مازن شاف اختو وطوالي جرى لي امو… لقاها نايمة وقعد يهز فيها عشان يصحيها : ماما ماما ماما قومي…
زينب فتحت عيونها وقالت ليهو : مالك في شنو ؟؟…
مازن : نسيبة اتجرحت وقاعدة تبكي…
زينب قامت عاينت لي مازن : وينا اختك ؟؟؟… والجرحا شنو ؟؟؟…
مازن : ما عارف الجرحها شنو… راقدة في اوضة مجاهد وبتبكي…
زينب سمعت صوت نسيبة وهي بتبكي… قامت سريع شالت توبها وجرت الحوش البهناك… لقت باب الشارع فاتح ودخلت الغرفة الكان قاعد فيها مجاهد… وشافت منظر الله لا وراكم ليهو…
شافت نسيبة راقدة في السرير وبتبكي وشافت الدم في ملابسها…
زينب ختت يدها في صدرها وجرت علي نسيبة صرخت : نسيبااااا وااااااي يا نسيبة مالك يا بتي مالك ؟؟؟…
ونسيبة تبكي…
زينب مسكت بتها وشافت الدم من وين… وعرفت انو مجاهد اغتصب نسيبة " الله يستر "…(( ياخ الكلمة دي الواحد ما بقدر يكتبها… ف ماعارف الزول الما عندو قلب ولا عندو ضمير ولا انسانية ولا ذزة رحمة في قلبو… بيعمل الفعل دا كيف مع طفلة صغيرة " !!!!… لا حول ولا قوة الا بالله العلي العظيم…
زينب بقت تصرخ وجرت علي باب الشارع وعاينت ومجاهد اختفي عن الانظار…
زينب رجعت لي بتها وحضنتها وتبكي معاها : واااااي يا بتي وووووب علينا الليلة وووب…
وعاينت ل مازن وقالت ليهو : امشي جيب لي تلفوني يا مازن اجري…وااااااي ..
مازن جرى جاب التلفون لي امو…
زينب اتصلت علي معاوية… ومعاوية طبعا ما متعود انو زينب تتصل عليهو في الزمن دا ....يعني بتتصل عليهو لمن يكون مارق من الشغل او هو البتصل عليها عشان يشوفهم عايزين شنو…
معاوية قلبو اكلو وفتح الخط : الو…
زينب وهي بتبكي : وااااااي يا معاوية الحقني… وااااااي بتك يا معاوية بتك…
معاوية طبعا اي حاجث ولا اسرتو…ومن سمع زينب بتبكي جسمو كلو برد وارتعش وقال ليها : في شنو يا زينب مالك بتبكي ؟؟؟…
زينب : واااااااي الليلة بتك خلاص ضاعت يا معاوية ضاعت وووااااااي اهيهي اهيهي…
معاوية خلاص اعصابو انهارت : ياخ اتكلمي بتي مالا !!!! الحصل ليها شنو يا اتكلمي ما تحرقي دمي ياخ …
زينب تبكي ما قدرت تتكلم : تهييييييي. هيهيهي…
معاوية قفل منها وقام طلع من شغلو واقرب تاكسي وقال ليهو : سريع عليك الله سريع… .
ومعاوية وصف ل بتاع التكسي وهو اعصابو منهارة…ويتصل علي زينب… وزينب تفتح الخط وتبكي…
معاوية حالتو يرثى لها وهو قلقان ويقول ل بتاع التكسي : سريع ياخ عليك الله اسرع…
بتاع : استهدى بالله يا زول انا ماشي سريع هسي… خير ان شاء الله ف شنو ؟؟؟…
معاوية ب صوت مرتجف : ياخ انا زاتي ما عارف ف شنو… المرة اتصلت علي وبقت تبكي… ما فهمتا منها اي حاجة… الله يستر بس…
بتاع التكسي : قول خير ان شاء الله واستغفر…
معاوية : استغفر الله استغفر الله استغفر… يا رب استر يا رب استر…
معاوية وصل البيت ولقى الباب فاتح ودخل سريع وسامع صوت زيتب بتبكي في غرفة مجاهد…
ف دخل الغرفة ولقى زينب حاضنة نسيبة وهم الاتنين يبكن… ف قام زح زينب شوية عشان يشيل منها نسيبة ويشوفها مالا… شاف الدم في ملابسها….
معاوية اتراجع ووقف ف مكانو وقال ل زينب ب حسرة : نسيبة مالا الحاصل عليها شنو ؟؟؟…
زينب وهي بتبكي : دا مجاهد … مجاهد الكلب الله ينتقم منو ....
معاوية اتوتر واتمنى انو يكون ال في بالو ما صاح وقال ليها ب توتر : ياخ اتكلمي مجاهد مالو ؟؟؟…
زينب : مجاهد اغتصبها يا معاوية ..اغتصبها… تهيتهيتهيتهي.. هييييي…
معاوية من هول الصدمة وقع في الارض كاااضم…وما قادر يتحرك… بس عيونو فاتحة وبعاين للسقف…
زينب حاضنة بتها وبتصرخ : معاوية معاوية معاوياااا…
مازن بقى يضرب ويهز في ابوهو ويبكي ويقول ليهو : قوم يا بابا قوم يا بابا…قوم…
بتاع التاكسي طبعا معاوية ما اداهو قروشو وواقف برا منتظر…
لمن معاوية اتأخر عليهو قام نزل من التاكسي ولقى الباب فاتح… قام صفق وقال : يا ناس البيت سلام عليكم ...
وسمع صوت البكي والصياح جاي من داخل الغرفة… ودخل طوالي… شاف زينب وعيالها ببكو وشاف معاوية واقع في الارض… قام خت اصبعو في رقبة معاوية لقى نبض .... طوالي خت يدينو في صدر معاوية وعمل ليهو تنفس صناعي وشوية معاوية بقى يكح واتنفس…وهو بعاين ف السقف وما برمش… ونزلت دمعة من عيونو…
بتاع التكسي هز معاوية براحة وقال ليهو : سلامتك سلامتك…قوم ارح اوديك المستشفى…
معاوية بلع ريقو ب حرقة وقال ليهو : انا كويس انا كويس…
معاوية اتمالك نفسو وقام علي حيلو وشال بتو وطلعو مع زينب ومازن وركبو مع بتاع التكسي وجري علي المستشفى ودخلوها طوالي للدكتور…
والدكتور مجرد ما شاف نسبة وشو اتقبض وقد يقول : لا حول ولا قوة إلا بالله… لا حول ولا قوة إلا بالله…
الدكتور عمل ليها اسعافات سريع….وفحص ليها…وبعد ما انتهى…
معاوية ب صوت مرتجف : طمني يا دكتور بتي كيف ؟؟؟…
الدكتور : بتك الحمد لله كويسة وحالتها مستقرة…لكن…..والدكتور سكت…
معاوية ب صوت مبحوح : لكن شنو يا دكتور ؟؟؟…
الدكتور : شوف يا اخ معاوية… عشان اكون واضح معاكم… بتك حصل ليها اغتصاب لكن ما اغتصاب كامل …
معاوية : طيب ح تبقى كويسة وترجع زي اول يا دكتور ؟؟؟…
الدكتور : الجرح ح يلتئم… لكن انا م ح اقدر ااكد ليك انها ح ترجع زي الاول مع انها صغيرة ولسة ما بلغت… لكن الاغتصاب اثر علي جهازها التناسلي … وما معروف قد ترجع زي اول ولا ما ترجع… ونسبة انها ترجع زي الاول نسبة ضعيفة جدا.... دي حاجة بيد ربنا…
معاوية ب بؤس : والحل شنو يا دكتور…
الدكتور : زي ما قلت ليك… كلو بيد ربنا… وانا ما عندي حاجة اقدر اعملها ليك غير اني اكتب ليك تقرير طبي عن حالتها…
معاوية سكت وقال ب حسرة : التقرير ح نستفيد منو شنو يا دكتور… اذا كان بتي م حترجع زي اول…
الدكتور : التقرير بيثبت حق بتك ويحفظ ليها حقها…
زينب ب حزن : خلاص اكتب لينا تقرير يا دكتور…
معاوية : تقرير شنو يا مرة عايزة تعملي لينا فضايح…
الدكتور : دي ما فضيحة يا اخ معاوية… والتقرير دا ف صالح بتك وهو الوحيد ال بيثبت براءتها… عشان مافي زول بعدين يتهمها في شرفها…وبرضو ممكن تقاضو بيهو الزول الاغتصبها لو بتعرفو… عادي تمشي محكمة الطفل وتفتح بلاغ بي التقرير دا ويمسكو الزول العمل العملة دي ويتحاكم…
الدكتور سكت شوية وقال ليهم : بس معليش كنت عايز اسألكم…
معاوية : اتفضل يا دكتور…
الدكتور : انتو بتعرفو الزول الاغتصبها ؟؟؟…
زينب : ايوه بنع…
معاوية قاطعها قبل ما تقول ايوا وقال للدكتور : لالا ما بنعرفو يا دكتور…
الدكتور خت يدو ف يد معاوية وقال ليهو : دي بتك يا معاوية والبت غالية… لازم تعرف الزول العمل العملة دي وتفتح فيهو بلاغ…وكدا بتكون انصفتا بتك واخدتا ليها حقها… والمجرم اخد جزاءه… نعم بتك صغيرة وما بتفهم حاجة… لكن بعدين لما تكبر ...الشي دا ح يأثر علي حياتها…
معاوية ب بؤس : الحمد لله علي ما اردا الله… الحمد لله…
الدكتور : انا ح اكتب ليكم تقرير و ح اكتب ليها ادوية تدوها ليها… وما تخلوها تتحرك ...وبعد اسبوع تعالو المقابلة… وامها برضو تجي عشان اديها ارشادات ل نسيبة…
معاوية : خير يا دكتور خير…
الدكتور كتب ليهم تقرير طبي مفصل عن حالة نسيبة وكتب ل نسيبة علاجات وخرجهم….
رجعو البيت مع نفس بتاع التاكسي كان منتظرهم وفي الطريق نهائي ما اتكلمو وكلهم مبلمين وحزنانين علي بتهم…
بعد وصلو البيت معاوية شال بتو وقال لي بتاع التاكسي : دقيقة بس ادخل البت و اجيب ليك القروش…
معاوية دخل رقد نسيبة في السرير وجا لبتاع التاكسي وحاسبو علي المشوارين… لكن بتاع التاكسي رفض يشيل حق مشوار المستشفى…
بتاع التاكسي ادا رقمو ل معاوية وقال ليهو : انا ساكن في الحي الجنبكم ولو احتجت لي في اي وكت اتصل علي…
معاوية : شكرا كتر خيرك ما قصرتا ....
بتاع التاكسي مشى ومعاوية دخل البيت وهو متحسر وقلبو مقبوض علي بتو…
اها بعد داك الحصل شنو…
بتابع ونشوف…
####
في مكان تاني…
عزالدين لوى يد رشا وهي بتتالم وقام عمل ليها حركة كدا ما ظريفة…
رشا ادتو كف وقالت ليه : انت قايلني انا حبيبتك…
عزالدين عاين ليها وابتسم ابتسامة خبيثة : بهظر معاك يا رشو…
رشا : هظار زي دا ما بنفع معاي… حيوان دا…شوف نسرين بتاعتك وين وامشي بو…
عزالدين : ههه نسرين ما بتاعتي وانتي عارفة كدا…
رشا : طيب بتمشي معاها ليه ؟؟… ومقضنها كافتريات وشارع النيل…
عزالدين : دا كلو حنك ساي…
رشا : يلا ما عايزة معاك كلام زاتو….
رشا دخلت غرفتها وقفلت الباب عليها…
عزالدين اصلا زول بتاع فارغة… وقال ف نفسو رشا ما زعلانة لانو لو زعلانة كان شاكلتو واتكلمت معاهو ب جدية… واصلا الكف دا عادي ك ردة فعل اي بت ....
المهم عزالدين طلع ودع خالتو ورفيدة و مشى بيتهم…
رشا قعدت تفكر في حركة عزالدين وكل شوية تمسح خدها وتبتسم…
عزالدين رجع البيت وبعد العصر مشى التمرين و بعد ما رحع من التمرين… شال تلفونو واتصل علي نسرين… وما ردت عليهو… واتصل عليها مرتين وتلاتة ومافي رد…
اها فضل يتصل لحد ما نسرين ردت عليهو…
نسرين ب حدة : خير…
عزالدين : نسو يا قلب… وين انتي لا حس لا خبر…
نسرين ب عصبية : وين انا برضو ؟؟؟…في داعي تشرني وتقفل تلفونك مني…
عزالدين : لا والله ما شري…
نسرين قاطعتو : وبتحلف كمان يا متخلف !!!..انت قايلني عبيطة ولا شنو ؟؟….
عزالدين : دقيقة بس انتي اديني فرصة خليني افهمك الحصل شنو ؟؟..
نسرين : نضال كلمتني بكللللل حاجة… .وانت ورشا شكلكم بتلعبو… لكن غلطانة انا الصدقتا كلامك يا حيوان يا تافه يا حقير…
عزالدين رقد : واللااااااهي ما بلعب بيكي وانا بحبك و …
نسرين ب عصبية : اسمع هنا يا عزالدين…تاني لا عايزة اشوفك ولا تتصل علي لو سمحت…
المهم عزالدين قدر ما حنس نسرين وبكى ليها… نسرين رفضت تتكلم معاهو وسفهتو وقفلت الخط ف وشو وحظرت رقمو وحظرتو في كل مواقع التواصل….
يلا عز الدين حس ب فراغ كبير لانو نسرين كانت ماخدة مساحة ف حياتو وكانت بتفرق ليهو شوية عشان لقاها ساهلة ومتجاوبة معاهو…
المهم عرف انو نسرين خلاص قطعتو معاهو وتاني م حتتكلم معاهو ونضال كمان تاني ما ح تديهو فرصة عشان يحنك معاها….
واتقفلت عليهو من كل النواحي و ما عندو تاني الا رشا بت خالتو…
…
..
.
يتبع
