ريم حاولت تلطف الجو وقالت لي امها : ههه يمة انتي مالك مصعبة الامور !!!…
امهم بي نهرة : انا مصعباها صح ؟؟؟… يعني القروش دي بقت تتلقي عادي مرمية في الارض؟؟؟… ولا اللحمة بقو يوزعوها للناس في الشارع ؟؟؟….
ريم ورفيدة سكتن وبقن يعاينن لي بعض…
امهم : ابوكن ليهو شهر ما جاب لينا ربع لحمة… وانتو تطلعو قبل شوية وترجعو باللحمة والخضار دا كلو… وشايفاكي يا ريم دخلتي الغرفة وشايلة في يدك كيس…. الحاجات دي جبتوها من وين ؟؟… ووالله لو ما اتكلمتن…هسي بلبس توبي دا… و دغرييي بمشي لي ابوكن في الورشة وبكلمو ..خلي يجي يتصرف معاكن…
ريم بتوتر : يا امي الموضوع ما بحتاج تكلمي ابوي…
ريم : طيب اتكلمن …
ريم مشت وقفت جنب رفيدة وقرصتها وغمزت ليها وقالت : مالك ما كلمتي امي ؟؟؟…
رفيدة بي دهشة : اكلمها ب شنو ؟؟؟…
ريم : شغلك ال اشتغلتي فيهو يومين مع صحبتك…
رفيدة وهي لسه مندهشة من كلام ريم وما عارفاها بتتكلم عن شنو : ياتو شغل ؟؟؟…
ريم قالت لي امها : شوفي يمة انا بكلمك لكن ما تزعلي…
امهم : اتكلمي سريع طيب ...
ريم : في الحقيقة يمة…رفيدة ايام كانت بتفتش في شغل…لقت صحبتها شغالة في كفتريا في السوق العربي…وكانو محتاجين بنات يشتغلن في السيرفس يعني الخدمات او جرسونات زي ما ب نقول… يلا رفيدة اشتغلت معاهم يومين وخلتهم وقالت ابوي ما ح يرضى انها تشتغل في كفتريا… وامبارح ناس صحبتها صرفو المرتبات والمدير اداها قروش رفيدة حقت اليومين وصحبتها جاتها هنا في البيت وادتها القروش… ورفيدة ما عايزة تكلمك عشان ما تزعلي منها....وانتي يمة عارقة رفيدة قدر كيف…
امهم حدرت لي رفيدة وقالت ليها : صحي الكلام دا يا رفيدة ؟؟؟…
ريم قرصت رفيدة قرصة حااارة عشان رفيدة ما قاعدة تكذب لي امها وهي مع امها زي الصحبات… وريم خايفة رفيدة تقول الحقيقة وتفشلها قدام امها وكدا تكون امورها جاطت… ف رفيدة اتألمت من القرصة وصرخت : اييييييي…
ريم استدركت الموقف وقالت لي امها : اها قالت ليكي ااااي…
امهم : اسكتي انتي… انا سألتها هي ما عندها خشم ترد بيهو؟؟؟…
رفيدة بتردد : اااي يمة صحي…
امهم : وطيب مالك ما اتكلمتي من بدري ؟؟؟….
ريم : هي ما كلمتك لانو ما كانت قايلة ح يدوها قروش اليومين ديل…ونست الموضوع علي كدا…
امهم : لا ليه ما اتكلمت وقالت انها اشتغلت يومين في كفتريا ؟؟؟…
ريم : والله يمة هي اشتغلت عشان تساعد ابوي… لكن لمن شافت الشغل ما ح يعجبكم خلتو عشان ما تزعلو منها…
امهم : انا ما عارفة انتي بتتكلمي بدلها ليه !!!… جابتك محامية ؟؟؟…
ريم : يمة انتي عارفة بتك حساسة شوية ولمن تكون غلطانة ما بتعرف تتكلم …
امهم عاينت لي رفيدة وقالت ليها : كويس انك خليتي الشغل يا رفيدة… انتي عارفة ابوكي جنو وجن ال بت ال بتشتغل مع الرجال… وكمان لو كان عرف انك اشتغلتي في كفتريا وماشة وجاية في نص الشباب وتنزلي ليهم طلبات ويتكلمو معاك ويعاكسوك… كان ضبحك…
ريم : انا زاتي قلت الحمد لله انها خلتو…
امهم : خلاص جيبو الحاجات دي انا بظبط ليكم الاكل…
ريم بي فرحة : ااي يمة عليك الله شفتي عايزين شية ودمعة ظاااابطة كدا من يدك الحلوة يا ست الحبايب…
امهم وقفت شوية وقالت : طيب وابوكم ح نقول ليهو شنو ؟؟؟…
ريم : قولي ليهو رفيدة اشتغلت في شركة ولا اي حاجة…اتصرفي معاهو انتي…هو راجلك…
امها ضربتها في كتفها وقالت : راجلي يا كلبة !!!… دا ابوكي…
ريم : خلاص ابوي ابوي… المهم انتي كلميهو…
ريم طلعت مشت الغرفة سريع قبل ما امهم تسألهم تاني… ورفيدة طلعت وراها …
رفيدة : واااااي الليله والله لو كان امي عرفت… كان ح تكتلنا…
ريم : انتي اصلك غبية وما بتعرفي تتكلمي ولا تتصرفي… كان تقولي ليها اي حاجة…قولي الحمد لله انها صدقت…
رفيدة : اقسم بالله لمن قالت لي جبتي القروش من وين… بقيت ارجف وقلتا ان شاء الله الارض تنشق وتبلعني…
ريم : غايتو انتي خوافة خوف… حالتك صحبة امي وما قادرة تمشيها بي اي كلام…
رفيدة : انتي عارفة امي لمن تقوم صعبة شديد…وقعدت تحقق معاي زي ال كتلت لي زول…
ريم : اااااي والله… والحمد لله انو رشا في الجامعة… لو امي سالتها كان قالت ليها اي حاجة…
رفيدة : اسمعي هنا يا ريم… تاني مافي ليكي اي طلعات ولا حفلات ولا كلام فارغ… وانسي موضوع الغناء دا…
ريم : انتي بتهظري يا بت !!!… انساهو كيف وانا يادوبي بديت مشواري الفني…
رفيدة باستهتار : انتي صدقتي نفسك حتبقي فنانة ؟؟؟… والله غير تجيبي لينا المشاكل وتجيبي المرض لي ابوي وامي ما ح تعملي حاجة…
ريم باصرار : اجيب ليهم المرض ولا قولي اجيب ليهم القروش واريحهم….
رفيدة ب عصبية : ياخي بطلي اوهامك العايشة فيها دي… وانتي عشان غنيتي مع الفنانة وادتك الفين جنيه قايلة نفسك بقيتي فنانة…
ريم : انتي ال الفين دي كنتي لاقياها ؟؟؟… ما كنتي بتشيلي قروش من امي وبتطلعي من الصباح وتلفي في الشمس دي لمن تشمي الدم بي نخرتك… وبعد دا كلو لا لقيتي شغل ولا عوضتي ابوي….والخمسمية ال انا اديتك ليها ساي فرحتك…
رفيدة : يعني بتتفضلي علي يا ريم ؟؟…
ريم : انتي اختي ..كيف اتفضل عليكي !!!… لكن بالمنطق كدا… انتي عارفة انا ممتحنة الشهادة ولو نجحتا وجبتا نسبة كويسة ح اخش الجامعة…اها ابوي ح يلقى قروش من وين عشان يقريني ؟؟؟… وانتي عارفة هو بستلف عشان يدفع لي رشا…
رفيدة : لكن القروش ما بتجي بالطريقة دي يا ريم…
ريم : خلاص وريني طريقة تانية ساهلة نجيب بيها قروش… وما تنسي رامي دا برضو عايز يقرأ لانو اخونا الوحيد ولازم نوفر ليهو عشان يقرا ويبني مستقبلو…
رفيدة : يعني انتي عاملة نفسك مسؤولة مننا وشايله همنا ؟؟؟…
ريم : انتي مشكلتك بتتعاملي بي عاطفتك وما بتشغلي مخك… اااي صاح نحن بنات لكن ما ممكن نقعد نعاين لي ابوي وهو بيتعب عشان يجيب لينا لقمة العيش…لازم نقيف معاهو ونحاول نساعدو…
رفيدة : ح تساعديهو بي حاجة هو رافضها ؟؟...وهسي لو عرفك انتي بتغني ممكن تجيهو صدمة بسببك….
ريم : اتفاءلي خير يا بت وخلي الامور لله…
رفيدة : انتي راكبة راسك وما عايزة تسمعي الكلام…غايتو انتي مخيرة… و انا تاني لا بساعدك ولا بقيف معاكي…
ريم : ما مشكلة… بس لا تكلمي امي لا ابوي…
رفيدة : هم مصيرهم في يوم من الايام ح يعرفو…
ريم : لحدي ما يعرفو…بعد داك نشوف ال بحصل شنو…
####
في مكان تاني…
عزالدين اتشيك ومشى لي رشا في الجامعة… و دا كلو عشان يجذب نظر نسرين صاحبة رشا…
المهم بعد وصل هناك وقعد مع رشا وصحباتها الاتنين نسرين والتانية الاسمها نضال…
طبعا نسرين بت الخرطوم مفتحة شوية… اسكيرتاتها شطفني والخطوة من دونك وبتلبس اسبورتات وتنبر…وتلبس زمام…
ونضال زولة جاية من الولايات.. يعني لسه مسكينة ولبسها محترم وما بتتكلم مع الاولاد…وزميلهم المشى معاهم لي عزالدين في الجامعة… اسمو بكري ...
بكري دا اتلصق فيهم بالغلط بس… في مرة من المرات رشا كانت قاعدة جنبو في القاعة والمحاضرة شغالة… ف كانت عايزة تكتب حاجة ولقت قلمها مافي… ف قالت ليهو لو سحمت ممكن قلمك دقيقة بس اكتب بيهو حاجة وارجعو ليك ؟؟؟…
بكري : جدا اتفضلي…
بكري اداها القلم… رشا كتبت ورجعت ليهو القلم… وبكري حلف قال ليها الا تشيليهو… رشا رفضت تشيل القلم وقالت ليهو خلاص انا انتهيت من الكتابة… لكن بكري قال هو ما محتاج للقلم وقال لي رشا خلي معاكي يمكن تحتاجي ليهو و عشان ما تطلبي زول تاني…والحنك البيش دا…
اها رشا شالت القلم ويا ريت لو كان ما شالتو… طبعا بكري بقى ليها في الزرارة الاخيرة… زول لايوق ملاح بامية فرك بس…
بكري من اللحظة ديك وشبك ليك في رشا وصحباتها وبقى ماشي معاهم وكل ما يزوغو منو… هو بفتش ليهن ويلقاهن ويقعد معاهن… ما باقي ليهو الا يخش معاهن الاستراحة… .
رشا و نسرين ونضال لمن تعبن منو… وما قدرن يحرجوهو….قالن خلاص طالما هو ما عايز يحس… خليهو يمشي معانا… لكن استغلن الحتة دي وخرفنوهو… يعني علموهو نجيلة.… يفطرهم ويشربهم الشاي والرفاهية كلها علي حسابو… وبكري كمان ما مصدق… بكون ماشي معاهن ونافش ريشو وماشي بي يايات زي العايز يطير… نظام الود مفتح ومكملا… ومثبت ليهو تلاتة بنات…وهو بالنسبة ليهن مجرد خروف….وبكري من النوع ال لا بعرف يتونس ولا بعرف يخلق مواضيع…يعني لمن يكون قاعد جنب واحدة فيهن بقعد يطقطق اصابعينو…و كل شوية بقول ليها ..قلتي لي اخبارك شنو ؟؟؟…
نرجع لي نضال…طبعا هي زولة طيوبة وما عندها حاجة للاولاد… و المرة الفاتت لمن مشت مع رشا ونسرين لي عزالدين في الجامعة… عزالدين كان بيتظارف ويخفف دمو وهو قاصد نسرين… لكن نضال اعجبت بيهو وشافتو شاب ظريف… ولمن جاهم اليوم في الجامعة…نضال حاولت تنبرش فيهو ومشت جابت ليهو موية صحة وبارد… عشان عزالدين ضيفهم وكدا…
بكري طبعا مسطح ساي وقاعد معاهم زيادة عدد بس ويطبز في تلفونو…
نسرين ورشا حسو بي نضال… مع انها ما انبرشت في عزالدين بالواضح لكن حركاتها وخفتها بتدل علي كدا… وبقت تختلس النظر وتعاين لي عزالدين ب اعجاب…
اها نسرين من شافت نضال بتعاين لي عزالدين وبتتراشق ليهو… هي كمان عايزة تمغرز نضال وبقت تتونس عادي مع عزالدين وتسألو عن الجامعة و و و…حركات بنات…
المهم عزالدين انبسط شديد لمن نسرين بقت تتونس معاهو لانو اول كانت قافلاهو…وقال خلاص المزة سلكت يلا بعد دا يحاول يحنك النضيف…
قام برااااحة همس لي رشا وقال ليها : هوينا شوية…
رشا طبعا فهمتو انو عايز ينفرد بي نسرين ويتكلم معاها زي ما هم متفقين….
…
..
.
يتبع
