عزالدين قعد يتونس مع رشا وصحباتها وبقى يتظارف معاهم وكان بلمح للبت الباكي فيها واسمها نسرين… لكن نسرين ما كانت مدياهو اي اعتبار… مع انها عارفة انو عزالدين قاصدها وبحاول يتظارف ليها لمن هي كانت متجاهلاهو…والشي دا كان مضايق عزالدين شديد…
المهم بعد خلصو ونستهم وقامو ماشين واتفرقو… عزالدين ورشا طلعو سوا وركبو المواصلات…
عزالدين : شنو انتي صحبتك دي عاملة فيها تقيلة ؟؟؟…
رشا : هههه ما قدرتا ليها مش كدا ؟؟؟… من اول انا كلمتك قلتا ليك دي ما بتقدر عليها ..انت براك كنت راكب راس…
عزالدين : هي مالا شايفة نفسها كدا.. قايلة نفسها حلوة ولا شنو ؟؟…
رشا : والله حلوة غصبا عنك… بس قول عشان ما قدرتا عليها… لكن انت زاتك غبي وكت شفتها متجاهلاك كان تحنك مع التانية… ديك مسكينة وسنقل… يعني لو كان لمحتا ليها ساي كان انبرشت فيك….
عزالدين : والله اقول ليك حاجة… انا كمان الا اجيب راس نسرين دي… بس انتي اديني رقمها…
رشا : لا لا يا عزو ما بقدر اديك رقمها...بعدين بتزعل مني…
عزالدين : ما تخافي انا ما بقول ليها انتي اديني الرقم…
رشا : يا ود انت عبيط…يعني هي لمن تعرفك دا انت… اكيد ح تكون متأكدة اني اديتك الرقم…
عزالدين : طيب الحل شنو… وريني ساكنة وين وانا بجيب زيتها…
رشا : لا لا ما بوريك…وانت حقو تشيل منها رقمها بالدغري كدا وما تدخلني بيناتكم…
عزالدين : طيب اشيل رقمها كيف وانتي ابيتي تديني ليهو…امشي ليهم في البيت يعني !!!…
رشا : انت حاول تعال لينا بكرة في الجامعة… وحنك معاها مرة تانية ..يمكن هي بس ما عايزة تكون خفيفة… وشوف حنكها شنو… لو ادتك ريق حلو وشفتها ح اتكلمت معاك…يكون تمام ..ولو شفتها قافلاك ومافي طريقة تحنك معاها… ف خليها في حالها عشان ما تحرجك … .
عزالدين : برضو فكرة…لكن والله البت دي كاسرة فيني ضلعة يا رشو…
رشا : خلاص بكرة آخر ليك فرصة…اجتهد وسنن حنكك…
عزالدين : وبكرة بستخدم معاها كل الاحناك وكل الاسلحة…وشوفي لو ما جبتا ليكي اخرها… ما اكون انا عزو ود خالتك…
رشا طقطقت للسواق وقالت لي عزو : ارح انزل معاي…بتلقي امي جبنتها جاهزة…
عزو : لا لا انا بمشي البيت طوالي… عندنا تمرين بيبسي الليلة…
رشا : طيب بعد المغرب ح تجينا ؟؟؟…
عزالدين : بحاول لو لقيت طريقة…
رشا : يلا سلام… ادفع لي معاك ...زي ما وعدتني…
عزالدين : خلاص امشي… الله يعوضني علي القروش الخسرتها فيكي....
####
في مكان تاني…
ابراهيم طلع من بيتهم ومشى علي دكان الريح…
وفي الدكان…
ابراهيم : سلام يااااا بتاع الهناي…
الريح : اهلا ابراهيم… هناي شنو البتتكلم عنو ؟؟؟…
ابراهيم : قالو فكيت اخرك وقلبتا… لكن ما عارف الكلام دا صاح ولا غلط !!…
الريح بارتباك : اااا… قبلتا شنو يا زول دا منو القال ليك الكلام ؟؟…
ابراهيم : في واحد قبضك بالثابتة وانت بتعمل حركة ما دسيسة يا مان !!…
الريح ارتبك زيادة وقال ل ابراهيم : ق ق ق ق قبضني ؟؟؟… قبضني وين ؟؟…
ابراهيم : قبضك في دكانك دا يا فردة… وانت من بترجف كدا معناهو كلامو صاح… اصلا اي زول مقلبن ما بعترف… ع العموم حنكك دا ما ظابط يا مان… اللحمة الحية قدامك وتمشي تقلب هوبة….والله انا لو في مكانك دا اثبت نساوين الحلة كلهم… وما اعاين لي طفل يا قاتل البراءة…
الريح سكت وما اتكلم…
ابراهيم : اول كنت دسيس يا مان بتاع خالات وقلنا الريح دا امورو واضحة ... لكن شكلك راحت ليك وطشيت شبكة…المهم ما علينا… اديني علبة سجاير وجيب اسكراتش زين خلينا نتخارج….
الريح شال اسكرتش وعلبة سجاير واداهم لي ابراهيم… ورفض يشيل القروش…
ابراهيم جدع ليهو القروش وقال ليهو : امسك قروشك يا زول… انا ما بتاع نجايل…ولا انا البعملك رهينة… شوف ناسك وين…
ابراهيم رجع البيت ونزل الكرت في تلفونو واتصل علي عباس…
عباس : هيما…
ابراهيم : عبس وين يا مان ..مالك اتأخرتا ؟؟…
عباس : مشيت اجيب الراس…
ابراهيم : سريع طيب يا مان ..عشان نوزن الباسم ونتجارخ…
عباس : في الطريق يا عمك قريب منك …
ابراهيم قفل من عباس واتصل علي ريم في تلفون اختها رفيدة ولقى التلفون مع ريم لانها كانت بتسمع بيهو…
ريم : الووو ابراهيم كيفك ؟؟؟…
ابراهيم : تمام والله… اها الليلة كيف ؟؟؟… بعد المغرب طالعين حفلة بتطلعي معانا ولا مافي طريقة ؟؟…
ريم : الحفلة وين ؟؟؟…
ابراهيم : في الجاح فان… الحاج يوسف… .
ريم : بعيدة ياخ…
ابراهيم : اااي والله بعيدة والحفلة زاتا ح تنتهي متأخرة… وممكن نرجع الساعة 12 او 12 ونص…والزمن دا ما بنفع معاك…
ريم : والله يا ابراهيم ما عارفة اقول ليك شنو ؟؟؟…
ابراهيم : يا زولة انا عارف الحفلة دي ما حتنفع معاكي وكلمتك للمعلومية… لكن مافي مشكلة خليكي…ولو في حفلة عصرية بكلمك…
ريم : كدي دقيقة وبرجع ليك…
ريم قفلت من ابراهيم… مشت لي اختها رفيدة ومسكتها من يدها وبقت تترجى فيها…
ريم : رفو… اختي الحبيبة انا واقعة في عرضك يا اختي ومستقبلي كلو في يدك انتي…
رفيدة نفضت يدها وقالت لي ريم : يا بت انتي عبيطة ولا شنو ؟؟… زحي مني كدا كدا…
ريم : عليك الله اقيفي معاي يا رفو…
رفيدة : تلفوني وعملتي حقك عديل… تاني عايزة شنو !!!… بس ما تكوني طالعة حفلة ؟؟؟…
ريم : ااي و الله يا رفو…
رفيدة : لا لا تاني انا ولااااا بساعدك ولا حاجة ..كفاية الايام الفاتت عدت بسلام…
ريم بترجي : عليك الله يا رفو… انتي اختي الكبيرة يرضيكي ما تقيفي معاي…
رفيدة : ريم طلعيني انا من مواضيعك دي…
اها ريم حنست رفيدة كداااا وفي الاخر وافقت ليها…
ريم طوالي رجعت اتصلت علي ابراهيم…
ابراهيم : اها يا بتنا الحاصل شنو ؟؟…
ريم : اسمعني انا ماشة معاكم…
ابراهيم بي دهشة : جادة انتي ؟؟…
ريم : اااي والله… بس وريني الفنانة منو ؟؟…
ابراهيم : دانة بتعرفيها طبعا…
ريم : اااي ااي بعرفها… خلاص بعدين لمن تكونو طالعين اضرب لي بوري وانا بطلع طوالي…
ابراهيم : خليك جاهزة…
ريم : تمام…
عباس جا لي ابراهيم وشربو سجارتهم وبعد المغرب رفعو عدتهم ومعاهم جماعتهم البعامين او المساعدين وضربو بوري لي ريم وطلعت ركبت معاهم ….
وصلو مكان الحفلة وكانت في الجاح فان…
اها وصلو زي الساعة 8 ونص وربطو الساوند طوالي…
ريم : هيما وينو ود حسين ؟؟؟…
ابراهيم : ود حسين الليلة ما شغال معانا… قال عندو قعدة خاصة….
ريم : شايفة ودحسين جنو حفلات خاصة…
ابراهيم : الحفلات الخاصة دي يا ريم حساباتها براها…يعني نقاطة من امها… و دي بطلعوها الفنانات الكبار…انتي عارفة قعدة واحدة بتعادل شغلنا بتاع الشهر كلو….
ريم : وانا اقول ودحسين مالو كل مرة بقول عندو قعدة….اتاريهو ماشي مكان القروش…
ابراهيم : كدي خليك من ودحسين… طبعا الليلة انتي ح تشاركي مع دانة ..يعني ح تغني معاها عديل… اها جاهزة ؟؟؟…
ريم : لا لا يا ابراهيم ما جاهزة…
ابراهيم : ح تغني يعني ح تغني…خلاص انتي بقيتي فنانة…يلا بعد دا لازم تظهري…
المهم الحفلة بدت ودانة بدت تغني وريم كانت واقفة معاها…
طبعا ابراهيم كلم دانة وقال ليها خلي ريم تغني وشجعيها… وفعلا ريم غنت ودانة كانت بتحمس فيها وغنت بي صوت جميل لدرجة انو ناس الحفلة في البداية كانو متضايقين منها لانهم جابو دانة لانها مشهورة في الجاح فان…لكن ريم لمن غنت ليهم وسمعوها… اتكيفو منها ...
الحفلة طبعا حنة عروس وكانت مقفولة في حوش وباب الحوش مقفول ما بخلو زول يدخل الا تكون بت او مراة… يعني راجل ما بخش الا يكون من اهل العروس…
المهم شباب الجاح فان عارفين انو الحفلة بي دانة وجو ولمن لقو الحفلة مقفولة بقى يرقصو في الشارع…لكن لمن سمعو صوت ريم عرفو انو القونة دي ما دانة…بس صوتها جميل وغناية… ف ركبو في الحيطة عشان يشوفو القونة دي مني… وطبعا الحيطة كلها اتملت شباب… وبقو يتلبو بي جوة عشان يشوفوها من قريب… واهل العروس كانو بشاكلو في الشباب وبطلعوهم برا واي واحد راكب في الحيطة بنزلوهو تحت… و شوية كدا والحفلة شغالة… جات طوبة وضربرت دانة في وشها… لكن جات خراطية بالجنبة في خدها… وبعديها النور طفى والدنيا بقت ضلام… وجات كم طوبة وضربت ليها كم بت و بدا الفليق بالطوب…
ابراهيم قال لي عباس والشباب : دبابين…
عباس والشباب : اااي يا عمك …
ابراهيم : كتمت يا شباب… نحاول نلم العدة سريع قبل السانات ديل يجازفوها….
ريم كانت ماسكة في ابراهيم وخايفة شديد…
ابراهيم قال ليها : خليك تحت الكراسي ما بتجيكي حاجة لحدي ما نلم الساوند…
عباس ومعاهو الشباب… اي اتنين مسكو ليهم سلك وتابعوهو لحدي ما يوصلو السماعة…
المهم ابراهيم والشباب لملمو الساوند ودخلوهو في البرندة ودخلو وريم معاهم….
ابراهيم بسأل في عباس وباقي الشباب عايز يتطمن عليهم…اي واحد فيهم طلع مضروب كم طوبة في ضهرو لكن مافي واحد فيهم اتكسر ولا انجرح…وريم ما جاتها حاجه لانها كانت متخبية تحت الكراسي لكن لسه خايفة وبترجف… بس دانة كانت بتبكي وتتألم وخدها وارم من الضربة….
اها اخوان العروس ومعاهم اصحابهم طلعو للشماسة ودقوهم وطردوهم… ووقفو بي سواطير وعكاكيز في الشارع وقالو لازم الحفلة تشتغل تاني والراجل خلي يقرب من الشارع عشان ياكلوهو حي…
المهم ابراهيم قال ليهم مافي طريقة وبنعوضها ليكم مرة تانية لانو الفنانة دانة مضروبة وما بتقدر تشتغل…
اخوان العروس قالو تشتغل البت التانية الغنت مع دانة…ريم طبعا كانت خايفة من الموقف الحصل لكن ابراهيم شجعها وقال ليها دي فرصتك وما تخافي الحفلة محروسة ما بتجيكي حاجة تاني…
اها بعد اصرار من اخوان العروس… ابراهيم ربط الساوند وكان في سماعة مشروطة وشكلها جاتها طوبة طايرة… اها ربط ليهم سماعة واحدة وصراختين…والحفلة اشتغلت…
ريم غنت في البداية بي خوف وهي بتتلفت… لكن شوية شوية والخوف راح منها وغنت ليهم واطربتهم بالاغاني الحفظتها…
رغم انو كان في شوية تنشنة من اهل العروس عشان الناس الانضربو في الحفلة لكن استمتعو وهججو وانبسطو…
بعد ما الحفلة انتهت دانة نادت ريم علي جنب ومدت ليها قروش وقالت ليها : امسكي دي الفين جنيه…
ريم : حقت شنو ؟؟…
دانة : دا العداد حق شغلك… طبعا انا بشتغل بي اربعة الف… شلت الفين واديتك الفين…
ريم بي دهشة : انا م…
دانة قاطعتها : عايزة زيادة ولا حاجة ؟؟؟..
ريم : لا ما قصدي كدا لكن الحفلة دي حقتك وانا جاية مع ابراهيم بس…
دانة : انتي غنيتي واطربتي الناس وما قصرتي… ومن اليوم تاني اي حفلة ح اسوقك معاي عشان تظهري يا ريم… انتي غناية وصوتك حلو ....
ريم ما عرفت تقول ليها شنو… بس كانت فرحانة من جواها انها مسكت ليها الفين جنيه يعني حقتها… هي ما مصدقة لانها كانت بتشحد قروش الكريم من امها….وبعد دا كلو الكريم بتمسحن بيهو هن التلاتة….
ابراهيم كان واقف بعاين ليها وشاف فرحتها بالقروش وقال ليها : يادوبك كدا بديتي الطريق… يلا احفظي اغاني زنق كتير وتاني ح تطلعي حفلات براكي…
المهم ابراهيم والشباب لملمو الساوند ورفعوهو في الكريز واتحركو رجعو وصلو البيت زي الساعة واحدة الا ربع…
ريم شالت تلفون ابراهيم واتصلت علي رفيدة اختها لكن رفيدة ما بترد ...واتصلت عليها مرتين وتلاتة ورفيدة ما بترد…
ريم بي زهج : يا الاااااااااه العبيطة دي بتكون نامت… مع اني قلت ليها انتظريني عشان تفتحي لي الباب…
ابراهيم : طيب دقي الباب ؟؟؟…
ريم : لا لا اي حاجة ولا ادق الباب… والله ابوي لو شافني جاية زي الوكت دا… ح يضبحني من غير ما يعرف انا جاية من وين …
ابراهيم : طيب الحل شنو ؟؟؟...
ريم : والله ما عارفة… دا كلو من رفيدة الحيوانة دي عملتها فيني…
ابراهيم : مافي غير حل واحد…
ريم : اها شنو قول…
####
في مكان تاتي….
نسيبة ومازن بقو متعلقين بي مجاهد اكتر ... ومعاوية وزينب بقو ما فاضين لي عيالهم وبقو متفرغين لي نفسهم…
اهاااا…
…
..
.
يتبع
