد .... وهو متاثر بكل ومش عارف كيف ايقوللها الخبر انت مؤمنه بقضاء الله وقدره وعارفه ان كانت حالته صعبه ربي يصبرك والله يرحمه ويغفرله
• ساره ...كانت تسمع فيه ومش قادره تستوعب انها خلاص قعدت وحيده بلا سند كان هو اللي مقويها ودموعها ينزلن علي خدها ومش قادره اتصدق انه خلاص مات وتفكر كيف حياتهن حتكون وكيف حتخبر هدي
• واشويه اشويه قعد صوتها يعلا بالبكاء وانهارت ااااااااااااه راح سندنا كيف اندير كيف انتحمل اللي اجاي من بيقويني من بيقولي انا عارفك قدها راح اللي ي كان ينسي فينا في همنا
• احمد ....وهو متقطع عليها وكان يلقي ياخذها في حضنه ويسكتها ا اذكري ربي الله يرحمه ويغفرله ويصبرك انت واختك علي فراقه خليك قويه كيف ماعرفتك
• ساره ... قوتي كملت قوتي كنت ناخذ فيها منا كيف ايصير فينا ونسندت علي الحيط وقعدت تبكي وتعيط لعند نزلت قمعزت علي الوطا
• احمد ... مسكها من كتافها صبي معرفاتكش ضغيفه هكي معقوله ساره افطني روحك كيف حتحمل هدي انها اتشوفك منهاره هك كيف حتماسك وتصبي معاك
• ساره ...وهي تبكي كيف حنقولها لها توه مش حنقدر انقولها لها كيف حنصرف انا معنديش حد شفت كم انا ضغيفه شفت كيف مكسوره انا بلاه مكسوره
• احمد .... بحت فيها وهزها اصحي لنفسك شوي شن قاعده اتقولي اوعك تنكسري هذا امتحان من ربي
• ساره ... 😭😭امتحان صعب يادكتور امتحان صعب مش حنقدر انخبر هدي . وهيا تبكي ومنهاره لعند اغمي عليها
• وجنها الممرضات بسرعه رفعنها لغرفه وعطنها ابره مهدي وخلنها رقدت
• وسمعتهاهدي وعد ت للمستشفي وانهارت وقعدت تبكي وتعيط و قعدن ايهدن فيها الممرضات وعدت لساره اختها لقتها راقده وعلي اعيونها اثرالبكا وزادت في البكي لان اول مره اتشوف اختها واصله لها الحاله وعرفت انها الحمل اثقل عليها ومعش تحملت
• احمد ... خش لغرفه ساره وقلبه متقطع عليها وبحت لقا هدي مقمعزه وماسكه يدها وتبكي
• احمد .... عظم الله اجرك
• هدي.... وهياتبكي😭 اجرنا واجرك علي الله كيف ايصير في الاجراءات يادكتور
• احمد ... جاء واحد اسمه كمال ودارهن الاجراءات كلهن
• هدي .... تبكي😭 وهزت راسها بحتت فيه وبعدها بحتت فيها اول مره تنهار هك حتي في وفات باتي مدارتش هك مع انها كانت متعلقه بيه كانت متماسكه علي شان عمر ماينكسرش بس توه انكسرت بعد عمر مش عارفه كيف حتصبر
• احمد ..... بيدك انت تخليها ترد كيف ماكانت واحسن لانها كانت شايله همك خليك معاها وقويها خليها اتشوفك كيف متماسكه
• هدي .... ان شاء الله😭 ربي يصبرنا وايقوينا يارب
• *****************
• عند نورا .......
• عمتها ...نورا تعالي جيبيلي الداوء
• نورا .....حاضر ياعمتي هي جايه
• سلفتها .... كيف ياعمتي اتخليها اتخش لدارك هذيما ناس تشبعش علي قلبهم الفلوس كيف الهم لكن مايحبوش الا ياكلو اللي مش ليهم
• عمتها ....خليك في حالك يا بدريه احسلك
• جيمله.. كنك ياعمتي معاها حق انت تبحتي في اعيالك كيف عايشين وعلي كيف عايش وساكته مخليتيه ياكل حقهم
• علي خشه لجين سمعتهن وهنا يحكن
لجين ... احترمي نفسك انت وياها وسكري فمك والكلام هضا خليه لناس اللي كيفكم ياكلو مايشبعوش
• نورا .... طلعت من الدار لجين سكري فمك واركبي فوق لشقه
• لجين .... لعند امتي حتقعدي ساكتيلهن هذينا مايبنش من يسكت وديني الا عند مراد ايوريكن من اللي ياكلو في حق من
• نزلت رحمه تجري بعد سمعت الصوت اعلي كنكم شن في
• جميله .. مشاء الله هذي التربيه اللي تحكي عليها ياعمتي هذين بنات نورا شوفي بعينك وهيا تهدد بخوها وتلاطع في اللي اكبر منها
• رحمه .... متربيات غصبن عنك وماما اللي تحكي عليها تسوي قبيلتك كلها
• نورا ... لجين رحمه قلت فوق انا بسرعه تحركي انت وياها
• لجين ... شوفي من يحكي علي التربيه لو سمحتي عدي شوفي بناتك قبل وبعدها تعالي احكي واعطي مواعظ علي التربيه وبرمت وركبت
• جميله .... بناتي متربيات غصبن عنك انت وامك يا حيوانه حتشوفي وكان ماوصل لباتك مانبقي اسمي جميله
• نورا ... الزمي حدود ك ياجميله احسلك وخليني ساكته علي خيرك وشرك بدال من انطلع القديم والجديد وانت عارفه علي شنو نحكي ونا مش كان سكتلك معناها ناسيه ونسمع انه علي عنده علم بالقصه هذي وديني ماحتقعدي يوم واحد اخر علي اسم راجلك وسيبتها مصدومه
• نورا ... هاكي دواءك ياعمتي وامسحيها في وجهي هالمره ان راكبه لو تبي شي كلميني
• عمتها... حشاك طول عمرك بنت اصول
• *******************
• عند هلي .......
• عادل ..السلام عليكم خير ياامي
• امي.. خيرات ياعدوله كيف حالك وكيف حال سحر
• عادل ...تمام الحمد لله ان شاء الله خير قلتي تبيني
• امي ... اهاا في موضوع شور محبه نبيك تحكي معاها بلكي تقنعها بيه انت وخالد
• خالد .... اسمعت اسمي ان شاء الله خير اووو العريس هنا وين عاش من شافك غارق في العسل عاد شن تبي في وجوهنا
• عادل ... ابرم ورد من وين ماجيت وجهك منبيش انشوفه
• خالد ...شفتي ياحويجه كلامه عيب اصلا امي دازه عليا
• امي... قمعز وخلي خوك في حاله اكيده بيقعد في حوشه مش ملزوم بوجهك قعد لعند طابت كبده وجهك في وجها خليه في حاله ربي ايهنيه واشقا بروحك
• عادل ... قصفاتك الحاجه ههههههه
• خالد.... هو ايبحت في عادل مقبوله منك يا غاليه بس كانه نساك بكل مع مراته اسماله عليك وخلاص
• عادل ....حيوان انت كنك يافرخ
• امي ...خلاص انت وياه انا مكلمتكم علي حاجه مهمه
• عادل ...شنو قلتيلي شور محبه
• امي.... اها جايها عريس وهيا رافضه نبيكم تحكو معاها
• خالد .... الموضوع هذا بذات منقدرش انخش فيه بتاتا
• امي ...ليش كنك وانا قلت خالد يقدر عليها كيف ماطلعها من حالتها المره الاولي
• عادل ... امي ... موضوع هذا بالذات شفتي ردت فعلها اول ماجاء صاحب سراج راجل موده وشنو صار فيها يعني اذاهيا مش مقتنعه مستحيل نجبروها
• امي .... قعدت تبكي باهي هكي انخليها عادي برايها هذا وهيا مازالت اصغيره قلبي محروق عليها وين انبحت فيها لعند امتي حتقعد هكي
• خالد .... وسعي بالك انت ماترعشيش روحك وبعدين لو احميده ماقنعهش في الموضوع هذا فامستحيل تقتنع سوا بكلامي والا كلام عادل
• امي ... قعدت تمسح في دموعها انا نبي انتريح عليها لعند امتي حنقعدلها وكل واحد فيكم بيلها بحياته وهيا تقعد هكي هيا توه مسكره راسها بس بعدين حتندم لقدام
• عادل ان شاء الله خير انت خليها اتروح وانا حنكلمها لكن مش حنزر عليها ابدا هيا كبيره وعارفه مصلحتها واللي صارلها صعب ايخليني نجبرها
• امي... انا المره هذي حنسكت بس ايجيها واخد اخر ويطلع اكويس تنطبق السماء علي الوطاء حتاخذه غصبا عنها تبي والا ماتبي
• خالد ... بحت في عادل .انت اهدي بس يامي وكله ليه حال
• امي... قولها لها ياعادل وانا عند كلمتي لو اتموت قدامي حتاخذه لوكان ولد عيله زي اللي جايها
• *********************
• في فيلا الحاج عبدالله .....
• وليد ..... بعتلك المبلغ و تقدر تسحبه وتدفع الغرامه اللي عليك ومن هنا معش نبي نعرفك ابدااا ولا نشوفك واعتبر نفسك ماتعرفنيش وانا هكي رديتلك معروفك معاي
• هو .... تمام تصافينا وكل واحد خذا حقه
• وليد .... تمام تصافينا وسكر وتنهد براحه ان واخيرا طلع من القصه اللي كانت مش مريحته
• احمد .... شنو انحلت
• وليد .... الحمد لله اها حولتله المبلغ ونهيتها معاه
• احمد .... الحمد لله رد بالك مره تانيه
• وليد ...ان شاء الله كنك حاسك مضايق
• احمد ... لا جو تمام مافي شي
• وليد ... مش عليا كنك بجد
• احمد ..... حاله عندي توفي وهله معندهمش حد وهنا بنتين بروحهن قاعدات مع انهن من عيله معروفه بس مافيش حد جاء حتي كمل اجراءات خوهن الا واحد جارهم هو اللي تكفل بالموضوع كله
• وليد ....لا حول ولا قوه الا بالله ربي يساعدهن ان شاء الله وانت علشان هكي مضايق والا في حاجه اخري
• احمد ..... بحت فيه وتنهد مش عارف المهم اني محروق من جوا حاس ايديا مربطات ومش عارف شن اندير
• وليد ...اوباااا شكلك طحت يا ولد امي
• احمد ... مش عارف يمكن اعجاب وسرح وهو يوصف فيها وعيونه يلمعن انسانه قويه عندها عزه نفس مشفتهش عند حد عيونها فيهن قوه علي رغم ضروفها الصعبه بس اتحسها بميه راجل مراه لو غبت عليها تحافظ عليك من غير ماتخاف مراه لو صارتلك حاجه توقف وتكمل حياتها وانت متريح انها حتربي اعياالك كيف ماتبي واحسن
• وليد ...كل هذا شفتا فيها وتقول اعجاب
• احمد ...واكثر مهما نحكي مش حنعطيها حقها رغم ضروفها الغامضه والصعبه عارف انها تشتغل في شغلين عشان تقدر اتاكل وتشرب وتسلك اجار الشقه ... بس اللي حارقني كله انها انهارت اليوم مقدرتش اتماسك حست روحها ضعيفه وبلا حد تنسند عليه تمنيت انها اتكون ليا وتبكي وتعيط وانا اللي نسكت فيها مش عارف هذا كله صار في ايام شعور عمري ماحسيته كاني ليا اسنين شايفها
• وليد ... انت حالتك مستعصيه انت مش معجب انت تحبها رسمي مافيهش كلام وربي ايعينك ان شاء الله
• احمد ...ان شاء الله وانت لعند امتي حتقعد هكي مش مفكر انك تستقر واتدير عيله
• وليد .. تغيرن ملامحه للقسوه جربت مره ومستحيل انكررها وسادني ماجاني
• احمد ....صدقني صوابع يدك مش نفس بعضهن
• وليد ... وصوابع اليد من نفس اليد سواء كبير والا صغير مافيش فرق
• احمد .... انت الدوه معاك عبت لانك ماشي بقناعتك ومش حتغير الا لماتجي وحده اتغيرلك نضرتك كلها
• وليد ... .. ضحك بهزو وهز راسه علي كلامه
• عند عمتي زهره ......
• عمتي زهره ... ياناري اسمله عليهن اصغيرات علي القزن وحده مطوحه ماتندري عليها والتانيه تببكي لعند اقريب تنزح ربي ايصبرهن ان شاء الله
• كمال ...ان شاء الله خليك معاهن ومتخممي في شي واللي تنقص قوليلي عليها انا انجيبها كسره الخاطر شينه وكله باجره
• عمتي زهره.... ربي ايبارك فيك ياغالي ويجبر بخاطرك يالله
• فات اليوم علي ساره وهدي وهنا ايتباكن وقعدن الليل كله وهنا ايذكرن كيف كانت حياتهن مع امهن وبوهن وخوهن وكيف قعدن وحيدات ماليهن غير بعضهن وفات عليهن اليوم من اصعب الايام اللي مرت عليهن وساره اتحاول اتماسك علي شان اختها واندفن خوهن وعمتي زهره صبت معاهن كانهن بناتها وماسيبتهن بكل
• لجين ....مراد نبيك اتشيلني لصاحبتي ضروري
• مراد ..مش فاضي بنعدي للمحل وبعدين انت متعرفيش حوشها صاحبتك بتقعدي تبرمي بيا وخلاص
• لجين ....وهيا تبكي والنبي يامراد كنك هكي هيا حوشها يالا عمتي زهره
• مراد ..وهو مستغرب ابكاها كنك عليش تبكي مش عوايدك
• لجين ...اقعد فيها انا انكلم بابا ايجي ايشيلني
• نورا ... شيلها هيا ورحمه صاحبتهن خوها متوفي ومعندهن حد بكل الاهو
• مراد .... خلاص قوليلهن ايوتن ارواحهن
• ***************
• عادل .....شن اخبارك يامحبه شن جو القرايه معاك
• محبه..... تمام الحمد لله لحد توه اكويسه
عادل... تمام سكت اشويه وبعدها محبه نبيك تسمعيني لعند الاخر ومتقاطعينش وفكري اكويس في كلامي اللي حنقوله هذا تقريبا خامس عريس ايجيك وكل واحد ترفضيه من غير ماتسمعي من هو ولا حتي اتحاولي انك اتفكري في الموضوع من اساسه امك اليوم قعدت تبكي لانك مش موافقه هيا اتفكر فيك وفي وضعك عارف انها صعبه عليك وعارف مازال منسيتيهم
• محبه ...قعدت تبكي وهيا ساكته وتسمع فيه
• عادل ....واللي عارفه انك مستحيل حتنسيهم اساسا بس الحياه حتستمر ولازم اتعيشيها واتكوني عيله نحنا خوتك صح ومش حنسيبوك صح بس حيجي يوم ونسهو ونلهو بعيالنا صح حندوروك ومش حننسوك بس مش زي عيلتك راجلك اللي لما تغيبي عنا اشويه ايدورك ويفقدك اعيالك اللي طول الوقت حوليك انا عارف معز الله يرحمه كان مفيش راجل زيه عندك بس صدقيني في الي زيه واحسن منا فكري اكويس في قرارك واستخيري وحتي لو رفضتي نحنا معاك ومع قرارك ومستحيل نجبروك علي حاجه انت متبيهش
• محبه .. تسمع وساكته ومابتش ترد عليه
• *********************
• عند هدي وساره ......
• لجين .... وهيا تبكي منسنده عليها هدي حبيتي خلاص نزحتي ادموع شوفي ساره كيف اتبحت فيك
• هدي.... مش بيدي يا لجين مش بيدي علي ماحاولت مقدرتش
• لجين .... وهيا تمسح في دموعها لازم تقدري عشان ساره لازم تقدري لازم كل وحده تقوي الثانيه انتن توه لازم اتكون قويات بعضكن هذا حكم ربي متقدرنش اتغيرنه.واكيده فيها خير لكن استهدي بالله وادعيله برحمه وعمره البكا مارد غالي
• هدي .. يارب قوينا يارب ملنش غيرك يارب
•
• ( لاتكره شيئا اختاره الله لك فعلي البلاء تؤجر وعلي المرض تؤجر وعلي الفقد تؤجر وعلي الصبر تؤجر فرب الخير لاياتي الا بالخير )
• رشا ..... يناري مسكينات الحياه صعبه مش عارفه كيف حيديرن برواحهن
• رحمه ... قهرني قسما بالله وين عيلتهن عمام عمات مافيش بكل
• رشا ... مش عارفه عمره ماجاهم واحد قريب لهن من اول ماحولو هنا
• رحمه ....ربي يصبرهن وايقدرهن علي هالحياه
• عمتي زهره ... رشا عدي انت ورحمه جيبن العشا من الحوش واتي غادي
• رشا... حار ياماما هيا رحمه نمشو مش حنطولو
• رحمه..... مش بعيد حوشكم صاح
• رشا .. اهاا اهو اللي مقابل العماره
• رحمه.... تمام هي نقول لجين وانجيك
• رشا .. نستني فيك قدام الباب
• رحمه ... هيا وطلعن عدن للحوش عمتي زهره
• رشا ... استنيني اشويه نبي الحمام وتلقي العشاء في المطبخ
• رحمه ..تمام نستني فيك وخشت للمطبخ وتلقي قدامها كمال مقمعز علي الطاوله ويتعشاء جمدت في مكانها
• كمال .......
• يتبع .....
• بقلم...... أحلام
