اصبح الصباح ومعاوية وزينب ما نامو عشان نسيبة الليل كلو تهلوس وتصحى مخلوعة تبكي….
زينب خلت معاوية مع نسيبة و قامت عملت الشاي وجابتو…
زينب : اها شفتا بتك يا معاوية !!!… ما معروف تمرق من الحالة دي متين ؟؟؟…
معاوية ب اسى : ربنا كريم عليها ان شاء الله تتعافى وتبقى كويسة…
زينب : اشرب شاييك دا وقوم البس ومن دربك دا طوالي تمشي جامعة ناس مجاهد وتمسكو…
معاوية : قايم انا اصلا ناوي ليهو… بس ان شاء الله القاهو…
معاوية شرب الشاي ولبس وقال اصلا مافي نفس يمشي الشغل واتصل عليهم قاليهم بتي عيانة وما بقدر اجيكم وناس الشغل قالو ليهو خليك مع بتك وربنا يشفيها…
معاوية مشى جامعة ناس مجاهد وسال عنو ومجاهد ما كان معروف شديد لانو ما كان عندو اصحاب غير سليمان…
المهم معاوية دخل قاعتهم وسال ووصف ليهم شكلو ولقى صحبو سليمان قال الليلة جاهد م جا الجامعة وتلفونو مقفول…
معاوية سال سليمان عن الداخلية القاعد يمشي ليها مجاهد وسليمان وصفها ليهو…
معاوية مشى الداخلية وسال الشباب هناك وقالو برضو ما ظهر عليهم…
يلا معاوية رجع البيت بخفي حنين… لا لقى مجاهد ولا عرف اي معلومات عن مكانو…
زينب بحرقة : يعني رجعتا ساي يا معاوية ؟؟؟…
معاوية : اعمل شنو !!!…فتشتو في الجامعة ومشيت ليهو الداخلية و اي مكان بتواجد فيهو وما لقيتو واصحابو قالو من امبارح ما ظهر…
زينب ب عصبية : قوم اتصرف طيب اعمل اي حاجة بس ما تقعد تخت لي يدك ف راسك وقاعد منتظر مجاهد يجيك في محلك…
معاوية : ياخ قلتا ليكي ما لقيتو… ما بتفهمي انتي !!!…
زينب : خلاص قوم امشي القسم افتح فيهو بلاغ …خلي الشرطة يفتشوهو…
معاوية ب استغراب : قلتي شنو !!!… افتح فيهو بلاغ ؟؟؟….
زينب : اااي افتح فيهو بلاغ وخلي يتقبض ويتحاكم…
معاوية : ياخ بلاغ ومحاكم وجرجرة… انتي عايزة تعملي لينا فضيحة والناس دي كلها يعرفو بتنا اغتصبوها !!!….
زينب : دي ما فضيحة… دا حق بتك يا معاوية…
معاوية : ياخ البت يوم ويومين وتبقى كويسة ومجاهد لما يظهر انا بتصرف معاهو…
زينب : شوف يا معاوية الشغلة لو ما بقت حار حار ما بتشفي الغليل ولو هسي سكتا تاني ما ح تاخد لي بتك حقها… قوم يا معاوية امشي القسم…
معاوية : كدا انتي اهدي وخليني اتصل البلد اشوف وصل هناك ولا لسه…
تررررر ن تلفون معاوية رنه…شاف تلفونو لقاهو دا اخوهو محمد…
معاوية : محمد كيف ؟؟…
محمد : بخير الحمد لله… يعني ما اتصلتا علي عشان توريني مجاهد عمل شنو !!…
معاوية : كدا اصبر بوريك… بس هو ظهر ولا ظهر عندكم ؟؟…
محمد : لا والله ما ظهر…كدا احكي لي انت من امبارح بتقول لي اصبر اصبر…
معاوية : انا جاي البلد وبحكي ليك الحاصل…
زينب خطفت التلفون من معاوية وقالت ل محمد : محمد…عليك الله امشي فتشو ف بيتهم وفتش بيوت اهلك كلهم…لازم تقبضو لينا يا محمد ..
محمد بي حيرة : طيب يا زينب انا ما عارف الحاصل شنو ومجاهد مالو… احكي لي انتي عشان افهم مجاهد عمل شنو… لانو معاوية م عايز يوريني…
زينب دمعت وقالت ب صوت حزين : مجاهد اغتصب نسيبة يا محمد… تهيتهيتهيهيهي…
محمد ب غضب : قلتي شنو يا زينب ؟؟؟…
زينب وهي بتبكي : والله يا محمد لو شفتا نسيبة حالتها تمسخ ليك الدنيا…ومجاهد الكلب شرد وما عارفينو مشى وين…
محمد سكت ..شكلو عايز يهدي اعصابو شوية لانو الدم غلى ف عروقو وما قادر يتكلم زاتو…
زينب : محمد…عليك الله لو لقيتو ما تخليهو يا محمد عليك الله يا اخوي ....
محمد ب زعل : كدا اديني معاوية…
زينب مدت التلفون ل معاوية…
معاوية : نعم يا محمد…
محمد ب غضب : يعني الكلب دا اغتصب البت وما عايز تكلمني ؟؟…ولا انا ما اخوك وبتك دي انا م عمها ؟؟؟…
معاوية : ما كدا يا محمد…لكن انت عارف الموضوع حساس شوية… وانا كنت عايز اجيكم ف البلد وبعدين اكلمك بالحاصل…
محمد بعصبية : ما تجي البلد ولا اي حاجة… امشي فتشو عند اهلنا الفي الخرطوم كلهم… ما تخلي ولا زول…وانا هسي بمشي لي ابوهو…
معاوية : اصبر يا محمد خليني اج…
محمد قفل الخط ف معاوية… ومعاوية رجع ليهو تاني ومحمد رفض يرد عليهو…
زينب : شفتا اخوك قلبو حارقو علي بتك اكتر منك ... وانت قاعد وتعاين ليها بدل تمشي تجيب ليها حقها…
معاوية : انتي القال ليكي كلميهو منو !!!… انا كنت عايز اسافر ليهو البلد ونمشي لي ابوهو ونكلمو…
زينب ب حرقة : عايز تمشي لي عمك وتكلمو !!!… وبعديها يقول ليك خلاص خليني انا بتصرف معاهو وما ح يعمل لي ولدو حاجة وكدا حق بتك ضاع….
زينب قامت تلبس توبها وقالت لي معاوية : انت شكلك متساهل مع ود عمك دا… وبتك ما فارقة معاك… لكن انا حاسة بي بتي وحقها ما بخليهو كان الف المحاكم دي كلها م بخليهو…خليك قاعد انت… وانا المراة دي بجيب ل بتي حقها ف مكانها الا ما اكون امها…
زينب قامت طالعة ومعاوية مسكها من يدها : لابسة توبك ماشة وين انتي هسي ؟؟؟…
زينب ودموعها جارية : انتو الرجال ديل ما بتعرفو شعور البت ولا بتحسو بيها… لمن يتزوجوها وما يطلع منها دم… كل الناس بتحكم عليها انها بت كعبة وعملت غلط…ولو راجلها قبل يقعد معاها ح يكون شاكي فيها وكل مرة يقول ليها انا لقيتك ما عذراء وسترتك ويمسكها عليها ذلة وبتك ح تكون عايشة حياة تعيسة وتعيش ذليلة طول العمر ... وهسي لو ما اخدنا ليها حقها…مافي زول ح يصدق انها اغتصبوها…. وبتك م ح تعفي لينا يا معاوية…
معاوية كلام زينب اثر فيهو وقال ليها : خلاص اقعدي انتي ..وانا بتصرف…
معاوية طلع واتصل علي بتاع التاكسي الكان شال رقمو وجاهو سريع ركب معاهو ومعاوية حكى ليهو الحاصل وقال ليهو وديني القسم… بتاع التاكسي قال ليهو على ما اعتقد القضايا دي عندها محاكم براها ونحن بدل نمشي القسم وتاني يحولونا مكان تاني اخير طوالي نمشي محكمة الاسرة والطفل…
معاوية : خير يا زول ارح طوالي…
اها وصلو محكمة الاسرة وفتحو بلاغ هناك ومعاوية حكى ليهم كل التفاصيل واداهم اوصاف مجاهد ود عمو…
معاوية عرف انو محكمة الطفل فيها احكام رادعة للمتهمين البجيبوهم ف قضايا تحرش واغتصاب وجرايم تخص الاطفال… وبتاع التاكسي قال ليهو الزول الاغتصب بتك دا لو اتقبض غايتو واطاتو صبحت ومستقبلو ضاع…
معاوية ضميرو انبو… و رجع البيت والوضع ف البيت ما عاجبو… وما قاعد مرتاح وكل ما يعاين لي بتو يحن علي حالتها…وزينب قاعدة تشغلا ليهو… وبي جاي المحكمة واحكامها الرادعة ل مجاهد…
اها معاوية قرر يسافر البلد…يمشي يقابل ابو مجاهد…وكلم زينب…
زينب : ماشي ليهو ل شنو !!!..بس ما تكون ماشي عشان تقول ليهو يعفي ليك والكلام دا عشان فتحتا بلاغ في ولدو…
معاوية ما رد عليها ولملم ملابسو في شنطة ضهر وقال ليها : خلي بالك من العيال ولو ف حاجة اتصلي علي…
المهم معاوية وصل البلد وقابل محمد اخوهو .... ولقى محمد اتكلم مع عمهم ابو مجاهد ووراهو مجاهد اغتصب نسيبة….
ابو مجاهد كلم اولادو وبناتو كلهم واستدعاهم لمن عرف انو معاوية جا البلد عشان يعملو ليهو جودية ويعفي عن مجاهد ...واتصلو علي معاوية يجيهم ف البيت….
المهم ابو معاوية ما كان عارف لانو محمد ما كلمو بالموضوع…ولا كلم زول تاني الا عمو ابو مجاهد بس…
يلا معاوية ومحمد مشو ليهم البيت وقعدو معاهم والجماعة بقو يحنسو في معاوية… ومحمد راكب راس معاهم…
يلا محمد لمن لقى معاوية راخي في الموضوع وكلو همو رضا عمو…قام طلع منهم وهو زهجان وخلى معاوية براهو معاهم…
محمد واقف برة زعلان… تلفونو رنه… شافو لقاها دي زينب متصلة عليهو…وفتح الخط وهو ساكت وقافلة معاهو…
زينب : محمد…
محمد : ااي يا زينب…
زينب : معاوية ليه ما برد علي ؟؟؟…
محمد : قاعد جوة مع عمي واولادو…
زينب : كلم اخوك دا يا محمد … لو عايز يعفي مجاهد… انا حق بتي ما بخليهو…حتى لو اصل معاهو للطلاق… بس حق بتي ما بخليهو…
محمد : انت خليكي بعيد والموضوع دا موضوع رجال… ومعاوية زاتو لو ما وقف قدام عمو انا بقيف وبجيب حق البت…
زينب : بس كلم اخوك شايفاهو بقول فضايح والموضوع ما باقي عليهو… وشكلو عمكم ح ياكل راسو ب كلمتين وعايزو يتنازل من القضية… انتو رجال م حتحسو بينا ولا ح تعرفو الوجع الجوانا
محمد : مافي كلام زي دا ولا ح يتنازل ..ولو اتنازل انا حق البت باخدو ب ضراعي دي…. وهسي انا منتظرو اشوف اخرو شنو ….
زينب قفلت الخط ومحمد قاعد برة بيت ناس عمو ويتنفس جاز جاز…
المهم معاوية اصلا زمان كان بحب بت عمو اخت مجاهد الكبيرة لكن عمو عرسها ل واحد تاني من اولاد الجلابة بتاعين الحلة لانو معاوية الزمن داك كان لسه طالب….
ف اخت مجاهد الكبيرة لمن سمعت انو معاوية فاتح في مجاهد بلاغ ... جات تتكلم مع معاوية وعايزة تأثر عليهو …
المهم سافتو بعيد من اخوانها وبقت تتكلم معاهو وتذكرو ب ايام زمان ورغم انها اتزوجت لكن ما نستو وبتتذكر الايام الجميلة العاشتها معاهو وقالت ليهو ما تخليني اغير فكرتي عنك وتخرب الصورة ال انا خاتاها ليك في جواي ...وانا عارفاك قلبك ابيض وما بترضى تأذي مجاهد اخوي…و و و….ومعاوية واقف ويسمع ليها…
اها معاوية قال ليها : خلاص اتطمني وان شاء الله يحصل خير…
معاوية طلع من بيتهم ولقى محمد اخوهو واقف برة وصاري وشو منتظرو…
محمد ب غضب : شايفك قاعد مع اولاد عمك وتاخد وتدي معاهم ف الكلام… وشايف بت عمك اثرت عليك وانت ساكت وبتقول ليها خير !!!…
معاوية : والله يا محمد اولاد عمك كلهم اعتذرو وعمك زاتو اعتذر… وبت عمك ما قالت حاجة غلط... وصحي مافي داعي للمشاكل بين الاهل و نسيبة لسه صغيرة وما فاهمة حاجة و ح تكبر وتنسى الحصل ليها…
محمد اتضايق من كلامو وقال ليهو : بت عمك شنو العايز تسمع كلامها !!!… اركز يا زول…بت عمك بي راجلها وعيالها .... ولا شكلك الحنين عاد بيك يا معاوية يا اخوي…وعايز تخلي حق بتك….
معاوية : لكن يا محمد اولاد عم….
محمد قاطعو ب غضب شديد : شوف هنا يا زول…الكلام الكتير ما بنفع….انت لو وقفت مع اولاد عمك وخليت حق بتك… من هسي لا انا اخوك ولا بعرفك….وعلي الطلاق مجاهد دا القاهو الا اشرط بطنو…
محمد مشى وساب معاوية واقف محتار… لا عرف يتنازل عن القضية ويكسب عمو واولادو وبت عمو وما يعمل مشاكل بين الاسرة… ولا عرف يواصل ف القضية ومجاهد يتحاكم…..
####
في مكان تاني…
عزالدين وصل بيت ناس رشا ف لمح البصر وما صدق زاتو انو البيت خلا ومافي زول غير رشا…
اها دخل البيت وسحب السلك حق الباب عشان اي زول جا يدق الباب… و مافي زول بقدر يفتح الباب من برة….
يلا دخل البرندة لقى رامي قاعد ف التلفزيون بيحضر…ف قال ف نفسو… رامي صغير وهو اصلا ولد مدلع لا بودي لا بجيب… ف دخل الغرفة ولقى رشا قاعدة ولابسة ليها بجامة ومسرحة شعرها وشكلها حلوة تقول قاعدة متتظراهو…
اها عزالدين دخل الغرفة وقفل باب الغرفة وراهو…
رشا باستغراب : ليه قفلتا باب الغرفة ؟؟؟…
عزالدين : عشان نكون برانا وناخد راحتنا يا بت…
رشا : لا لا يا عزو افتح الباب… رامي قاعد برا يقول علينا شنو هسي ؟؟؟…
عزالدين : ياخ رامي اخوكي دا ما فاهم حاجة…. هو زاتو زيكم واحد…
رشا : هوي اوعك تتكلم في رامي…
عزالدين : خلاص معليش يا ست الناس… خلينا ف المهم… اشتقتا ليك يا منقة…
رشا ب دلع : لو اشتقتا لي كان اتصلتا علي ووريتني انت ماشي وين…
عزالدين ب رقاد : المشوار زاتي خليتو عشانك وجيتك شايل حنان ريدي… يشيلني السيل انا ان شاء الله…
رشا فصلت هيهي…
عزالدين ب رقاد شديييد : هيهي…احييييي انا ياقلبي…
عزالدين ماشي علي رشا بالخطوة البطيئة و بتعاين ليها ب خبث…
رشا : ماشي وين انت ؟؟؟…خليك مكانك…
عزالدين وهو متقدم عليها : ماشي وين كيف !!!… ماشي لي دنيتي…
رشا : عزالدين اوعك تقرب مني… .
عزالزين : ومنو ال حيسمع كلامك… الليلة الا تقدي الارض وتطلعي ب تحت… انا ما صدقتا بيتكم فاضي وكل يوم يوم تقولي لي امي قاعدة وامي واقفة….
عزالدين عايز يمسك يد رشا... ورشا نزلت من السرير ووقفت من الناحية التانية…
رشا : وااااي عزو والله اكورك…احسن ليك اقعد ساي…
عزالدين : خلاص تعالي اقعدي جمبي وانا بقعد ساي…
رشا : انا لو كنت عارفاك ح تتعابط كدا ما كان اتصلتا عليك زاتو…
عزالدين ب رقاد شديد شدييييييد : يا بت انتي بتجري مني مالك ؟؟… انتي بت خالتي وحقتي… عارفة يعني شنو حقتي… يعني ملك حر….يعني ختم عديل ... يعني اي حاجة زاتو…
رشا اتسمرت ف مكانها وقالت ليهو ب صوت حنين : عزو انتي بتغشني وبعدين تسيبني…
عزالدين ب رقاد اشد من الشديد وهو يقرب منها : انا… انا اسيبك… ياخ يكون اخر يوم ف عمري… انتي ليه م مصدقة انك حقتي ؟؟؟…انا ممكن اكذب علي اي زول ف الدنيا دي الا انتي يا رشو… انتي القلب… انتي الروح….
رشا : خايفة يا عزو كلامك دا كلو يكون كلام ف الفاضي …
عزالدين وصل جنب رشا وخت يدو ف شعرها وقال ليها : انا معاك يا رشا لحدي ما تزهجي مني… لحدي ما نكبر مع بعض واكون قاعد امسح ليكي ف شعرك واقول ليك شعرك كلو بقى ابيض يا روحي…
رشا رقدت دكوة وبقت تسمع كلام عزالدين…
وعزالدين يقول ليها ف الكلام المعسول ورشا مصدقة كلامو وشوية شوية الواطة صنت ..و…
...
..
.
وحقو بعد دا نحاول نتجاوز التفاصيل ونختصر القصة ونختمها لانو الناس عرفت الاحداث كلها…
.
..
يتبع
