مجاهد كان شايل ليهو تلفون نوكيا صغير…لكن طبعا شاف الطلبة معاهو شايلين تلفونات كبيرة وبدخلو مواقع التواصل الاجتماعي وبدردشو مع بنات وكدا …
المهم الحكاية عجبتو و قرر يشتري تلفون كبير لانو قروشو متوفرة وما قاعد يصرف كتير… بس حق المواصلات ومرات بفطر في الجامعة…لكن باقي الوجبات كلها في بيت معاوية…
اها ابوهو لمن رسل ليهو قروش الشهر الجديد… مجاهد طلع قروش الفطور والمواصلات وزادها شوية وختاها علي جنب وباقي القروش الفضلت من الشهر الفات وعلي القروش ال حتفضل الشهر دا لماها…ومشى السوق العربي مع مصطفى واشترى ليهو تلفون كبير ...وقال لي مصطفى نزل الفيس والواتس والماسنجر والحاجات السمحة دي…
مصطفى : انا والله ما عندي شغله بيهم ولا بعرف كيف بتعاملو بيهم… لكن الزمن بدري… ارح الداخلية نكلم الشباب القاعدين معاي في الغرفة ديلك بعرفو كويس و ح يظبطو ليك تلفونك…
مجاهد : لكن ما تقول لي ابيت معاك لاني ما كلمت معاوية ولا شايل معاي غيار…
مصطفى : ما مشكلة… ارح وبعدين ارجع بيت معاوية…
مجاهد : خلاص خير يلا نمشي…
مصطفى ومجاهد مشو الداخلية ولقو واحد من الشباب الاتنين القاعدين مع مصطفى والتاني ما موجود ..
مصطفى : اسمعني يا علاء…مجاهد دا اشترى ليهو تلفون جديد وعايزك تنزل ليهو فيس وواتس وتعمل ليهو حساب في الفيس…
علاء : جدا وينو التلفون…
مجاهد طلع التلفون من جيبو واداهو لي علاء …
مصطفى قال لي مجاهد : اقعد مع علاء دا بظبط ليك التلفون ..وخلي يفهمك كيف تتعامل مع العولمة عشان ما تمشي تطبز ساكت ....انا عايز اخد لي نومة كدا خفيفة…
مجاهد : خلاص كويس…
علاء نشط لي مجاهد خدمة يوم ونزل ليهو الفيس والماسنجر والواتس وعمل ليهو حساب في الفيس…وعلمو كيف ينشر وكيف يعلق للناس والاعجابات وكيف يرسل طلبات صداقة ويدخل خاص وطريقة البحث … وقال ليهو الفيس مليان مزز….واي حاجة عايزها بتلقاها في الفيس….وفعلا وراهو بيان بالعمل كيف يبحث وكيف يدخل في بروفايل اي شخص ويشوف صورو وفيديوهاتو عادي وممكن يعمل حفظ للصور والفيديوهات في تلفونو من غير ما الشخص يعرف….
اها مجاهد مادي راسو وقاعد مقهي مع علاء وشرب ليك الكلام شراب وفهم اي حاجة قالها ليهو… وطبعا علاء زول مسلط…وعلم ليك مجاهد اي حاجة ….
يلا مجاهد بعد فهم كويس… خلى مصطفى نايم وطلع من الداخلية قريب المغرب… وفي الطريق كان بطبز في التلفون وبعمل نفس الكلام القالو ليهو علاء…لحدي ما وصل بيت معاوية….
معاوية اليوم داك كان تعبان وما اتونس مع مجاهد كتير وبعد العشاء طوالي نام…
نسيبة ومازن قاعدين يحضرو مع امهم في التلفزيون بهناك… ومجاهد مسك التلفون وفتح الفيس وقعد يتصفح…
الزول لمن يكون مستجد في حاجة… بيتعامل معاها بي طريقة بشعة… ومجاهد بالجد التلفون والفيس تعبو معاهو شديد وعيونو زاتهم تعبن من المعاينة في التلفون…
والفيس طبعا فيهو السمح وفيهو الكعب ..و اي زول بلقى ضالتو في الفيس… يعني العايز يتعلم ويستفيد بلقى الفائدة والعايز يضيع زمنو والعايز يتسلى والعايز الفارغة بلقاها وكلو موجود في الفيس….
والزول لو كان دغري وزول ثابت… ما بفتش للفارغة وحتى لو جاتو لحدي عندو ما ح يشتغل بيها كتير… لكن لو الزول فيهو نفس ومنحرف من الداخل اكيد ح يتم انحرافو في الفيس و ح يلقى ضالتو… والتلفون دا حاجة شخصية وانت بتستعملو براك… يعني حسب فهمك والعايز تعملو ح تعملو… و مافي زول مراقبك… بس ربنا الوحيد الشايفك….
مجاهد كان من الاشخاص ال بحاولو يظهرو قدام الناس انهم اشخاص ملتزمين وما بتاعين فارغة… ومجاهد كل الناس بتشهد عليهو سوى كان في البلد او هنا في بيت معاوية او في الجامعة انو زول دغري وسوي وما بتاع بنات ولا بدخن ولا بسف يعني كان ود طبي ... يعني نقي ونضيف… لكن مجاهد في جواهو كان عكس الظاهر للناس…عايز ينحرف وعايز يعرف ويعمل اي حاجة في الدنيا… بس عايز يعملها في السر وما كان عندو الشجاعة عشان ينحرف…لانو ما عايز يشوه سمعتو قدام الناس… ونفسو من جوة ماكلاهو….
ف شنو اكيد في ناس كتار زي مجاهد… الواحد قدام الناس يعمل فيها انسان طاهر وما بتاع فارغة… لكن بي تحت تلقاهو خارب الدنيا كلها… ويدخل مواقع ويدخل الفيس وينخس ويقابض ويعمل علاقات ويخش علي البنات والنسوان خاص ويحنك معاهم وممكن يكون عندو علاقات حقيقية لكن مع بنات او نساء ما بعرفهم ولا بعرفوهو… يعني بلعب بعيد بعيد…
مجاهد اليوم دا قاعد في التلفون قريب اذان الصبح ...حتى مازن جا نام جنبو ومجاهد ما شغال بيهو… بس ماسك التلفون ويدخل في بروفايلات البنات ويفتش الصور ..ولو في صورة عجبتو او فيها حاجة من مفاتن البت ظاهرة ..بقوم بعمل للصورة حفظ في تلفونو….وكل شوية بتظهر ليهو بت تانية عندها صور خليعة وهو يشيل ويحغظ في تلفونو…
المهم الليل كلو شغال كدا ملف بت لي ملف بت تانية وكلهن عندهن صور ما كويسة…
مجاهد عيونو وجعتو وبقى يشوف طشاش… ف قفل التلفون ونام قريب الصبح…والصباح معاوية صحاهو عشان يمشي الجامعة… مجاهد كذب علي معاوية وقال ليهو الليله ما عندنا محاضرت ... و دا كلو عشان امبارح كان مساهر وهسي تعبان عايز ينوم ويتفرغ للتلفون….
المهم معاوية مشى خلاهو نايم…وزينب ما صحتو للشاي ولا لي اي حاجة وخلتو نايم بي راحتو لحدي ما قام براهو زي الساعة 10 صباحا…
طبعا معاوية مشى الشغل ونسيبة ومازن مشو المدرسة… والبيت ما فيهو زول غير مجاهد وزينب…
####
في مكان تاني….
ابراهيم : بابكم مقفول وقلتي ما بتقدري تدقي الباب… يبقى مافي غير حل واحد…
ريم : اها شنو قول ؟؟؟…
ابراهيم : ارح نومي معاي والصباح امشي بيتكم…
ريم بي دهشة : انت بتقول شنو يا ابراهيم كيف انوم معاك ؟؟؟…
ابراهيم : يا بت قولي بسم الله…قصدي... انتي ح تنومي جوة الصالون وانا ح انوم في الحوش… ولو خايفة مني اقفلي باب الصالون عليكي من جوة…
ريم : مقعولة يا ابراهيم انوم في صالونكم ؟؟؟… وامك وابوك لو صحو ولقوني نايمة في الصالون ح يقولو علي شنو !!!…
ابراهيم : لا ياخي… انا ح اصحيكي الصباح بدري قبل ما ناس بيتنا يصحو…
ريم : لا يا ابراهيم ما بقدر… لانو ابوي اول زول بصحى في البيت وبجي بصحينا كلنا للصلاة… ولو لقى سريري فاضي ح يقلب الدنيا علي…
ابراهيم : طيب ح اصحيكي قبل اذان الصبح واتصلي علي رفيدة يمكن تكون قامت من النوم وتفتح ليكي الباب…
ريم : رفيدة دي بتنوم زي الميتة… وعشان تصحى الا يلبعوها لبع حتان تقوم….
ابراهيم : خلاص تاني انا ما عندي ليك حل… انت فهمك شنو !!…
ريم فكرت كداااا وقالت لي ابراهيم : اسمع اديني شنكل…
ابراهيم : عايزة تعملي شنو انتي ؟؟..
ريم : عايزة اتلب بالحيطة….
ابراهيم بي دهشة : انتي جنيتي ؟؟… بتقدري تتلبي بالحيطة ؟؟؟…
ريم : اااي عادي قبلي كدا تلبتا…
ابراهيم : والله البشوفك بقول مسكينة وعلي نياتك لكن شكلك محمد ولد…
ريم : ههه محمد ولد ساي !!..اسكت بس وتعال اديني شنكل….بس قول ان شاء الله ابوي ما يكون نايم جنب الباب…
ابراهيم : كدا نشوفك بتتلبي كيف…
ريم : بس براحة ما تخلي الباب يعمل ازعاج عشان ابوي بصحى…
ريم مشت وقفت جنب بابهم وابراهيم رفعها من رجلها وهي مسكت في الباب وعاينت بي فوق ما شافت ابوها… بس اخواتها نايمات لكن بعيدين من الباب…
ريم : كويس ابوي نايم في الحوش التاني…
ابراهيم : اخواتك نايمات وين ؟؟؟…
ريم : نايمات في الحوش هنا لكن بعاد شديد…
ابراهيم : طيب ارميهم بي حجر يمكن واحدة فيهم تصحى…
ريم : هههه هسي لو الحجر ضرب واحدة فيهن ح تصحى مخلوعة وتقعد تصرخ وابوي يصحى… وخلاص تكون كتمت فيني…اسمعني انت ارفعني فوق من رجلي تحت خليني اختها في يد الباب وتاني بقدر بطلع براي….
اها ريم ملصت شبطها ورمتو بي جوة البيت وكانت لابسة ليها اسكيرتي فنايلي ..ورفعتو فوق شوية عشان تقدر تتلب ...وكويس الدنيا ليل وابراهيم كان بعاين ليها لكن ما شاف حاجة…
ابراهيم ساعدها ورفع ليها رجلها وريم ركبت في الباب وتلبت جوة البيت… لكن الباب عمل شوية كركبة ...وريم شالت الشبط وجرت سريع ولقت سريها جاهز ورقدت في السرير واتغظت بالملاية سريع وهي حاضنة الشبط… وفتحت الملاية شوية وبقت تعاين…
ابو ريم جا شايل عكازو وبتلفت وفتح الباب وما لقى زول وجا لافي بين سرايرهن وشافهن نايمات ورجع … وكويس انو ابراهيم دخل بيتهم سريع لانو ابو ريم لو كان شافو في الشارع كان ح يقول هو الحرامي او عايز يتلب عشان بناتو…
المهم الصباح ريم نايمة جات رفيدة صحتها… طبعا هي الوحيدة العارفة ريم طلعت حفلة…
اها رفيدة صحت ريم عشان تسألها لكن ريم ما ردت ليها وقامت دخلت الحمام وغسلت وشها وجات طالعة ورفيدة منتظراها بي فارغ الصبر…
رفيدة : يا بت انتي جيتي متين والفتح ليكي ااباب منو ؟؟؟..ولا كنتي بايتة برة البيت…
ريم : دقيقة ال نسألك… انتي امبارح ليه نمتي خليتيني !!!… مش قلت ليكي انتظريني لحدي ارجع عشان تفتحي لي الباب…
رفيدة : شالتني نومة والله… لكن انتي شكلك نمتي برة عشان دي ملابسك الطلعتي بيها امبارح…مش يا بت !!…
ريم : انتي لقيتيني نايمة برة ؟؟؟… مش لقيتيني نايمة في سريري ؟؟…
رفيدة : والفتح ليكي الباب منو ؟؟؟…
ريم ب هظار : فتحو لي ابوي…
رفيدة بي دهشة : اقسم بالله كذابة… ابوي لو فتح ليكي الباب هسي كنتي في المقابر ولا في المستشفى…خليكي جادة واتكلمي…
ريم : هيي والله تلبتا من فوف الباب..
رفيدة : احلفي…
ريم : والله صحي… اتصلتا عليكي كدااااا وانتي ما رديتي… يعني امشي ابيت في القسم ولا شنو !!!… كلمتا ابراهيم اداني شنكل وتلبتا بي فوق الباب…
رفيدة : هههه… ذكرتيني لمن كنتي صغيرة… كان جنك تركبي في الحيطة… اها الحفلة كانت كيف ؟؟؟…
ريم دخلت يدها في جيبها وطلعت القروش وحسبت خمسمية وادتها لي رفيدة وقالت ليها : دا حقك عشان وقفتي معاي وخليتيني امشي الحفلة ... ولو كنتي فتحتي لي الباب كان زدتها ليكي…
رفيدة وهي بتعاين ليها ب ذهول : دي شنو يا ريم !!!… القروش دي جبتيها من وين ؟؟؟…
ريم : دا اسمو عداد يا هبلة انتي… يعني قروش الشغل… يعني حق الغناء… فهمتي ؟؟…
رفيدة : اتكلمي يا بت احسن ليك… جبتي القروش دي من وين ؟؟؟… اوعي تكوني ..
ريم قاطعتها : ياخ والله دي قروش الحفلة… ولا اقول ليكي تعالي احكي ليكي اصلا ما ح تصدقيني…
ريم حكت لي رفيدة الحصل امبارح كلو لحدي ما رجعت وتلبت بالباب…
رفيدة : واااااي ..اقسم بالله ابوي لو كان شافك… كان اداكي ضربة واحدة بي عكازو… جاب اجلك… .
ريم : والله انا رقدتا في السرير وقلبي بدق ولمن جا ماشي جنب سريري قطعت النفس.. وبقول ان شاء الله ما يكون شافني… لكن الحمد لله ربنا ستر…
رفيدة : يلا طبعا الليلة عازمانا… الغداء عليكي يا ريم…
ريم : امممم ...خلاص كويس… اها عايزين شنو ؟؟…
رفيدة : نفسي في شية والله طولنا ما اكلنا لحمة … قومي ارحكي السوق نجيب لينا لحمة ونجيب الكريمات برضو كملت…
ريم : كيلو واحد بكفينا كلنا صاح ؟؟؟…
رفيدة : كيلو شنو يا بت !!!..حنعمل شية وحنعمل دمعة…يعني انا برااااي عايزة لي كيلو ونص…
ريم : انتي جحمانة يا رفيدة ؟؟؟… هي وينا القروش عشان براكي تاكلي ليكي كيلو ونص ؟؟؟…
رفيدة : خلاص نجيب 2 كيلو… انا كيلو وانتو كلكم في كيلو…
ريم : يلا ورحكي…
رفيدة وريم طلعو مشو السوق واشترو كريماتهم ولحمة وخضار وحاجات تانية ورجعو البيت ....
اها رفيدة طوالي شالت كيس اللحمة والخضار ودخلت المطبخ وطلعت الحاجات عايزة تظبط الشية وتعمل حلتها… و امها طبعا بتعاين ليها باستغراب وشايفاها بتطلع في اللحمة والخضار وباقي الحاجات…
امها : انتي مشيتي لي ابوكي في الورشة ؟؟…
رفيدة وهي مشغولة : لا لا…
امها : طيب الحاجات دي جبتيها من وين ؟؟؟…
رفيدة يدوب افتكرت انها ما كلمت امها ومن فرحتهم بالقروش ما اتفقت مع ريم ح يقول لي امهم القروش دي جابوها من وين…
رفيدة وهي فاتحة خشمها ومولعة عيونها كباااار وبتعاين لي امها : آاااا…
امها : اااا شنو يا بت… ما بتسمعي !!!… الحاجات دي جبتيها من وين !!!والقروش دي ال اداكي ليها منو ؟؟…
رفيدة فاتحة خشمها وما عرفت ترد علي امها…وما ممكن تقول ليها الحقيقة… لانو امهم لو عرفت انو ريم طلعت تغني في حفلة وهي ما عارفة اكيد ح تشاكلهم وممكن تكلم ابوهم…لانو ابوهم قال لي امهم اي حاجة تحصل في البيت دا لازم تكلمو بيها ولو ما كلمتو هي تتحمل المسؤولية وتتحمل البحصل ليها…واهم شي تراقب بناتها وتعمل حسابها عليهم شديد… وابوهم كمان لو عرف ح يقلب عليهم البيت…
اها رفيدة ما باقي ليها الا تبكي… لانو امها زنقتها زنقة كلب في زقاق… ورفيدة ما قادرة تعترف ليها وما عايزة تكضب لي امها… ف بقت تنادي : يا ريييييم… رييم ...ريييييم…
امها : انا بتكلم معاكي يا مقصوفة الرقبة انتي… ردي لي ولا اكلم ابوكي وهو يتصرف معاكم…
رفيدة خلاص دموعها قربت تجري وهي بتصرخ : رييييييم… يا ريييييم…
ريم جات داخلة المطبخ : مالك بتكوركي يا حيوانة انتي في شنو ؟؟؟…
رفيدة بوجه بائس : امي قالت القروش دي جبناها من وين…
ريم سكتت شوية وقالت لي امها :…
...
..
.
يتبع
