ريم مجرد ما شافت ابوها جاي من اول الشارع … من الخوف ما عرفت تعمل شنو !!!… عايزة تدخل بيت ناس ابراهيم ..لكن قالت ابوي ممكن يشوفني دخلتا ويجي وراي ولو لقاني هنا ح يقطع رقبتي…
اها جرت فتحت بابهم ودخلت جوة في الغرفة لقت اختها رشا راقدة في السرير… اها فتحت الدولاب وطلعت ليها جلباب ولبستو فوق لي ملابسها ال طلعت بيهم… مافي زمن عشان ابوها ما يقبضها…
المهم ابوهم جا داخل البيت وينادي : ريم… يا ريم… وينا ريم دي ؟؟؟… يا بت يا ريم…
ريم جات طالعة من الغرفة و بي مسكنة : اااي يا ابوي…
ابوها بي صوت كبير : جاية من وين يا بت ؟؟؟؟…
ريم سكت وبقت تتمتم : اااا ..
ابوها بي صوت كبير زيادة : انا شااااايفك… اوعك تكضبي…
ريم : ج ج ج جاية من الدكان يا ابوي…
ابوها : دكان بلة بي جاي…والجابك ب الشارع التاني شنو ؟؟؟… .
ريم وهي مدنقرة راسها ب ادب : دكان بلة دا ما قاعدة امشيهو يا ابوي… الولد ال معاهو دا كريه… عشان كدا قاعدة امشي الدكان التاني…
ابوها : شايفك واقفة جنب بيت ناس ابراهيم… الدكان التاني في بيتهم ولا شنو ؟؟؟…
ريم : لا لا يا ابوي انا جاية من الدكان… قمت اتذكرتا اني نسيت حاجات ما جبتها ولما شفت القروش لقيتها ما بتكفي…هسي اديني قروش يا ابوي…
ابوها بي زهج : تقرشي ام جعارين ملوة….قروش قروش ..انتي عارفة القروش دي قاعد اجيبها ليكم كيف !!!…انا بتعب وروحي بتطلع عشان اجيب ليكم لقمة العيش… وانتي ماشة تضيعيها في اندومي وكلام فارغ… يلا امشي من قدامي يلا….
ريم رجعت الغرفة وهي عارفة ابوها من يجيبو ليهو سيرة القروش ولا يطلبو منو حاجة طوالي بطردهم من قدامو…
المهم ريم ملصت الجلباب وقعدت تغير ملابسها…
رشا : انتي صحي جاية من وين يا ريم ؟؟…
ريم عاينت ليها باستغراب: بسم الله… من متين انتي قاعدة تسأليني كمان ؟؟؟…
رشا : شايفاكي بتغيري ملابسك وتكتضبي لي ابوي تقولي جاية من الدكان… انا من جيت من الجامعة ما شفتك….صحي كنتي يا بت….
ريم : جاية من بيت صحبتي…
رشا : ومالك كضبتي لي ابوي ؟؟؟…
ريم : ابوي انتي عارفاهو…لو قلتا ليهو مشيت اي مكان ح يقول نحن قاعدين نتحاوم وجننا لف…
رشا : برضو دا ابوكي ما تكضبي ليهو…
ريم : كدي فكينا…اديني تلفونك دا عايزة اتصل لي زول دقيقة واحدة…
رشا : ما فيهو رصيد…
ريم : دايما انتي مفلسة…اصلو مافي يوم لقيت عندك رصيد…
ريم نادت رفيدة عشان رفيدة طوالي بتكون قاعدة مع امها…
اها شالت التلفون من رفيدة وطلعت قعدت في الحوش وعملت رنة لي ابراهيم وقفلت…
ابراهيم اتصل عليها…
ريم : الوو ..
ابراهيم : اااي يا ريم… وين مشيتي؟؟؟… انا جبت التلفون وما لقيتك…
ريم : اسكت ساي… ابوي شافني واقفة جنب بيتكم ....لكن جريت وخشيت بيتنا سريع… بس الحمد لله انت ما طلعتا… والله لو كان طلعتا وابوي شافني معاك… هسي كان دفنوني ولا ودوني المشرحة…
ابراهيم : هههه… والله ابوكم دا صعب يا ريم ..
ريم : والله صعب لي درجة ما تتوقعها ..
ابراهيم : وانتي عليك الله قاعدة تطلعي كيف ؟؟؟… ما بتخافي ولا شنو ؟؟؟…
ريم : والله اقول ليك شي…اول كنت بخاف لكن هسي ولا بهمني… انت عارف انا لمن كنت صغيرة ابوي دقاني دق… اكتير واحدة انا اتدقيت في اخواتي ديل… كنت بطلع بلعب مع الاولاد وبرجع البيت غببببببشة ومرات امي وابوي واخواتي يطلعو يفتشوني ويلقوني قاعدة مع الاولاد جنب الدكان بناكل فتة…طبعا كنا اطفال بريئين وقلوبنا نضيفة وكان عندنا جيرانا كلهم اولاد وعندهم اخت واحدة وهي صحبتي… واختهم دي كمان بقت زيهم ...ولو شفتها كدا تقول ولد… بتلبس معاهم بنطلونات وتلبس كاب… وانا كنت طوالي بمشي معاهم…
ابراهيم : ايواااا… وانا اقول الشفتنة دي جبتيها من وين ..قلبك قوي وبتلبي بالحيطة… اتاريكي محمد ولد…
ريم : محمد ولد بس…انا المفروض اجي ولد لكن تقول شنو…
ابراهيم : ههههههه…عشان كدا ما عندك اي انوثة… .
ريم : هسي عليك الله انوثة اعمل بيها شنو ؟؟؟…خليتها للشباب القبيلك ديل…
ابراهيم : شباب شنو قولي شابات يا بت…
ريم : والله يا ابراهيم اول انا ما عرفتهم اولاد ولا بنات…الا بعد قعدتا فترة حتان فرزتهم…لكن مالهم عاملين كدا وبعملو زي حركات البنات ؟؟؟…
ابراهيم : ههههه ديل بحلو القعدة عشان كدا بسموهم (حل…)… يلا طبعا ديل زي المساعدات للقونة… يعني بساعدوها في كل حاجة حتى الحاجات الشخصية… وبشتغلو ليها في البيت وبمشو معاها الحفلات وبرقصو وطبعا النسوان برتاحو ليهم شديد ومصاحبنهم شديد انا ما عارف ليه !!!… لكن اي قونة عندها مجموعة من الاشكال دي….
ريم : شايفاك بتعرفهم…ومصاحبهم كمان…
ابراهيم : اااي بعرفهم لانو بجو مع القونات ..وشفتي الشغل والتنظيم وتجهيز القعدات و البكش والجبنات دا كلو بعملو هم… حتى الطبيخ بطبخو… ولو ضقتي اكلهم يدهم طاعمة خلاص ....انتي زاتك لي قدام ح يكون عندك جماعة من ديل…
ريم : ههههه… هوي كمان ما للدرجة….وانت بتقول لي مافيني انوثة… لالا ما عايزاها الاثونة يا اخوي…اخير كدا معصبة بس…
ابراهيم : لكن يا ريم مجالكم دا بيعتمد على الانوثة… واي فنانة وقونة لازم يكون فيها انوثة طاغية عشان تعمل جمهور وشغلها يبقى كتير…
ريم : دقيقة دقيقة ذكرتني…طيب قبيل لمن كنا في بيت ناس دانة… في واحدة قالت لي صوتك سمح تنفعي للقعدات الخاصة ح تعملي قروش زي التراب…لكن لازم تربي ....يلا انا ما فهمتها قاصدة شنو ب كلامها دا !!!…
ابراهيم : هههه ما قلتي محمد ولد… وما فاهمة كلامها دا يعني ؟؟…
ريم : تصدق ما فهمتو…اااي صاح انا في صغري كنت بمشي مع الاولاد وبقعد معاهم ..لكن لما كبرتا وحسيت انهم بتاعين مصالح وعايزين علاقات وكلام فارغ….والكلام دا ما بنفع معاي وعشان كدا بقيت ما عندي ليهم حاجة…وما مشيت معاهم كتير عشان ابقى مفتحة…
ابراهيم : كان كدا كلام دانة صاح لما قالت انتي بريئة ؟؟…
ريم : والله ما بريئة لكن في حاجات ما واقعة لي…
ابراهيم : طيب يا ستي…البت ديك لمن قالت ليكي صوتك سمح وتنفعي للقعدات…كلامها صاح طبعا لانو القعدات دي بتكون هادية وعايزة اغاني استماع… وانتي صوتك جميل في اغاني الاستماع…
ريم : اها عايزة اسألك… انت القعدات الخاصة دي قعدات شنو بالضبط…
ابراهيم : شفتي القعدة بتاعت قبيل ال في بيت ناس دانة…
ريم : ااااي ..
ابراهيم : يلا نفس التفاصيل والحاجات الموجودة كلها ويمكن في زيادة انواع… لكن في ناس دانة طبعا كلهم قونات… لكن هناك بكون لمة رجال اعمال عندهم صفقات ولا حاجة… او مثلا ضباط كبار ....او ناس فطاحلة كبار في السوق عايزين يرفعو الاسعار مثلا… او تجار عملة….او شباب اولاد ميكي زهجانين…ف شنو بجيبو ليهم فنانة وتقعد تغني ليهم… وطبعا القعدة بتكون مطعمة يعني فيها مزز وخالات والجماعة الطيبين و و….
ريم : والفنانة بتغني ليهم بس ؟؟؟…
ابراهيم : اااي بتغني ليهم… لكن ما معروف تاني الحصل شنو ؟؟؟…وعشان الفنانة تطلع بقروش كتيرة لازم تكون ملحلحة كدا و زي ما قالت ليكي البت قبيل…
ريم : طيب وقالت لي لازم اربي… بس انا ما فهمتها اربي زباين ولا اربي جمهور ولا قصدها شنو !!!… .
ابراهيم : لا لا قصدها ليكي جسمك تعبااااان وما عندك مؤهلات… يعني لازم تعملي ليكي لحمة وتشحمي شوية وتربي ليكي حاجات تجذب الناس… عشان القونة ما بتغني وبس… لازم برضو ترقص وتقلب للناس وتعمل حركات عشان تشتهر… وكدا الطلب عليكي بكون كتير والاسبوع كلو بتكوني شغالة حفلات…واهم حاجة القعدات الخاصة…لانو النقطة فيها بتكون كتيرة والجلابة بتنافسو في النقطة….وشفتي الانوثة القلتي تعملي بيها شنو ؟؟؟… ح تكون ليها اثر كبير في شهرتك… ف شنو…حاولي اشربي ليكي مديدة كتيرة…زي ما قالت ليكي القونة…
ريم : كان كدا القعدات الخاصة كويسة والواحدة بتعمل منها قروش….
ابراهيم : والله فيها قروش لكن ما بنحصك بيها…
ريم : ل شنو يعني ؟؟؟…ما هي زي الحفلات ..الفنانة تغني ليهم وتستلم قروشها وتمشي…
ابراهيم : اااااا وين يااا… ما كل مرة القعدة بتكون كدا ..في قعدات بيكونو فيها ناس من معجبينك… يعني عجبهم صوتك وجابوكي عشان تغني ليهم… ف ما معروف ممكن الواحد فيهم تحكم معاهو و يقول ليكي حاجة كدا ولا كدا … وبرضو مرات القعدة بتكون لي شخص واحد بس… يعني لمن توصلي مكان القعدة تلقي نفسك براكي ولا عازف معاك ولافي زول مدعو… الا الشخص الدفع القروش عشان تغني ليهو براهو ويستمع ليكي… والقروش بتلعب دورها وما معروف برضو البحصل شنو !!!…
ريم : والله يا ابراهيم كلامك بين بين… يعني مرات احس بيك بتشجعني علي القعدات ومرات احس بيك عايزني ابعد منها…
ابراهيم : الكلام دا خلي…هسي ما وكتو… بعدين بتفهمي براك وانت البتقرري عايزة تعملي شنو…
ريم : معليش كملت ليك رصيدك…
ابراهيم : لا لا اصلا انا عملت خدمة… اها التلفون كيف ح اديكي ليهو ؟؟؟....
ريم : خلي معاك لحدي ما نتقابل… انا تاني ما بقدر اطلع هسي لانو ابوي قاعد قريب… ولو سمع الباب فتح طوالي ح يشوف دا منو الطلع و ح يمسكني بالثابتة…
ابراهيم : خلاص تمام… يلا سلام ...
####
في مكان تاني…
عزالدين بقى طوالي بمشي لي نسرين في الجامعة.. وبي لسانو وكلامو الرومانسي الحلو… قدر ياكل راسها ويخليها ترتاح ليهو وتميل ليهو لكن لسة ما وصلت مرحلة الحب… وبقت كمان تنفر من خطيبها ومرات لمن يتصل عليها ما بترد ليهو ولو اتصل عليها مرة تانية بتقفل التلفون…
يلا عزالدين كان معيشها في وهم…ومحسسها انها دنيتو كلها….وبقى يحاول يستدرجها بعيد من الجامعة وكل مرة يقول ليها خلينا نبعد من ناس رشا ديل عشان نقدر ناخد راحتنا في الكلام…
طبعا نسرين الجامعة زاتا بقت ليها مسيخة… لانها بتكون في المحاضرة وقاعدة تدردش في التلفون مع عزالدين ....وهو يكتب ليها اشتقتا ليكي ووحشتيني وما قادر اكون بعيد منك والكلام الدراب دا…وطوالي يقول ليها اطلعي من المحاضرة تعالي في المكان الفلاني…
يلا بقابلها في كفتريات هادية وبعيدة شوية من الزحمة والجوطة… وبرضو بمشو توتي او جنب المعدية تحت كبري المنشية وبرج الاتصالات….ومرات بمشو الغابة… عشان يكونو في مكان مافيهو زول بعرفها وتجيب لي نفسها كتاحة…
المهم في يوم قاعدين الاتنين في الغابة…
عزالدين : نسو…ما ممكن ياخ نحن نكبت مشاعرنا بالشكل دا يا بت الناس…
نسرين سارحة بعيد وبتعاين في الدبلة حقتها…
عزالدين : لا والله بالجد انا جادي معاك يا بت انا ما بقدر اسكت من كدا وانتي ما عايزة تشجعيها لكن انا عايز ابعترف ليكي…
نسرين : عايز تقول شنو ؟؟؟…
عزالدين : انا…
…
..
.
يتبع
