• #خريف المحبه .........
• الحلقه السادسه...... .
• فيلا الحاج عبد الله ...
• وليد ..... اها والله اوصلت ملياش ساعه تمام قتلك انحاول انحل الموضوع من الاول انت عارف ان الموضوع مش شوي وادبست فيه وعشان الصحبه اي بينا نبي انساعدك وسكت يسمع في يلي ايكلم فيه
• وليد ... يعني تبي اتذلني بيها انت وانا عارفين شن صار بالضبط وتوه بنسكر وقتلك اول من حصل فرصه حندبرالمبلغ وندير حل سكت اشويه
• وليد .... تمام خلاص اوكي توه وبرم بيخش ويلقا وراه 😨 احمد
• احمد.... مرحبتين بالغالي ليك وحشه والله وحضنه
• وليد .... وهو يضحك معقوله انجي ونلقاك مش قاعد ولا خلاص قعدت دكتور وتفشك علينا
• احمد ....هههههههه
• وليد ......تضحك صار شن امورك وشن اخر اخبارك
• احمد....... تمام ميه ميه انت شن صار معاك في الموضوع
• وليد .... اختفت الضحكه من وجها وتنهد 😔 زي ماهو ماتغير شي والمشكله انت عارف انه مش شوري وانا عشان معروفه اللي داره معاي مابيتش انسيبه وتوه كان يسال علي المبلغ وانت عارف اللي عندي
• احمد .... انت متفكريش في شي توه المهم انك روحت ولو كان عليك حاجه مكنتش اقدرت اتروح المهم المبلغ حنلقوله صرفه وكان اوحلنا نشوفو عزيز بعدها توه انت كيف واصل تريح ومتفكر في شي وكله ينحل
• وليد ... تمام ان شاء الله خير وخلاص
• احمد ....تمام خلينا انخشو جوا وافرد وجهك ومتخليش حد يحس بشي
• وفات اليوم وكل واحد يفكر في اللي شاغله ساره وهدي ايفكرن في خوهن وياعالم كم يوم حيقعدن علي الحال هذا
• ومحبه اللي كل يوم مازال قبل لاترقد تذكر معز واعيالها وكيف كانت حياتها وكيف صارت
• وعادل اللي يفكر واخيرااا حيتجوز حب عمره ويجمعهم حوش واحد
• وليد ايفكر كيف ايحل المشكله اللي حاصل فيها من غير ماحد يعرف
• واحمد ايفكر في البنت اللي خذت حيز كبير من افكاره ومش عارف شنو السبب اللي امخليه ايفكر فيها هكي هل هو تعاطف والا حاجه تانيه
• وفات الليل علي كل واحد بشكل واشرقت شمس صباح يوم جديد علي جميع ابطالنا وكلهم علي امل انه بكري حيكون احلي .....
• *****************
• عند هلي .......
• امي..... شن صار ياإيمان في الحاجات جابهن احميده
• ايمان.... اهااا جابهن معاه بعد روح من المحل
• محبه ..... صباح الخير كنك ياماما ما وعيتيني وين الضهر قريب يأذن
• امي .... صباح النور ارقدي ماعندك عليش واعيه وانت امس مرقدتيش بكل كل مره جايه اتشوفي فيا
• محبه ... كيف حالك اليوم ان شاء الله اكويسه
• امي ... الحمد لله اكويسه تعالي افطري هيا وانت قعدتي جلده علي عظم
• محبه ....هي جايه مني احميده قاعد والا طلع
• ايمان .... طلع وجاء قاعد فوق اشويه وينزل قال يبي اوراق ناسيهن هنا
• محبه .....اهاا
• ايمان ..... محبه امتي تبي تطلع تاخذي حاجات للفرح
• محبه.... تفطر حطت الخبزه اه مش عارفه والله
• ايمان..... محبه انت متبيش تطلعي صاح قصدك لو تبي عمتي متزعلش ضروري تطلعي تاخذي حاجه وين محبه اللي كانت اتحب تلبس وتفتلك وهيا اللي تنسق
• محبه .... وهيا ماسكه بكيتها لوقتلك اني انكبر ونساير فيكم لان منبيش انزعل حد يمكن اللي يشوفني يحساب اني انسيت بس انا ولايوم فات عليا وانسيت كل يوم نذكر كل تفاصيل الحادث من وعيتنا لعند صار الحادث
• ايمان .....عارفه والله يعني انت تحسابي مش حاسين بيك علي فكره محمد هو اللي قالي انا متاكد انها شايله من بالها انها تطلع وتاخذ حاجه
• محبه .... احميده اه من احميده انا اكثر شي مصبرني هو احميده وجود ماما في حياتي انا بلاهم مكنتش نقدر انتجاوز اللي كنت فيه بس عشان خاطرهم حنطلع وناخذ
• احميده .... ايمان انا طالع لو تبو شي كلميني بحت شاف محبه هلا وين نوم لعند توه
• محبه... اهاا والله مافطنتش للوقت بكل قتلك حميدا نبيك في موضوع لو فاضي بعدين
• محمد ....... اهاا فاضي خلاص لما نروح اندورك
• محبه .... تمام توكل معناها
• محمد...... هي سلام توه
• محبه..... في امان الله
• ************
• عند ساره ..........
• روحت من المستشفي وهيا تاعبه وخشت اتدير دوش عشان اتصحصح واتشوف هدي عشان يمشن مع بعضهن للمستشفي بعدين وقمعزت تستني في هدي لعند اتجي من المدرسه ومن غير ماتحس بروحها رقدت لانها فارطه من التعب
• عند هدي في المدرسه ......
• لجين..... باهي انت وين قاعده توه
• هدي .....عند عمتي زهره جيرانا وتوه مروحه للحوش عشانبي نمشي للمستشفي انا وساره
• لجين .... ربي يشفيه وينوض طيب
• هدي ...امين ان شاء الله وهي تبكي😭 مش عارفه لوصارتله حاجه شن حنديرو ولا كيف حنعيشو ساره تعبانه بس اتكابر متبيش اتبين وانا مش عارفه شن اندير عشان انساعدها بس هيا متبيش انهمل اقرايتي وكله كوم واجار الشقه كوم تاني
• لجين .....وهي تبكي😢 ولان وجعتها صاحبتها امسحي ادموعك وخليك قويه يا هدي زي ماعرفتك ساره معاك هيا قويه بيك ولما اتشوفك هكي حتزيد تتعب و تزيد تنقهر
• هدي ..... وهيا تمسح في ادموعها انا هذا اللي مقويني والله وربي ينتقم من اللي كان السبب 😠في اللي عايشينه وحسبي الله ونعم الوكيل فيها هيا اللي قهرتنا في باتي وخلاتنا نعيشو المعاناه اللي عايشينها توه
• لجين ....ربك كريم وحتفرج ان شاء الله هيا صبي معايا الجرس رن تو اتجينا ابله سكينه بعدك ادورلي في سبله
• هدي .... وهي تمسح في ادموعهاوتضحك هههه هيا
• *******
• عند البنات في فيلا الحاج عبدالله ...
• وداد ..... هيا اتكلم في التلفون في صاحبتها اهاا قالي نبي انتعرف عليك لانك عاجبتيني لو تفاهمنا نجي نخطب
• نجاح ..... والله استاذ توفيق اكويس بكل محترم ماينردش يا وداد وانا قلتها لك من قبل انه يبيك وعينه منك
• وداد.... مش عارفه والله انا سريب المكالمات والجو هذا منبيش انخش فيه انت عارفه اني عمري ماكلمت شاب من قبل ولو فكرت ان انعطيه رقمي حيكون عند وليد علم بالشي اللي حنديره مستحيل انحط روحي في موقف لو صار ماصار وانكشفت مانبقاش خايفه من حد انه يعرف
• نجاح .... انت ادري بوليد خوك شن حيكون موقفه بس بجد استاذ توفيق انسان ذوق وفعلا يبيك بجد فلازم تعطيه فرصه حرام تضيعيه من ايديك
• وداد ......ايصير خير انفكر في الموضوع وانشوف شن ايصير معاي سلام توه
• نجاح.... سلام وافكري اكويس قبل لاتعطي قرارك
• زوبه ..... معقوله يا دودي اتقولي لصاحبتك في حد معجب واختك حبيبتك لا
• وداد ..... اسسسسسس ياحيونه من امتي انت هنا
• زوبه .... من لما قالك انت عاجبتيني وبنتعرف هههههه
• وداد ..... اوف وراس زوبه فكيني من الدوه ايوه انا بروحي مش عارفه شن اندير
• زوبه .... باهي تعالي نحكو بجد والله مش حنركب عليك انت شنو عاجبك باهي
• وداد ....هو والله انسان اكويس بكل ومحترم من قبل نجاح ديما اتقولي عينه منك بس انا عادي يعني
• زوبه .... باهي شكله قصدي سمح وطرف
• وداد .... عارفه انا اللي تاعبه اللي نحكي معاك
• زوبه .....ههههههه خلاص والله خلاص انا انقولك شن حديري بس قبلها قولي ورس دودي سمح وشخصيه والا اصلع وشين هههههه ٥
• وداد ...... حولي يابارده معش نبي نسمع منك شي
• زوبه ...... ههههههه خلاص اخر مره والله نحكي معاك جديات بما انك متبيش سريب المكالمات والجو هذا قوليله طبعا لو جاء وسألك انك مش متاع مكالمات ولو في باله شي ايجي من الباب ويخطب وبعدها خوذ وقتك ونتعارفو زي ماتبي لان مستحيل انكلمك ومفيش شي رسمي بينا كلا قصه وليد انك اتقوليله الكلام هذا ويسكت هذي طلعيها من راسك لان مش حيسكت ومرات اتصير مشكله انت في غني عنها وانت وحضك لو صاح يبيك حيجي يخطب ولو لا معناها بيكسد بس
• وداد ..... تمام انحاول اني انقولها له بطريقتي طبعا مش زي ماقلتي
• زوبه..... باهي اخرسؤال جوابيني عليه لكن وراس وداد
• وداد .....شنو
• زوبه ..... شن شكله ههههههه
• وداد....... انت وحده بارده عارفه روحك وانا الغلطانه اني حكيتلك اصلا
• زوبه ..... انا حاسه انك انت اللي معجبه بيه مش هو بس
• وداد..... وجها انحمر وعزقت فيها المخده اطلعي من يالا وجهي بسرعه احسلك راه
• زوبه...... طلعت تجري وتضحك
• مروه...... كنك تجري طالعه
• زوبه..... قريبا جدا حيقعدعندنا فرح
• مروه .....شن اتقولي انت تعالي هنا يافرخه
• **************
• عند نورا ........
• روحت لجين وخشت للشقه لقت نورا قدامها
• لجين..... خير
• نورا.... خير كنك قالبه وجهك
• لجين ... شي ياماما وخشت لدارهن
• نورا ..... لاحول الله وخلاص مراد نبيك تشيلنا لعند عيت جدك راه مش تطلع وتسيبنا بعدين
• مراد..... باهي بس طالع بدري قولي للبنات ايوتن روحهن بدري منبيش نرجي ايوه
• نورا...... باهي تو انقوللهن نتغدو ونلمو الحوسه وبعدها اتشيلنا وبكري نبو المحلات فضي روحك هاليومين خلاص قرب الفرح وخواتك يبن دبش من توه قتلك مش اتقول مش فاضي
• مراد..... تمام بس هن يومين مايخذنش فيهن مش شوري ايوه لان عارف الفرخه لجين ديما اتشحور في امي بيش تاخذ لو ملقتش مدخلنيش بيها اتدبر راسها
• نورا..... كيف هكي لمن نبو انقولو باهي تشيلهن وانت ساكت لعند يلقن حاجتهن
• مراد ...... قصه والله حتي انا مش فاضي راه انا قلتها يومين وبعدها ايدبرن روسهن
• نورا .....انت غير شيلهن قبل وبعدها ساهل
• رحمه ...... السلام عليكم
• نوراومراد ......وعليكم السلام غريبه مروحه بدري
• رحمه ....الاستاذ معتذر رنيت علي بابا جاني
• نوا ....اهاا خلاص خشي غيري ادبشك علي بين ماحطيت الغداء بعد باتك روح
• علي .... السلام عليكم
• نورا ومراد ..... وعليكم السلام
• علي .... وينك اليوم استنيتك امبدري اتمر عليا للمحل
• مراد .....عندي جامعه اليوم قتلك انجيك العشيه من امس
• علي .....خلاص معناها عدي لمحل اللي في فنيسيا وهو اللي نبيك تمسكه وخوذ معاك معاذ خليه يمسك الحسابات
• مراد.... تمام معناها انكلمه وانقوله
• **********
• عند موده .....
• سراج... موده وينك
• موده.... طلعت من الدار وفي يدها ولدها نعم يا عمري هنا
• سراج ...... مبروك عليك الارض وان شاء الله ربي ايقدرني ونديرلك الحوش اللي خاطرك فيه
• موده ..... حطته ولدها في المشاي وجت حضناته وتضحك نجك ليا يا ضي اعيوني مبروك علينا انا وياك وتبوس فيه امووووووووه
• سراج ..... ههههههههه وليا نجك ياقلبي يا مطرشقه العيال ايبحتو فيك
• موده ...... ههههههه عادي المره هذي حاله خاصه تستاهل اكثر من بوسه بس نعوضها لك في الليل
• سراج .....يا نعليا منك انا وغمزلها هههههه شنو باهي واتيه نحطك عند هلك
• موده .....اهااا نلبس اشربي بس وانت طلع العيال ولاحقتك
• سراج .... طلع العيال وهو فرحان ان قدر ايريح ايفرحها علي قد ماصبرت معاه في محنته اللي خلاته يعرف انه اختياره صح
• *********************
• عادل.....خيرات يا غلاي
• سحر .... اهلين حبيبي شن اخبارك
• عادل .... فوق الريح خلاص اسبوع وتقعدي جنبي وفي حضني
• سحر ...... ههههه عادل خلاص
• عادل ..... لا وراسك مافيها خلاص توه كيف نبي نبدا انا ارخيلي روحك اه فكيني من الحشم
• سحر ......عادل والله انسكر راه اسكت خلاص
• عادل ..... واخري عادل تمام تمام انتفاهمو فيهابعدين شنو كملتي حاجتك خلاص
• سحر ....اهاا خلاص كملت مازالي كم حاجه هك بس شور الكوافير
• عادل... تمام شنو ناقصك افلوس والا حاجه قولي حبيبي اهاا نزعل منك راه لو ماقلتيش
• سحر... تسلملي يارب لا والله تمام انت مش مقصر اصلا
• عادل.... تمام وقعدو ايهدرزو علي يوم الفرح وشن بيديرو
• **************
• عند ساره وهدي .............
• هدي.... اتشوف في عمر خوها من القزاز شكله مافيش اي تحسن
• ساره..... الصبح قالي الدكتور وضعه مستقر بس مازال في غيبوبه
• هدي.... وهيا تنهد قتلك ساره ردي للشغل الوضع شكله مطول ولازم تعدي عشان مايلقوش سبله عليك وايفصلوك وانا قاعده هنا توه وبعدين تعالي وانت مروحه
• ساره .... لالا روحي نحطك عند عمتي زهره وانا حنشوف الدكتور توه ونساله علي حالته وحنبلغ الاستعلامات برقمي لو صاراي شي ايبلغوني
• هدي.... تمام باهي كيف ايصير في اجار الشقه منبيش انضايقك بس لازم نلقو حل
• ساره ... وهيا اتنهد متشغليش بالك انت حندور علي شغل تاني العشيه بشهادة التمريض الي واخذتها وحنشوف الدكتور لو عنده امكانيه ان ايشوفلي شغل في مكان يعرفه وانا حندور في عيادات خاصه
• هدي ..... كيف هكي وانا حنقعد هكي مش حنساعدك بشي
• ساره .....هدي اتساعديني لما تقري اكويس وتنجحي هذا المهم توه الله ايخليك متزيديهاش عليا بالكلام هذا وتوه خليني انشوف الدكتور وانجيك
• واتجهت ساره لغرفه الدكتور احمد ودقت الباب
• احمد ....تفضل
• ساره ... السلام عليكم دكتور
• احمد ....وعليكم السلام تفضلي انسه ساره
• ساره .....جيت نسالك علي حاله عمر شن وضعه
• احمد ..... قاعد زي ماهو مافيش تغير
• ساره ... نزلت اعيونها وتنهدت وناضت شكرا دكتور عطلتك برمت تبي تطلع وبعدها ردت يعني دكتور لو سمحت نبي نسالك لو تعرف مكان فيه نقص ممرضات يعني
• دكتور احمد ... قصدك انت ممرضه
• ساره .... اهاا عندي شهاده تمريض غير شهادتي الجامعيه فلو يعني تعرف مكان اتكون درت فيا معروف
• احمد .....تمام انشوف وانرد عليك بس ممكن لما اتجي مره اخري اتجيبي ملفك معاك وان شاء الله تنحل
• ساره ....بارك الله فيك ومعروفك هذا مش حننساه لك وشكرا وطلعت علي امل انها تفرج وتنحل كل المشاكل اللي هيا فيهن
• **********************
• وفاتن الايام وجاء اسبوع فرح عادل وعدن البنات ونورا خذن كل وحده اللي تبيه بس رحمه خذت الدبش العملي بس فستان محصلتش
• رحمه......ياماما كلميه قوليلا ايشيلني نقعد عادي بلا قفطان انا
• نورا ....عارفه خوك قالها لكن من الاول فوق من مرتين مش شايل شن تبيني انديرلك رني علي باتك ايشيلك وخلاص
• رحمه ..... يعني عادي عندك انت نقعد بلا قفطان جربيه انت بس
• نورا.....مش مجربه عارفته شن يبي ايقول مافيش داعي انرن
• رحمه .....رقتلها خلاص قريب تبكي قعدت ساكته وخلاص جتهن محبه
• محبه ....كنك يارحمه كنها يانورا
• نورا .....محصلتش قفطان ومراد سكر راسه مايبيش ايشيلها
• محبه ..... خلاص تزعليش روحك نمشي انا وياك انا مزلت ماشريت تو انكلم واحد منهم وتو نطلعو انت وتي روحك بس
• رحمه .... حضنتها وهيا تضحك نجك ليا اخويله العسل خلاص ماشيه نلبس
• محبه ....تمام عدي خليني نشوف واحد منهم
• ****&******
• عند فيلا الحاج عبدالله ......
• رغد .....عزيز نبي نطلع اليوم لوفاضي انا والبنات ناخذ دبش علي فرح خو محبه
• عزيز .....خليها بكري باهي مش فاضي بكل اليوم
• رغد ... منقدرش بكري محبه عازمتني علي تفريشه الشقه ومايصيرش عارفه حنروح متاخر وتأجل
• عزيز .... باهي خليني انشوف منير اكيده فاضي ما عنده مايدير ايشيلكن وخلاص
• رغد .... تمام بس عطيني مبلغ نبي قفطان حفله سمح
• عزيز .... عندي افلوس هنا حاطهن في القجر عدي خوذي منهن
• رغد ....ربي ايخليك ليا ولايحرمني منك
• عزيز .... نبو حاجه حلوه عاد حق الطلعه
• رغد ..... يانعليا منك يعني متفوتش شي بلاش
• عزيز..... تأنا نستغل فيهن الطلعات هذن عشان انحصلي كم بوسه علي كم حضن بعدك الايام هذين فايتيني بالطويل
• رغد ...... ههههه معليش يا عيوني انت عارف جوي يخرب بعد نقعد مريضه
• عزيز .... اصلا بعون الله قررت اخر مرضه معش عندي لها راس وبعدين افطومه كبرت نبي انسمي عبدالله
• رغد .... فنصت اعيونها شن
• عزيز ....اتفنصيش مش متنازل ولا مغير راي وحطيها في بالك
• رغد قعدت ساكته وخلاص
• واتصل عزيز بمنير
• منير .... شنو والله طالع جاييني الشباب توه مايصيرش منها راه الطلعه
• عزيز .... باهي تمام خلاص اربح مدورش
• منير .... فكنا من الجو انت عارف والله لو مش مواعد الشباب راه شلتهن
• عزيز .....والله مافي حاجه خلاص قتلك اربح مادور شي
• منير ....تمام سلام توه
• وليد .... شنو طالع شكلك
• منير ...اها جايني الشباب متعشي بره
• وليد ....اهااا
• منير ...قتلك البنات كانن يبن السوق وتو غير كلمني عزيز لان رغد معاهن لوفاضي شيلهن عندهن فرح الخميس
• وليد..... تو انخش انشوفهن اهو حتي الواحد ايغير جو
• منير.... تمام سلام اهم جو الشباب
• وليد .....سلام وخش جوا لقا وداد منو من اللي يبي يعدي للسوق
• وداد ..... اسراء وزوبه ورغد
• وليد.... خلاص قولياهن ايوتن ارواحهن نصلي العصر ويطلعن
• وداد ....تمام
• ***************
• عند.محبه ورحمه .....
• احميده..... وين تبني نشيلكن
• رحمه عدي مول ...... فيه حاجات حلوات بكل
• احميده.... تمام
وصلن وقعدت رحمه من محل لا محل وملقنش شي يعجبهن لعند خشن لمحل وقعدن ايشوفن في البضاعه وعجبتهن بكل رحمه اخويله تعالي شوفي هذا ايهببببل ايجي عليك من غادي كان قفطان سمائي هادي لونه وقماشته حلوه و ثلاث ارباع الكم واكتوفه طايحات ونازل ظابط ويرسم الجسم رسم ومرصع بفصوص ذهبيات من يالا الصدركان قفطان بسيط وايهبببل
رحمه ... وراس اخويله خوذيه حتقدي فيه اتهبلي عشان خاطري
• محبه ... تمام معليش لوسمحت نزلي منا 40
• الشاب ...حاضر هي وعطاه لها
• محبه .....علي كم معليش
• الشاب ....250
• محبه.... تمام هيا شوفي رحمه طولنا ومازال لاحذيه والاكسوارات
• رحمه ....هي تعالي معاي انشوفو وقعدن ايدورن لعند طاحن في واحد لونه احمر سيره عريض وامبوج وقصير
• رحمه.... شن رايك ياخويله ايجنن صاح
• محبه .... اهاا حلو بكل خوذيه خلاص
• رحمه .... ان شاء الله في مقاسي
• محبه ...معليش في منا38
• الشاب.... اهاا في ان شاء الله
• محبه .....نزلي علي الاحمر لو سمحت
• الشاب..... تمام ونزله لهن
•
• زوبه ..... في محل شفته عالنت نبي نمشيله هو الاول في حاجات خيااال
• رغد ...هيا باهي مرات انحصلو منا كلنا بعدك وليد اللي جايبنا مش عارفه كيف حسيتها سامطه بكل منبيش انطولو عاد
• وخشن للمحل وراهن وليد
• محبه .... وهيا اتسلك في حقهن
• رغد .... هييي محبه خير ات
• محبه.... وهيا تضحك خير شن اخبارك وقعدن ايسلمن علي بعضهن وليد مصبي يرجا فيهن امتي ايكملن
• رغد ....شن اديري هنا
• محبه ....رحمه تبي قفطان لفينا علي المحلات كلهن محوتك بيش حصلنا
• رحمه ...هيا اخويله خالو يرن
• وليد ..... ارتفع حاجبه واستغرب كلمه اخويله
• محبه... برمت علي رحمه هي طالعين سلام توه نتلاقو بكري متغيبنش كلكن وسلمن علي عمتي فاطمه والبنات
• رغد والبنات ان شاء الله مع السلامة
• وخشن خذن حاجتهن وطلعن
• **************
• عند ساره بعد حطت هدي عند عمتي زهره قعدت اتدور في العيادات بس محصلتش بكل وروحت تعبانه من غير اي فايده وقعدت اتفكر في اجار الشقه اللي خلاص قريب يكمل الشهر ولازم اتحصل شغل تاني عشان تقدر تدفع حقها
• اما عند هدي كانت تسمع فيهن وهنا يحكن علي الفرح وحزت في نفسها وجعتها روحها انها قيدتهن
• عمتي زهره .... انت اقعدي مش ضروري اتعدي عيب البنت جايه وقاعده عندنا متجيش نمشو وانسيبوها وهنا محتاجاتنا توه
• رشا ....خلاص عادي مش لازم نمشي واعتذريلي من محبه وعمتي سالمه
• عمتي زهره ... خلاص معناها توه اسكتي مرات تسمعنا والا حاجه عيب تحساب منبوهش
• رشا ... تمام نايضه اندير قهوه قريب المغرب ياذن علي طلعه هدي شايله شنطتها امتاع المدرسه وتبي تطلع اتروح وخشت عليهن مع السلامه يا عمتي زهره طالعه ساره رنت عليا وقالت روحت منبيش انخليها بروحها توه
• عمتي زهره ... اربحي يابنيتي خلاص وتعالي بكرا مش اتقولي لالا مش جايه
• هدي .... اءءء اها والله بكرا مش جايه صاح ساره عندها معمل وانا نبي نقعد عند عمر في المستشفي بارك الله فيك مقصرتنش كاني في حوشي
• عمتي زهره .... مش بيناتنا الكلام هذا خلاص براحتك امتي ماتبي اتجي حوشنا مفتوحلك في اي وقت متحشميش
• هدي ..بارك الله فيك والله ماقصرتي هي تصبحو علي خير
• عمتي زهره ..... وانت من اهل الخير ان شاء الله
• ورحت هدي ومابتش تحكي شي لساره وقالتلها انهن سمعتهن عند انه عندهن فرح الاسبوع هذا فامتبيش تعدي تقعد عندهم واتقيدهم وساره سكتت لان مافيش عندها حل تاني الا انها تقعد في الحوش وخلاص وهيا تقضي شغلهاو معندهش مادير
• عند محبه ......
• يوم اقراية الفاتحه......
• كانن البنات يرقصن ودايرات جو مش عادي ويرجن امتي يكملو الفاتحه عشان عندهم عشاء رجاله وكانن قاعدات رغد والبنات وعمتي زهره ورشا واشويه واحميده رن علي محبه وقاللهم قروها وانقلب الحوش زغاريت وبعدها قعدن ايوتن في حوسه العشاء امتاع الرجاله
• نورا .....عدي يارحمه للمخزن بسرعه جيبي القازوزه من الفريز هيا نقصت عليهم ويرجو
• رحمه هيا هي نلبس حاجه بس
• موده.... مافيش حد من غادي غير عدي بسرعه مافيك ماخشيتي جوا تو تمسكك شي وحده من البنات
• رحمه ...باهي هي ماشيه وطلعت وخشت خذت القازوزه من الفريز وطلعت تجري من غير ماتبحت قدامها وتخبط في حد وايطيح صندوق القازوزه من يدها
• رحمه .... هييييييييي
• .............
• يتببع........
• بقلم ........أحلام
