رشا فهمت كلام عزالدين وقالت لي نضال : تعالي معاي دقيقة عايزاكي…
نضال : في شنو ؟؟؟…
رشا قامت وقالت ليها : قومي ارحكي هنا قريب ونجي…
نضال : طيب وود خالتك ؟؟…
رشا : نسرين بتتونس معاهو لحدي ما نرجع…
نضال : لكن يا رشا !!…
رشا قاطعتها : ارحكي ياخ ما تبقي عبيطة…
نسرين لمن شافتهم وقفو وماشين مكان قالت ليهم : ماشين وين يا بنات ؟؟؟…
رشا : ماشين هنا وجايين دقيقتين بس….
نسرين : طيب سوقوني معاكم…
رشا : لا لا الموضوع ما بخصك… خليكي مع عزو دا اتونسي معاهو لحدي ما نرجع…
رشا ساقت نضال وقالت لي بكري ارح معانا… بكري طبعا دلدول ساي…سايقنو زي الغنماية…يقولو ليهو ارح اي مكان بمشي من غير ما يسأل ماشين وين…
نضال طبعا ما عايزة تمشي…وعايزة تقعد تتأمل في عزالدين… لكن لما رشا اصرت عليها قامت مشت معاها…
اها لمن ابتعدو شوية نضال وقفت وقالت لي رشا : دقيقة يا رشا… سايقانا وين انتي ؟؟؟…
رشا : والله انا نفسي في مخبازة… وانتي عارفة نسرين ما بتحب المخبازة وعزالدين برضو ما بحبها…
نضال : خلينا نسوقهم معانا طيب…
نسرين : انتي عارفة نسرين ح تقعد تتعاور لينا وتقول يعععع يعععع….خلونا نمشي ناكل سريع ونرجع ليهم…
رشا اتلفتت علي بكري وقالت ليهو : ولا انت رايك شنو يا بكري ؟؟؟…
بكري : اااي تمام… انا زاتي مشتهي لي مخبازة والله…
رشا : يلا بينا…
رشا ونضال وبكري طلعو مشو الكفتريا وخلو عزالدين مع نسرين…
عزالدين الجو اتهيأ ليهو وقال يحاول ينجز سريع…
عزالدين : قلتي لي كيف بالله ؟؟؟… " لا لا دا كلام كلام بكري لمن ما يلقى موضوع لكن عزالدين بعرف يحنك "…
عزالدين : يعني بتعرفي تتكلمي ؟؟؟…
نسرين : ومنو القال ليك انا ما بعرف اتكلم ؟؟؟ ..
عزالدين : يا شيخة المرة ال فاتت لمن جيتوني في الجامعة انا قلت البت دي يمكن خرصاء ما بتعرف تتكلم…لانك نهائي ما عبرتيني مع انكم جيتوني ضيوف وكدا…
نسرين : ما كدا لكن انا اول مرة اقابلك وما بعرفك قبل كدا… ف ما ممكن طوالي اتونس معاك ولا افتح معاك مواضيع وانا ما بعرف طبعك كيف….
عزالدين : وهسي كيف ؟؟؟…
نسرين : هسي عادي… بس يعني قابلتك قبل كدا وبعدين ما تنسى انك ود خالة صحبتي وجيتنا ضيف في جامعتنا ف لازم نعمل معاك الواجب وكدا…
عزالدين بي قرصنة : ايواااا… يعني عادي نقدم اوراقنا ؟؟…
نسرين عاينت ليهو عين كدا ما مفهومة ورفعت ليهو يدها اليمين عشان يشوف الدبلة وقالت ليهو : ههه بالمناسبة انا مخطوبة…
عزالدين بي مكر ضرب رجلو وعمل نفسو حزين وقال ب حسرة : اخخخخخ… يا خسارة شكلي اتأخرتا… لكن ما مشكلة بس والله انا عجبني استايلك…وذوقك راقي جدا…انتي زولة فريدة من نوعك…وشكلك توب كدا وما شبه البنات…
نسرين رفعت حاجب واحد وعاينت ليهو ب استهبال : بالله…
عزالدين بي مكر زيادة : بالجد والله… ما شاء الله ..مافيكي كلام…انتي زي صباح العيد… زي قمرة في دورين...
نسرين ب خجل : هيهي...
نسرين فصلت…وعزالدين لحم سلكو… وبدأ يحنك النضيف وقعد يقول ليها انتي وانتي و كلام دراب دراب… ياخي كلام ما بخش العقل ..يعني زول واعي كدا ما بصدقو… وطلعها ليك انها نجمة جات واقعة من السماء وهي حورية جاية من الجنة بالغلط…وهي المزة الوحيدة والبنات الماشات في الشارع ديل غنم ساي….
عزالدين رقد دكوة…وهو كمان بعرف يكضب كويس…بصر وشو وما ببتسم وتحس بيهو جادي والكلام طالع من جواهو…حتى حركاتو وتعابيرو بتدل علي انو زول صادق…زول كضاب كضب… ياعوز بالله منو…ونسرين العبيطة صدقت كلامو وبقت طايرة في الجو وتحلق وسط النجوم من كلام عزالدين…
"شفتو يا جماعة نوع عزالدين دا كتاااار لافين في الجامعات والشوارع… يلا اي زول ااااي زول خطيبتو ولا مرتو بتقرأ جامعة… يحاول يملأ ليها اضانها بالكلام المعسول والحنك النضيف…قوليها انتي احلى زولة في الدنيا قول ليها كلام رومانسي وحسسها انها الزولة الوحيدة ال انت شايفها… احتويها…املا ليها حياتها وحسسها انها كل شي في حياتك… ما تبقى زول ناشف وونستك معاها كلها… ((كيفك؟؟…الجديد شنو ؟؟… في زول ضرب ليك؟؟؟…غداكم شنو ؟؟؟… قلتي لي كيف؟؟..شربتي اللبن ؟؟؟…تصبح علي خير)) …ياخي سيبك من الحنك البيش دا ..اتكلم كلام سمح رومانسي املا ليها اضانها حتى ولو بالكضب… خليها كل ما تتذكر كلامك تعاين لي نفسها في المراية وتبتسم زي المجنونة…خليها تحلق وتطير في الجو زي حمامة السلام زي عصفورة حتى ولو انت شايفها عشوشة"…
رشا ونضال وبكري… رجعو من الكفتريا بعد اكلو المخبازة ولقو عزالدين ونسرين يتونسو ويضحكو سااااي وآاااخر اندياح…
طبعا الكلام دا اكل جنبة مع نضال لكن اكلتها لباد يعني"كظمت غيظها"….
المهم الجماعة قعدو اتونسو شوية… وودعو بعض واتفرتقو وعزالدين ورشا ركبو المواصلات وراجعين البيت…
رشا : شايفاك مبسوط واخر ونسة مع نسرين… ان شاء الله بعد دا كلو ادتك الرقم ؟؟؟…
عزالدين وهو مبسوط : ههه الرقم بس ؟؟؟؟… ياخ دي ادتني الرقم وحسابها في الفيس وتويتر والانستا وما باقي ليها الا توصف لي بيتهم بي وين…وجع ياخ…
رشا : هوي يا عزو… صحبتي دي ما تغشها وخليها في حالها دي مخطوبة…
عزالدين : لا لا انتي انسي الموضوع ...ولحدي هنا ومهمتك انتهت…
رشا : مهمتي شنو ال انتهت !!!… انت عايز ترتكب جريمة ولا شنو ؟؟؟…
عزالدين طلع جزلانو وطلع عشرين جنيه واداها لي رشا وقال ليها : دا حقك زي ما وعدتك…وكدا حبايب يا منقة…
رشا شافت القروش لقتها عشرين جنيه قامت رمتها ليهو وقالت ليهو : تديني عشرين قايلني شافعة !!!..هو الشفع زاتهم اقل من خمسمية ما قاعدين يشيلو…وبعدين انا بتكلم معاك جادة والله…
عزالدين : خلاص بعدين بجيب ليكي فطاير وباسطة في البيت… .اها كدا قصرتا معاكي ؟؟؟...
رشا : لا انا بتكلم معاك عن نسرين…سيبها في حالها يا عزو دي مخطوبة وعرسها قريب… ما تخرب عليها....
عزالدين : هو انا عايز افركش ليها خطوبتها ؟؟؟… وبعدين تعالي هنا انتي جابوكي وصية عليها ولا انتي شايفاها طفلة وما بتعرف هي بتعمل شنو ؟؟؟..
رشا : انا بتكلم معاك عشان عارفاك انت تافه ...وهي زولة مسكينة ساي وما بتعرفك …
عزالدين : مافي زول مسكين الزمن دا… وهي كبيرة وبتعرف ال صح من الغلط ... وانا زاتي ما قلت ليها حاجة … شلت رقمها بس…
رشا : والله كلامك دا ما بطمن…
عزالدين : كدا فكينا من الموضوع دا… يلا خلاص وصلنا محطتكم ارح انزلي... انا الليلة ماشي معاكي بيتكم…مزاجي حكم لي بي جبنة من خالتو… يلا انزلي…
عزالدين ورشا نزلو ومشو بت ناس رشا…
####
في مكان تاني….
مجاهد طبعا اليوم ال ما مشى فيهو الجامعة… قعد اتفرغ لي تلفونو وساط الفيس سواطة… ويلقى اي بت اومراة… طوالي بخش في حسابها ويفتش صورها ولو لقى ليهو اي صورة عجبتو… بقوم يعمل ليها حفظ…
طبعا ااي زول اااي زول ببدأ جديد في طريق الانحراف والكلام الفارغ…ما بقيف وبحاول يتعمق اكتر واكتر…يلا شنو…مجاهد الصور النزلها اتفرج فيها كدااا لكن ما ارضت نفسو…وما كفتو…يعني ما الحاجة العايزها هو بالضبط او ناقصة ولسه عايز يخش في الغربق…وحاول يتعمق ويفتش لكن استعصت عليهو وغلبتو وما عرف ليها…"معليش ما بنقدر نوضح اكتر من كدا عشان الكلام ما يكون خادش… والفهم فهم… و ال ما فهم دا زول بريء ونضيف خليهو في نضافتو "….
المهم الحاجة الغلبتو وماقدر عليها… مافي طريقة الا يستعين بي صديق و زول بعرف….اها صحبو سليمان زميلو في الجامعة ما اظن يعرف… ف مافي قدامو الا علاء الساكن مع مصطفى في الداخلية لانو زول واضح وصريح وما بخجل وبختها ليهو درررر وبقول ليهو انت شاب متع نفسك…واصلا هو كان لمح ليهو… وقال ليهو لو في حاجة غلبتك تعال لي وما تتردد…
يلا مجاهد طوالي قرر يمش لي علاء في الداخلية ..والزمن داك الساعة 2 بعد الظهر والكهرباء قطعت… ف مجاهد لبس ملابسو ومشى الحوش التاني لي زينب عشان يكلمها وزيتب وعيالها كانو قاعدين في العريشة لانها شوية باردة….
زينب طبعا زيها و زي اي مراة قاعدة في بيتها مع اطفالها ولابسة جلابية بيت ..يعني عادي مرات لمن تكون الكهرباء قاطعة والدنيا سخانة بتلبس ليها جلابية خفيفة او مشروطة ...دا ما عشان هي ما عندها جلاليب تانية لكن عشان الجلابية المشروطة بتكون فيها شبابيك ومناور والتهوية بتكون مية مية مع السخانة دي...
اها مجاهد الاطرش جا داخل العريشة تووش من غير احم ولا دستور….
زينب كويس انو التوب كان جنبها… ف شالت توبها واتغطت بيهو…لكن مجاهد شاف جزو من جسمها… ومجاهد اي لقطة زي دي بخزنها في راسو الماكن دا…ومرات عديل بكون قااااصد… بمشي لي زينب بهناك ويدخل عليها فجأة عشان اللقطات ال زي دي…ويعمل نفسو عايز يشرب موية ولا اي حاجة…
اها مجاهد قال لي زينب : زينب انا طالع ماشي الداخلية ....
زينب ب عفوية : السخانة ما خلتك تقعد ولا شنو ؟؟؟…
مجاهد : لا لا بس عندنا بحث وما بعرف كيف اكتبو ...ماشي لي مصطفى عشان يوريني…ومعاوية لو جا كلميهو…
زينب : ح تبيت بهناك ؟؟؟؟…
مجاهد : والله ما عارف لكن لو الزمن اتأخر ابيت بهناك…
زينب : خلاص كويس…
مجاهد طلع مشى الداخلية لي مصطفى ...وهو اصلا قاصد يمشي لي علاء…
اها وصل غرفة ناس مصطفى وعلاء…لقى مصطفي قاعد براهو وسلم عليهو…
مصطفى : كيف امورك تمام ؟؟؟…
مجاهد : الحمد لله…
مصطفى : يا زول الليلة جيت برك يعني ؟؟؟…
مجاهد : اااي المرة ال فاتت قلت ليك بجيك… عشان ما تقول غشيتك ...
مصطفى : يا زول كويس والله…
اها قعدو يتونسو كدااا لحدي المغرب وعلاء ما ظهر…مجاهد قال لي مصطفى : اسمع وين الشباب ال معاك في الغرفة ؟؟؟… يعني ما شايفهم ظهرو لحدي هسي !!!…
مصطفى : قالو معزومين حفل استقبال الطلاب الجدد ...لكن هسي بكونو جايين في الطريق…
مجاهد : لا لا تمام…
اها الشباب جو قريب العشاء وهم مبسوطين… سلمو علي مصطفى ومجاهد… .
علاء : اقسم بالله يا مصطفى نص عمرك ضاع… والله الحفلة كانت زي السم…
مصطفى : ياخ انا مالي ومال الحفلات !!!… انتو شماسة وصعاليك ساي ... بتمشو للبنات ...
علاء : الجامعة بدون بنات ما عندها طعم يا حبيبنا…
مصطفى : بس دا الفالحين ليهو… انتو جايين تقرو ولا جايين عشان البنات…هسي كدا خلونا… اها جبتو معاكم حاجة ناكلها… انا جيعان كلب بس…
علاء : والله ما جبنا اي حاجة… عليك الله امشي ظبط لينا فتة من الدكان الناصية داك….
مصطفى زول خدوم قام طوالي شال الصحن الكبير وطلع الدكان…
علاء : جوجو يا برلوم… خبرك شنو يا فردة ؟؟؟…
مجاهد : تمام الحمد لله …
علاء : اها كيف مع التقنية والتلفون الجديد؟؟....
مجاهد : والله لسه يعني في حاجات ما وقعت لي…
علاء : خلاص دقيقة استحم ونتعشى وبظبط ليك امورك…
مصطفى جاب الفتة وجا لقى الشباب منتظرينو واتعشو وشربو الشاي…
علاء قال لي مجاهد : تعال هناك جنب سريري عشان الشاحن…
مجاهد قعد جنب علاء…
علاء : اها قول لي شنو ال ما عرفتا ليهو ؟؟؟…
مجاهد عاين لي مصطفى لقاهو بصلي وعاين للشاب التالت لقاهو مشغول بي تلفونو… ف قال لي علاء بي صوت واطي : ياخ في مواقع كدا لمن افتحا ما بتفتح معاي وبتجينا رسالة محجوب وما عارف ليك…
علاء ابتسم وقال : ايواااا….طيب افتح الشير ارسل ليك البرناج دا بتشغلو وبفتح ليك اي موقع…
مجاهد فتح الشير وعلاء رسل ليهو البرنامج ووراهو كيف يشغلو….
علاء طبعا فهم مجاهد قاصد شنو… ف قال ليهو : اسمع رسلت ليك حاجة خام كدا عز بيها نفسك يا فردة…
مجاهد فتح الملف وعجبو شديد وقعد يتلفت يعاين لي مصطفى وخايف يقبضو… عشان مصطفى زول ملتزم شوية….
مصطفى خلص صلاتو وتسبيحو وقال للشباب : يلا يا جماعة هوي ...ارحكم انزلو الكتشينة انا عندي معاكم تار…
علاء : ياخ اصبر شوية…
مصطفى : والله مافي اي صبر… انا من قبيل منتظركم تجو… يلا انزلو…
مصطفى وعلاء والشاب التالت ال معاهم… قعدو يلعبو كتشينة… ومجاهد ما بعرف يلعب فقعد يشاهد في تلفونو…
مجاهد طبعا عجبو الملف وقال لي علاء : كدا تلفونك دقيقة يا علاء….
علاء فتح التلفون بالرمز واداهو لي مجاهد…
مجاهد دخل الاستوديو وفتش كداااا ما لقى حاجة… كلها صور عادية لي علاء ومافي حاجة كدا ولا كدا…
مجاهد قال لي علاء : تلفونك مافيهو حاجة يا علاء…
علاء طوالي فهم مجاهد عايز شنو… ف قال ليهو : جيبو دقيقة…
علاء شال التلفون وهو طبعا عامل اخفاء للملفات ال كدا … يعني قافلها في ملف مافي زول بشوفها الا يفتح الملف والملف مقفول بي رمز…
اها علاء فتح الملف ورجع التلفون لي مجاهد…
مجاهد شاف الحاجات العايزها وعمل نحديد الكل ورسلها في تلفونو…
…
..
.
يتبع
