•كانت زي شروق الشمس لما بتدخل المحاضره ،كانت منوره زي نور القمر وهو بدر ،كانت زي ضحكة بتترسم على وش واحد شارد في جمالها ،عينيها بتلمع زي لمعان اللؤلؤ ،شفايفها ورد زي الفراولة ،شعرها البني الدهبي زي غروب الشمس ،بحب ضوافرها وهي بتلونهم بلون السما بليل، بحب اكون بجوارها دايما حتى لو من بعيد، دايما بمشي وراها وهي مش واخده بالها، حاولت كذا مرة اصارحها واقولها اني معجب بيها، بس بتحرج منها وبخاف تحرجني قدام الناس ،بس انا عارف انها بتحب حد تاني من الدفعه ،مبعرفش اتكلم معاها لوحدنا ،ولما ببصلها الكلام بيتلغبط وببقا مش عارف اقول ايه، بس هي بردو ساعات بتعصبني ،وبتخرج الواحد عن شعوره حقيقي ،الكل شايفها انانيه ،بس هي لا طيبة جداً، وشايفنها تنكة عشان هي بس مهتميه بنفسها شويه او شويتين ،بس هي لا حاجه كدا جايه من كوكب الزهرة ،يا الله ،بتكلم معاها عادي لما بنكون مع صحابنا وبنضحك ونهزر عادي ،بس انا عايز اتكلم معاها هي ،ياربِ إن كانت خيراً لي فقربها إلي...•
-كانت اول صفحة من المذكرة اللي منار خادتها من اوضه زياد ومحمود وخالد ،وقرأت منها اول صفحة ،وقبل ما تكمل قفلت المذكرة، وقعدت مع نفسها شويه تعرف مين اللي كتب المذكرة دي ،وقصده على مين !!-
*********
•نص الليل دخل كان زياد وخالد وأستاذ احمد وأستاذ طارق ومحمود ناموا من التعب ،وبسمة سندت رأسها على الشجرة بتفكر ازاي تخرج منار، وعينيها غفلت من التعب ،ونامت شويه ،بس ملحقتش تنام كتير؛ لأنها سمعت صوت قرع الأجراس في المعبد ، بس هي من التعب نامت تاني ومخادتش في بالها ، بس زياد صحي هو كمان من صوت الأجراس ،ياترى الأجراس دي ليه؟؟ يمكن يكون فعلا استاذ رمضان هيتجوز اللي الملك وعده بيها؟؟ بس المدينه كلها نايمه، ولسه نص الليل، يمكن يكون عشان حاجه تانيه !! زياد قام براحة من غير ما حد يحس بيه، ومن غير ما بسمة تشوفه ،وراح للمعبد كان مقفول، بس كان شايف نور جاي من اوضه في ضهر المعبد، زياد لف وراح يشوف يخطف نظره سريعه ايه اللي ف الاوضه ، لقى بنت لابسه فستان دهبي زي أميرات الفراعنة وقاعده في ركن في الاوضه، وجنبها شنطه ،ودفتر ،ايه داه؟؟ دي منار؟؟ يالهوي!! رمضان هيتجوز منار ؟؟؟ زياد اتجنن ساعتها ،وجري على خالد يصحيه يقوله•
زياد: خالد اصحى الحقني.
خالد: ايه يابني ما تتعلم ازاي تصحي الناس.
زياد: خالد مش وقته.
خالد: ما تقول في ايه ،احنا لسه نص الليل ياجدع انت، انا ملحقتش انام.
زياد: يا خالد البنت اللي هيتجوزها رمضان تبقى منار.
•خالد قام اتعدل: انت بتهزر ولا ايه يا زياد ،وقعت قلبي.
زياد: انا ههزر برضو، يا خالد منار لازم تخرج من المعبد قبل الصبح.
خالد: انت عارف ان احنا لو دخلنا ممكن يحصل فينا ايه ،مش بعيد يعدمنا احنا السته! عايز تموت يا زياد؟
زياد: امال هنسيب منار جوه تتجوز الراجل الشرير داه.
خالد: عندي فكرة يا زياد.
زياد: ماتقول.
خالد: مش هقول دلوقتي، عشان انت مش هتفهم، بس مش هينفع نعمل لمنار حاجه دلوقتي عشان كلنا نعيش لازم نستنى.
زياد: خالد متهزرش ،منار بقولك هتتجوز رمضان.
خالد: يابني حد قالك اني اطرش بتزعق ليه؟ قولتلك عندي فكرة، بس لازم نسيب منار دلوقتي.
زياد: وهنعمل ايه دلوقتي، انت راضي عن اللي بتقوله؟
خالد: قولتلك مش هتفهم.
زياد: طب فهمني!
خالد: لا هتبوظ الدنيا اكتر ما هي خربانه، روح شوف الساعه كام.
زياد: طيب ياخويا اما نشوف اخرتها معاك.
•زياد حط عصايه في الارض زي ما عمل قبل كدا، ولقى الساعه تقريبا ٢بعد نص الليل•
زياد: الساعه ٢ يا خالد.
خالد: ياخرابي محمود ناقصله كام ساعه ويتحول.. بس ثانيه كدا هو هيتحول الملك ازاي والملك هنا اصلا؟
زياد: هو مش هيتحول للملك هو هيتحول للروح الشريرة اللي مسيطرة على الملك ،مانت لو لاحظت هتلاقي الملك لما طلع بره المعبد كان لابس نفس الإسورة دي ،وعروق ايده الشمال بارزه اوي اوي عن اليمين.
خالد: وانت اللي بتدقق في التفاصيل اوي.
•زياد بصوت واطي: ماهي لعنه التفاصيل اللي بتخلي الواحد خايف من كل حاجه.
خالد: بتبرطم بتقول ايه؟
زياد: بكلم نفسي يا خالد ايه الجديد يعني.
خالد: خف شويه طيب عشان شكلك ملبوس.
زياد: هه طب يلا ياظريف ،هنعمل ايه؟
خالد: شوفت منار فين واحنا نروحلها؟
زياد: شباك موجود ورا المعبد ،هي قاعده في الاوضه جوه.
خالد: طب يلا.
زياد: هتعمل ايه؟
خالد: تعالى وانت ساكت.
أنت تقرأ
مقبرة أيلاند
Adventureفي جزيرة نائية بعيده ذهب مجموعه من الأصدقاء لاستكشاف مقبرة فماذا سيحدث لخالد وأصدقائه؟ وما الأحداث التي ستدور داخل هذه الجزيرة؟ وهل سيستطيعون النجاة مِنَ الذي سيحل بهم ام ماذا؟
