• # خريف المحبه ....
• الحلقه الثالثه وعشرون.....
• عند ساره .......
• ساره .... ها شن رايك هكي تمام كانت لابسه قفطان قصير لعند الركبه وكمه ثلث ارباع لونه تركوازي وفيه ورد ملون ودايره شعرها فلو وقاصاته مدرج لعند نص الظهر ودايره مكياج خفيف رسمه عين كات وروج وردي هادي
• هدي .....نجك لياطالعه اتهبلي
• ساره ...تنهدت شنوباهي واتيتي الحاجات
• هدي ...اهاا كله واتي شنو تبي تعطيه الهديه اللي جبتيها والا
• ساره ..اهاا اكيده بس خليها لعند يبي يروح انخش انجيبها له
• هدي .....تمام اهو الباب ايرن شكله جاء خليني نفتح وعدت اتشوف من
• احمد ...احمد افتحي اهلين هدي شن اخبارك
• هدي ...تمام الحمد لله الف مبروك ان شاء الله تفضل
• احمد ..الله ايبارك فيك .تسلمي
• هدي ...دخلتاه المربوعه خوذ راحتك اشويه واتجيك ساره خاشه انكلمها
• احمد ..مبتسم تمام
• هدي ...ساره خشي بسرعه يرجا فيك وانا اندير القهوه ونكلمك تمام
• ساره ...تمام هي بحتت في روحها علي المرايه وسقمت شعرها وزادت عطرها وطلعت وهيا مرتبكه وترعش وقفت قدام الباب وخذت نفس وزفراته وخشت احمم
• احمد ...كان مطبس راسه ويرجا فيها ويلعب بمفتاح السياره لما سمع صوتها رفع راسه وقف وقعدن عيونه يلمعن ومبتسم
• ساره ..قدمت عليه وهيا مبتسمه خيرات ومدت يدها
• احمد ... اهلين .وههو يضحك ومد يده وجبدها حضنها
• وحط راسه علي رقبتها وقعد ايشم في عطرها واخيراااا الف مبروك عليا انت ياقلبي
• ساره ....تفاجات بيه بس بعدها رفعت ايديها وهيا ترعش وحضناته وحست بكميه الامان اللي كانت ادور عليها وطولو وهما علي الوضع هذا الله يبارك فيك
• احمد .... باعدها وباس خدها وبحت في عيونها انحبك ونزل عليها باسها
• ساره .... كانت ترعش ومش قادره اتحرك خلطت عليها ومعش عرفت مادير
• احمد.... تباعد عليهاوقعد ماسك وجها بيديه ويحكيلها وهيا قريب اتدوخ من قربه ليها كنت ماسك روحي علي اني انقولها لك لاني نبي انقولها وانت حلالي ملكي ومرتي وطلقها علي دقت الباب
• احمد ...وخر عنها وقمعز وقعد يمسح علي جبهته العرق من الارتباك
• ساره ...قعدت تسقم في شكلها وطلعت لهدي
• هدي ...هاكي القهوه واشويه انجيب العصير تمام
• ساره .وهيا مش معاها ءءتمام
• هدي ...بحتت في اختها قعدت تضحك خلاص خشي
• ساره ....خذت الصفره وخشت وهيا وجها احمر ومش قادره ترفع اعيونها فيه تفضل
• احمد ...خذا الفنجان منها
• ساره ....حطت السفره وقمعزت جنبه بس بعيده اشويه عليه
• احمد ...قربي كانك بعيده هههههه متخافيش مش حندير شي
• ساره ...وهيا مبتسمه وقربت قمعزت جنبه باهي اشرب قهوتك
• احمد ...حاضر شنو الجو اليوم جاكم حد والابروحكن
• ساره ...لا جتنا عمتي زهره ورشا بنتها وبعد روح عمي فتحي جاء بركلي وطلعن روحن
• احمد ..اهاا تمام نحنا حايسه عندنا عزومه عشاء وعشان وليد اليوم فرحه
• ساره ...اهاا الف مبروك ان شاء الله
• احمد ....حتي نحنا هانت اسبوعين واتكوني عندي
• ساره ...وهيا مبتسمه ان شاء الله
• احمد ...خليني انلبسلك الدبله واحسن حاجه انها ماصارش من البيان عشان انا انشوفك ونلبسها لك
• ساره ....هههههههههههه
• احمد ..ربي ايدوم الضحكه علي هالوجيه القمر
• ساره ...بوجودك ان شاء الله
• احمد ...لبسها الدبله وهيا لابساته وخذا باس يدها من جو بوسه طويله ربي ا يقدرني ونسعدك
• ساره ...وايقدرني انكون قد حبك يارب
• احمد ...اناخليني نمشي توه وهذي هديه بسيطه تفضلي
• ساره ...تسلم يارب مكانش في داعي
• احمد ....معش اتقولي هك نزعل منك
• ساره ...ههه كله الا زعلك ارجاني اشويه هنا
• احمد .....تمام
• ساره ...هدي وين البوكس بسرعه يبي يطلع
• هدي ..اهو هاكي وتيته لك اقريب
• ساره ....يسلمو وطلعت وخشت عليه تفضل
• احمد ....يسلمو وباس خدهاا
• ساره ....وهيا وجها احمر احمم هههه
• احمد ...تعالي جنبي ناخذو صوره
• ساره.... جت جنبه وصورو سلفي كم صوره
• احمد ... ههههههه خذيت راحتي واجد صاح
• ساره.... ههههههه
• احمد ....هي سلام وتصبحي علي خير انروح وانرن عليك تمام وحب علي راسها وحضنها انا نطلع خير
• ساره ....هههههههههه وانت من اهل الخير ودير بالك علي روحك وصلاته لعند الباب
• احمد...... خلاص خشي هي سلام
• ******************************
• في السياره .........
• وليد .....ركب السياره ولعها وهو ساكت محكش معاها وكانو اصحابه دايريله جو وتبيب ومسجل عالي وكل واحد يبي يسبقه ويكلمو فيه وهو يضحك عليهم
• محبه .... ساكته وتعصر في ايديها من التوتر ومش قادره حتي تبرم وجها وتبحت فيه
• وليد ..وكسر الهدوء للي في السياره وولع المسجل
• حبيبي ياحبيبي ........ قصتناا شو غريبه
• انت المبدا ..........والباقي خبر ياحبيبي
• اويني انا عندك ......ساويني شو مابدك
• علمني كون مثلك .....كمل هالكان ناقصلك
• خلي الايام تثبتلك ....والاخر عمري اخلصلك
• وليد ......بحت فيها وبرم وجها وقعد يسوق ويسمع في الاغنيه اللي حركتله مشاعره وتمني ايعيش اشعور هذا
• محبه ... كانت تسمع وتدعي انها ايقدرها اتعيش معاه وتنسي الماضي
• لعند وصلو ودخل السياره لعند جوا وونزل وجاء فتح بابها انزلي ومكسها من يدها
• محبه .....لماسمعت صوته حساته ان مار عليها وبعدها مسك يدها ركبتهاا رعشه وساعدها لعند خشت وهنا لما سمعن التبيب عرفنه جاء قعدن ايزغرتن لووووووووللللي
• واستقبلتها الحاجه فاطمه والبنات وهو طلع يالا الشباب
• الحاجه فاطمه .....تحضن فيها مبروك يا بنيتي اجعلها جوازه الدهر يارب
• محبه ...تسلمي يا عميمه ان شاء الله
• رغد ...انستيي عيلتنا يا غلاي
• محبه ...نجك ليا الله ايانسك
• وسلمن عليها البنات وهنا فرحانات ودخلنها في الدار اتسقم شكلها وتطلع اتقمعز وتعرف علي العيله واللي اتشوفها تنبهر بيها كانت طالعه خيال وكانت حنتها زايدتها سماحه واشويه وجتها الحاجه فاطمه هيا يامحبه وليد جاء
• محبه ..صبت وطلعت رغد تعالي اشويه
• رغد ...نعم شنو تبي
• محبه ....عبايتي هاتيها نبي نلبس
• رغد ..اطلعي انت وتوانجيبها لك بعدين هيا عمتي ترجا فيك
• محبه ...وهيا مرتبكه تمام هي
• الحاجه فاطمه ..... تعالي من هنا عشان الصبايا مايبيش ايخش
• محبه... مشت وراها ومطبسه راسها وماسكه قفطانها لان طويل وباينه منه حنتها لعند وصلت هيا والحاجه فاطمه
• الحاجه فاطمه ...اهي عروستك استلم وتصبحو علي خير
• وليد ..كان مصبي ومنزل راسه بعدها سمع خطواتها بالكعب رفع راسه وتفاجاء بجمالها وفتح اعيونه علي اخر وهذا كله مشافش وجها وركز علي لون الحنه اللي باينه من ايديها وكرعيها لعند وصلت فيه الحاجه فاطمه تسلميلي يا غاليه وانت من اهل الخير وبرمت علي محبه ربي ايهنيكم وايسعدكم ان شاء الله
• محبه ....رفعت راسها وحبت علي راس الحاجه فاطمه تسلمي يا عميمه ورفعت اعيونها وتلاقن في عيونه وفتحتهن علي الاخر من المفاجاءة ومتوقعتش انه يطلع راجلها دكتورها في الجامعه وقعدت اتبحت فيه ومش مصدقه واذكرت سؤاله في الجامعه علي الدبله وايجابتها عليه ورفعت حواجبها من الصدمه بعدها تحاولت انها ماتبينش رده فعلها له
• وليد .... لما باست راس امي فرحت بحركتها وكانت نرجافيها امتي ترفع اعيونها فيا ونبي انشوف رد فعلها بعد اتشوفني وانشوف اعيونها كانت نضرتها مصدومه وكنت انشوف فيها جميله بس لما رفعت اعيونها وتلاقن بعيوني انبهارت بجمالها كانت تهبببببل بمعني الكلمه وما افطننا الا بامي وهي اتقول اركبو خلاص وعبايتها وتو اتجيبها لها وحده من البنات وركبو هيا قدامه وهو وراها
• *******************************
• عند هدي وساره .............
• هدي ...تهببببل الدبله يا سروو ربي يحفظه لك
• ساره ... اهاا حلوه بكل تعالي نفتح البوكس انشوفو شن فيه كان بوكس كبير
• هدي ..هيا متشوقه نعرف شن فيه
• ساره ..حتي انا و فتحاته كان فيه قفطان احمر صدره سبعه ونازل علي الجسم وفيه فتحه لعند الفخذ ومعاه كندره وشنطه وطاقم علي شكل قلب ومليان البوكس بشكلاطه ورد
• هدي ...واااااااااااو ايهببببببل خيال بكل عليك ذوق عنده
• ساره ....وهيا فرحانه ومش قادره اتصدق انها واخيرا عايشه الفرحه هذي اهااا حلو بكل
• هدي ..تتهني فيه يارب بس كيف عرف المقاس
• ساره ..مش عارفه والله وهيا تحكي رن تليفونها بحتت لقاته احمد
• هدي ..خلاص انا تصبحي علي خير انت خوذي راحتك وانا انعدي نرقد
• ساره ......وانت من اهل الخير تمام ايوه
• احمد ..يا هلا بحبيبي
• ساره ...اهلين شن اخبارك توه روحو الناس من عندكم
• احمد ...تمام اهااروحو كيف خشيت غيرت وخشيت مكاني وانت شن اديري
• ساره ...ضميت انا وهدي الحوسه وتوه كنت انشوف في البوكس اللي جايبه كله ايهببببلن كلهن ربي ايخليك ليا
• احمد .... اه نعليا نا نجيلي اللي انطلق معاي
• ساره ....ههههههههههههههه
• احمد...... دوووم الضحك علي قلبك ياقلبي
• ساره ......انا وانت ان شاء الله
• وقعدو ايهدرزو ويتعرفو علي بعضهم من اقريب اكثر
• هدي ....حطت راسها تبي ترقد اشويه رن نقالها بحتت في الساعه لقتها اقريب الواحد وبحتت في نقالها لقاته رقم مابتش اترد اشويه وصلتها رساله
• (ردي انا خالد نبيك ضروري )
• هدي....حي عليا شن اندير توه انا اشويه وعاود ايرن التلفون وخذاته وفتحت ايوه
• خالد ..يامرحبا شن الاخبار
• هدي ... شن تبي مني لو سمحت
• خالد ..كنك عالقه طول هكي عاد
• هدي ..الله ايربحك خطاني وقولي شن تبي مني وشن هيا الحاجه اللي حنعرفها واناوالله مش متاع وجيج مكالمات والجو هذا
• خالد ...ومن قال اني امتاع وجيج بس انت عجبتيني ونبي انتعرف عليك
• هدي ....وانا منبيش انتعرف انا حياتي مش زي اي بنت فارجوك معش اترن عليا ودور غيري اتعرف عليها
• خالد ....اصبري بس كنك هك متعطيش الواحد فرصه تذكري يوم اللي جيتيني وجبتيلي التلفون عشان انصلحه
• هدي ... ارتبكت وخافت انه شاف اصورها اهااا كنه شنو شفت صور صاح
• خالد ...صور شن انا عندي خوات مستحيل انديره حاجه هك المهم ونا طالع لاقتني امي دعتلي ربي يفتح عليك و يفرحك ويعطيك مافي بالك ويرزقك بنت الحلال اللي تسر قلبك وخاطرك سبحان الله كنها دعوتها استجابت جيتيني انت اختك يومها
• هدي .....باه وبعد القصه هذي كلها شن نفهم يعني
• خالد ... نبي انفهمك ان ننتعرفو وانت مش خاسره شي
• هدي ...وانا منبيش انتعرف وصلك ردي فلو سمحت انسا رقمي ومعش ترن عليا لان منبيش اختي تفطنلي سلام توه وسكرت
• خالد ....افففففف تبي اتعبني معاها هذي بس انا وراها وراها لعند اتلين
• ********************************
• عند محبه ووليد..........
• وصلو للشقه وكانت مقابله شقه عزيز ورغد
• وليد ...فتح الشقه تفضلي
• محبه ....خشت قدامه وقدمت اشويه
• وليد ..ولع الضي وخش هو وياه وسكر الباب
• محبه ....بعد سكر الباب زاد توترها ومعرفتش شن ادير قعدت تبحت في الشقه كانت الشقه فيلا اصغيره وتفصيلتها تهبببل اول ماتخشي من الباب يلاقيك مربوعه ويلاهاا حمام وبعدها الفاصل سحاب تخشي تقابلك صاله كبيره يفتح فيها مطبخ بار كان المطبخ لونه اسود في الرصاصي كانت الصاله فيها شاشه كبيره ومكتبه مليانه كتب وصالون انتري بيج في الحني وبعدهاا ترقي درجتين ايجيك علي اليمين دار فاضيه واتقابلها زي الجناح فيه دار النوم كان لونها بيضاء وفوقها ورغان حمر وفرشه حمرا كانت اتهببببل بكل ومريحه
• وليد .... خشي غيري وتوضي عشان انصلو تلقيني قاعد في الصالع نرجا فيك وسلح الجاكه متاعه وحطها علي السرير وفتح الدولاب وخذا بيجامته وطلع من جنبها وهيا رقت معاها ريحه عطره القويه
• محبه .... بعد طلع حطيت ايدها علي قلبها وغمضت اعيونها وقعدت تدعي يارب يارب توكت عليك يارب انكون قد قراري يارب يارب مشي هالليله علي خير ونزلت يدها وخشت الحمام تشطفت وتوضت وغيرت لبست بجامه بيضاء مورده بالاحمر كت احمر خيوطه ارقاق وصدرها نازل سبعه وسروال احمر وعليه طرف ابيض مورد بالاحمر وفكت تسريحة شعرها ورفاعته بطريقه حلوه خففت مكياجها وبخت عطرها ولبست ملايه الصلاه وطلعت
• وليد ...كان مغير البدله ولابس شرت ازرق وفوقه تشرت ابيض بالازرق وكان جسمه رياضي وطالعه عليه اتهبل ومقمعز يرجا فيها في الصاله
• محبه ...طلعت من الدار ولقاته يرجا فيها في الصاله احمم
• وليد ...برم عليها شنو انصلو
• محبه ..اهاا هيا
• وليد ..تمام هيا تعالي وطرح المصليه وحده له وحده لها وصلو وبعدها برم عليها حط يده علي راسها وقال الدعاء ونزل اعيونه جن علي ايديها قعد ايبحت فيهن وخاطره ايشوفها نزل يده ومسك يدها وقعد ايشوف في حنتها مشاء الله اتهبببل بكل طالعه حلوه علي ايديك
• محبه ....وهيا ترعش وقلبها ايدق من مسكه يده
• وليد ...هيا صبي تعالي انتعشو جعان بكل في عشاء جايبينه يبي تسخين بس
• محبه ....مسكت يده ووقفت تمام هي اشويه انحول الملايه وانجي
• وليد ....طلق يدها تمام سابقك للمطبخ
• محبه ...عدت لدار وحولت املايتها وسقمت شعرها وبحتت روحها في المرايه وتنهدت وطلعت خشت للمطبخ لقاته حتط العشاء غي الميكرويف ويرجا
• محبه ...تمام تريح تو انكمل انا
• وليد منقولش لا وقمعز ايتفرج عليها وهيا توتي في الطاوله
• محبه ..شن تبي تشرب مشروب والا عصير
• وليد ..لا مشروب اكيده
• محبه ..تمام وطلعت العشاء وحطت مشروب وكان العشاء رز بالخلطه وبطاطا امبطنه وعصبان ونغين سلايط وقمعزت وقعدو ياكلو وهما ساكتين
• وليد ... الحمد لله تسلم ايديك كملي وديريلي فنجان قهوه وسط وتعالي في الصاله
• محبه .......صحه تمام اشويه ولاحقتك وقعدت اتفكري شن يبي وكملت وقعدت ادور في القهوهووين مكانها لعند القتها وحطت الميه علي النار ودارت القهوه وتت السفره وحطت حلويات لقتهن في الثلاجه وطلعت لاقاته والع التفلزيون وايتفرجوقدمت عليه تفضل
• وليد .... شكرااا وقعد يشرب
• محبه ....حطت السفره علي الطاوله وقمعزت مقابلته
• وليد ... حط الفنجان وبحت فيهااا نبي نحكي معاك موضوع وياريت تفهميني
• محبه .....تفضل نسمع فيك
• وليد ..................
• يتبع .............
• قراءه ممتعه حبيباتي 😘😘
• بقلم .....أحلام
•
