• # خريف المحبه .......
• الحلقه الثامنه عشر ........
• الحاجه فاطمه ...قمعز يا وليد نبي نحكي معاك
• وليد .... نعم يا غاليه وحط راسه علي ركبتها وغمض اعيونه
• احمد ..همس لعزيز حي عالعاصفه اللي تبي اتصير توه
• عزيز.... عقد حواجبه عاصفه شن
• احمد ...تفرج وتشوف وهوو خايف من رد فعل وليد
• الحاجه فاطمه ...شن صار في الموضوع اللي قتلك عليه
• وليد ...... ساكت مايبيش ايرد عليها
• واحمد..... اعيونه هوو عزيز علي وليد
• الحاجه فاطمه ...بنعدي نخطبلك البنت اللي قتلك عليها نهايه لاسبوع شن قلت
• وليد ..... تمام ديري رايك
• الحاجه فاطمه .... وهيا فرحانه شن يعني موافق
• وليد .... سقم تقمعيزته ويبحت في امه اهاا موافق
• احمد ....مصدوم ومبتسم وعزيز ايبحت فيهم وفرحان ان واخير وليد يبي يستقر
• الحاجه فاطمه ...لووووووووووولي ربي يفرح قلبك ويريح بالك ياغالي ان شاء الله
• البنات جن يجارن شن في ياماما
• الحاجه فاطمه ...وهيا فرحانه وليد وافق نخطبله
• البنات ...الف مبروك ان شاء الله ايتمم علي خير
• الحاجه فاطمه ...وحتي احمد الايام الجايه بنخطبله ساره اخت صاحبه
• احمد....بحت في وليد وابتسمله وهزله راسه
• وليد ..ابتسمله
• وداد ...مشاء الله عليها ساره اتهببببل بكل ربي ايتمملكم علي خير
• زوبه ...بس مقلتيش ياماما من اللي تبي تخطبيها االوليد
• الحاجه فاطمه ....بعدين تعرفنها مش قايله من توه
• زوبه ...جت جنب وليد ..قصدك حتي وليد مايعرفهش
• الحاجه ..فاطمه ..اهاا اساع ايدير مقابله ويعرفها
• وليد ....ايبحت فيها وساكت
• *****************************
• صباح يوم جديد.☀️.........
• عند عمتي زهره .......
• مجدي .... رشا شن صار في الغداء
• رشا ....خلاص اشويه وانحط علي ماجاء كمال
• مجدي .... تمام ماشي انغير
• الحاج فتحي .....شنو صار ردت عليكم بنت خيك
• عمتي زهره ...اهاا ردت وقالت تفضلو
• الحاج فتحي ...باهي كل شي عالبركه شوفي ولدك وخلينا نمشو ندفعو فيهاا عشان ايسقد روحه ويشقا بشقته وايطلع الفرح
• عمتي زهره ... لاهو قالي نبدا فيها ان شاء الله غير ايدور في عمال مازال
• كمال ...السلام عليكم
• هما ....وعليكم السلام
• الحاج فتحي ... شنو استلمت من المينا اليوم
• كمال ...اهاا استلمت بعد هوتك بيش طلعت
• الحاج فتحي .... ربي ايعوضك علي قد تعبك ان شاء الله
• كمال ...ان شاء،الله
• الحاج فتحي ...قالتلي امك تبي تبدا في شقتك
• كمال ..اهاا ان شاء الله شفت امس كم عامل واتفقت انا وياهم علي الاسبوع الجاي يبدو
• الحاج فتحي ...باهي مشاءالله خلاص معناها انت الها في شقتك ودفعك عليا اناعطيهم موعد يا زهره الخميس الجاي الدفع كان ايناسبهم
• كمال...بحت في امه وعاقد حاجبه باستغراب وهزلها راسه بمعني شنو
• عمتي زهره ....ههههه ياحاج بشويه علي العيل مازال معندش علم انهم وافقو وهيا اتبحت في كمال ربي ايتتم عليك بالخيران شاء الله
• كمال ...تحشم من باته وناض خش لداره والفرحه مش سايعته لانهم وافقو او بالاحرى عشان رحمه وافقت
• ***************************
• عند ساره وهدي.....
• هدي .... هييي حي عليا شن درت من عمله سوده وهيا قريب تبكي
• ساره .....كنك ياهدي فجعيني
• هدي .. ءءءء اه لا شي نسيت ماحليتش الواجب والامتحان فيه كذا عطيني تلفونك انرن علي لجين
• ساره ....ساهله ان معرفتش الحل تو انحله لك انا بعد انروح
• هدي ..تمام خليني انكلم لجين قبل وبعدها ساهل
• ساره ...تلفون تلقيه فوق القجر في الدار
• هدي.... تمام وعدت خذت التلفون ورنت علي لجين
• هدي ... ايوه خيرات
• لجين ...اهلين شن اخبارك هدهد
• هدي ...مش تمام بكل حي عليا يا لوجي دبريلي في حل
• لجين ...كنك حي عليا شن صاير
• هدي ... عديت اناوساره امس تبي تاخذلي تلفون المهم ماصارش من وخذت التلفون فانا عديت شن درت عطيت صاحب المحل تلفوني القديم عشان ايصلحه ليا وتوه اذكرت اني عندي اصور من قبل فيه حي عليا زعما شافهن وخذاهن
• لجين .... نهارك اسود وانت كنك غبيه معقوله فاتت عليك
• هدي ....شن اندير لازم ناخذ تلفون ضرري عشان ساره تقدر تعدي للعمل انت عارفه شن صار
• لجين ... تمام باهي شن اسمه المحل اللي مشيتيله وين
• هدي ....في شارع ......اسمه .......والشاب اللي عطيته هكي اتحسيه محترم
• لجين .... المهم توه مانبيش انهزبك مش وقتها لاني عارفتك محروقه ساره عرفت
• هدي ...لالا حي عليا سادها الهم اللي هيا فيه منبيش انقوللها الله ايربحك لجين ديريلي حل
• لجين ...تمام عندي خالو خالد عنده محل موبايلات كن قلتيلي بس وتو نساله كيف ايصير فيه ممكن يعرف صاحب المحل
• هدي ...تمام المهم بعداشويه طالعه للعمل وبنعدي انجيبه لان قال تعالي بكرا
• لجين ...خلاص تمام نسكر وانرن عليه
• هدي ...تمام اوكي طمنيني بس
• ***********************
• رحمه .....كنها هدي
• لجين ....وهيا اتدورفي اسم خالد تربش في تلفونها شي عليش تسالي
• رحمه ......خزي عادي يعني حسيتك منفعله سالتك بس
• لجين ...اهااخليني انرن علي خالد نبيه زعما في المحل والا روح
• رحمه ... مش عارفه انا طالعه نوتي صفره الغداء كملي والحقيني
• لجين ...بحتت فيها وهزت راسها بمعني باهي ورنت علي خالد ايوه خالو الصقع
• خالد ....اهلين ام لسان كيف خطرنا علي بالك
• لجين ... رايفت عليك قلت نسال عليك بدال مانك فايت اختك وماتسأل عليها
• خالد ....حي علي امك لاتخليها تسمعك اتقولي في الكلام هذا
• لجين ....هههههه وانت كنك خايف منها .
• خالد ..يا حيوانه شن خايف بس امك سكنان مسكين باتك ازرط فيها ياناري واجعني حاله
• لجين ....حي عليك وحي هههههههه المهم
• خاتد .. .ايوه عطيني المهم انا عارف ان وراها قصه رنتك
• لجين .... بنسالك يعني لما التلفون تنكسر شاشته باهي يقدر صاحب المحل اللي يصلحه يفتح الصور وايشوفهن
• خالد ..... وانت عليش تسالي حي علمك نلقلك عاطيه تلفونك لشي محل
• لجين ....والله ماانا صحبتي تلفونها انكسرت شاشته وتبي اتصلحه عطاته لصاحب المحل ونست انها مصور فيه وبعد روحت اذكرتها وقالتها ليا والمحل نفس الشارع اللي فيه محلك فانا قلتلها انشوف خالو ممكن يعرفه الراجل وتحللها الموضوع انت
• خالد .... وهيا كنها غبيه معقوله تلفون امصوره فيه تعطيه عادي هك هذا استهتار اسمه تعدي تشري غيره
• لجين ... حالتهم صعبه والله ماتقدر تشري غيره وتبيه ضروري التلفون عشان تطمن عليهااختها المهم توه انت تعرف حد غادي
• خااد ...شن اسم المحل قبل بيش انقولك نعرف صاحبه والا لا
• لجين ...قالتلي اسمه .....في شارع .....
• خالد ....ارجي ارجي نوع تلفونها سامسونج راهوقديم اشويه وشاشته محروقه
• لجين ....اهاا كيف عرفته انت
• خالد .... تمام عرفتها صاحبته التلفون عندي انا وصلحته وجايه العشيه تاخذه
• لجين ....نجكككك ليا الحمد لله ربي ايحبها والله انت متعرفش كيف ضروفهن وحق ربي بعد قالتها ليا انقهرت قلت حي راحت فيها وهنا ماعندهن حد بكل
• خالد ....كيف يعني ماعندهن حد وين هلهن ..
• لجين... كلهم ماتو قعدن بنتين خوات صاحبتي واختها اللي اكبر منها بس المهم توه خلبني انسكر وانطمنها قاعده علي نار
• خالد .... تمام المهم قوليلها معش اتعاودها اللقطه هذي المره جات فيا مرة اخري متندريش كيف اتجي
• لجين ...تمام خلاص باي توه
• خالد ...سلام وسكر وقعد ايفكر فيها كيف حياتها كان عنده فضول ايشوف شن في التلفون اللي خايفه هك بس تعوذ من الشيطان وافطن لروحه
• *******************************
• عند محبه في الجامعه .........
• محبه ....مقمعزه متوتره لانه اول امتحان وتحس في روحها خايفه انها ماتحلش واشويه وقعد ايوزعو في الاوراق بحتت وكانت الماده للدكتور وليد بحتت في الاسئله وابتسمت وقعدت اتحل لعند وصلت في مساله نفس اللي حلتها لها رغد غيرالارقام بس مختلفه وقعدت اتحل فيهن واذكرت كلام معاذ انها رح اتجي وفعلا صاح جت ضحكت وكملت الحل بنفس الطريقه اللي عطتها لها رغد
• ****************************
• عند فيلا الحاج عبدالله .......
• رغد..... خير ياعميمه كيف حالك اليوم
• الحاجه فاطمه ... الحمد لله بخير
• رغد ...ربي ايتمملهم علي خير احمد وليد
• الحاجه فاطمه ....ان شاء الله والله كنت شايله همه الحمد لله ربي هداه وافق
• رغد ... ربي يكتبله بنت الحال اللي تصونه وتريح باله
• الحاجه فاطمه ...اللهم امين قتلك يا رغد
• رغد... نعم ياعميمه
• الحاجه فاطمه ...عندك رقم سالمه ام محبه
• رغد ...اهاا عندي
• الحاجه فاطمه ...كذا اكتبيه ليا في تلفوني نبي انرن عليها نبي نمشيلها ونبيك تمشي معاي
• رغد ...حاضر ياعميمه وين تليفونك
• الحاجه فاطمه ... اهو خوذي اكتبيه ورنيلي عليها
• رغد ... هي اهو ايرن
• الحاجه فاطمه ..... هاتي هي
• ***********************************
• عند هلي ....
• سالمه ..... ايمان عدي تريحي في شقتك وسيبي عنك تو انكمله انا الغداء
• ايمان ...لا والله ماتصير ياعميمه عادي مافيا شي شكله ردلي الهبوط
• سالمه .... قتلك اركبي تريحي وتو انركبولك غداك لعندك ساد من امبدري وانت تبرمي
• ايمان .... والله مافيا حاجه اشويه دوخه جت وعدت علي حالها وتو نشرب عصير ونقعد اكويسه
• سالمه ....تو بعدين انكلم احميده ايشوفلك دكتوراكويس ضروري علي رنة تلفونها من زعما
• ايمان ....رقم ياعميمه ردي وخلاص
• سالمه ....الو ايوه
• الحاجه فاطمه ...خير كيف حالك ياسالمه وكيف حال صحتك
• سالمه ....الحمد لله بخير كيف حال صحتك ...
• الحاجه..... فاطمه سلم عافيتك طيبه والله
• سالمه ...من معاي سامحيني والله ماعرفتك
• الحاجه فاطمه ...مسموحه ياحنه صدقتي انا فاطمه مرت الحاج عبدلله عمت رغد
• سالمه ..اهاا كيف حالك يافطومه وشن دايره صحتك
• الحاجه فاطمه ....الحمد لله اكويسه والله كان قاعده اليوم جايه انهدرز نا ورغد
• سالمه ...تفظلي مرحبتين بيك في اي وقت اتأنسي وتشرفي
• الحاجه فاطمه ....سلمك ياحنه خلاص مع السلامه
• سالمه .... مع السلامه
• ****************************
• عند هدي وساره .......
• هدي .... خليك في السياره ارجيني انجيبه وانجي عطيني حقه بس
• ساره ..لالا خليني ننزل معاك احسن
• هدي ...وهيا خايفه ءءءلالا مافيش.داعي اشويه مش مطوله انا
• ساره... تمام هاكي خوذي بالزايد احسن
• هدي ..تمام هاتي وفتحت الباب ونزلت وهيا مرتبكه وخشت المحل لقاته قاعد السلام عليكم
• خالد ...وعليكم السلام
• هدي ...معليش امس جبتلك تلفون شاشته مكسوره شن صار صلحته
• خالد ....اهاا تمام ركبتله شاشه وحطيتلك لصقه حمايه عليه
• هدي ...شكرا كم حقك
• خالد ....130بس يا ريت مره اخري تاخذي احتياطك مش اي حد تعطيه تلفون في اصور واطمني انا اللي صلحته
• هدي ...وهيا منزله راسها ومتحشمه وجها انحمر من الارتباك وحست انه موقفها بايخ بكل تمام تفضل هذا حقك وعطيني التلفون
• خالد ... طلع التلفون من الدرج ومده لها لو استحقيتي اي شي انا هنا وهذا محلي
• هدي ...تمام شكرا والسلام عليكم وطلعت
• ********************************
• عند هلي ...........
• سالمه ....محبه راه اشويه اخري جايه رغد والحاجه فاطمه
• محبه ...صاح غريبه ماكلمتنيش رغد
• سالمه ... كلمتني الحاجه فاطمه بروحها وقالت جايه انهدرز
• محبه ...اهاا اشويه ورن الجرس
• سالمه .....اهن شكلهن جن
• محبه ...خليك وتو نفتح انا وعدت فتحت الباب وخشن
• الحاجه فاطمه .....خير يامحبه كيف حالك
• محبه.... بخير يا عمتي فاطمه كيف حالك وشن دايره صحتك انستينا
• الحاجه فاطمه ...الحمد لله الله ايانسك
• رغد ...خيرات كيف حالك شن صار في امتحانك
• محبه ...تمام بخير الحمد لله حليت والله تفضلن
• الحاجه فاطمه ....دام فضلك وخشن قعدن ايهدرزن
• ايمان .. كيف حالك يارغد وين افطومه
• رغد ..تمام الحمد لله
• محبه... جت جايبه القهوه تفضلي يا عمتي فاطمه
• الحاجه فاطمه .... دام فضلك وخذت الفنجان والحلووالله ياسالمه انا جايه اليوم وطالبتك وان شاء الله ماترديني
• سالمه ..لا يبتي بأذن الله ماتطلعي الا وانت راضيه كان في ايدي
• الحاجه فاطمه ... وان شاء الله انا جايه اليوم بنخطب محبه لولدي وليد الكبير
• سالمه ......
• محبه .......
• يتبع.........
• بقلم ......أحلام
