مكر رجل ودموع انثى(باللهجه العراقيه)

part-4

يله نبدء
بسم الله
-صلو على النبي-

اني اسمع هيچ بابا يحچي واريد الكاع تنشك وتبلعني احس دكتور عمار كام يغلي من العصبيه رفعت راسي شفته نظرلي بنظره حاده فنزلتها من الخوف فوگ ضيمي ويه بابا هسه دكتور عمار يطيح حضي هو شبقت بابا مسؤيلي البيت جحيم ودكتور عمار مكرهني بالجامعه.

د.عمار"أبو مراد اريد احچي وياك بالمكتب....وأستبرق بلغي الطلبه الكل اريده بالقاعه راح اجيكم هسه بعد دقيقتين

باوعت على بابا انتضر الاذن منه.
بابا"روحي لقاعتچ بنيتي.

أبتعدت عنهم وتسألت بعقلي بابا منين يعرف دكتور عمار ودكتور عمار شنو الي يريده من عنده ....بس كل هاي تسأؤلات بعقلي بس ماكدر أسأل لان اذا أسأل بابا اعرفه ميجاوبني..

وصلت للبنات ماريا وديما وزينب"دكتور عمار كال راح يجينه ويريد الكل بالقاعه لذلك عفيه زنوبه بلغي كل طلاب..

كلت هيچ وفتت للقاعه وكعدت ثاني استول واني على اعصابي اريد اعرف شنو الي راح يصير خايفه من بابا هسه شنو الي راح يحچي ويه دكتور عمار وهسه دكتور عمار يعصب عليه بعد شخلصني من عنده...دقايق وفات للقاعه"السلام عليكم..
الطلبه"وعليكم سلام..
حسيته ذب عينه علينه كلنه وشكله معصب وبالكوه كامش اعصابه .
د.عمار"بما انو كان عندي اجتماع واتاخرت عليكم فماكو كوز اليوم راح اشرحلكم المحاضره الثانيه واريدكم تقرون زين وهسه راح اخذ حضور قبل ماشرح. اخذ الحضور وبدأ يشرح المحاضره واني بغير عالم حاولت اهوايه اركز بمحاضراته بس ماكو فايده....بعد مرور الوقت باوعت على ساعه شفتها2:15دقيقه وهو بعده يشرح تمنيت اروح اتلاعب بالساعه وامضي دقايق احس روحي مختنكه والافكار تلعب بعقلي.
د.عمار"انتهت محاضره بس راح اسأل كم واحد من عدكم حتى اعرف وصلتكم الفكره.

اني جمدت شفته كام يدور بعيونه وجتي عيني بعينه فدنكت راسي بسرعه وباوعت على الكاع ودعيت ربي مايكومني مابيه حيل اتفشل لان صراحه مامركزه ويايه..

سمعت كال انتي رفعت راسي من الخوف اباوع ياشر بتجاهي فكلت بخوف"العفو دكتور اني.
د.عمار"لا الي بعدج.
ارتحت واخذت نفس خله طالبه تعيد شرح بشكل سريع وبعدها كوم طالبين..

انتهت المحاضره وكال اخذو راحتكم طلاب...اخذت أغراضي وطلعت...سمعته كال"أبوچ ينتظرج يم الرئاسه.

ماكدرت التفت عليه ولا حچيت شيء رحت بسرعه على بابا مامستعده احصل رزاله من عنده..

وصلت يمه ولكيته معصب...بس محچه شيء لاول مره.
مشيت وياه وطلعنه الجامعه وركبنه السياره وساقها...
أبومراد"الله يفشلج ان شاء الله مثل مافشلتيني وحطتيني بهيچ موقف طلع دكتور عمار رئيس قسمج واني الي ماعرف بشيء كعدت استخطيه على رئيس قسمه وتعامله وياه.
أستبرق"بس انت ماسألتني عن اسمه بس حجيتلك عنه وكلتلك يحب الاتزام واني شمعرفني انو انت تعرفه وراح تحچي وياه هيچ.
أبومراد"انچبي طايحة الحظ لوشايفه شكلي شلون صار بس فوتني لمكتبه وقريت اسمه على المكتب رئيس القسم د.عمار فاعتذرت من عنده وكال عادي يتفهم الموضوع ويعرف الاغلبيه يحچون عنه لان يحب الالتزام وحچيت وياه على وقت محاضرته كلتله الخط يعوف بنتي ولازم احنه نجيبها فكال هذا الوقت ثابت من العماده وميكدر يتلاعب بيه وتكعدلي يشوفلي حل لذلك اريدج تشدين حيلچ مادته وتجبين درجات ترفع رأس.
أستبرق"تمام ان شاء الله بس خلوني على لاقل اقرأ ولاتغيبني واني ان شاء الله ارفع رأسك.
أبومراد"انجبي مازين من عندي مخليج داومين وعايف شغلي واجي اخذج من جامعه صدك مايغزر وياج اي شيء اسويه.
بقيت ساكته ومجاوبته بشي لان معصب كعدت ادعي بس الله يعدلي هل سنه على خير ردت اسأله عن مراد وين وليش ماجه ياخذني بس مكدرت أسال لان اعرفه ميجاوبني.
☆☆☆☆☆☆☆☆