عزالدين : الووو… ياااا قلب…
نسرين : اهلين عزالدين…
عزالدين : عزالدين حااااف كدا… مافي اي كلمة تخلي الواحد يرتعش…
نسرين : عايزني اقول ليك شنو مثلا ؟؟؟…
عزالدين : قولي اي حاجة غير عزالدين… عزالدين دا اسم رسمي…
نسرين : خلاص عزو…
عزالدين : برضو مقبولة منك…اها قبيل اتأخرتي ولا رجعتي بدري ؟؟؟…
نسرين : لا لا رجعت بدري الليلة الحمد لله ما كان في زحمة…
عزالدين : تمام… انا لو ما رشا معاي كنت مشيت قدمتك وصلتك لحدي بيتكم…
نسرين : ههه لحدي بيتنا دي كتيرة ..كدا بتجيب لي هواء…..كفاية الموقف بس…
عزالدين : جدا يا ستنا…اهم شي انتي تكوني مرتاحة ...
نسرين : عايزة اسالك…
عزالدين : احكي ..
نسرين : رشا قبيلك مالا كانت عصبية كدا ؟؟؟… كانت بتتكلم معاي بطريقة غريبة وعايزة تشاكلني عديل…
عزالدين : والله انا زاتي ما عارفها مالا… لكن بتكون بتغير عليكي مني… عشان اخدتك منهم وبقيتي ما بتقعدي معاهم كتير…
نسيبة : ههه تغير علي انا برضو ولا يمكن بتغير عليك انت ؟؟؟…
عزالدين : تغير علي في شنو !!!..اصلا هي بت خالتي وفردتي شديد ومافي بينا حاجة…
نسرين : يمكن بتحبك !!!…
عزالدين : هههه… ياخ رشا دي قلبها ميت وما عندها حاجة للاولاد … وكان حبت انا اخر واحد ح تفكر فيني…ويمكن ما تعاين لي زاتو… لانو انا وهي زي الاخوان…
نسرين : لا لا عادي اصلا في ناس بفكرو في الشخص بعد ما يفقدوهو او يحسو انهم ح يفقدوهو…
عزالدين : شوفي يا منقة…انا و رشا فرد لمن بهناك… يعني اكتر واحدة صحبتي في بنات خالتي… وانا وهي متفاهمين… لكن مافي بينا حب ...واقول ليكي حاجة… انا الاصريت عليها تعرفني بيكي…
نسرين : طيب يمكن بعد شافت علاقتنا مع بعض ...بقت تفكر فيك بطريقة تانية…
عزالدين : هههه يا بت انتي قاعدة تجيبي الكلام دا من وين ؟؟؟… عليك الله انسي رشا وخلينا في برنامجنا…
نسرين : طيب نسيناها…
عزالدين : مافي اخبار من خطيبك ؟؟…
نسرين : ااه… اتصل علي امبارح بالليل لكن ما رديت ليهو…
عزالدين : يا بت ما قلت ليكي خليكي عادية معاهو وما تتغيري من ناحيتو…
نسرين : والله يا عزو قلبي اباهو وبقيت كل ما اشوف رقمو متصل علي… بطني بتطم…
عزالدين : لا لا ياخ ...مش اتفقنا انك تكوني معاهو سمنة علي عسل !!!… عشان يكون ليكي تغطية لحدي ما امورنا تسلك…عليك الله ما تخربي لينا البرنامج…ردي ليهو عادي واصلا انتي قلتي هو ما بتكلم كتير ..بس بسأل عن احوالك وبقفل طوالي…يلا انتي ردي واتكلمي معاهو…
نسرين : خلاص خير…
عزالدين : ااااي خليكي فاهمة… اها بكرة الحنك شنو ؟؟؟…
نسرين : بكرة مافي اي حنك ....
عزالدين : مافي اي حنك كيف !!!… لازم نتلاقى….
نسرين : لا لا يا عزو… اهدا شوية وخليني يومين تلاتة اقعد في الجامعة…ونتلاقى الاسبوع الجاي…
عزالدين : ما بقدر والله ..الليلة ما قعدنا بي مزاج ..و رشا اتصلت خربت لينا القعدة…عشان كدا بكرة ضروري اقابلك ومن الصباح كمان…
نسرين : من الصباح ؟؟… انت عايزني ما ادخل الجامعة ولا شنو ؟؟… وثم ثانيا لينا كم يوم بنتلاقي… انت اصبر شوية عشان تشتاق لي…
عزالدين بي رقاد : ياخ اقسم انا هسي بتكلم معاكي ومشتاق ليك…يا بت انا لمن اكون معاكي بحس اني شخص تاني… ف ما تحرميني من اللحظة والاحساس الجميل دا…
نسرين : ههههههاي…لقيتك بكاااش…
عزالدين : والله لا بكش ولا اي حاجة… انا بس بحبك والكلام منتهي…وبكرة عايز اشوفك عليك الله ما تبقي قاسية…
نسرين : اممممم… خلاص بعد المحاضرات تنتهي…
عزالدين : لا لا بعد المحاضرات ح تقولي الزمن مشى وما ح نقعد كتير…
نسرين : والله انا من تابعتك بقيت مهملة وما قاعدة ادخل محاضرات… الله يستر السمستر دا ما اشيل لي مواد…
عزالدين : انتي قايلة اي زول بدخل المحاضرات عشان يفهم ..يا بت عليكي بالشيتات واقري في البيت…و ح تجيبي معدل كبير…
نسرين : ههههاي انت بتغشني ولا شنو ؟؟…
عزالدين : لا والله ما بغشك… طيب انتي احضري المحاضرة الاولى والتانية وباقي المحاضرات ما مهمة…تعالي نتلاقى الساعة 11 برا الجامعة عشان ما تقولي لي رشا وبتاع…ونفطر سوا ونمشي الغابة هناك الجو ظااابط ومافي عوارض…
نسرين : اممممم… ما عارفة اقول ليك شنو !!!…
عزالدين : ما تقول لي اي حاجة… بس بكرة منتظرك بعد المحاضرة التانية اعملي لي جرس وانا برجع ليكي… اصلا ح اكون قريب لكن ما ح اخش جامعتكم…
نسرين : خلاص تمام…
عزالدين : اااي يا سكر…خلينا نعيش دنيتنا قبل الامتحانات تكبس علينا وبعدين ما نلقى طريقة نتقابل…
نسرين : اوكي يلا باي…
عزالدين : دقيقة دقيقة…شنو عايزة تقفلي انتي !!!…
نسرين : تعبانة والله يا عزو… عايزة انوم…
عزالدين : عايزة تنومي من هسي جدادة انتي ؟؟؟؟… خلينا نتونس شوية يا بت …
نسرين : عزو… قبيلك كنا مع بعض،… وهسي اتكلمتا معاي.. وبكرة ح نتقابل…ياخي خليني انوم والله جسمي بوجعني من المشي حق قبيل…
عزالدين : خلاص سمحنا ليكي تنومي،… بس ما اخش الفيس القاكي اون لاين…
نسرين : لا لا اصلا ما منشطة ولا عايزة انشط زاتو…
عزالدين : احسن… يلا اتخمدي نومي…
نسرين : اوكي يلا باي…
عزالدين : باي ساي كدا بدون اي حاجة… يا بت انتي قاعدة تتكلمي مع اخوكي ولا شنو ؟؟؟…
نسرين : اها طيب عايزني اقول ليك شنو ؟؟…
عزالدين : قولي اي حاجة تخلي الواحد ينوم مرتاح…
نسرين : زي شنو مثلا ؟؟...
عزالدين : زي شنو كيف… انتي اول مرة تحبي ؟؟… وبعدين انتي عارفة اخر كلام بين الاحبة بكون كيف والكلمة بتكون شنو… حاجة كدا رومانسية بتخلي الواحد يساهر الليل كلو يتقلب في السرير. ..
نسرين : ههههاي ما عشان كدا انا ما عايزاك تساهر…
عزالدين : بطلي عوارة يا بت وقوليها…
نسرين : ابييييييت…
عزالدين : والله ؟؟؟..
نسرين : جد…
عزالدين : خلاص عفيتك منها… طيب مافيها حركة كدا ولا كدا ؟؟؟…
نسرين : اها حركة شنو تاني كمان يا عزو ؟؟؟…
عزالدين بي رقاد ( رقاد يعني الولد لمن يكون بتكلم مع بت حبيبتو او اي بت قاعد يحنك معاها ...بتكلم بي لطافة ورومانسية وكلام دقااااق دقاق وصوتو بكون واطي وبتكلم بحنية تقول عايز يبكي…وبكون قاعد ليهو في مكان ما طبيعي… يعني قاعد في لستك ولا في حجر ولا قاعد ليهو في كلب ولا قاعد في كوشة وهو ما حاسي بي نفسو… ويقول كلام دراب دراب ما بتصدق زاتو… يعني مثلا اب شنب لمن يرسل لي حبيتو ويكتب ليها ردي لي انا ما قادر اتنفس ..واب جيقة لمن يقول لي حبيبتو انا حق من. ؟؟؟.. يلا دا اسمو رقاد ) اها عزالدين ب رقاد : حركة كدا انتي عارفاها… والبت قبل ما تقفل الخط بترسلها ل حبيبها…
نسرين : انا ما بعرفها…
عزالدين : بتعرفيها كويييس… عليك الله فكيها ..
نسرين : ابيييييت…
عزالدين : ياخ ما تبقي ناشفة انتي كمان… اي حاجة اقولها ليكي تقولي ابيتي…
نسرين ب زعل : انا ناشفة يا عزو ؟؟؟..
عزالدين اتراجع : لا لا خلاص ما ناشفة…لكن كمان ما تبقي قاسية يا نسو …وتحرميني من اي حاجة…
نسرين ساكتة وما عايزة ترد…
عزالدين : ما قلنا معليش يا بت…ما تزعلي وحقك علي…
نسرين : ما تقول لي ناشفة تاني…
عزالدين : حاااضر يا ستنا… اها صافي يا لبن ...
نسرين : ما صافي ولا حاجة…
عزالدين : طيب رسلي حاجة عشان نصفى…
نسرين : كف بس لو عايز…
عزالدين : انا استاهل كف يعني ؟؟؟…
نسرين : اااي عشان قليل ادب…يلا سلام…
وقفلت الخط…
عزالدين ما قدر يفهم نسرين زعلانة ولا ما زعلانة من كلامو والطلبات الطلبها منها…
ف قرر يرجع ليها تاني ويجسها ويشوفها ولو لقاها زعلانة يحاول يعتذر ليها ويعمل نفسو بمزح معاها… ولو لقاها ما زعلانة ف دا العايزو…
ف رجع اتصل عليها جرس جرسين وردت…
نسرين : اها مالك يا ولد ؟؟؟…
عزالدين : اشتقتا ليك…
نسرين : عزو عليك الله خليني انوم…
عزالدين : يعني ما زعلانة وصافي يا لبن…
نسرين : ياخ ما زعلانة بس انت اقفل مني…
عزالدين بي رقاد : طيب انا في انتظارك…
نسرين : اااي خلاص بكرة نتلاقى…
عزالدين : لا لا قصدي ليكي رسليها…
نسرين : عزووووو…
عزالدين : خلاص يا ستي…بنوم كدا قرقاش…
نسرين : باااي…
عزالدين : واااي…
نسرين قفلت الخط… وعزالدين عرف انها ما زعلانة منو…لانها لو زعلانة منو كانت وقفتو في حدو… لكن هي شكلها بتتدلع عليهو… وقال في نفسو ...في امل بس عايزة مسايسة و ح يحاول معاها…
المهم اليوم التاني نسرين مشت الجامعة وحضرت المحاضرتين زي ما اتفقت مع عزالدين ....وكانت قاعدة جنب رشا لكن ما اتكلمت معاها لانها حست بي رشا شايلة منها…
اها بعد المحاضرتين انتهت ..طلعو للفطور…ونسرين قالت ما ح تفطر معاهم وطالعة مشوار…
رشا : ماشة وين ؟؟؟…
نسرين : ماشة عندي قريبتي عيانة مرقدنها في الحوادث… بمشي بكفر ليها وبرجع…
رشا : انتظري طيب نفطر ونمشي كلنا معاكي…
نسرين : لا لا اقعدو انتو عشان تحضرو المحاضرات الباقية… انا بمشي سريع وبجي ما بتأخر…
نسرين مشت سريع وطلعت برا الجامعة قبل ما رشا تحقق معاها… واتصلت علي عزالدين…
عزالدين : الوووو…
نسرين : ااي يا عزو وين انت ؟؟؟…
عزالدين : تعالي بي جاي جنب الاشارة تلقيني واقف…
نسرين مشت لي عزالدين ودخلو اقرب كفتريا اكلو ليهم سندوتشين واتحركو مشو علي الغابة… وصلو هناك وشالو كرسيين من ست شاي ولقو ليهم شجرة اتدسو وراها وقعدو يوسوسو…
عزالدين : شنو انتي امبارح عاملة لي تقيلة ؟؟؟…
نسرين : تقيلة في شنو؟؟؟… اوع تكون قصدك الكلام الفارغ القاعد تقولو ؟؟؟…
عزالدين : شنو هو الكلام الفراغ ؟؟؟… انا قلتا ليكي شنو اصلو ؟؟؟…دي حاجات عادية يا بت…
نسرين : عزالدين انت بتطلب مني حاجات انا عمري ما عملتها ولا في زول قالها لي…
عزالدين : شوفي يا بتنا… اي طالب لو حضر المحاضرات وقال يعتمد عليها عشان ينجح.. ما بنجح… الا يشتري ليهو كتب وشيتات ويراجع في البيت… كلامي صاح ؟؟…
نسرين : ااي صاح...
عزالدين : والملاح البناكلو دا ...من غير ملح وبهارات ما بكون عندو طعم… صاح ؟؟…
نسرين : ااي صاح…
عزالدين : الشاي زاتو من غير سكر ما بتشرب… صاح ؟؟…
نسرين : اااي صاح…
عزالدين ب رقاد : يلا شنو… الحب زاتو عندو حاجات كدا خفيفة بتديهو نكهة و طعم …والحاجات الخفيفة دي بتخلي الحبايب يتمسكو بي بعض اكتر وحبهم كل يوم بيزيد…ف شنو… انتي ما تصعبي الحكاية ياااا نسو…
نسرين بتعاين في الارض وبتلمس في اظافرها : لكن يا عز…
عزالدين قاطعها : ما لكن ولا اي جاجة…ياخ الحاجات دي عادية بين اي اتنين بحبو بعض…وانتي عاملة لي زعلانة عشان قلتا ليكي رسليها لي…ياخ انا لو علي اشيلها منك عدييييل كدا…
نسرين ب خجل : تحلم حلم…
عزالدين عرف انو نسرين فصلت بس عايزة شوية رقاد وحنك… ف قال ليها ب رقاد شدييييد : بس قولي لي احلم كيف وانتي قاعدة قدامي…
طبعا هم كانو خاتين كراسيهم مقابلة لي بعض… لكن عزالدين بعد الكلام جاب كلام… شال كرسيهو ولصقو مع كرسي نسرين وقعد ملاصق ليها وهي قاعدة تطقطق في اصابعيها وتعاين في الارض…
عزالدين مسك يدها وقال ليها : انتي عارفة يا نسو… انا عمري م…
تررررررررررن تلفون عزالدين رنه…لمن هو اتخلع…
عزالدين طلع تلفونو لقاها دي رشا متصلة عليهو…
عزالدين رد ليها بي زهج : اااي يا بشر ف شنو ؟؟..
رشا : ومالك انت بتتزهج فيني كدا ؟؟..
عزالدين : هسي دا زمن تتصلي فيهو ؟؟؟…في شنو طيب ياخ ؟؟؟…
رشا : وين انت ؟؟؟…
عزالدين : في السما الاح… في الجامعة… مالك ؟؟؟…
رشا : انت صحي مالك بتتنهر فيني كدا ؟؟؟…
عزالدين : في الجامعة قلت ليكي قاعد في محاضرة…
رشا : لا لا ما في الجامعة… مكانك هاااادي وما سامعة صوت زول…
عزالدين : ياخ طيب عايزة شنو ؟؟؟…
رشا : انا عيانة تعال وديني البيت…
عزالدين : انا بعيد ما بقدر اجيكي…
رشا : طيب تعال سريع انا منتظراك…
عزالدين : قلت ليكي بعيد وما برجع الا بعد المغرب… امشي البيت براكي…
رشا : قول قاعد معاها وما فاضي لي بس…
عزالدين : قاعد مع منو قصدك ؟؟؟…
رشا : يعني ح تكون قاعد مع منو !!!!… ما قاعد مع نسرين ...
عزالدين : ما قاعد معاها ولا شفتها زاتو…
رشا : قااااعد معاها… لكن اصبرو لي انتو الاتنين…
وقفلت الخط…
####
في مكان تاني…
تلفون ابراهيم رنه ..لقاهو دا ود حسين متصل عليهو… وفتح الخط،…
ابراهيم : حسونة…سان السان…
ودحسين : كيفك يا جاح…
ابراهيم : كلو سمبتيك…
ودحسين : مجكك في الهوم يا جاح ؟؟؟…
ابراهيم : يو…
ودحسين : افحت الدور انا كاجي ربا…
ابراهيم مشى فتح الباب ولقى ودحسين واقف بي عربيتو…
ابراهيم : شخ شخ يا مان…
ودحسين نزل من عربيتو وسلم علي ابراهيم سلام راطسات ودخلو الصالون حق ابراهيم…
ابراهيم : الحنك ونش ؟؟…
ودحسين : والله تيبنا مقفل وكدا… كجو لينا ضيوف يا جاح وغرقو التيب… علطتا لخيتهم…
ابراهيم : زيت يا مان… جيت في التايم… هسي كنت عايز الف لي اصبع…
ودحسين : لف لف خلينا ننفخ يا جاح…
اها ابراهيم و ود حسين شربو سجارتهم كويس وبعديها ...
ودحسين : اسمع… انت مش قلتا لي في سان كدا تباع كناد ما دسيس بنجكم نها ؟؟؟…
ابراهيم : يو يا مان… دا تباع الكناد ال في الصانية دا…
ودحسين : قوم نشتم ليهو…
ابراهيم : لي ونش ؟؟؟…
ودحسين : انا رايدو عماهو السان دا…
ابراهيم : ياخ اكسر الحنك…
ودحسين : لا لا يا جاح… حكمت عماي دكا…
ودحسين قام وطلع علي االشارع فتح عربيتو طلع منها بسطونة زي بسطونة العساكر بتاعين الشغب… وختاها في كتفو ومشى علي دكان الريح وابراهيم ماشي وراهو …
…
..
.
يتبع
