نسيبة الطفلة البريئة…تضحك مع مجاهد وتمزح معاهو وهي ما فاهمة حاجة… مفتكرة انو مجاهد بمزح معاها زي ما بمزح مع مازن…
ومجاهد العفن استحلى الشغلة وبقى يخت يدو في مناطق حساسة في جسمها ويقول ليها تعالي بي جاي….وتعالي بي جاي…وهي تضحك….ومجاهد كل ما يشوفها بتضحك بقول نسيبة مبسوطة من اللمسات دي وبقوم بكررها تاني وتالت…
مجاهد طبعا بتحرش بيها… ونسيبة لا عارفة معنى التحرش ولا عارف اي حاجة… يعني مسطحة ولسة طفلة….
(( للامهات العندهن بنات ...بنتك لمن توصل عمر معين وقبل ما توصل مرحلة البلوغ… لازم تقعدي معاها في الواطة وتوعيها وتوريها العيب والغلط… لانها ممكن تكون في مرحلة وما تستوعب ليك يعني شنو حلال ويعني شنو حرام…ف لازم توريها انو في مناطق حساسة في جسمها ممنوع الاقتراب منها واللمس لاي شخص كان …وفي افعال خط احمر ممنوع اي شخص يحاول يفعلها معاها…لازم توعوهن وكيف يقدرن يدافعن عن نفسهن حتى ولو بالصراخ... وما تقولو بتتعلم في المدرسة… المدرسة ما فيها دروس عن التحرش ))….
باك…
مجاهد قاعد في الجامعة يقدم البنات بي عيونو… جا مصطفى…
مصطفى : ياا حبيبنا…
مجاهد : اووو مصطفى كيفك ؟؟…
مصطفى : تمام الحمد لله… وينك ما باين ؟؟؟…
مجاهد : والله مع الجامعة بس يا صحبي…
مصطفى : مرات بجي بي جاي وبخش قاعتكم ما بلقاك… عملتا ليك جحور بقيت تغطس فيها ولا شنو؟؟…
مجاهد : لا والله برجع البيت بدري بس،…
مصطفى : انت شكلك حفاااار وعايز تجي اول الدفعة؟؟؟…
مجاهد : يا زول لا خفار ولا اي حاجة… بلقى مافي موضوع بقوم بمشي البيت…
مصطفى : المهم الليلة عازمك معاي… عندنا صاحبنا قاعد معانا في الغرفة جا من البلد وعاملين ليهو حلة كدا ظاااابطة… ارح اضربها معانا وبعداك انت ومزاجك…
مجاهد : يا زول خير ما مشكلة بمشي معاك… اصلا اشتقتا لي اكل العزابة…
مجاهد ومصطفى مشو الداخلية وهناك لقو علاء وباقي الشباب مجتمعين ومعاهم الشاب الرجع من البلد اسمو علي… سلمو عليهم وعلي قعد يحكي ليهم….
علي : والله عادي هناك عندنا…
علاء : يا زول انت نصيح ؟؟؟…
علي : نحن عندنا في البلد الناس بعرسو صغار…يعني انا هسي لو ما قلت عايز اقرأ جامعة… كان زمااااان ابوي عرس لي و دبسني يا فردة….
علاء : انتو لسه من زمن الاب بعرس لي ولدو ؟؟؟…
علي : اصلا ابهاتنا بكون قاعدين يتونسو عادي وفجأة واحد يقول للتاني ولدك فلان دا كبر تعال نعقد ليهو علي بتي فلانة… والتاني طوالي بقول ليهو خير ويقرو الفاتحة وكدا الولد والبت اتدبسو….
علاء : هههه ياخ انتو اهلكم ديل بهظرو… طيب بعقدو ليكم في عمر كم كدا ؟؟؟…
علي : يازول ما عندنا عمر معين 15 او 16 او 17… يعني مجرد ما شافو الولد بقى صوتو تخين وظهرت عليهو علامات البلوغ… طوالي بعقدو ليهو وبقولو عشان يبقى قدر المسؤولية وما يفكر في الحرام…
علاء : اها والبت بتكون عمرها كم مثلا ؟؟؟…
علي : والله البنات ديل كمان صغار عديييل كدا…وبزوجوهن من بدريييي ومرات ما ببلغن زاتو… ياخ عندنا جارنا كدا عندو 6 بنات…الزول دا بناتو بعقد ليهن من عمر 10 وبالكتير 12 سنة وبقول لي راجلها اي وكت تعال سوقها….انت عارف بتو الكبيرة عمرها 23 وعندها 6 اطفال…واقول ليك حاجة… دا كلو خليهو… بتو الصغيرة عرس ليها السنة الفاتت قبل ما انا اجي الجامعة والبت كانت ضعيفة زي الخيط وصغيرة عمرها 12 سنة… ياخ ما بلغت زاتو… وابوها عقد ليها واداها لي راجلها قال خليها تبلغ في بيت راجلها…وهسي لمن انا رجعتا للعرس قالو حملت واجهضت… شفتا كيف !!!!…
مصطفى : لا حولااااااا… يا زول 12 سنة دي طفلة وما بتعرف ليك العرس زاتو يعني شنو…
علي : يا شيخنا اهلنا هناك ما بعرفو ليك طفلة… اي بت تفوت ال 10 سنوات طوالي بعقدو ليها… ولو راجلها عايز يسوقها تاني يوم بسوقها طوالي… يقولو ليك البنات زي شجر العشر…
علاء : حسبنا الله ونعم الوكيل من اهلك ديل…
علي : طبعا ما عندنا بت بتقرأ جامعة… بالكتير لو كملت الابتدائي…بكونو عقدو ليها و بطلعوها من المدرسة يودوها بيت راجلها…وعندنا عادي الام وبتها بلدن سوا…يعني الام بتكون بقت حبوبة ولسه بتولد…
علاء : لا لا دي جبتها كبيرة…
علي : ياخ اقسم بالله…والله بالجد عشان بعرسو صغار…تلقى الام عرست لي بتها ولسة بتولد…
المهم مجاهد قاعد يسمع في كلام علي و الشيطان بدأ يلعب بي عقلو وبقى يفكر في حاجات غريبة ….
اها ااااا…
####
في مكان تاني…
ريم شالت التلفون من ابراهيم ومشت اشترت ليها شربحة و ادت الرقم لي ابراهيم…
اها اليوم التاني زي ما الفنانة وعدت ريم انها تشتغل معاها واتصلت علي ابراهيم قالت ليهو جيب معاك ريم…
المهم ابراهيم اتصل علي ريم ووافقت انها تمشي معاهو الحفلة واتفقو يطلعو بعد المغرب….
ريم جهزت نفسها وقبل ما تطلع اتكلمت مع رفيدة…
ريم : رفيدة انا طالعة حفلة…
رفيدة : انتي لسه ما عايزة تنسي موضوع الحفلات دا ؟؟؟…
ريم : اسمعي انا ما فاضية ليكي… بس بعدين انتظريني ما تنومي… ولو عايزة تنومي افتحي الترباس حق الباب وثبتي الباب بي طوبة ونومي…
رفيدة : ما بفتحو ولا شغلتي بيكي…
ريم : يعني انوم ليكي في الشارع ولا كيف ؟؟؟…
رفيدة : مخيرة انتي نومي مكان ماشة…
ريم : بطلي غلاسة يا رفيدة… وانا بعدين بتصل عليكي ما تنومي عليك الله….
رفيدة : بنوم بنوم بنوم وان شاء الله ابوي يمسكك عشان يقطع ليكي كراعك وتاني ما تمشي مكان ...
ريم : بعزك يا بت…
رفيدة : لا تعزيني ولا عايزة منك حاجة…
ريم سمعت صوت البوري وقالت ل رفيدة : يلا يلا انا ماشة ...و زي ما وصيتك بعد ابوي ينوم افتحي الترباس…
ريم طلعت ولقت الشباب رفعو الساوند وركبت مع ابراهيم قدام ومشو مكان الحفلة…
طبعا القونة صحبة دانة لمن كلمت ريم عشان تجي معاها الحفلة كانت مفتكرة ريم لسة مبتدئة وممكن ترجف في الحفلة وترتبك وتفرق زمن وكدا تكون خربت عليها الحفلة وممكن ناس الحفلة يدق ليها جرس… ف عشان كدا قالت ليها شيلي معاي بس…
لكن بعد الحفلة بدت والقونة بدت تغني اتفجأة لمن ريم كانت بتغني معاها بثبات وكأنها فنانة قديمة…
المهم الحفلة سخنت والقونة لمن شافت ريم منداحة خلتها تغني براها لانو صوتها جميل… والجماعة بدو ينقطو لي ريم والقونة قعدت تلقط في المقطة…وابراهيم بعاين لي ريم ب ذهول وقال في نفسو… خلاص ريم دي عبرت…
الحفلة من شدة ما حلوة انتهت سريع والساعة 11 جات… وناس الحفلة قالو الا ريم تغني ليهم اغنية اخيرة… لكن ابراهيم رفض وقال الزمن كبس يا جماعة وبالطريقة دي بناخد مخالفة لانو التصديق حدو الساعة 11 فقط…
اها ناس الحفلة قررو انهم يجيبو ريم في يوم براها تغني ليهم…
الشباب لمو العدة وريم والقونة جو قعدو جنب ابراهيم وود حسين…
القونة غمتت لي ريم قروش في يدها وقالت ليها : امسكي دا حقك…
ريم بدون ما تعاين للقروش مسكتها في يدها قوي وما كانت مصدقة …
ابراهيم وهو بعاين لي ريم بانبهار : لا لا لا مافي كلام… الليلة ابدعتي يا ريم…
ريم : والله ؟؟؟…
القونة : وانا افتكرتها لسه مبتدئة اتاريها قونة وشغالة من ورانا…
ريم : لا والله غنيت يمكن مرة ولا مرتين بس مع دانة… لكن براي ما طلعتا حفلة…
القونة : لكن صوتك رهيب يا ريم…ولو شديتي حيلك ح تمسكي مننا السوق… بري منك….
ويم : هههه امسك السوق شنو بالله… انا لسه بدري علي….
القونة : لا لا والله يا ريم حقيقة عندك مستقبل في الفن… بس حاولي طوري نفسك…
ريم : يعني اعمل شنو بالضبط ؟؟؟…
القونة : احفظي اغاني كتيرة استماع و زنق….عشان بعد دا تطلعي حفلات براكي وفي كل حفلة غني اغاني مشكلة وما يكون عندك اغاني معينة بس،… ولو لقيتي ليكي شاعر يكتب ليكي وملحن ..امورك بتظبط وتبقي دولية…
ريم : ههه ما تكبري لي راسي ..كدا انا بصدق…
القونة : انا جادة والله…وانتي ما شاء الله صوتك جميل وعندك عزيمة قوية…
ابراهيم : خلاص بطلو الونسة ..يلا نمشي الشباب منتظرين…
القونة ودعت ابراهيم وريم وركبت مع ود حسين ومشو…
ابراهيم وريم والشباب ركبو الكريس حقهم ورجعو البيت…طبعا ريم لحدي ما وصلو البيت ما شافت القروش ولا حسبتها… لانها ما كانت فرحانة…
وبعد وصلو… الشباب نزلو الساوند وابراهيم مشى مع ريم ووقفو جنب باباهم…
ريم اتصلت علي رفيدة كدااا ورفيدة ما عايزة ترد ليها…
ريم ب زهج : افففف… الحيوانة دي قلتا ليها انتظريني ما تنومي ولو عايزة تنومي خلي الباب فاتح .... بس هي جنها نوم زي الخروف…
ابراهيم : اها ح تتلبي بي فوق ولا كيف ؟؟؟…
ريم : لا لا م بقدر اتلب الليلة تعبانة والله…
ابراهيم : والحل شنو ؟؟؟…
ريم : اعمل شنو !!!… الا اقعد اتصل عليها كدااا لمن تصحى…
ابراهيم : خلاص انا بقعد…
ريم : ما تنتظرني امشي نوم… انا بقيف جنب بابنا لحدي ما رفيدة تفتح لي الباب…ولو ما فتحتو انا بتصرف…
ابراهيم : لا لا يا ريم الدنيا ليل وما معروف ممكن يجو شباب ماشين في الشارع ويشوفوكي واقفة برا وممكن يكونو سكرانين ولا مساطيل…وبعدين انا بخاف عليكي يا بت
ريم : انت نسيت انا محمد ولد ولا شنو وما بخاف ؟؟؟…
ابراهيم : برضو… انتي في النهاية بت وما بتقدري تقاوميهم…
ريم : امممم… خلاص دقيقة طيب نتصل عليها اخر مرة .... ولو ما صحت ..شنكلني وخليني اتلب بي فوق عشان ما تقعد تنتظرني…
ريم اتصلت علي رفيدة للمرة الاخيرة والخط فتح…لكن مافي رد من رفيدة…
ريم : الوو ..الووو...الووووو...افتحي خشمك دا يا رفيدة… الوووو… طيب افتحي الباب ياخي انا واقفة لي ساعة…الووووو….
ومافي رد…
ريم قربت تدق الباب لكن قالت لو دقت الباب ابوها بصحى….
شوية كدا والباب فتح ورفيدة طلعت راسها وقالت لي ريم ب رااااحة : ادخلي ادخلي سريع ابوي صاحي خشه الحمام… ادخلي سريع يا بت…
ريم دخلت جوة ورفيدة قفلت الباب براااحة وجرو رقدو في سرايرهم وابوهم طلع من الحمام وجا لافي علي سرايرهم ولمن جا جنب سرير ريم… ريم بقت تشخر وعملت نفسها نايمة وقلبها بيدق شديد… اها ابوهم رجع الحوش التاني…
ريم طلعت راسها وبقت تتنفس : واااااااي الليلة نفسي انقطع…
رفيدة بي صوت واطي : اتخمدي نومي ...ما تجيبي لينا المشاكل…
ريم وهي بتتنفس : قايمة اغير ملابسي…
رفيدة : نومي بيها كدا والله ابوي لو شاف نور في غرفتنا يقول دا حرامي ولو جا لقاكي دي انتي ب ملابسك دي ح يعرف انك كنتي برا…نومي يا بت…
ريم ما لقت حل غير تنوم ب ملابسها ال مشت بيها الحفلة…
الصباح رفيدة جات صحت ريم ولبعتها في ظهرها لبببب… لمن ريم قامت مخلوعة…
ريم ب زعل : مالك لابعاني يا حيوانة انتي؟؟؟ ..
رفيدة بعصبية : بلبعك… لمتين ح تعيشينا في الرعب دا… كل يوم لافة من حفلة لي حفلة و جايينا انصاص الليالي...والله ابوي لو ما عرفك براهو انا ح اكلمو…خلاص انا فاض بي…
ريم عرفت انو رفيدة جابت اخرها ومتضايقة منها… ف دخلت يدها تحت مخدتها وطلعت ليها قروش حسبت منها 1500 جنيه وختتهم لي رفيدة في يدها ....
رفيدة عاينت للقروش ورجعتهم لي ريم وقالت ليها : عايزة تغشيني بالقروش مش كدا؟؟؟…
ريم ب هدوء : اغشك شنو يا هبلة دا نصيبك وكل مرة اطلع حفلة ح يكون ليكي فيها نصيب الاسد…
رفيدة : لا لا خلي قروسك معاكي ما عايزاها…
ريم : احمدي الله انك قاعدة عاطلة ولاقية ليكي قروش… وبعدين انتي كبيرة البيت المفروض تشتغلي وتساعدي ابوي ولا عاجبك حالنا والاكل في تلتلة…ومرات وشنا لمن يبقى شاحب من عدم الكريمات…
رفيدة : انتي شايفاني قعدتا ساي…ما شايفاني لفيت اي مكان واديت ورقي للناس دي كلها…
ريم : وما لقيتي شغل وقعدتي عاطلة صاح ؟؟؟….
رفيدة : طيب تاني شنو في يدي وما عملتو عشان اساعد ابوي ؟؟؟…
ريم : خلاص انتي العليكي عملتيهو وخليني انا اعمل البقدر عليهو… بس ما تبقي لي شوكة حوت… لازم تساعديني وتقيفي معاي…انتي ما شايفة ابوي ضهرو انحنى من الوقوف في الورشة وبجي تعبان اخر اليوم...والمسؤولية هدت حيلو….ابوي ما عندو اولاد كبار… و نحن لازم نبقى ليهو زي اولادو ونسندو ونخليهو يرتاح بعد كدا….
رفيدة سكتت شوية وقالت ليها : لكن ما بالغناء يا ريم....
ريم : اها ب شنو بس وريني ؟؟؟… انتي بي شهاداتك وقاعدة جنب امي…وما كل مرة تشبكيني ما بالغناء وما بالغناء… الفنانات هديلك راكبات عربات وساكنين في عمارات وفلل…جابن القروش دي من وين؟؟… ما من الغناء ال انتي رافضاهو لي دا…
رفيدة : هي لكن يا ريم ال…
ريم قاطعتها : عليك الله الدنيا صباح ما تشبكينا نقة… وامسكي القروش دي خليها معاك وجيبي بيها حاجات للبيت…وقروش الكريمات عندي بعدين نمشي البوتيك…
رفيدة : طيب المرة الفاتت كضبنا لي امي وعدت علي خير … اها المرة دي ح نقول ليها جبنا القروش دي من وين ؟؟؟…
ريم ختت يدها في حنكها وقالت بي حيرة : ااااي والله صحي ..ح نقول لي امي شنووو؟؟؟…
رفيدة : ما دي ال انا حاجة الخايفة منها…
ريم فكرت كدااااا وقالت ليها : اسمعي مافي غير حل واحد بس…
رفيدة : شنو ؟؟؟…
ريم : لكن لازم تساعديني المرة دي بالجد وما تخافي…
رفيدة : طيب قولي انا سامعاكي…
ريم :…
####
في مكان تاني…
عزالدين : ياااا قلب ....
…
..
.
يتبع
