ابراهيم ماشي ورا ودحسين وعايز يهديهو ويرجعو…
ابراهيم : يا مان اكسر الحنك ياخ انت مالك ومالو ؟؟؟…
ودحسين : لا لا يا جاح… السان دا حنكو ما دسيس يا عمك… لازم نوريهو الطفى النور منو…
ابراهيم مسك ودحسين ووقفو : يا مان ما تخرب لينا الوزنة ياخ انسى السان…
ودحسين : الوزنة حكمت كدا يا خالك… والسان دا الليلة بتمو يعني بتمو…
ودحسين نفض يدو من ابراهيم ومشى علي الدكان ...ابراهيم عرف انو ودحسين السطلة حكمت ليهو ولو عمل اي حاجة ما حيقدر يوقفو ..ف قال خليهو اصلا الريح يستاهل الضرب عشان عمايلو ما كويسة…
ودحسين وصل الدكان و ضرب الطربيزة بالبسطونة كو كو كو… وصرخ ب صوت عالي : تعال طالع برا ياااا تيت….
مافي رد ومافي زول ظهر… وتاني ود حسين ضرب الطربيزة كو كو كو…
شوية كدا وسمعو زول بقول ..السلام عليكم ورحمة الله… السلام عليكم ورحمة الله…
وشافو عم بلة طبق المصلاية بتاعتو ووقف شاف ابراهيم ومعاهو ودحسين متعصب..
ابراهيم من شاف عم بلة طوالي مسك ودحسين ووقف قدامو ...
ابراهيم : عم بلة كيفك… حمدالله علي السلامة… جيت متين ؟؟؟...
عم بلة باستغراب : الله يسلمك يا ابراهيم… لكن مالكم… في شنو ؟؟؟…
ودحسين : في شنو كيف ؟؟؟…عامل نفسك ما عارف في شنو !!!..وكمان بتصلي وعامل نفسك شيخ ؟؟؟…
ابراهيم قال لي ودحسين : يااا بشر دا ما السان دا معو …
عم بلة باستغراب : في شنو يا ابراهيم يا ولدي… وزولك دا مالو زعلان كدا ؟؟؟…
ودحسين : وينو الزول التاني الشغال معاك ؟؟؟…
عم بلة : الريح ؟؟؟…مشى السوق الشعبي يجيب بضاعة… لكن هو مالو عمل ليك شنو يا ولدي ؟؟…
ابراهيم عايز يتفادى عم بلة وقال ليهو : لا لا مافي حاجة يا عم بلة….
ابراهيم مسك ودحسين وعايز يسوقو : ارح ارح يا مان…
عم بلة : دقيقة يا ابراهيم… كدا فهمني في شنو ؟؟… الريح غلط عليكم في حاجة لا سمح الله ؟؟…
ودحسين : هو ما بقدر يغلط علينا لكن قاعد ي…
ابراهيم قفل لي ودحسين خشمو قبل ما يتم كلامو وساقو بالقوة…
عم بلة وهو لسه مستغرب من تصرف ودحسين : يا ابراهيم يا ولدي ما توريني الحاصل شنو عليك الله…
ابراهيم : لا لا مافي حاجة يا عم بلة ..مجرد سوء تفاهم بس…معليش…
ابراهيم ساق ودحسين ورجعو البيت ..
ودحسين : انت ليه ما عايز تكلم عم بلة ولا منو دا ؟؟…
ابراهيم : اكلمو كيف ؟؟… هسي لو كلمتو وسال الريح ..اكيد الريح ح ينكر حطب ويقول انت متهمو بي حاجة ما فيهو…وممكن يفتح فيك بلاغ اشانة سمعة…
ودحسين : انا السان دا بختها ليهو ..اصلو ما بخليهو …
ابراهيم : خلاص شرك ليهو براهو وبعداك اعمل العايز تعملو فيهو… لانو هسي قدام عمو ممكن ينكر والمشكلة تكبر ونوصل القسم وانت تطلع غلطان لانك ما عندك دليل… لكن لو لقيتو براهو اجلدو جلد صاح وما تقصر معاهو وحتى لو الناس لقوك قاعد تضربو… هو ما ح يقدر يقول للناس انت ضربتو ل شنو…
ودحسين : اففف…
ابراهيم : طيرتا لينا الوزنة يا مان وسخنتا بينا… دقيقة اجيب لينا عصير من بهناك ..
ابراهيم مشى المطبخ ظبط ليهم جك عصير وجابو…
ودحسين : اسمعني يا جاح…بتك عبرت ..
ابراهيم : ريم !!!… ياخ البت دي في حفلة امبارح ابدعت عدييييل كدا…يا زول تاني حقو تطلع تشتغل براها…
ودحسين : اسمعني يا جاح…يوم الجمعة في شباب كدا عندهم رحلة وكلموني اجيب معاي قونة… رايك شنو نسوقها معانا ؟؟؟…
ابراهيم : والله يا مان فكرة دسيسة…كدا انا بحاول اجسها اشوفها بتقول شنو ؟؟…
ودحسين : زيت يا جاح ...جسها وعرج لي…قول ليها الكسرة ح تكون حقتك براكي…
ابراهيم : منتهي يا مان…
####
في مكان تاني…
رفيدة : اها ح نقول ل امي شنو ؟؟…
ريم فكرت كداااا وقالت لي رفيدة : اسمعي انا عندي خطة لكن لازم تساعديني فيها…
رفيدة : انت خططك دي دايما بتجيب لينا المشاكل مع امي وابوي يا ريم… عليك الله امسكي قروشك معاكي…
ريم : يا عبيطة انتي عارفة انو البيت محتاج قروش ومصاريف ولازم ندي القروش دي لي امي عشان تجيب بيها حاجات للبيت….
رفيدة : طيب نحن ما عارفين نقوليها جبناها من وين… ياخ اتصرفي براكي وما تجيب سيرتي معاك…
ريم : انا براي ما بقدر اتصرف لازم انتي تقيفي معاي…لانو انتي الكبيرة والمفروض تشتغلي ما انا…
رفيدة : طيب اها عايزاني اعمل شنو يعني ؟؟؟…
ريم : انتي قولي لي امي انك اشتغلتي…
رفيدة : اشتغلتا شنو ؟؟؟…
ريم : ياخ قولي اشتغلتي في شركة ولا مصنع ولا محل اتصالات ولا اي حاجة… بس قولي ليها انك اشتغلتي…
رفيدة : وبعد داك…
ريم : بعد داكا…ح تدي امي القروش… لا لا اقول ليكي… امشي هسي قولي لي امي انو في ناس شركة من القدمتي معاهم واديتهم ورقك… اتصلو عليكي وقالو ليكي بكرة تجي تنزلي شغل…
رفيدة : انتي مجنو…
ريم قاطعتها : اسكتي دقيقة خليني اكمل ياخ….
رفيدة : اها سكتا… لكن انا نهائي ما بكذب ولا بدخل نفسي معاك في الورطة دي ….
ريم : مافي حل غير انك تقولي اشتغلتي….وبكرة تطلعي من الصباح تمشي اي مكان وترجعي بي اكياسك وتقولي ناس الشغل ادوكي قروش عشان تشتري ملابس او قولي انك استلفتي منهم قروش للمواصلات وكدا… و ح يخصموها من مرتبك اخر الشهر… وطبعا انا ح امشي اشتغل حفلات واجي اديكي القروش وانتي تديها لي امي كأنها المرتب حقك وكدا مافي زول ح يعرفنا…
رفيدة : وعايزاني اطلع كل يوم يعني ؟؟؟…
ريم : لا لا ما تطلعي كل يوم… انتي اطلعي يوم بعد يوم ...او بعد يومين او تلاتة عادي جدا…المهم انك تطلعي وقولي ليهم دوامك كدا…
رفيدة : طيب اطلع امشي وين ؟؟؟…
ريم : ياخ امشي اي مكان ...امشي لي صحباتك… ولا صحي انتي ما عندك صحبات زاتو…لكن اقول ليكي حاجة… انتي امشي اتفسحي في مول الواحة او امشي الاسوق… الليلة امشي لفي في العربي… واليوم البعديهو امشي الشعبي والبعديهو امشي سوق ليبيا ...ولفي شوفي الحاجات الجديدة…
رفيدة : انتي عارفاني انا ما بحب اللف الكتير…عايزاني اطلع الصباح وارجع الساعة 2 ظهر ؟؟؟…
ريم : اصلا انتي عندك توحد .... جنك قعاد البيت… يا بت اتلحلحي شوية….
رفيدة ما ردت ليها ..
ريم : عايني… انتي الايام الاولى امشي لفي الاسواق وشوفي الاسعار وشوفي الحاجات السمحة… وانا بشتغل شوية شوية وبديكي قروش تعملي ليكي راس مال وتجيبي تياب واحذية و ملابس اطفال وتعالي وزعيها في الحلة بالاقساط،… وكدا تكون عملتي شغل براكي وبعد دا طلوعك ما ح يكون ساي…يعني ح تمشي السوق وتشتري وترجعي وكدا امي م ح تسالك لانها شايفاكي شغالة وعارفة مصدر قروشك من وين…
رفيدة : و رشا نكلمها عشان تساعدنا ولا كيف ؟؟؟…
ريم : لا لا رشا اوعك تكلميها… دي لسانها متبري منها و حتكلم لينا امي وكدا خطتنا ح تفشل وتخب لينا اي حاجة…
رفيدة ب تردد : والله يا ريم انا خايفة…
ريم : ما تخافي ياخي… انا قاعدة ارجع نص الليل وما خايفة ..انتي تخافي ل شنو ؟؟… انتي بس نفذي الكلام ال قلتو ليكي بالحرف…وخلي الباقي علي…وهسي انتي امشي لي امي وقولي ليها ناس الشركة اتصلو عليكي…
رفيدة : طيب قومي ارحكي معاي…
ريم : انا قايمة اغير ملابسي واغسل وشي… امشي براكي كلميها وجيبي لي معاكي الشاي…
رفيدة مشت لي امها في المطبخ… وريم غيرت ملابسها وغسلت وشها ورفيدة لسة ما جاتها راجعة… ف قامت مشت ليهم في المطبخ ولقت رفيدة قاعدة تغسل في العدة وامها بتعمل في الفطور…
ريم مشت قعدت جنب رفيدة وهمست ليها براحة : كلمتي امي ؟؟…
رفيدة : بري ما كلمتها…
ريم : كلميها ياخ مالك عبيطة كدا…
امهم : في شنو ؟؟؟… بتتوسوسن مالكن ؟؟؟… .
ريم : يمة رفيدة كلمتك ؟؟…
امهم : بي شنو ؟؟..
ريم قرصت رفيدة عشان تتكلم لكن رفيدة ساكتة وكاتماها في جواها…
ريم اتضايقت وقالت لي امها : رفيدة لقت ليها شغل يمة…
امهم بي فرحة : صحي يا رفيدة ؟؟؟…
ريم لكزت رفيدة عشان تتكلم …
رفيدة بعد تردد : اااي يمة…في شركة قدمتا فيها واتصلو علي قالو بكرة انزل شغل…
امهم فرحت وزغرتت ايووووووووووي يوي يوي يوي يووووووووي...
ريم : يا امي انتي تزغرتي اصلو عندنا عرس !!!…
امهم : يا بتي فرحانة لي اختك…قعدت كتير وصبرت… انا كل يوم بدعي ليها والحمد لله ربنا فتحها عليها….
ريم : الحمد لله يا امي…
ريم مسكت رفيدة من يدها وجرتها ساقتها معاها الغرفة…
ريم : يلا كتمت فيكي يا حلوة… شفتي امي فرحانة كيف….يعني لازم نطبق الخطة…
رفيدة : كلو منك انتي دبستينا في الورطة دي…
ريم : لا ورطة ولا حاجة… انتي مثلي بس وعيشي الدور…وهسي تاني ما تمشي لي امي بهناك لانها ح تحقق معاكي وتسآلك اسئلة تعسفية وما بتقدري تجاوبي عليها وتقعدي ترجفي وامي ح تعرفك كضابة… عشان كدا امشي غسلي ملابسك ولا نومي وخليني انا الليلة بشتغل مع امي في المطبخ….
اها ريم اتفقت مع رفيدة انها ح تمشي تشتغل مع امها في المطبخ ورفيدة ما تظهر عليهم وتعمل نفسها بتجهز لي بكرة عشان نازلة شغل…
اليوم عدى علي خير لانو ريم كانت بتشغل امها بي مواضيع تانية عشان ما تفكر في موضوع رفيدة ....
بعد المغرب قاعدين يتونسن… .يسمعن ليك صوت ابوهن بنادي : رفيدة…يا بت يا رفيدة…
رفيدة : اااي يا ابوي…
ابوهم : تعالي عايزك…
رفيدة ختت يدها في صدرها وقالت بي خوف : وااي اللييييلة ابوي بناديني،…
ريم : اوعك ترجفي لو سالك ...خليكي ثابتة وردي عليهو… انتي عارفة ابوي بعرف الزول لمن يكذب عليهو…
رفيدة : ما دا ال انا خايفة منو ..
ابوهم : وينك يا بت…
رفيدة جرت مشت بهناك وريم وقفت قريب عشان تسمع التحقيق…
رفيدة وقفت بعيد من ابوها : ايوا يا ابوي…
ابوهم : امك قالت لي لقيتي شغل في شركة…
رفيدة : اااااي…
ابوهم : اها شركتكم دي وين ؟؟؟…
رفيدة : ااا… في السوق العربي يا ابوي… .
ابوهم : اسمها شنو وبشتغلو في شنو ؟؟؟…
رفيدة سكتت لانها ما كانت متوقعة السؤال دا من ابوها…
ابوهم : ما تتكلمي يا بت…
رفيدة : ااا.. والله ما عارفة يا ابوي…
ابوها حدر ليها : كيف ما عارفة !!!..ومنو الضرب ليكي وقال ليكي تعالي بكرة ؟؟؟…
رفيدة : اااا… انا يا ابوي قدمتا في شركات كتيرة وما عارفة دي ياتو شركة القبلتني… الا بكرة امشي ليهم واعرف…
ابوهم : خلاص بكرة امشي ليهم وتعالي كلميني هم شغلهم دا زااااتو شنو ؟؟؟…
رفيدة : كويس…
ابوهم تاني ما سالها ورفيدة رجعت الحوش التاني…
ريم : الحمد لله التحقيق عدى علي خير…
رفيدة وهي بتتنفس : قلبي عايز يقيف يا ريم…
ريم : والله انتي خوافة كيف…هسي سالك قال ليك شنو !!..ما سؤال عادي جدا .. بس انتي براكي قاعدة تتراجفي…
رفيدة : انتي ختيتيني في وش المدفع وقاعدة تتفرجي علي مش كدا ؟؟…هسي بكرة اقول لي ابوي شنو ؟؟…
ريم : ما تخافي ح نلقى كلام نقولو ليهو…
المهم صباح اليوم التاني رفيدة كانت ناسية انو اول يوم ليها في الدوام وريم صحت من النوم لقتها قاعدة تكنس في الحوش ..
ريم : يا حيوانة انتي نسيتي الليلة ماشة الشغل ..
رفيدة : واااي نسيت والله…
ريم : امشي سريع البسي وارحكي انا زاتي بطلع معاكي… يلا سريع…
رفيدة وريم لبسن سريع ورفيدة قالت لي امها حتسوق معاها ريم عشان تشوف الشغل كيف…
المهم طلعن مشن السوق ولفن كداااا وفطرن هناك وبعد الظهر اشترو ليهم حاجات للبيت ورجعو…
…
نتابع ونشوف هل خطتهم مشت زي ما هم عايزين ولا حصل شي تاني
...
..
.
يتبع
