الوووو تيست ون تيست ون تست ون…
- ااااااا بكل الحب واصدق التبريكات نهني اخونا العريس وربنا يتم ليهو علي خير…واااا نتمنى ليهو حياة زوجية سعيدة … واااااا نترككم في اللحظات القادمة مع ملكة الطرب الكروانة دانة صاحبة الصوت الشجي والحنجرة الذهبية… وااااا على آلة الاورغن المايسترو ود حسين صاحب الانامل الماسية…وااااااا فني الساوند… الانيق دوما ابراهيم هيما…
والطربة اشتغلت….
اغنية استماع… وبعديها اغنية سيرة… وبعديها ال تم تم والزنق اشتغل…..
هيييييييييييييييي دي مالا…
لو ما عارفة وروها… تتلمى وتشوف حالا….
هييييييييييييييي دي مالا…
الطربة راااااابة والناس مهججة وعرقهم سايل و غبارهم فوق…
ابراهيم : قومي يا ريم امسكي المايك دا و غني مع دانة…
ريم بي توتر : لا لا يا هيما ما بقدر…
ابراهيم : ياخي امسكي… لمتين ح تقعدي تخجلي وتخافي من الناس كدا ؟؟؟….
ريم : لا لا خليني ما عايزة اغني…
ابراهيم : يا بت لو ما اتشجعتي وسبتي الخوف بتاعك دا عمرك ما ح تبقي فنانة….
عباس : خليها يا ابراهيم ب مزاجها… هي ما عايزة تغني….
ابراهيم : ما عايزة تغني شنو !!!… ريم دي صوتها حلو والله وعندها امكانيات عجيبة ولو سمعتها وهي بتغني براها تقول البت دي عندها مستقبل في الغناء…
عباس : طيب ما ممكن طوالي عايزها تغني في حفلة…
ابراهيم : انا ما عايزها تغني… انا عايزها تشيل مع دانة وشوية شوية ح تتشجع وتغني براها….
ريم ساكتة…
ابراهيم شال المايك ومداهو لي ريم وقال ليها : امسكي يا ريم خليكي قاعدة جنبي هنا وشيلي مع دانة…يلا امسكي…
ريم مسكت المايك وابراهيم شجعها وبدت تشيل مع الفنانة دانة بصوت متوتر وفيهو رجفة….
وبعد ما الحفلة انتهت….
((ابراهيم شاب فني ساوند اعزب… عايش مع ابوهو وامو… عندو اخوهو الكبير في قطر واختو متزوجة .... وعباس صحبو وبشتغل معاهو يساعدو… وطبعا معاهم بعامين… ديل الشباب البمشو مع بتاع الساوند ضهب بس عشان يحضرو الحفلة ....و ريم… جارة ابراهيم بالحيطة وطوالي ابراهيم بسمعها بتغني في بيتهم لمن تكون بتكنس في الحوش او قاعدة تغسل العدة او الملابس… وعرف انو صوتها جميل وممكن تبقى فنانة في المستقبل ))…
ود حسين العازف عندو عربية خاصة ف رفع الاورغن حقو وقال لي ابراهيم : يا هيما انا عندي قعدة خاصة اوفر نايت ماشي عليها….
ابراهيم : زيت يا مان… بينا كول…
ابراهيم وعباس ومعاهم البعامين لمو الساوند والعدة كلها وقعدو منتظرين الحافلة حقتهم تجي…
الفنانة دانة جات قعدت جنب ابراهيم وبتعاين لي ريم…
دانة : هيما…دي منو البت الكانت بتشيل معاي ؟؟؟…
ابراهيم : دي ريم جارتي في الحلة….
دانة : ما شاء الله صوتها حلو لكن…
ابراهيم عاين لي ريم وقال لي دانة : كلميها بالله مش عليك الله هي مشروع فنانة…
دانة : اااي والله عندها مستقبل في الفن… بس عايزة شوية شغل عشان عندها رجفة في الصوت…
ابراهيم : ايواااا ... بس دي الحتة العايزك تخدميني فيها يا دندن…انا عايزك لو عندك اي حفلة او اي قعدة تسوقيها معاك ولو لقيتي طريقة خليها تغني…
دانة : من عيوني يا هيما… غالي والطلب رخيص… انا اصلا حفلاتي كلها قاعدة اسوقك انت ...وانت تاني جيبها معاك طوال….
ابراهيم : لا لا اطمني تاني ح تكون ثابتة معاي….
دانة : خلاص تمام… يلا انا ماشة راجلي هداك واقف برا بالعربية…
ابراهيم بي خباثة : راجلك ولااااااا ؟؟؟… .
دانة فصلت ب مياعة : بس ولااااااا دي زاتا… هيهيهيهيهي…
دانة طلعت وركبت مع بتاع توسان ومشو….
الحافلة الكريز بتاعت الساوند جات وابراهيم والشباب رفعو العدة وركبو الحافلة وريم وابراهيم ركبو قدام واتحركو مشو علي الحلة…..
الحافلة وقفت قدام بيت ناس ابراهيم والشباب نزلو العدة ودخلوها جوة البيت… وابراهيم مشى مع ريم… طبعا هم جيران بالحيطة… و دق الباب جات رفيدة اخت ريم وفتحت الباب سلمت علي ابراهيم وريم دخلت البيت وابراهيم رجع بيتهم… لقى الشباب مطلعين الكراسي قدام بيت ناس ابراهيم وقاعدين….
عباس : يا عمك….القرمبوزة نضيفة لكن…
ابراهيم : ههه بس ما تفكر فيها يا مان انا عايز اربيها…
عباس : تربيها وبعدين تكبر وتفوتك…
ابراهيم : عادي يا مان كتاااار الكبروها مننا…لكن كل شي بي حقو….
#####
في مكان تاني…
في بيت اسرة…
زينب قاعدة في المطبخ تجهز الغداء… وبعد ما رصتو في الصينية نادت راجلها…
زينب : معاوية… يا معاوية…
معاوية : ايوا يا مرة مالك بتكوركي…
زينب : تعال شيل الغداء…
معاوية جا دخل المطبخ…
زينب : شيل الغداء دا االنجهز ليكم الشاي…
معاوية شال الصينية وقبل ما يطلع زينب قالت ليهو : اسمعني… دا منو الضيف المعاك دا ؟؟؟…
معاوية : دا ود عمي جا من البلد…
زينب : ومالو عيان ولا شنو ؟؟…
معاوية : لا لا جا الخرطوم يقرا الجامعة…..
زينب : ايواااا…
معاوية : وبالمناسبة ح يقعد معانا كم يوم لحدي ما يسجل في الجامعة ويشوف ليهو داخلية…
زينب : خير مافي مشكلة…
معاوية : يلا تعالي سلمي عليهو…
زينب : خلاص بعد تتغدو بجيب ليكم الشاي وبجي بسلم عليهو…
معاوية : طيب خلي مزوني يجي يتغدى معانا… وانتي اكلي مع نسيبة….
معاوية شال الصينية ومشى لي ود عمو بهناك وولدو مزوني لحقو وقعدو يتغدو…
(( اسرة عادية بتتكون من اب اسمو معاوية وام اسمها زينب عندهم طفلين… نسيبة عمرها 10 سنوات بتقرا في رابع ومازن عمرو 7 سنة وبقرا في الصف الثاني… ساكنين في بيت ايجار بيتكون من غرفتين وبرندتين خلف خلاف وفيهو حوش علي باب الشارع وزقاق يدخلك الحوش التاني فيهو مطبخ وعريشة وحوش صغير ))….
وبعد الغداء…معاوية شال الصينية ورجعها المطبخ لقى زينب بتعمل في الشاي…
معاوية : بعد تعملي الشاي جيبي لينا بهناك…
زينب : كويس…
معاوية رجع للضيف.… وزينب عملت الشاي ولبست توبها ومشت ليهم ومعاها بتها نسيبة…
دخلت عليهم البرندة ....
زينب : سلام عليكم…
ود العم : وعليكم السلام…
معاوية قال لي ود عمو : دي زوجتي زينب وبتي نسيبة…
معاوية قال لي زينب : دا ود عمي اسمو مجاهد…
زينب : اهلا حبابك…
مجاهد وهو مدنقر في الارض : الله يسلمك….
((مجاهد ود عم معاوية… شاب عمرو حوالي 19 او 20 سنة ..امتحن الشهادة مرتين المرة الاولى ما نجح والمرة التانية جاب نسبة 56 و جا الخرطوم يدرس الجامعة ))…
زينب ختت الشاي ورجعت مع بتها وخلت معاوية بتونس مع ود عمو مجاهد ويسألو عن حال الناس في البلد…..
#####
في مكان تاني…
في دكان الريح…
نجوى : اديني كيلو سكر وشاي و…
الريح قاطع نجوى : كدا دقيقة… اديني قروش القديمة اول…
نجوى : قروشك كلها بديك ليها… مش مسجلة ؟؟…
الريح : طيب بتديني ليها متين لكن يا نجوى ؟؟… الدفتر كلو اتملى بي اسمك….
نجوى : اصبر قلت ليك القروش جاية…
الريح : هي لكن بتجي من وين ؟؟… انتي راجلك طلقك وشرد خلاكي… تاتي البصرف عليكي منو انتي وعيالك ؟؟….
نجوى : ما عندك شغلة بي… انت عايز قروشك ولا عايز حاجة تانية ؟؟؟…
الريح بي خبث وهو بعاين في جسم نجوى : والله لو لقيت حاجة تانية برضو مقبولة منك .…
نجوى ضربت الطربيزة بتاعت الدكان بي يدها وقالت ليهو بي نهرة : الريح !!!!…
الريح اتجرس : خلاص خلاص بديكي حاجاتك…
الريح سريع اداها السكر والحاجات الطلبتها… ونجوى شالتهم ومشت تقدل والريح يعاين ليها ويعضي في سنونو ويقول في نفسو…والله المرة دي ما عارفها مخدراني بي شنو…كملت دكاني كلو وانا ما قادر ارفض ليها طلب… لكن هي زااااتا عندها جسم عجيب… احيييييي انا…
ابراهيم جاي الدكان شاف ليك الريح منتبه مع نجوى وهي ماشة في الشارع والريح فاتح خشمو ويعاين ليها…
ابراهيم قال للريح : لحمة جد…
الريح : لحمة زي اللحمة….
ابراهيم : ياخ انت مشكلتك بتاع كلام ساي وما بتعمل اي حاجة… بس قاعد وماسك مننا الحاجات السمحة دي…
الريح جر نفس طويل وقال لي ابراهيم : والله عايز لي فيها طريقة لكن هي زااااااااتا ما عايزة تديني ريق حلو…
ابراهيم : والله انت زول نفاخ ساكت… عامل زي كلب السرة….
الريح : اااااخ…يا ريتني لو كنت كلب السرة….شم ساي كان بطاطيري بتكون مليانة…
ابراهيم : ههههه انت شكلك ممكون وصابر يا مان… .
الريح : ممكون ساي… والله حالتي بالبلا يا ابراهيم اخوي….
ابراهيم : كدا اديني علبة سجاير انا طالع لي مشوار ما فاضي ليك…
الريح : شااايفك امبارح سقتا معاك ريم… شكلك قفلتا عليها يا معلم….
ابراهيم : شوف يا الريح… ريم دي تبعي انا ..يعني ما عندك شغلة بيها ولا تفكر فيها… خلينا ليك الخالات ال في الحلة….
الريح : خير يا حبيبنا ولا يهمك… اصلك جنك براعم…
ابراهيم : اااااي البراعم لحم طااااعم…
الريح : هههه… تمام عز نفسك يا فردة….
(( الريح شاب اعزب شغال مع عمو بلة فاتح دكان في نص الحلة … واهلهم كلهم في البلد… وعمو بلة مرات بسافر البلد لي اولادو وبخلي الريح شغال براهو في الدكان ))…
####
في مكان تاني….
في بيت ناس ريم…نتعرف علي اسرتهم…
(( اسرة ناس ريم بتتكون من ابوهم نجار بسيط عندو ورشة في سوق الحلة… وامهم ربة منزل وعندهم تلاتة بنات وولد...رفيدة الكبيرة خريجة محاسبة وبتبحث عن شغل…و رشا بتقرا في الجامعة بتدرس اداب لغة انجليزية ...وريم ممتحنة الشهادة… وولد واحد اصغر البيت اسمو رامي بيقرا في تالت ابتدائي))….
رفيدة : تعالي يا ريم امبارح ما حكيتي لي حفلتكم كانت كيف…
ريم : اسكتي ساي…
…
..
.
في رعاية الله…
