عزالدين خلاص بقى يتنفس شرار شرار وما قدر يتحمل اكتر من كدا… ووقف علي حيلو وكورك لي رشا : رشااا…
رشا اتلفتت عليهو وقالت ليهو : اااي يا عزو عايز حاجة ؟؟؟… نحن ماشين الكفتريا وجايين…
عزالدين ب غضب جا نفض يدها الماسكة بيها بكري وساقها من يدها وقال ليها ب غضب : بلا كفتريا بلا زفت يلا امشي قدامي…
رشا يدها وجعتها من قبضة عزالدين وقالت ليهو : ياخ فكني ما تجرني كدا ؟؟؟…
عزالدين فكاها وقال ليها : امشي يلا…
رشا : ما ماشة ؟؟؟…
عزالدين بعصبية : امشي احسن ليكي يا رشا قبل ما اقوم اسوقك بالغصب…
رشا : مالك انت ؟؟؟… في شنو ؟؟؟..مالك بتتعصب فيني كدا ؟؟؟..
عزالدين بعصبية : مالي كيف !!!..انتي ما شايفة نفسك بتعملي ف شنو !!!… ولا ما واعية انتي ؟؟…
رشا : عملتا شنو يعني… شفتني سويت حاجة غلط ؟؟؟…
عزالدين ب غضب : والبتعنلي فيهو دا كلو ما غلط ؟؟…
رشا : انا ماشايفة نفسي عملتا حاجة غلط…
عزالدين بي غضب : رشاااا… انا ما عايز معاكي كلام كتير…امشي قدامي للمرة الاخيرة…
رشا حست ب عزالدين الليلة متوحش جدا… ف قصرت الشر ومشت قدامو لحد ما ركبو المواصلات وعزالدين وشو منفوخ عايز يطق من الزعل…
رشا عايزة تهديهو شوية وقالت ليهو : فك وشك دا شوية… بقع منك ؟؟؟…
عزالدين : خلي يقع ولا يتحرق زاتو… انتي لو كنتي خاتة لي اعتبار ما بتعملي حركاتك مع الزفت دا قدامي…
رشا : وانت المزعلك شنو !!!..بتغير علي ولا حاجة ؟؟…
عزالدين حمر ليها وقال : ااا.. اغير !!!...اغير في شنو !!!… انتي بت خالتي… يعني يرضيكي اشوفك بتتمايصي للحيوان دا و اسكت يعني…
رشا : بكري دا مجرد زميل ومافي بيني وبينو حاجة وانا بتعامل معاهو زي اخوي… وبعدين انت زاتك ما قاعد تقصر مع نسرين… حصل انا سألتك ؟؟؟…
عزالدين ب دهشة : كيف يعني ما قاعد اقصر معاها ؟؟؟؟…
رشا : انت عااااارف وانا عارفة…
عزالدين : اسكتي يا بت نحن في مواصلات ما عايز معاكي كلام كتير …
رشا سكتت وما اتكلمت تاني لحدي ما نزلو في محطتهم…
يلا ماشين علي بيت ناس رشا…
رشا : هسي احرجتني قدام زملاني...يعني كدا كويس ؟؟؟…
عزالدين : طيب وانتي العملتيهو دا ما احراج لي ؟؟؟… تقولي ل بكري بيكو وتمسكي يدو وتلعبي معاهو وتتكلمي معاهو بالطريقة دي…يعني عادي الكلام دا … اااا ؟؟؟…
رشا : وانت خطيبي ولا كنت خطيبي ؟؟؟…
عزالدين : ما خطيبك ولا اي حاجة ...لكن ما صاح تعملي حركاتك دي قدامي…
رشا : يعني من وراك عادي مافي مشكلة ؟؟؟…
عزالدين : ولا من وراي ولا تقربي منو زاتو... واقول حاجة… تاني بكري ولا زفت دا ما يمشي معاكم…ولو لقيتو معاكم انا بلفها معاهو…
رشا : وانت بتغير منو ؟؟؟…
عزالدين سكت وما رد عليها…
رشا : ما تتكلم مالك سكتا ؟؟….
الوكت داك وصلو قدام باب ناس رشا ...وعزالدين فتح الباب ودخل…ورشا دخلت وراهو…
عزالدين مشى العريشة لقى خالتو ومعاها رفيدة قاعدات يغسلن في ملايات وملابس البيت…
عزالدين : سلام…
رفيدة : وعليكم السلام اهلين عزو…
ام رفيدة : اهلا عزو كيفك يا ولدي وكيف ناس امك واخوانك ؟؟؟..
عزالدين : كويسين الحمد لله ما عندهم عوجة…
ام رفيدة : ومالك يا ولدي طولتا ما جيتنا ؟؟… ما اشتقتا ل جبنة خالتك ولا بقيت تشربها عند ستات الشاي وجبنة خالتك بقت ما سمحة ؟؟…
عزالدين : لا والله يا خالتو… لكن معصورين في الجامعة وبرجع متأخر عشان كدا ما بلقى زمن اجيكم بي جاي…
ام رفيدة : الله يدي العافية يا ولدي…
عزالدين : لكن الليلة طلعتا بدري وجيت مخصوص عشان اشرب جبنتك…
ام رفيدة : ومالكم صحي جايين بدري كدا… ما عندكم محاضرات ولا شنو ؟؟…
عزالدين عاين ل رشا وقال ل خالتو : لا لا بس كان في مظاهرات في جامعة ناس رشا وانا كنت ماري بهناك ..ف سقتها وجينا البيت…
ام رفيدة : خلاص ادخل اقعد في البرندة المكيف شغال الليلة الكهرباء ما قطعوها… بس نخلص من الغسيل واعمل ليكم الجبنة…
عزالدين : حاااضر يا خالتو…
عزالدين دخل البرندة… ورشا عايزة تمشي وراهو ..امها قالت ليها : رشا افتحي التلاجة تلقي عصير كبي ليكي كبايتين و ادي عزو معاكي…
رشا كبت العصير وشالتو ودخلت البرندة لقت عزالدين راقد في السرير… مدت ليهو الكباية وقالت ليهو : امسك روق اعصابك…
عزالدين قعد في السرير وشال الكباية وقام ضربها في مكان ما ياهو وقال ليها : دا كلو منك بوظتي اعصابي…
رشا : ايييي…ضاربني كدا ليه يا حيوان ؟؟…
عزالدين : بضربك عشان جبتي لي كثافتي…
رشا : جبتا ليك كثافتك في شنو وريني ؟؟…
عزالدين : ما عارف…
رشا : ما عارف ما عارف … انا زاتي ما عايزة معاك كلام…يلا…
رشا عملت نفسها زعلانة ودخلت الغرفة وقفلت الباب وراها… وغيرت ملابسها وقعدت منتظرة ممكن عزالدين يدق ليها الباب ويجي يعتذر ليها ويتونس معاها… وبقت تفكر في الحصل وتصرف عزالدين معاها ف الجامعة… هل هو بغير عليها بالجد ولا بس عشان هي بت خالتو وخايف عليها … طيب لو كان بعتبرها بت خالتو كان اتكلم معاها براحة بدون ما يحرجها قدام زملائها ف الجامعة ويتصرف معاها ب عصبية كدا...ف اكيد هو بغير عليها لانو عصبيتو ونرفزتو وغضبو منها دي حركات زول غيران …
رشا عرفت انو عزالدين بغير عليها ...بس هو ثقيل ما عايز يتكلم معاها…
المهم قعدت في الغرفة قريب نص ساعة ومنتظرة عزالدين يدق ليها الباب لكن عزالدين ما دق ليها الباب وما سامعة صوتو… ف قالت يمكن زعل منها عشان قفلت منو الباب و طلع مشى بيتهم…
ف قامت وفتحت الباب لقت عزالدين ناايم ويشخر…والنوم موت… " طبعا ما من الصاح انو شاب بالغ ينوم في مكان فيهو بنات او حتة خاصة بيهن حتى ولو اخوهن… وبالنسبة للبنات برضو …لانو الزول لمن يكون نايم ما معروف وضعو كيف " النقطة دي ختو تحتها خطين…
رشا وقفت تعاين ل عزالدين…لكن قالت ممكن هو يصحى ويشوفها بتعاين ليهو… او رفيدة تجي داخلة البرندة وتلقاها بتعاين ليهو… ف طلعت مشت ل ناس امها في العريشة وقالت ليهم : امي الجبنة لسه ؟؟؟…
امها : خلاص قربنا ننتهي من الغسيل…شوية وبقوم بعملها ليكم…
رشا رجعت البرندة وتعاين ل عزالدين ودخلت الغرفة وخلت باب الغرفة فاتح وقعدت جوة قصاد عزالدين وتعاين….
خمس دقايق وتاني طلعت من غرفتها وجات مارة بالبرندة بالخطوة البطيئة وتعاين ل عزالدين وطلعت مشت ل ناس امها وقالت ليهم : يمة لسه ما انتهيتو عشان تعملي لينا الجبنة ؟؟؟…
امها : اصبري يا بتي ..خلاق قاعدين باقي اكياس المخدات بس…
رشا رجعت تاني وبعد خمس دقايق جات طالعة تاني ل ناس امها وقالت ليهم : برضو ما انتهيتو يمة ؟؟؟…
رفيدة اتغاظت منها وقالت ليها بي زعل : انتي مالك الليلة ماشة وجاية فينا !!!… ومن متين قاعدة تسالي من الجبنة ..ما كل مرة قاعدين نجيبها ليكي في الغرفة ؟؟؟...الليلة الجديد شنو !!!…خلاص تعالي غسلي معاي وخلي امي تمشي تعمل الجبنة وكت شفقانة ليها كدا….
رشا : بسم الله دي مالا كمان ؟؟؟…
وقالت ل امها : يمة كان عملتيها كوركي لي…
رشا رجعت الغرفة وقعدت… شوية وتلفون عزالدين رنه… لكن عزالدين ما صحى… رشا مشت سحبت التلفون من تحت المخدة وشافت الرقم لقتها دي نسرين متصلة عليهو… ومسجلها ب نوسة الحب…
رشا رفضت المكالمة… وتاني نسرين اتصلت ورشا رفضت المكالمة وقفلت تلفون عزالدين ورجعو تحت المخدة ومشت الغرفة وقعدت قصاد عزالدين وانتظرت لحدي ما امها كوركت ليها وقامت مشت شالت كبايتين جبنة وجات البرندة لي عزالدين و ضربتو في كتفو : عزو عزو قوم اشرب الجبنة…
عزالدين قام مسح وشو وقال : ديشاااك… انا نمتا بالله ؟؟؟…
رشا : قلبك ميت عشان كدا بتنوم سريع…
عزالدين عايز يضربها لكن رشا رجعت منو لمن الجبنة قربت تنكشح وقال ليها : انا قلبي ميت يا رشا ؟؟…
رشا مدت ليهو الجبنة وقالت ليهو : اااي قلبك ميت ...
عزالدين : كويس انا بوريك قلبي ميت كيف !!!…
رشا :امسك امسك جبنتك دي قبل ما اكشحها ليك…
عزالدين شال الجبنة ورشا قعدت في الكرسي بعيد منو…
رشا : نسو الحب اتصلت عليك ؟؟؟…
عزالدين : دا شنو دا !!!… انتي شلني تلفوني ولا شنو ؟؟…
رشا : تلفونك بضرب وعامل لي ازعاج جيت اعلمو صامت لقيت المتصل نسو الحب…
عزالدين : انا ما سجلتو… هي براها سجلتو كدا…
رشا : وانا هسي سالتك…
عزالدين : بس عشان تعرفي…
رشا : بالمناسبة عايزة اسألك… الحصل شنو بينك وبين نسو ؟؟؟…
عزالدين : مافي اي شي حصل بينا… هي قالت ليكي حاجة ؟؟؟…
رشا : ما قالت لي… لكن خلي بالك هي صحبتي و ح توريني اي حاجة… اخير ليك انت اتكلم…
عزالدين انتهى من كباية الجبنة : كلامك الكتير دا طيرتي لينا الجبنة من راسنا زاتو…
رشا قامت من كرسيها وجات جنبو وقالت ليهو : خلاص جيب نجيب ليك تاني… بس احسن تتكلم ..
عزالدين مدا ليها الكباية ورشا مدت يدها عشان تشيل الكباية ...عزالدين وقف علي حيلو ومسك يدها ولواها ليها ..." وانتو عارفين الزول لمن يلوو ليهو يديو بلف مع اللوية "…."امسك يدك و الويها ل برا… يلا بس رشا لفت نفس اللفة دي وصرخت : ايييي… ياخ فك لي يدي وجعتني…
عزالدين ابتسم ب خبث وقال ليها : مش عايزة تعرفي الحصل بيني وبين نوسة شنو ؟؟؟…
رشا : طيب فكني ياخ ما عايزة اعرف…
عزالدين : لا كمان الا اوريك الحصل شنو…
و…
####
في مكان تاني…
ودحسين اتحرك وعاين للمراية وقال ل ابراهيم : يا جاح عز نفسك… فرصة زي دي ما بتتلقي كل يوم….
ابراهيم حسب السطلة ركب ورا وقعد جنب ريم…طبعا العربية زجاجها مظلل فضي… اراك ولا تراني ...
ود حسين شغل اغاني سلين ديون ورفع الصوت و اتحرك و لافي ما عرف يمشي وين… لو مشى الغابة هناك في افراد مباحث كتار لافين وممكن يشكو في عربيتو ويمسكوهو وح يلقو الشغلة جايطة… ف مافي مكان هادي وما فيهو كتاحة….الا يمشي الشجرة الري المصري… هناك الوضع ظاابط والناس كلهم خالطين وعايشين دينتهم… ومافي هواء تقيل…
وصل الري المصري وشاف ليهو شجرة واحدة مطرفة كدا… مشى وقف بالعربية تحتها وشال تلفونو ونزل خلى العربية شغالة عشان التكييف…
ودحسين شاف ليهو ست شاي في شجرة قريبة منهم ومشى قعد جنبها واتوجه بي كرسيهو علي العربية عشان لو شاف زول ماشي علي العربية يقوم ويسلتمو…
لكن لمن قعد يعاين للعربية لاحظ للعربية فيها حركة… ف قال لو في زول شاف العربية فيها حركة ح يعرف انو جواها زول… لكن لو هو مشى قعد ب كرسيهو جنب العربية مافي زول ح يشك لانو هو قاعد برة جنب العربية…
ف شال كرسيهو وشال كباية جبنة من ست الشاي ومشى قعد جنب العربية… وضهرو علي العربية وقعد يراقب…
شغل تلفونو يستمع وشرب جبنتو وشرب ليهو سجارة وطلع التانية ولعها و جر منها نفسين وعايز يجر النفس التالت ف زول مسكها منو…
ودحسين اتلفت وراهو لقاهو ابراهيم ..
ودحسين : يااا جاح… تميت الغلش ؟؟؟…
ابراهيم عيونو صغار ويفتح فيهم بالغصب : يو…
ودحسين : والسمنجحة ؟؟؟…
ابراهيم : قاطمة…
ودحسين : قاطمة قاطمة ولا فيها هزة ؟؟؟…
ابراهيم : ولا رزة يا مان… اها القنح ونش ؟؟؟…
ودحسين بقى يفكر : االقنح ونش… القنح ونش .. القنح ونش….
ودحسين قام من الكرسي وقال ل ابراهيم : تكل نها انا بظبط ليك الوضع يا جاح…
ابراهيم : ح تعمل ونش يا مان ؟؟؟…
ودحسين : تكل سب ولخي الباقي ل سموخويك…واعمل كوتوموتو…
…
الحصل شنو ؟؟؟...
نتابع ونشوف
…
..
.
يتبع
