عزالدين طبعا صرف نظر عن جامعة ناس رشا و امورو جاطت ب هناك وبقى حاسي ب فراغ لانو اتعود علي المزز والكذب عليهن…
اها بقى يجي بيت ناس خالتو كل يوم بالنهار ويقعد مع خالتو ورفيدة…
رشا لما ترجع من الجامعة ما قاعدة تسلم ليهو في يدو ...بس بتقول سلام وتمشي تدخل الغرفة وما بتطلع تاني الا بعد عزالدين يمشي…
يومين بالطريقة دي واليوم التالت عزالدين قاعد مع خالتو ورفيدة… . رشا جات سلمت ودخلت الغرفة طوالي…
عزالدين قال ل خالتو ورفيدة : رشا اليومين دي ما براها… بتجي من الجامعة صارة وشها تقول ميت ليها زول…
رفيدة : خليها اصلا دي عندها كديسة مرات بتقوم ليها….
عزالدين : كدا اشوفها مالا… يمكن امتحانتهم قربت عشان كدا زهجانة…
ام رفيدة : احسن ما تمشي ليها… تقوم تشاكلك ساي …
عزالدين : كان شاكلتني بطلع بخليها… ما عندي ليها حاجة….
عزالدين قام ودخل الغرفة لقى رشا قاعدة ف السرير وحاضنة المخدة وصارة وشها…
عزالدين : الجميل مالو زعلان ؟؟؟…
رشا : ما تتكلم معاي… ما عايزة معاك كلام…
عزالدين : ليه يا رشو… انا عملتا ليك شنو عشان تقولي م عايزة معاي كلام؟؟؟ …
رشا وهي زعلانة : عامل نفسك م عارف يعني ؟؟؟…
عزالدين : كدا وريني انا عملتا شنو يمكن نسيت…
طبعا عزالدين كان مفتكرها ح تقول ليهو زعلانة منو عشان الحركة البايخة العملها ليها المرة الفاتت… .
لكن رشا قالت ليهو : هسي عملتا مشاكل مع صحباتي وبقو ما يمشو معاي…نسرين قالت انا وانت عاملين علاقة مع بعض وقاعدين نلعب بيها…
عزالدين جر نفس طويل وقال ليها : طيب ومالو اصلا نسرين انا م عندي ليها حاجة خليها تقول العايزة تقولو….
رشا : كيف طيب ومالو !!!!… يعني هي تقول انا عندي معاك علاقة وانت تقول لي طيب ومالو ؟؟؟…
عزالدين ب رقاد : ما انتي بت خالتي يعني شنو لو عندنا علاقة مع بعض !!!…زيتنا ف دقيقنا….
رشا عاينت ليهو باستنكار : انت بتقول ف شنو يا عزالدين ؟؟؟…
عزالدين بقى يحنك مع بت خالتو ورقد ليها رقاد جد : شوفي يا رشا… انا صاح اول كنت شايفك بت خالتي وما عندي ليكي حاجة غير الخوة… لكن يوم كنتي قاعدة جنب بكري ف الجامعة وتتكلمي معاهو وتهظري معاهو ب طريقة مستفزة… انا كنت بغلي من جواي وزعلت شديد من تعاملك بالطريقة دي مع بكري… ف لمن قعدتا مع نفسي و فكرت في الموضوع لقيت تصرفي داك كان غيرة عليكي من بكري وطبعا الغيرة ما خوة….ف بحثتا ف دواخلي عنك وبالجد حسيت ب مشاعر غريبة تجاهك غير مشاعر الاخوة…ونظرتي ليكي اختلفت ولقيتك محفورة في جواي…وانا اليومين ديل طوالي بجي بيتكم عشان اشوفك بس واحدد مشاعري تجاهك…
عزالدين سكت شوية ولمن شاف رشا بقت منتبهة ل كلامو قال ليها : تعرفي يا رشا اول مرة اعرف انك حلوة كدا… دا عشان ما كنت بعاين ليكي ب قلبي وكويس انو تعاملك مع بكري حرك مشاعري وخلاني اشوفك علي حقيقتك…معقولة يا بت… انتي بالجمال دا وقاعدة قدامي وانا م قادر اشوفك !!!…صدق اللي قال العين ما بتشوف بشوف القلب ….
رشا رخت شوية وقالت ليهو : عزو انا ما عايزة معاك هظار…
عزالدين : هظار شنو يا بت ف الحاجات دي !!!!… انتي عارفة الشي الخلاني اعنرف ليكي شنو ؟؟؟..
رشا : شنو ؟؟؟…
عزالدين : تتذكري انا لمن كنت بجيكم ف الجامعة وكنت بتكلم مع نسرين ...كنت بشوف نظرة الغيرة ف عيونك ...وبرضو لمن كنت بطلع معاها وانتي طوالي بتتصلي علي ومرات تقولي لي تعال الجامعة بدون سبب وانتي عارفاني قاعد مع نسرين واخر مرة لمن قلتي عيانة وقلتي لي اجي اوديكي البيت… يلا انا عارف انك ما عيانة ولا اي حاجة بس ما عايزاني اقعد مع نسرين ولا اطلع معاها ومن ديك عرفتا انك بتحبيني لكن ما قادرة تقولي الكلام دا…
رشا اتوترت شوية وقالت ليهو : ما بحبك ولا اي حاجة… انت زول كذاب وبتاع بتات…
عزالدين : انا ما بتاع بنات… لكن كنت بفتش في تومي… زولة افهمها وتفهمني…وفي الاخر لقيتك انتي قدامي يا رشا… انتي الزولة ال انا كنت بفتش فيها من زمان … ف مافي داعي نكذب علي نفسنا ونخبي مشاعرنا….
رشا رقدت دكوة من كلام عزالدين وما قدرت تقول ليهو حاجة…
عزالدين : اسمعي يا رشا…انا غايتو اتكلمتا ووريتك مشاعري تجاهك… ولازم انتي كمان تقولي لي مشاعرك شنو تجاهي…لو بتحبيني قولي لي ...ولو شايفاني عزالدين ود خالتك بس وما عندك لي اي مشاعر تانية.... برضو وريني عشان اتعامل معاكي عادي زي رفيدة و ريم….
رشا ساكتة…
عزالدين : انا ماشي…وعايزك تفكري وتديني قرارك…و ح انتظر منك مكالمة او رسالة… لكن قبل ما تقرري لازم تبحثي ف دواخلك وشوفي هل انا موجود وحاسة بي ولا انا بتوهم ساي….يلا سلام…
عزالدين طلع ومشى بيتهم…
رشا بقت تفكر ف كلام عزالدين… هل هي صاح بتحبو زي ما قال ولا دي مجرد غيرة عابرة…وهي اصلا انسانة منطوية وعمرها ما حبت ولا عملت علاقة مع ولد…
يلا لمن بحثت ف اعماقها وفكرت ف عزالدين لقت بفسها يمكن تكون بتحبو…بدليل الخطة العملتها ليهو مع بكري وهي اصلا كانت قاصدة تعرف موقفو شنو وكدا وضح ليها…
عزالدين كل شوية يعاين ل تلفونو يشوف لو في مكالمة من رشا او حتى رسالة…لكن رشا لا اتصلت عليهو ولا رسلت ليهو رسالة… وهو ما عايز يتصل عليها وقال يصبر يشوف نهاية فهمها شنو !!!!…
اها اليوم التاني عزالدين مشى بيت خالتو وقعد منتظر رشا ترجع من الجامعة ب فارغ الصبر…
ورشا اليوم دا جات بدري وشكلها كانت بتفكر ف كلام عزالدين وسارحة ف المحاضرات وما فهمت حاجة… عشان كدا رجعت البيت بدري…
عزالدين شاف وشها فيهو تعابير غير مفهومة…
المهم الوكت داك خالتو عملت الجبنة ومدت ل عزالدين…
عزالدين قال ليها : كبي كباية تانية ل بتك المنفسنة دي خليني اوديها ليها…
خالتو كبت ليهو كباية تانية وعزالدين شالها ودخل الغرفة ل رشا… لقاها حاضنة المخدة وقاعدة سارحة بعيد… ولمن شافت عزالدين غطت وشها بالطرحة…
عزالدين : امسكي الجبنة يا بت بتحرقني…
رشا ساكتة وابت تشيل الجبنة…
عزالدين خت الكباية ف الطربيزة وقال ليها : امبارح انتظرتك وما رديتي علي ولا عبرتيني… اعتبر دا رفض ولا شنو !!!!…
رشا ساكتة…
عزالدين يئس لكن قال يرمي ليها آخر كلمتين يمكن قلبها يلين ..ف قال ليها ب مسكنة : خير يا زولة…ومعليش لو ف يوم من الايام غلطتا ف حقك او شفتي مني حاجة زعلتك…لاني ما قاصد بالجد اغلط عليكي…بس انا شكلي كنت فاهم الموضوع غلط… و اعتبرتك حبيبتي قبل ما تكوني بت خالتي… شفتا فيكي الزولة الحتسعدني وتكون لي شريكة حياتي وتبدأ معاي مشوار حياتي من الصفر…
وبلع ريقو وقال ب رقاد : المهم انسي الكلام القلتو ليكي…واتعاملي معاي عادي عزالدين الزمان ودخالتك… وانا بحاول انساكي لكن انا عارف نفسي م ح اقدر…بس ح اكتم هواكي ف جواي واحاول اتصبر…..يلا سلام يا رشا يا بت خالتي…
عزالدين ماشي طالع علي باب الغرفة سمع رشا نادتو : عزو…
عزالدين وقف وعاين ليها ب ادب " دي اصلا حركات التماسيح " : نعم يا رشا…
رشا سكتت شوية وقال ليهو : اوع تكون عايز تلعب بي يا عزو…
عزالدين ب فرحة ورقاد : ياخ العب بيك يا رشو وانتي بت خالتي !!!…انتي مجنونة ولا شنو يا بت !!!!… انتي لحمي ودمي…
رشا : والله لو بتفكر تلعب بي ولا تغشني ف يوم من الايام اصلو م عافية ليك…
عزالدين : قولي بسم الله …انا لو عايز العب… بلعب بعيد بعيد… لكن انتي مستحيل العب عليكي… انتي القلب يا بت… انتي الروح…
رشا فصلت وقالت ليهو : جد يا عزو دا احساسك تجاهي ولا كلام ساي…
عزالدين : تعرفي…انا ما عرفتا نفسي بحب بالجد الا لمن حبيتك انتي " نفس الحنك القاعد يقولو ل كل البنات "…والله يا رشو ما تتصوري انا سعيد قدر كيف…يااااااااااه…بحبك يا رشا بحبييييك…
رشا : اسكت اسكت يا ولد…ناس امي ما يسمعوك…
عزالدين مسك يد رشا وباسها وقال : انا لو علي… الدنيا كلها لو سمعت ما مشكلة اهم شي عندي انتي يا قلب….
رشا : خلاص خلاص اقعد ساكت…
عزالدين : يلا افتحي وشك دا خلينا نشوف القمر…
رشا ب دلع : مام… ما بفتحو…
عزالدين : بتخجلي من ود خالتك وحبيبك يا بت…
عزالدين شال الطرحة من وشها وقال : ماشاء الله ماشاء الله… والله مستغرب اني ما شفتك الزمن دا كلو وانتي قدامي… عسل عسل يا بت…
رشا ضربتو ف كتفو ضربة حنينة وقالت ليهو : ما عميان ما بتشوف…
عزالدين ب دجل : احييييي انا… ياخ ضربتك زاتها بتشيل الوجع…
المهم رشا فصلت مع عزالدين ووقعت ف شباكو…وعارفاهو زول رمتالي وصايع ولسه طالب بشيل المصاريف من ابوهو…بس هي شكلها حبتو ولا بتتوهم ما معروف ..لكن قالت تجرب الحب مع ود خالتها ..
اها عدت الايام وعلاقة عزالدين ورشا كل يوم بتتطور وعزالدين اصلا زول جنو مقابضة….وكان بدردق البنات بالكلام المعسول ويخدعهم ويحاول يستدرجهم… لكن رشا بت خالتو من اول قاعد يهظر معاها هظار عفوي… بس بعد العلاقة هظارو بقى ما عفوي… وهو عندو فهم تاني ف راسو….
يلا بقى يجي البيت كل يوم من بعد الفطور ومرات يفطر معاهم ف البيت ويقعد لحدى قريب المغرب… زمن ابوهم يكون جاي هو بتخارج طوالي…
اها في يوم قاعد مع ريم ف البرندة وبحضرو مسلسل من المسلسلات الاجنبية دي… وانتو عارفين ديلك عيال ام زقدة…المسلسل بجيبو ليك كامل لا بجرو لقطة ولا بحذفو مشهد…
اها المسلسل جابو فيهو لقطة رومانسية عميقة كدا بين شاب وحبيبتو….
عزالدين قام عاين ل رشا وابتسم ابتسامة خبيثة…
رشا عاينت ليهو ب خجل وقالت ليهو :هوي مالك !!!..
عزالدين ب رقاد : مالي كيف !!!… ديل مش بحبو بعض ونحن بنحب بعض ؟؟؟.…
رشا : وطيب نحن دخلنا شنو بيهم ؟؟…
عزالدين ابتسم تاني نفس ابتسامتو الخبيثة وقام من كرسيهو وجاي علي رشا ومسكها من يدها…
رشا سحبت يدها وقالت ليهو : عايز تعمل شنو انت ؟؟؟…
عزالدين : ياخ مااااا تفهميها طايرة… كدا قومي اوريكي…
رشا : ناس امي قاعديييين …
عزالدين عمل نايم ورجع قعد ف كرسيهو…وبقى يترصد المواقف ويمد يدو يمسك بيها يد رشا واحيانا بعض التجاوزات ورشا متجاوبة معاهو….وعزالدين كل ما يلقى رشا متجاوبة معاهو بحاول يتمادى ف شكل هظار كدا…
يلا في يوم عزالدين ما جا بيت ناس رشا… لانو ابوهو رسلو مشوار ف قال يمشي ويرجع سريع بيت ناس خالتو…
وهو في الطريق رشا اتصلت عليهو…
عزالدين فتح الخط : آاااااه انا… رشا يا كحيل غيثني… هواك سباني…الشوق يا بت الشووووق …
رشا : لو كنت مشتاق كان جيت البيت…
عزالدين : جاييكي يا منقة عندي مشوار وبرجع ليكم…
رشا : ماشي وين كمان ؟؟؟…
عزالدين : والله الحاج شغلا لي ورسلني مشوار… بمشي سريع وبرجع… كلمي امك قولي ليها تخلي لي جبنتي…
رشا : امي مافيشة طلعت هي ورفيدة مشو بكى…
عزالدين : بكى منو كمان ؟؟؟…
رشا : عندنا جارتنا ابوها اتوفى ونساوين الحلة اجرو حافلة ومشو ليهم…
عزالدين ب لهفة : وطلعو متين ؟؟؟ ...
رشا : طلعو هسي قبل عشرة دقايق…
عزالدين : و ريم وين ؟؟؟…
رشا : ريم طلعت مشت الكورس …
"اصلا ريم بتقول ليهم ماشة الكورس وبتمشي تلف زهجانة من الحصل عليها مع ابراهيم… وقاعدة تتصل علي بعيد من البيت عشان تعرف منو عمل شنو ومافي زول يعرف من ناس بيتهم "…
عزالدين : يلا جاييك هواء…
عزالدين لمن عرف انو بيت ناس رشا خلاء… ومافي زول غير رشا… نسى المشوار حق ابوهو ورجع ف زمن قياسي وصل بيت ناس رشا…
####
في مكان تاني…
ريم : اها عملت شنو ؟؟؟…
ابراهيم ببرود : ف شنو ؟؟؟….
ريم : ف شنو كيف !!!… مش قلتا ح تشوف لينا حل ف المصيبة العملتها فيني دي… ولا انت ما بهمك انا اضيع ولا حتى اموت زاتو !!!…
ابراهيم : انا والله لسه ما فكرتا ح نعمل شنو لكن انتي اصبري…
ريم : م ح اصبر… ولازم تتقدم لي يا ابراهيم وتتزوجني…
ابراهيم نطط عيونو وقال ليها : اااا…
ريم : عندك حل تاني…ولا ح تقدر ترجعني زي ما كنت ؟؟؟…
ابراهيم سكت ودنقر راسو ب يأس وما عرف يقول ليها شنو …
ريم : خلاص طالما م عندك حل… يبقى تتزوجني…لانك انت العملتا فيني كدا ومافي زول تاني ح يرضى بي…..وما عايزة اجيب الكلام ل اهلي…
ابراهيم ب تردد : لكن اتزوجك كيف وانا لسه ما جاهز ولا عندي حاجة ؟؟؟ ....
ريم بعصبية : يعني اول لمن اغتصبتني كنت جاهز للاغتصاب لكن ما بتقدر تتحمل الغلط العملتو فيني صاح ؟؟؟… شوف يا ابراهيم انا ما عندي شغلة بيك جاهز ولا ما جاهز دي مشكلتك…تتصرف بس… تكلم اخوك الفي السعودية… ولا تسرق…ولا تبيع عدتك دي…المهم تتصرف وتجي تتقدم لي ف اسرع وكت… والا اقسم بالله يا ابراهيم اكلم ابوك وامك وامشي افتح فيك بلاغ اغتصاب واقول انت خدرتني واغتصبتني….والبحصل يحصل اصلا تاني ما فارقة معاي…
ريم وطلعت وقفلت الباب ومشت…
ابراهيم خلاص قفلت معاهو وما عارف يتصرف كيف…
شال تلفونو واتصل علي ودحسين…
ودحسين : هيما… الصحة والخبر ؟؟؟…
ابراهيم : زي الزفت والزفت احسن…
ودحسين : مالك يا جاح…الحاصل شنو ؟؟؟…
ابراهيم ب زهج : ياخ دي جات البيت وشغلتها لي…قالت الا اتزوجها…
ودحسين : والله يا عمك ما عارف اقول ليك شنو زاتو !!!!…
ابراهيم : زواج وتشغيلة يا عمك انت عارف الزواج مقيد والحنك دا…
ودحسين : والله يا جاح انت العمل الشغلا دي ولازم تتصرف مع زولتك دي…
ابراهيم : ياخ هي شكلها ما صدقت وطوالي قالت اتزوجها… زواج يا عمك في الزمن الصعب دا…
ودحسين : انت اصلا من اول كنت باكي ف الجاحة دي ومرقد ليها… وخلاص حصل الحصل… مافي حل الا تتم الباقي وتتزوجها…
ابراهيم : ياخ اتزوجها شنو انا ما كنت بفكر كدا… طوالي انت وهي عايزين تركبوني ماسورة….
ودحسين : كدا هسي انت وين ؟؟؟…
ابراهيم : قاعد في البيت…
ودحسين : طيب انا جاييك ونشوف الحنك شنو….
…
..
.
يتبع
