رشا متضايقة من علاقة عزالدين ونسرين… وكانت مرات بتحاول تسال نسرين عشان تحكي ليها عن علاقتهم…نظام هي صحبتها وعزالدين ود خالتها والموضوع ما خطير ….لكن نسرين ما كانت بتحكي ليها عن عمق العلاقة البينها وبين عزالدين ... بس بتقوليها عادي نحن مجرد اصحاب…و ما كانت بتقعد معاهم كتير ... بتطلع بدري بتمشي لي عزالدين ويتقابلو برا …
رشا عزمت عزالدين الجامعة لانو كان عندها فهم في راسها…حفرت ليهو وجهزت ليهو خطة وقالت تشوف البحصل شنو…
يلا في الايام ال كانت نسرين بتطلع مع عزالزين… رشا ونضال بكونو قاعدين براهم في الجامعة ومعاهم بكري….
اها رشا كانت عارفة انو نضال معجبة ب عزالدين لانو في الايام الاولى لمن كان عزالدين بجيهم في الجامعة ..نضال كانت بتختلس النظر و بتعاين ليهو بي خجل ورشا لاحظت ليها …
ف رشا حاولت تجاريها في الكلام وتتكلم ليها عن عزالدين وتمزح معاها عن رايها في عزالدين وكدا ونضال انبرشت لكن ما بالواضح… ورشا فهمت انو نضال لسه عينها من عزالدين…بس شكلها اتراجعت عشان عزالدين عمل علاقة مع نسرين…بس رشا حمستها وقالت ليها ما تستسلمي ونسرين زولة انانية والمفروض هي مخطوبة تاني الحب ليها شنو !!!…
المهم رشا قالت لي نضال : اسمعي ... بكرة انا عازمة عزالدين ولازم انتي تظهري ليهو ب شكل مختلف واستايل جديد… فاهمة ؟؟؟..
نضال طبعا زولة قروية ومسكينة وما بتعرف الشلهتة وحركات بنات الخرطوم….
ف ردت لي رشا ببراءة : اعمل شنو يعني ؟؟؟…
رشا : اول حاجة تجي لابسة موضة و عبايتك عبدالواحد دي ما تجي بيها…او دخليها في شنطتك وما تلبسيها…وتلبسي حاجة راقية كدا ولو ما عندك شدي من اي واحدة…اصلا البنات كلهن بشدن…ولو لقيتي ليكي لبسة كدا مضبضة يكون احسن مع انك معصعصة وما عندك حاجة عشان تظهر…لكن برضو حاولي…
نضال : كويس…
رشا : وشبطك دا ما تجي لابساهو لانو اصابعينك الرقاق ديل طالعات برا ومنظرهم بشع… وجزمتك السوداء الباهتة ديك بتاعت نساوين كبار برضو ما تجي بيها …
نضال بي بؤس : طيب انا ما عندي غيرهم… البس شنو تاني؟؟؟…
رشا : البسي ليكي اسبورت ولا تمبر …خليكي استايل يا بت…
نضال : وديل اجيبهم من وين ؟؟....ما عندي قلت ليكي…
رشا : ياخ اتصرفي… شوفي البنات المعاكي في الداخلية… يعني انتي ما عندك صحبة ولا قاعدة تتعاملي مع واحدة عندها اسبورت ولا تمبر ؟؟؟…
نضال ب استسلام : خلاص كويس بشوف….
رشا : وبكرة لمن تجي في الاستراحة نمكيج ليك وشك الواحد دا….
يلا رشا ونضال افترقو علي الخطة بتاعتهم دي ال حينفذوها بكرة…ونضال المسكينة مفتكرة انو رشا واقفة في صفها علي اساس. انو رشا عايزاها ل ود خالتها… لكن رشا كان عندها خطة تانية خاصة بيها… بس عاملة نضال شكل طعم وتجس بيها الموقف…
المهم اليوم التاني …نضال استعانت ب واحدة زميلتها في الداخلية وما قصرت معاها…وجات الجامعة بشكل تاني … كانت انيقة شديد لدرجة انو رشا لمن شافتها انبهرت …
رشا : وااااي يا بت بسحروك… ما شاء الله عليك عيني باردة…
نضال ببراءة : اها كدا كيف ؟؟…
رشا : مزة مزة عدييييل كدا…..
رشا طلعت تلفونها وقالت ليها : دقيقة اتصل ب عزالدبن اشوفو جاي متين عشان نظبط ليكي المكياج…
رشا اتصلت علي عزالدين وقال بجيهم الساعة 11 بعد المحاضرة التانية…
المهم دخلو المحاضرة ونسرين شافت نضال ب شكلها الجديد واستغربت منها… لانها اول كانت مكوجنة وكل يوم بتجي ب عباية… واليوم شكلها غير…بس ما سالتها ...وما كانت عارفة انو رشا ونضال حافرين ليها….
يلا بعد المحاضرتين انتهو وطلعو الفطور… نسرين قالت ما عندها نفس وماشة المكتبة عشان تخلص البحث حقها… وهي في فهمها انها تخلص البحث وتاكل بعدين مع عزالدين…
رشا ونضال بعد فطرو مع بكري…قالو لي بكري اللصقة انتظرنا في المكان القاعدين نقعد فيهو كل يوم … ومشن دخلن الاستراحة…
رشا مكيجت نضال وظبطتها تمااااام وطلعت ليها شعرتين كدا نازلة في جبهتها زي ما البنات بعملن… و بقت مزة عسل…والبشوفها بقول دي ما نضال البت المسكينة الهادية ورزينة… ال ما كانت مهتمة ب نفسها… بس بتمسح وشها بي زيت وتلبس عبابتها وتربط طرحتها تكربها كرب في راسها… ويا الجامعة جاك بلا ….
اها شوية كدا وعزالدين اتصل علي رشا وقال ليها : انا عند باب الجامعة…
رشا : ادخل ادخل…تعال نفس المكان البنقعد فيهو بتلقى بكري قاعد…ونحن شوية كدا ب نجيكم…
عزالدين دخل الجامعة ولقى بكري قاعد سلم عليهو ..واصلا مافي بينهم طرايف… اي واحد بقى مشغول مع تلفونو…
رشا بهناك بتوصي في نضال ..
رشا : اوعك ترجفي… سامعة…وخليكي مبتسمة علي طول ونعسي عيونك… واعملي حركات البنات دي… انتي ما بتعرفيها ولا شنو ؟؟؟…
نضال بي براءة : والله ما بعرف يا رشا…
رشا : يا معولقة انتي ما بتعرفي كيف البنات بوقعو الاولاد في شباكهم ؟؟؟…ما عارفة اقول ليك شنو زاتو !!!…انتي بس اعملي الكلام القلتو ليكي ونفذيهو بالحرف الواحد…واتكلمي بي صوت حنييين واعملي نفسك خجولة… ولا اصلا انتي خجولة…وما تقعدي ساكتة ومادة بوزك…اتكلمي قولي اي حاجة ..اسأليه عن الجامعة ....و ليه طول ما جانا هنا و و و انضمي انضمي ما تسكي… المهم خليهو ينبرش فيكي سامعة الكلام دا ؟؟؟...
نضال ب تردد : كويس…
رشا : ولمن تجي تسلمي عليهو ما تمسكي من يدو زي ما بتسلمي علينا بقوة … ختي يدك في يدو بكل رقة… خلي يحس بنعومة يدك… واسحبي يدك… فاهمة؟؟؟….
نضال : فاهمة ؟؟؟…
رشا : يلا وراي ....
رشا ونضال جو للشباب وفعلا عزالدين من شاف نضال… نظر ليها نظرة اعجاب لانها كانت جميلة بمعنى الكلمة….
سلمو علي عزالدين وقعدو معاهم…
رشا خلت نضال تقعد جنب عزالدين وهي قعدت جنب بكري زي ما هن متفقات….
رشا : عزو اجيب ليك بارد شنو ؟؟؟…
عزالدين : مالك انتي الليلة عيانة ولا شنو ؟؟؟…
رشا : مش قلت ليك عازماك… يلا اطلب ؟؟…
عزالدين : خلاص جيبي لي عصير مشكل…
رشا مسكت بكري من يدو وجرتو وقالت ليهو : ارح معاي الكفتريا يا بيكو…
طبعا اول مرة رشا تمسك بكري من يدو ...واول مرة تدلعو تقول ليهو بيكو…
بكري قام بحماس ومشى معاها…واشترو عصاير وشوكولاتات وبكري دفع الحساب…
وجو شايلين العصاير ورشا ماشة جنب بكري وتتونس وتضحك معاهو مبسوطة….
اها عزالدين لقى الجو خلاء… ونسرين في المكتبة وقاعد هو ونضال بس… وطبعا نضال لفتت نظرو وبدأ يحنك معاها…
يلا لمن شاف رشا جاية مع بكري وماشة قريب منو وتضحك معاهو بكل اريحية … بقى يعاين ليهم ساااااي … لحدي ما وصلو ومدو ليهم العصاير …
رشا قعدت جنب بكري وبتتكلم معاهو براحة ومرات تقول ليهو كلام في اضانو وتضحك وتضربو في يدو…."" اصلا بتقول ليهو كلام عادي جدا… يغني بتسالو… تلفونك دا سامسونج… وهو برد ليها… اااي سامسونج … وهي تضحك وتضربو في يدو… وتاني تقوليهو ..سعرو غالي صاح ؟؟؟..وهو برد ليها رسلو لي اخوي من السعودية واشترى بي 1500 ريال… ورشا تضحك وتضربو… زي ال قال ليها نكتة…""… بس هي كان عندها فهم تاني…
وبكري مندمج معاها لكن محتار في رشا… شنو الاسئلة دي !!!..وليه بتضحك كدا !!!… الليلة سكرانة ولا بالعة ليها حبة… اول مرة تتعامل معاهو بالاريحية دي ...
ورشا بتلتفت علي عزالدين ولما تشوفو قاعد يحدر ليها… بتنداح زيادة مع بكري …
يلا رشا لمن عصيرها وصل النص قالت لي بكري : بيكو هاك بدلني ....
بكري : عايزة عصيري دا ؟؟…
رشا بي دلع : اااي…
بكري : خلاص دقيقة اجيب ليكي واحد تاني من الكفتريا…
رشا بي دلع : مممم… لا لا بس انا عايزة باقي عصيرك دا…
بكري اداها العصير حقو وشال منها عصيرها…و..
في واحد اخونا كدا دمو بقى يغلي…وعايز يطق…
اها الحصل شنو بعد داك !!!!…
نتابع ونشوف…
####
في مكان تاني…
الشغل فتح مع ريم وبقت كل اسبوع شغالة… مرات بتطلع حفلتين…ومرات حفلة واحدة…واي مكان تمشي ليهو بتعمل جمهور…
طبعا ريم قالت لي امها… انها اشتغلت في المصنع مع رفيدة عشان كدا بطلعو الاتنين مع بعض و دا الشي الخلاها تشتغل بي راحتها ويومين في الاسبوع يعني حاجة عادية… وابوهم يشرب الشوربة ويضرب اللحمة ومبسوط من بناتو اشتغلن وسندوهو.... وبيتهم انتعش شوية وبقو ياكلو حاجات زمان ما كانو بياكلوها….
رفيدة طبعا برنامج الحفلات دي ما بنفع معاها وكل مرة طالعين بعد المغرب وراجعين نص الليل…ومرات بعاكسوها في الحفلة او الشباب ال مع ابراهيم وخلااااص زهجت وقررت تتكلم مع ريم ...
جات لقت ريم قاعدة تمسح لي رامي شعرو بي فاتيكا وبتتكلم معاهو : والله يا رامي انت لو كان طلعتا بت كان ح تكون احلى مننا كلنا…
رفيدة : هيي…
ريم اتلفتت عليها : بسم الله مالك ؟؟؟…
رفيدة : انا تاني لا بمشي معاكي حفلاتك دي ولا شتين…
ريم قالت لي رامي : قوم امشي لي امي بهناك…
رامي طلع ومشى لي امو في المطبخ…
ريم : انتي عبيطة ؟؟؟… بعد ما الشغل فتح معاي وتقولي تاني ما ح تمشي معاي !!!…نحن يدوبي بدينا نشوف الدنيا ونعيش زي الناس….
رفيدة : شوفي انا اخلاقي وصلت هنا ....وما قادرة استحمل اكتر من كدا…انا جوطة الحفلات دي اصلا ما بتنفع معاي…
ريم : خلاص هانت يا بت ..ما باقي كتير…خلينا نطلع لينا كم حفلة و القروش العندك تزيد وتعملي ليكي راس مال وتشتغلي تجيبي حاجات من السوق وتبعيهم في الحلة بالاقساط….
رفيدة : لكن يا ريم ....
ريم قاطعتها : مافي حل غير كدا ....لازم انتي برضو تشتغلي حتى ولو في البيت عشان تساعديني…… انتي شايفة ابوي مبسوط مننا كيف… وانتي عايزة تقعدي في البيت وتعتمدي علي انا براي !!!…بالطريقة دي ممكن امي وابوي يعرفو وتاني نرجع ل نقطة الصفر… لكن انتي لمن تكوني معاي بقدر اتشجع وامشي وما بسالوني…وكدا اي حاجة نشتريها للبيت… امي وابوي ما ح يقولو حاجة….
رفيدة اقتنعت ب كلام ريم وسكتت…
طبعا ابراهيم باكي ومكسر ومنبرش في ريم نظام هو السبب في ظهورها للناس… لكن لسه ما قال ليها اي حاجة…
المهم ابراهيم كان قاعد مع ودحسين يمخمخو…
ودحسين تلفونو رنه وشافو لقاهو دا واحد من الشباب الجلابة ال قاعد يشتغل ليهم… وفتح الخط…
ودحسين : اوووو الجمك يا…خبرك يا جلبة ؟؟؟…
الجمك زول شبعان وصوتو غليظ : تماااام والله ...كيف امورك انت ؟؟؟…
ودحسين : كلو في السليم يا جلبة…
الجمك : اسمع… بكرة عندنا قعدة ظرييييفة كدا… جيب لينا واحدة من بناتك ديلك تطربنا…
ودحسين : غالي يا جلبة والطلب رخيص…وين المكان ؟؟؟…
الجمك : في المزرعة حقتي ال في سوبا…
ودحسين : والحضور…
الجمك : بعد المغرب…
ودحسين : منتهي…
ودحسين قفل التلفون وقال لي ابراهيم : اها يا جاح الجمك دا بكرة دنعو تكيلة…نقوس عمانا الغزالة ولا فيك ؟؟؟…
ابراهيم : لا لا يا مان الجمك دا زول بتاع فارغة وانت ناقش اخوك محوط الجاحة دي…
ودحسين : يا عمك…الجمك دا نقطتو جااامدة…بتعدل لينا كلنا…ولو ما سقناها ح نسوق معانا قونة تانية وتقبض الكنجالات… ف ما تحرم الغزالة من القنزب يا جاح….
ابراهيم : والله يا مان انا خايف عليها من الجمك يجازفها مننا… انت عارف عينو طايرة ومافي حاجة بتغلبو…
ودحسين : الكاش بقلل النقاش…انسى ياجاح واتصل علي الغزالة خلينا نمسك السمينة…
ابراهيم فكر كدااا واتصل علي ريم ..
…
..
.
يتبع
