مجاهد وهو نايم وبتقلب في السرير… حس بي جسم غريب نايم معاهو… ف صحى وعاين ليهو لقاهو دا مازن….
ف عايز يصحيهو… شاف معاوية جا من الحوش التاني…
معاوية : مزوني نام معاك ولا شنو ..والله ود غلباوي خلاص اصلو ما بعرف ينوم براهو…
مجاهد : انا زاتي استغربت… قلت دا شنو الراقد جنبي دا…
معاوية : خلاص دقيقة نشيلو من جنبك… عشان ما يضايقك ....
مجاهد : لا لا عادي خليهو ينوم…
معاوية : مازن دا نومو شين وجنو يشلت….ما ح يخليك تنوم…
مجاهد : ما مشكلة… انا اصلا قاعد انوم في طرف السرير… وهسي لو صحيناهو ما حينوم ليك سريع…
معاوية : صاح والله هسي لو صحيناهو ح يساهر بينا ساي… يا زول تمام… لكن لو ازعجك شيلو وجيبو رقدو جنبي…
مجاهد : تمام… يلا تصبح علي خير….
معاوية : وانت من اهلو…
المهم اليوم داك زينب نامت بي مزااااج واخدت راحتها…لانو مازن ما نايم معاها… ومازن مشكلتو بنوم في نص السرير ...ف عشان كدا كان امو تعبانة معاهو شديد… يعني زينب ما كانت ماخدة راحتها معاهو وباليل لو عايزة تنقلب بالجنبة التانية… الا تشيل مازن وتوديهو في الاتجاه التاني… والنوم زاتو كان بطير من عيونها… الا تنوم بالنهار…ونوم النهار ما زي نوم الليل…
اها اليوم التاني كان يوم جمعة ومعاوية ومجاهد الاتنين كانو قاعدين في البيت….
معاوية ما بحب يتونس مع ولدو وبتو لانو يوم الجمعة يوم راحة… ف بكون عايز ينوم وياخد راحتو…
وزينب لمن يكون عندها شغل… بتطرد مازن وتقول ليهو امشي لي ابوك… عشان مازن هباش وما بقعد ساي… ومازن لو جا لي ابوهو… ابوهو بينهرو ويقول ليهو ما تقرب مني انا عايز انوم …
ف شنو مازن بجي لي مجاهد ويقعد يتونس معاهو…
مجاهد طبعا بقى ود البيت… و معاوية استغل مجاهد واداهو قروش قال ليهو امشي الدكان جيب لينا اغراض وتعال…
مجاهد شال القروش وطلع ومازن طلع معاهو مشو الدكان وماسكو من يدو…
المهم في اثناء ما مجاهد بطلب الاغراض وهم واقفين برا قدام الطربيزة بتاعت الدكان…مازن دخل جوة الدكان ومشى علي الرفوف شال ليهو شوكولاتة… وجا طالع…
مجاهد مسكو من اضانو وقال ليهو : القال ليك ادخل جوة الدكان منو ؟؟؟… لو عايز حاجة اتكلم وانت واقف برا…
مازن : لا لا عمو ما قاعد يقول لي حاجة… و طوالي بقول لي ادخل شيل الحاجة العايزها…
مجاهد طبعا اخد الكلام عادي وقال انو ممكن مازن متعود لمن يجي مع ابوهو يدخل الدكان ويشيل الحاجة العايزها… عشان كدا اخد الموضوع عادي…لكن طبعا الموضوع كان عندو ابعاد اخرى….
يلا اليوم كلو مازن قاعد مع مجاهد ومرات نسيبة بتجيهم تقعد معاهم واوقات بتكون قاعدة تشنغل مع امها ….
اها بالليل زينب استحلت النومة براها… ف لمن مازن جا ينوم معاها…قالت ليهو : امشي نوم مع ابو بهناك…
مازن طبعا عارف ابوهو ح ينهرو ويكورك فيهو… ف طوالي مشى نام جنب مجاهد…. والشغلة جرت ومازن اتعود ينوم مع مجاهد…
زي ما قلنا مجاهد بقى ياخد راحتو في البيت ويمشي حوش زينب عادي… ومرات زينب بتكون قاعدة بدون توب لكن مجاهد لمن يشوفها ما لابسة توب ويشوفها بتعاين ليهو… بيقوم يرجع… ف زينب بقت تلبس توبها طوالي الا تكون قاعدة في غرفتها او مجاهد يكون في الجامعة….وبرضو لمن تكون ماشة الحمام الا تلبس توبها…يعني ما ماخدة راحتها…
اها في يوم مجاهد قاعد يذاكر لي نسيبة ومازن ومعاوية مشى يتونس مع زينب…
زينب قالت لي معاوية : مجاهد دا ح يقعد معانا كدا يعني… وما ح يشوف ليهو داخلية ؟؟؟…
معاوية : خليهو يقعد…احسن زاتو مستفيدين منو…بذاكر للعيال ريحنا شديد…
زينب : والله من ناحية المذاكرة ريحنا… وكمان احسن حاجة بالنسبة لي … انو مزوني بقى ينوم معاهو…
معاوية : مزوني دا لو ما انتي عودتيهو كان هسي بنوم براهو… من زمان قلت ليك خليهو ينوم في سرير عشان يتعود علي النوم براهو… لكن انتي دلعتي…
زينب : مزوني عشان بخاف ما بقدر ينوم براهو… والله انا ما عارفة مجاهد مستحملو وقاعد ينوم معاهو كيف… ولدك بنوم في نص السرير والليل كلو يرفس…
معاوية : مجاهد نومو تقيل وبنوم في طرف السرير…انا بصحى نص الليل بلقاهو بشخر يعني مرتاح والموضوع عادي بالنسبة ليهو…
زينب : المهم انا حاسة بي وجع راس طوالي قاعد يجيني… شوف ليك يوم نمشي الدكتور ونكشف نشوف الوجع دا من شنو…
معاوية : الوجع دا بكون من شحمك الكتير دا… قلت ليك كم مرة اعملي ريجيم و نقصي وزنك شوية وانتي تشيلي وتزيدي…
زينب ضربتو في كتفو بي حنية وقالت ليهو : الزيادة كويسة معاك لانك بتحب الشحم يا راجل…
معاوية قرصها وقال ليها : صحي بحب الشحم لكن برضو صحتك اهم حاجة يا مرة…
زينب بي دلع : الحمد لله مجاهد من مسك مننا العيال شايفاك بقيت تهتم بي…
معاوية : حقيقة قعاد مجاهد معانا في البيت ريحنا… وانتي كان 24 ساعة عيالك ديل لاصقين فيك… يا اما قاعدة تذاكري ليهم يا اما نايمين معاك… يعني انا زاتي ما كنت لاقي معاكي فرصة…
زينب : انت قول عامل العيال ديل سبب…وهاجرني…
معاوية : تاني ما بهجرك… بس قولي ان شاء الله مجاهد ما يقول ماشي الداخلية….
زينب : مع اني متضايقة منو و بقيت لابسة التوب اليوم كلو… لكن برضو ريحنا من حاجات تانية…
معاوية : لا لا مجاهد ود طيب وزول علي نياتو…من قام زول دغري وما بتاع فارغة…
زينب : خلاص لو قال ليك ماشي يقعد في الداخلية…ما تخليهو يمشي…. او حتى لو مشى خلي يجينا زيارات…
معاوية : خلاص خير…يلا اعملي لينا لبن خلينا نشرب…
زينب : حاااضر من عيوني…
معاوية رجع الحوش التاني ورقد في سريرو ال في الحوش… ومجاهد جوة في البرندة قاعد يذاكر لي نسيبة ومازن…
اها نسيبة ومازن برنامجهم بقى ثابت مع مجاهد اكتر حاجة… وحتى لو ما قاعد يذاكر ليهم بكون قاعد يلعب او يتونس معاهم… والعيال بقو متعلقين بي مجاهد شديد…
اهااا…
####
في مكان تاني…
عزالدين : اها يا منقة بكرة موعدنا…
رشا ب لا مبالاة : موعد شنو كمان ؟؟؟…
عزالدين : ياخ ما تبقي عبيطة… بكرة منتظرك في الجامعة… ما تمسكيني ليها…
رشا : اممم…كدي نشوف…
عزالدين : عليك الله يا بت الخالة… ما تنسي قلت ليكي بعزك…ويومك كلو علي انا…
رشا : كويس قلت ليك…خلاص امشي ما تشغلا لي…
عزالدين عايز يطلع يمشي…رشا قامت دخلت يدها في جيب عزالدين الخلفي وطلعت الجزلان عايزة تشيل منو قروش…
عزالدين مسكها من يدها وقلع الجزلان منها ولزاها…
رشا : ايييي وجعتني ياخ…
عزالدين : قلت ليكي بكرة… بعد تجيبي لي المزز بعدين بعزك ما تشفقي…
عزالدين طلع البرندة وخلاها ومشى قعد مع رفيدة يكوي معاها الملابس… ويتونس و ام رفيدة جابت ليهم الجنبة وشربو…
تاني يوم رشا مشت لي عزالدين في الجامعة ومعاها بتين من صحباتها ومعاهم ولد زميلهم…
عزالدين استقبلهم وضيفهم وقعدو يتونسو مع بعض…
اها عزالدين همس لي رشا في اضانها وقال ليها : دا شنو الجبتو معاكم دا ؟؟…
رشا : دا زميلنا في الجامعة…
عزالدين : طيب انا قلت ليكي جيبي مزز بس… تمشي تجيبي لي تالتكن دا معاكن ؟؟….
رشا : مالك بتغير منو ولا شنو ؟؟؟…
عزالدين : اغير من شنو يا هبلة انتي… بس دا ما كان اتفاقنا…
رشا : طيب الود كان قاعد معانا ولاصق فينا ولمن قلنا طالعين…قال الا يمشي معانا… عاد اقول ليهو ما تمشي ؟؟…
عزالدين : خير يا زولة… ما حنك ...
رشا : كدي وريني ال عجبتك منو في المزتين ديل ؟؟؟…
عزالدين وهو بعاين للبتين : شفتي العاملة فيها جامايكية دي بتنفع معاي لانو شكلها زول اصلية و مفتحة…
رشا : لا لا دي مخطوبة… شوف التانية…
عزالدين : التانية دي شكلها مكوزة كدا ح تقطعو معاي…اخير لي الاصلية دي زولتي…
رشا : قلت ليك مخطوبة وبي زولها…
عزالدين : ياخ مخطوبة ولا عاقدين عليها… المزة دي خشت دماغي يا منقة…
رشا : خلاص انت وحنكك…
…
..
.
يتبع
