تررررررن تلفون ابراهيم رنه… شاف الرقم لقاهو دا ودحسين متصل عليهو…
ابراهيم : حسونة…
ودحسين : اوووو حبيبنا هيما…الخبر شنو يا جاح ؟؟؟…
ابراهيم : تمام والله… كيف امورك انت ؟؟؟…
ودحسين : كلو في السليم…
ابراهيم : الرصة شنو والجديد عندك يا مان ؟؟؟…
ودحسين : كلو قديم ومشرط… اها يا جاح ما سمعت الحنك ؟؟؟…
ابراهيم : حنك شنو يا مان ؟؟؟… سمخويك تاكل في الجنبة ومطنش…
ودحسين : يا جاح ما حكيت لي انو دانة ضربوها في حفلة في الجاح فان وانت شغال معاها !!!…
ابراهيم : والله نسيت يا خوة والموضوع طلع لي من بالي ؟؟؟…
ودحسين : طيب هسي القونات قالو شاتمين ليها في التيب يكفرو ليها يا جاح… اها الحنك ونش ؟؟؟…
ابراهيم : لا لا دندن زولتي يا مان نقد طوالي…
ودحسين : زيت يا جاح… مسافة السكة واكون جنبك…
ابراهيم : اسمعني يا مان… جيب معاك وزنة…
ودحسين : جاهزة في الكار يا جاح…
ابراهيم : منتهي يا خوة… في انتظارك…
ابراهيم قفل من ودحسين… وقال في نفسو عباس الليلة طلع مشوار… لكن حقو يتصل علي ريم يكلمها… لانو دانة زولة اصلية وما قصرت مع ريم… وريم لو ما مشت ليها في البيت ح تكون شينة في حقها…
اها ابراهيم اتصل علي ريم في تلفون رفيدة لكن لقى تلفونو مافيهو رصيد….
قام طلع دكان الريح عشان يجيب ليهو رصيد وعلبة سجاير كالعادة…
ولما قرب من الدكان يشوف ليك شافع جا طالع من جوة الدكان و جاري وشايل حلاوة في يدو اليمين ويدو الشمال ماسك بيها التريني حقو…
ابراهيم عاين للشافع ولاحظ شي ما ياهو ..ف اتذكر كلام عباس… وكورك للشافع : تعال يا ولد… تعال هنا…
الولد وقف…
ابراهيم : تعال هنا قلت ليك…
الولد وقف شوية وابراهيم لاحظ للولد بعاين في الدكان…وحس بي انو الريح بتاع الدكان قاعد يأشر ليهو يعني بقول ليهو امشي لكن بالاشارة من غير ما يتكلم عشان ابراهيم ما يسمعو… والولد قام جاري…
ابراهيم اتلفت علي الدكان شاف الريح نزل يدو… ايواااا يعني شكلو قال للولد اجري…
ابراهيم جا للريح في الدكان وعاين ليهو شديد ولاحظ فيهو حاجة ما طبيعية…
ابراهيم بي دهشة : انت جادي يا الريح ؟؟؟…
الريح ب توتر : ف ف ف في شنو يا ابراهيم ؟؟؟…
ابراهيم : انت جادي في البتعمل فيهو دا ؟؟؟…
الريح : ب ب بعمل شنو ؟؟؟… م م ما بعمل حاجة انا …
ابراهيم : يا زول نحن لو ما متنا شقينا المقابر…ظاهر عليك انك كنت بتعمل حاجة للولد…انا والله ما كنت مصدق كلام عباس…لكن لمن هسي شفتا منظرك والولد الجاري دا ...عرفتا انكم كنتو بتعملو في حاجة غلط…
الريح ب خوف : ا ا انا ما عملت حاجة غلط يا ابراهيم ما تتهمني ساي…
ابراهيم : ليه بتخلي الولد يدخل جوة الدكان ؟؟؟… وانت عارف انو اي زول بقيف برا في الطربيزة وبطلب حاجاتو…
الريح : هو هو هو براهو فتح الباب وجا داخل ومشى شال ليهو حلاوة ورمى القروش وجرى…
ابراهيم : طيب ل شنو ب تأشر للولد تقوليهو امشي لمن انا ناديتو ؟؟؟.…
الريح : انا ما اشرت ليهو ولا اي حاجة….
ابراهيم : ياخي بطل امورك البتعمل فيها دي… يا زول والله الكلام دا منك ما صاح…انت شكلك بتستغل النهار والناس نايمين والشارع فاضي وبتعمل عملتك دي… .
الريح : ما تتكلم ساي يا ابراهيم انت لقيتني بعمل في حاجة ولا مسكتني بالثابتة…
ابراهيم : يمسكوك بالثابتة كيف وانت مصور الشارع كلو وبتشوف الزول قبل ما يوصلك…
الريح : خلاص انت ما مسكتني ما تتهمتي بالغلط…
ابراهيم : شوف يا الريح… ما معناهو انا قلتا ليك ما عندي ليك حاجة يعني بسكت علي الغلط البشوفو منك…لكن يا مان بنصحك… لو داير تغلط…اغلط صاح… شوف ليك خالة ولا بت فاكة واغلط معاها عشان ربنا يحاسبكم الاتنين… لكن ما تخرب ليك طفل وبعدين يكون معقد وممكن يواصل في شغلتك دي و لمن يكبر ويتذكر ال عملتو فيهو دا ممكن ينتحر ولا يحس بي نقص و يكون شخص معقد….
الريح ساكت و مدنقر راسو…
ابراهيم : ااااي نحن كلنا شباب والوضع كاتم… وعارفين الصاح من الغلط والحلال من الحرام…وانا ما بشجعك وبقول ليك امشي للخالات ولا البنات واعمل الحرام…لكن قصدي ليك انتو الاتنين بتكون عاقلين وبتكونو عارفين انو البتعملو فيهو دا حرام وربنا بحابسكم عليهو… بس اطفال لا يا الريح يعني ما تقرب من الشفع… سامع كلامي دا…اعقل يا زول قبل ما اهل الطفل… يعرفو وبعدين بتكتم فيك وواطاتك بتصبح….
ابراهيم طلع قروش من جيبو ورماها لي ابراهيم في الطربيزة وقال ليهو : اديني اسكراتش وعلبة سجاير خليني نتخارج ....
الريح سريع ادا ابراهيم الاسكراتش وعلبة السجاير…
ابراهيم مشى وشاف ودحسين وصل وواقف قدام البيت….سلم عليهو وقال ليهو : شخ شخ يا مان…
ودحسين : مالك يا جاح كاتم كدا ؟؟؟…
ابراهيم : ياخ بتاع الدكان قفلها معانا زاتو ؟؟…
ودحسين : مالو معاك السان دا ؟؟؟…
ابراهيم : طلع زول ما دنديس…
ودحسين : ال ما دنديسين كتااار يا جاح حدد…
ابراهيم : طلع… .
الريح : لااا ياخ… اقسم بالله كرهتي في الدنيا النوع دا… دقيقة خليني امشي الفها ليك معاهو….
ابراهيم : لا لا جليهو يا مان… انت مالك ومالو ؟؟؟…
الريح : زول زي دا ما تسكت ليهو يا جاح… والله عندنا واحد في الحلة قبضناهو بتحرش بي طفلة… ياخ والله ورينا ليك كيتة وزفينا ليك زفة عمرو ما ينساها… دقينا دق العيش وطردناهو من الحلة…وكنا عايزين نفتح فيهو بلاغ لكن ابو الطفلة قال ما عايز فضايح…
ابراهيم : ماهو عشان كدا الواحد ما عايز يتدخل ...لكن انا اتكلمت معاهو يا مان…
الريح : دا يا جاح قاتل البراءة…والكلام ما بنفع معاهو… دا عايز ليهو زول يوريهو الطفى النور منو…
ابراهيم : يا عمك ح يجر بينا هواء وانت عارف نحن ماشبن لي دانة وهسي الشباب بكونو معاها…
ودحسين : زيت يا مان لكن بختها ليهو وما بخليهو…
ابراهيم : لف لينا اصبع خلينا نوزن الباسم ونتفكفك…
ابراهيم نزل الاكراتش في تلفونو واتصل في رقم رفيدة…
رفيدة شافت رقم ابراهيم وابت ترد… تاني ابراهيم اتصل عليها…
ام رفيدة : مالك ما عايزة تردي ؟؟؟..دا منو البتصل عليك ؟؟؟..
رفيدة : دا رقم غريب يمة ما عارفاهو…
ام رفيدة : طيب ردي ..هسي يمكن دا زول عايزك في شغل ولا واحد من الاهل…
رفيدة ردت علي ابراهيم : الووو…
ابراهيم : سلام عليكم ..
رفيدة : وعليكم السلام…
ابراهيم : معليش يا رفيدة بس كنت عايز ريم لو سمحتي…
رفيدة : ريم مافيشة…
وقفلت الخط لمن ابراهيم استغرب من تصرفها…
المهم ابراهيم عمل نايم… و ودحسين ظبط السجارة وقعدو ينفسو بي مزااااج…
شوية كدا وتلفون ابراهيم رنة.... شاف الرقم لقاهو دا رقم رفيدة…
ابراهيم : الووو…
ريم : ااي يا ابراهيم معاك ريم…كيف ؟؟..
ابراهيم : تمام والله…
ريم : اها في حفلة ولا شنو ؟؟؟…
ابراهيم : لا لا مافي حفلة… بس ماشين لي دانة… الجماعة قالو عايزين يكفرو ليها و عاملين ليها قعدة…رايك شنو تمشي معانا عشان الفنانات كلهن جايات وانتي كمان لازم تمشي…
ريم : امممم… صاح والله وكان ما مشيت ح تكون شينة في حقي…
ابراهيم : المهم نحن طالعين بعد نص ساعة كدا… لو بتقدري خليكي جاهزة…
ريم : بس نرجع بدري…
ابراهيم : لا لا ما بنقعد كتير…ساعة ساعتين كدا ونرجع…
ريم : خلاص تمام… بس اهم شي نرجع قبل المغرب قبل ما ابوي يجي من الورشة ..
ابراهيم : كويس…يلا اجهزي…
ريم : خلاص دقايق بس ..لما اعمل ليك رنة معناهو انا جاهزة…
اها ابراهيم وودحسين شربو سجارتهم بي مزااااج وظبطو راسهم…وبعديها ريم عملت لي ابراهيم رنة…
ابراهيم اتصل عليها…
ريم : اها يا ابراهيم انا جاهزة…
ابراهيم : دقيقتين بالضبط واطلعي…
ريم : يلا تمام…
ابراهيم لبس سريع وطلع مع ودحسين وريم جاتهم وركبو العربية ومشو بيت دانة…
وصلو قدام بيت ناس دانة… بيت مبني طابق وساكنين ناس دانة وقاعدين يبنو في الطابق التاني..
طبعا ريم عاينت للبيت كداااا وقالت ان شاء الله حالنا يا رب…
اها ابراهيم اتصل علي دانة وقال ليها نحن برا قدام الباب…
شوية كدا وجات بت لابسة برمودة وتي شيرتي وفتحت ليهم الباب… وسلمت علي ابراهيم وودحسين بالاحضان وتتكلم بمياعة كدا ....وسلمت علي ريم وقالت ليهم اتفضلو…
ريم كانت مستغربة في شكل البت وكيف جات طالعة لابسة كدا وسلمت علي الشباب ديل كيف…
المهم ريم لمن دخلو جوة علي دانة والجماعة القاعدين معاها… شافت البدع…
####
في مكان تاني…
عزالدين بعد شرب الجبنة مع خالتو وطلع منهم ماشي علي بيتهم… طلع تلفونو واتصل علي نسرين ..
نسرين : الووو…
عزالدين : هلا… معاكي عزو يا نسو…
نسرين : اااي عرفتك اصلا رقمي دا ما اديتو لي زول غيرك انت ورشا ونضال…
عزالدين : اخبارك شنو ؟؟؟…
نسرين : تمام الحمد لله…
عزالدين : ان شاء الله وصلتي البيت بدري ؟؟؟….
نسرين : والله اسكت ساي مع الزحمة والسخانة دي غايتو وصلتا متأخرة…
عزالدين : كان تكلميني… كان شفتا ليكي امجاد ولا ترحال عشان توصلك…
نسرين : لا لا عادي اصلا متعودة علي الزحمة….
عزالدين : والله ما تستاهلي يا نسو… انتي الزيك المفروض يشيلوها شيل من الارض ويهتمو بيها وآخر دلع… وما تتشاقي في الدنيا…
نسرين : ههه بطل بكش يا عزالدين…
عزالدين بي رقاد : بكش شنو يا نسو… والله انتي المفروض تكوني ملكة وكل الناس تشتغل تحتك وتخدمك… "هسي نحن ذنبنا شنو "…
نسرين : بس نقول الحمد لله… قسمتنا كدا…
عزالدين : معليش ما اكون اتصلتا عليك في زمن ما مناسب…وخطيبك بكون منتظرك وكدا…
نسرين : لا لا اصلا الرقم دا ما عندو…بضرب لي في الرقم التاني… وهو زاتو يا كافي البلا ما بتصل الا يكون عايز يسأل من حاجة…واتصالاتو كلها بي مزاجو…
عزالدين : لا يا شيخة…معقولة زول خاطب القمرة ويقعد يتعزز عليها كدا… والله انا لو في مكانو… اتصل عليكي 24 ساعة واطمن عليكي…
نسرين : كلكم واحد… في البداية بتقولو كدا وبعدين تتجاهلونا…
عزالدين : هسي انتي بتجاهلوكي !!!…اقول ليكي حاجة من يوم شفتك… والله نوم ما نمتا وقعدتا سرحان فيكي .. اتمنيت بس انك تتكلمي معاي …
نسرين : خلاص يا سيدي امنيتك اتحققت…
عزالدين : لكن لسه عشمانين في حاجات تانية…
نسرين : لا لا يا اخوي ما تعشم ساي وتتعب نفسك…
عزالدين : اصلا انا بحب التعب… وانتي ال زيك ال مفروض يقطعو ليكي البحر عديل ...
نسرين : هههه غايتو انت يا عزالدين عليك حركات…
عزالدين : حركات ساي… بس انتي حني علينا شوية…
نسرين : شوف يا عزالدين انا والله مخطوبة وما بقدر اوعدك بي شي…عشان ما اكذب عليك…
عزالدين : يا ستي ما توعديني بي اي حاجة… بس خليني جنبك…. كدا انا مرتاح…
نسرين المسكينة صدقت …وعزالدين من عرف انو نسرين محرومة عاطفيا ورومانسيا وخطيبها ما معبرها… بقى يلعب علي الوتر الحساس ويقول ليها كلام غزل وحنان وعواطف… وملأ ليها راسها وخلى قلبها يدق… دق دووق دوووق دوووووق…
عزالدين : اها يا سكر… عايز اقابلك والله ...
نسرين : بسم الله الليلة ما كنت معانا في الجامعة ..
عزالدين : يا ستي انا لو علي اكون معاك العمر كلو…
نسرين : هيهي…خلاص خليها بعد يومين تلاتة كدا…
عزالدين : ما بقدر اصبر والله… لازم بكرة اشوفك…
نسرين بي دلع : امممم… كدي نشوف بكرة عندنا محاضرات شنو ولو طلعنا بدري بتصل عليك…
عزالدين : في انتظارك علي احر من الجمر…
نسرين : يلا تصبح علي خير…
عزالدين : وتلاقي الخير. ..
نسرين : بااااي…
عزالدين بي رقاد : وااااي…
…
..
.
يتبع
