• # خريف المحبه .........
• الحلقه الحاديه عشر .....
• رشا ... استنيني اشويه نبي الحمام وتلقي العشاء في المطبخ
• رحمه ..تمام نستني فيك وخشت للمطبخ وتلقي قدامها كمال مقمعز علي الطاوله ويتعشاء جمدت في مكانها
• كمال .... حس انه في حد خش عليه رفع راسه لقاء رحمه احمم احممم
• رحمه ....ءءءء خير كيف حالك وهيا تبحت اشويه وتنزل في عيونها ءءجيت انا ورشا عشان العشاء
• كمال ... وهو متفاجي وسرح فيها اهااا اهلين شن اخبارك
• رحمه ...وهي متوتره ومرتبكه ءتمام الحمدلله
• رشا .... جيت شنو القيتي العشاء اها كمال انت هنا
• كمال ...اهااهو العشاء واتي
• رشا ... عرفتها من هذي رحمه بنت نورا بنت خالي
• كمال ... اهاا واعيونه مقدرش ينزلهن من عليها
• رحمه ... ارتبكت من نضرته هيا نعدو منبيش انتاخرو عشان قريب ايجي مراد وانروحو
• رشا ...صاح هيا تعالي شيلي معايا
• كمال .. ارجن نوصلكن ونشيل معاكن
• رشا... تمام هي وطلعن
• وطلع كمال معاهن وهو فرحان ان شافها ومستغرب في روحه كيف خذت تفكيرا بعفويتها
• **********************
• عند محبه .....
• فات يومها وهيا متنكده ومطلعتش من دارها بكل لان وجعها كلام عادل كله وعارفه انه كلامه كله صح بس مش قادره اتعيش حياتها ولاقادره تنسي معز وقعدت اتصلي وتدعي ان ربي اينور بصيرتهاويصبرها علي فقدهم لان جرحهم مازال مانساته
• ****************************
• عند موده ......
• سراج .... خش لحوشه جوه العيال فرحانين ويحضنو فيه لقي الحوش حايس ومش مضموم والعيال قاعدين بدبش النوم وهيا مش باينه
• سراج ....خير يابابا وين ماما ياسالم
• سالم .. ماما مريضه ومش قادره اتصبي اليوم كله وهيا اترجع
• سراج ... تمام خليك يالا خوتك تو انشوفها وانجيكم
• سراج ... خش عليها لقا الدارمضلمه وراقده وموده تبكي موده كنك حبيبتي شن اتحسي
• موده ... وهيا تبكي شي اكويسه
• سراج.....كيف اكويسه وانت تبكي باهي كنك قاعده في الظلام مش من عوايدك ترقدي لعند توه وكنك قالي سالم كل اشويه اترجعي
• موده .... قمعزت وقعدت تبحت فيه وبعدها قعدت تبكي
• سراج .... كنك بسم الله ال حمن الرحيم كان تعبانه صبي انشيلك للمستشفي
• موده ... وهيا تبكي هزت راسها بلالا
• سراج ... باهي شن في شن صاير وجاء حضنها
• موده .... ليا ايام وانا نحس بدوخه وكبدي زاعمه
• سراج... وهو يسمع فيها بانتباه باهي كنك ماقلتيلي معقوله لك كم يوم اتحسي وماتحكيش
• موده ... قلت عادي ممكن هبوط بس بعد مرضتي تاخرت عليا شكيت اني نقعد حامل واليوم درت تحليل منزلي وطلع ايجابي
• سراج .... وهو يضحك وفرحان ههههه وهياةهذي حاجه اتزعل الف مبروك ياعمري
• موده ... وهيا تبكي بس مازال حسن اصغير بكل حرام واناعلي شنو بلحق والا بنلحق
• سراج....وزاد حضنها وانا معاك ياقلبي وانتعاونو عليهم مع بعضنا انا نبي منك عرم اعيال وانت عارفه الكلام هذا وربي يقدرني وانعيشكم احسن عيشه
• موده .... وهيا تمسح في ادموعها ربي ايخليك ليا انت اللي مهون عليا حياتي والله
• سراج ...باهي هيا صبي اغسلي وصلي وانا طالع انجيب غداء من بره علي بين مابرمتي علي الشقه والعيال
• موده ... تمام ربي ايخليك ليا يا حنوني عارف اني انموت فيك صح
• سراج .... لاهكي مايصير شي خليك ساكته والا مايصير لامن غداء ولامن نوضتك اساسا
• موده .... هههههه خلاص خلاص نايضه
• ********************
• عند فيلا الحاج عبدالله .....
• بعد تغدوا مقمعزين يلا الحاجه فاطمه وهيا مقمعزه علي العداله وتصب في الشاهي لهم
• الحاج عبدالله .... شنو سالتو علي الشاب اللي جاي لاختكم والا مازل
• وليد.... لاسالت عليه في منطقتهم كلهم يشكرو فيه باته متوفي ومتكفل بالعيله كلها وعنده خوت شباب اصغر منا
• احمد ...حتي انا سالت عليه اوليد صاحبي يعرفه قال عطوه وانتم مغمضين ناس مشاء الله عليهم
• الحاج عبدالله ... علي بركه الله ياحاجه اسالي بنتك لو موافقه ردو علي العرب
• الحاجه فاطمه .... حاضر ياحاج ان شاء الله
• الحاج عبدالله .... منير عدي لخوك عزيز في المحل العشيه ضروري مسيبه وحده حتي علي الغداء مايلحق ايروح مش ساد انضني جاء الوقت اللي تمسك معاه مش كان مخليك براحتك معناها فايت الموضوع
• منير .. حاضر ياحاج .كلمني عزيز امبدري واتفقت معاه
• الحاج عبدالله ... تمام معناها انا خاش انقيل ياحاجه وعيني علي العصر
• الحاجه فاطمه.... حاضر ياحاج
• الحاجه فاطمه ...شنو خلاص بديت اتقري يا وليد
• وليد ....اها الحمد لله تعينت
• الحاجه فاطمه ....باهي مشاء الله خلاص معناها نبي نفرح بيك وانشوف اعويلتك
• وليد ....الله يربحك يا امي سكرينا عليهاالسيره
• الحاجه فاطمه .... لا مش مسكره وعندي ليك عروس اتنسيك الاولي وبلاها كله
• وليد ... وانا منبيش نتجوز ولو حابه تفرحي بحد اهو احمد قدامك جوزيه وطلعيني انا من القصه هذي
• الحاجه فاطمه .... حتي احمد مش ناسيته لكن انت لعند امتي بتقعد بلا جواز انا قاعده انساير فيكم وساكته ومخليتكم علي راحتكم لكن معش ينفع معاكم الطيبه
• احمد ... ياحويجه كنك شايطه وحيده وحيده وكله ايمشي زي ماتبي
• الحاجه فاطمه ... انا قتلك والموضوع حاطاته في بالي ومش مسيباته لعند اتوافق لان راه والله العظيم انعدي انكمل في الوليه ونحطك تحت الامر الواقع تبي والا ماتبي
• وليد ...وانا منبيش نجوز كنك يا امي
• الحاجه فاطمه ... عليش اها قولي علشان هذك اللي ماتسمي لعند امتي بتقعد كاره الصبايا بسببها اه قولي هيا عاشت حياتها وانت بتقعدلي هك لا والله ماتصير وانا قتلك متخلينش اندير شي من دون علمك
• وليد ... هيا هكي قعدت ياتوافق يا نلوي اذراعك فكيني من هالسيره الي تغم في قلبي اهاا انا كرهت الصبايا و الزواج منها ومنبيش نظلم حد معاي
• الحاجه فاطمه ... انا قتلك فكر وخوذ وقتك بس اوعك اتجيني واتقول منبيش بعده حتشوف شن اندير واني قتلك
• وليد .... بحت فيها ومش مصدق اللي يسمع فيه منها وطلع راقيتله خبط الباب بالقوه
• مروه .....بسم الله الرحمن الرحيم كنهم
• زوبه ...حي هذا وليد بعدك لما ترقاله ومعش حد يقدر ايهديه
• وداد ...انضركنهم زعما علي توفيق
• زوبه ... يانعليا توفيق صار كبدنا والا شنو
• مروه ... حي شكلنا يازوبه شوفي وجها كيف انحمر
• اسراء ... شن في من اللي قريب جاب الباب في يده
• زوبه .... انت عدي كملي نومك ياخميره
• اسراء .... خزي سامطه ماشيه اقعدي فيها ومعش نبي نعرف
• احمد ... وداد وين حبه السكر متاع امي بسرعه
• وداد .....كنها حي عليا اهيا
• احمد .. هاتي بس مافي شي
• منير ....وسعي بالك يامي بس كنك انت هو اللي تبيها حيديرها غير انت سايسيه
• الحاجه فاطمه .... هذا مايبيش مسايسه والله لو ماياخذ كلامي حيشوف مني وجه عمره ماشافه انا وحده ماتسوي اتخلي اولدي دايح هك بلا عيله لا والله مانخليها تقرهني فيه تحسابوها ساهله عليا وين ايقولها هك في وجهي
• منير .. بس هك ياا مي بتظلمي بنت الناس معاه شن ذنبها هيا
• الحاجه فاطمه ... ولدي و عارفه كيف امربياته مستحيل يظلمهاممكن يهملها لكن ايقلل من قدرها مايدرهش واللي في بالي باذن الله ماطبب الا جرحه ويقول طيبك عليا جيبه يا امي
• وفات باقي اليوم وليد ماروحش ومش قادريستوعب ان ممكن يتجوز غصبا عنه ورد كل اللي كان ناسيه او يتناسها من وحده حبها وخاناته
• ****************************
• عند هدي وساره ........
• لجين .. بكرا ان شاء الله نجيك من الصبح عشان قاعدين عند عمتي زهره
• هدي ... خلاص تمام تسلميلي يارب ان شاء الله مانفقدك
• لجين ... وكم عندي هدهد انا اهم شي شدي حيلك وخليك قويه يالاها وردي بالك تضعفي لان ضعفك ضعفها وتوه خليك معاها تصبحن علي خير
• رحمه ... مع السلامه هدي وربي يغفرله ويرحمه
• هدي.... تسلمي ان شاء الله
• رحمه ... ليش ما قلتيليش انك كلمتي ماما وخليتيها تقنع مراد ان نبو نقعدو عند عمتي زهره وكيف مراد وافق اصلا
• لجين .... قنعتها وخلاص وقالت تمام لكن كيف دارت في مراد مش عارفه لان بابا قال عادي يقعدن
• رشا..... نجكن ليا والله قعدتكن جت في وقتها
• لجين ...وين ختيبك ياحنه مسيبك
• رشا ... مش قاعد مسافر وامبدري كلمني طبعا انت محروقه منا
• لجين ....لا محروقه لاشي ربي يعقد عسلكم شنو مش ناويه تعطينا نغيرو دبشنا
• رشا .... هههه حيوانه اهو دولابي قدامك خوذي اللي تبيها
• رحمه ... تعدليش عليها هذي لسانها فالت ومتبري منها
• رشا.... مش معدله اصلا خليها تحكي لعند تتعب
• لجين ... هاكي هذي اتجي عليك يارحمه وانا خذيت هذي
• رشا.... تمام غيرن وانا تو انجي انشوف امي بس
• رحمه ... والله ماعندي نيه في البيته كله منك انت عارفه ما نعرفش نرقد لما انبات بره
• لجين ....منبيش انسيب هدي من الصبح نبي نمشيلها حتي المدرسه فتتها
• ************************
• عند محبه .......
• ايمان ..... دقت علي الباب انخش
• محبه ...تفضلي خشي
• ايمان ..... كنك يا محبه كارسه في دارك وجهك كانك باكيه
• محبه .... لا مش كرسه بس كنت نقرا واعيوني ارهاق بس مش راقده اكويس
• ايمان .... يعني مش علي موضوع ولد عمتي
• محبه .... رفعت اعيونها فيها ونزلتهن
• ايمان ...يبقي عليه انا حنرد علي عمتي ان مافيش نصيب وربي يبعتله نصيبه مع غيرك بس فكري في الموضوع بجديه بغض النظر علي منو العريس يعني حنسالك متبيش اتعيشي احساس الامومه اللي انحرمتي منها مره ثانيه متبيش اتسمعي كلمه ماما مره اخري فكري في كلامي هذا كله وحتلقي انك في شي في داخلك راضي ومتقبل كلامي
• محبه.....ممكن بس مازال مش قادره انوافق مانبيكش تزعلي مني لان بجد قاعده في حال مايعلمه الا ربي اتشوفو فيا رديت نضحك ونهدرز معاكم بس في حاجه جواي مكسوره متبيش تنجبر صح تقبلت قدر ربي بس مش عارفه نطلع من وجعي لان مش ساهل صدقيني وان شاء ماتجربي اللي انا فيه 🥺
• ايمان .... ربي ايريح بالك يارب ويجبر بخاطرك ان شاء الله وتوه تعالي دايره كيكه نشربو بيها القهوه ونفرشو في الجنان عمتي جوها مش تمام نغيرولها جوها بالقعده هذي
• محبه ... تمام هي نغير ونلحقك
• ***************
• عند عمتي زهره
• لجين ... نبي نسالك يارشا علي صاحبك شن صار معاك اللي خلاك اتسيبيه
• رشا ... تنهدت لما توفي معز وعياله كنت في حاله كاني مغيبه مش قاعده في الدنيا كانه اللي صار حلم حتي هو معش عندي نيه انكلمه ولما اهملته القيته يكلم في وحده ثانيه
• رحمه ... باهي شن صار فيك بعد عرفتي
• رشا ... اتصدقي محسيتش بشي عادي يعني ممكن موتت معز هي اللي خلتني منحس بشي
• لجين ... قصدك وافقتي علي خطيبك عشان تقهريه
• رشا ....لالا ابدا ولا فكرت حتي التفكير فيه بالعكس اول ماسمعت الموضوع صليت استخاره وتريحت وافقت وبعد تعرفت عليه حبيته انسان حنون وطيب ويبي رضاي
• رحمه ... ربي ايخليه ليك يارب قصتك معاه حلوه
• رشا .. تسلمي حبيبتي خلاص انا نعست وبكرا ماما من الصبح حتنوضنا نعدو
• رحمه ... انا عطشانه نبي اميه رشا صبي جيبي
• رشا ...في احلامك عدي جيبي بروحك مش شوري بيك
• رحمه ... باهي وكان نلقي واحد من خوتك قاعد
• رشا ... خلاص خليني نبي نرقد ياانزلي اشربي يا ارقدي مش نايضه راه
• رحمه ...اففف نايضه بلا جميلك وناضت لفت شعرهابطريقه عشوائيه
• خليني نوصف شكل رحمه بشرتها لابيضه ولا سمره واعيونها عسليات واكبار ورموشها طوال وشعرها بني فاتح مايل للاصفر طويل لنهايه ضهرها وطولها متوسط
• رحمه ... نزلت وهيا تمشي بشويه وخشت للمطبخ شربت وجت طالعه وهيا راكبه تجري تعترت قريب طاحت وانفك شعرها ومسكتها يدوبرمت بسرعه وتبحت تلقاه كمال
• كمال ... جاء شعرها علي وجهه غمض اعيونا وايشم في ريحته وقلبه يبي يطلع من مكانه 💓
• رحمه ....ءءءء فكت روحها منا وتبي تركب
• كمال .... لو خطبتك توافقي
• رحمه .... برمت عليه مصدوم😳 وترمش في اعيونها
• كمال ...سالتك لو خطبتك اتوافقي
• رحمه ............
• يتبع .....
• بقلم ....أحلام
