ودحسين جا لي ابراهيم ف البيت ولقاهو زهجان وقرفان…
ودحسين : شنو يا جاح !!!…
ابراهيم ب زهج : هو فيها جاح تاني يا عمك !!!… الزولة دي ياخ قفلتها معاي جوة وبرا…وقالت ح تفتح فيني بلاغ وتقول انا خدرتها واغتصبتها…
ودحسين : وهسي وصلتا ل شنو بعد كلامها القالتو ليك ؟؟؟؟…
ابراهيم : يا عمك انا اموري جايطة وما جاهز للعرس زاتو….ياخ ف زول بعرس بالطريقة دي ؟؟؟…
ودحسين : خليك صنديد يا مان والجاحة مافيها كلام…انت بس الورطتا نفسك…
ابراهيم : والله دي ورطة ما بعديها ورطة… يا مان انا الحنك دا ما بقسم معاي…
ودحسين : و ح تعمل شنو يعني ؟؟؟…
ابراهيم : بحاول اتخارج برا البلد دي لحدي ما الوضع يهدا و الجاحة تنسى الموضوع دا…
ودحسين : تتخارج وتسيب امك وابوك ل منو ؟؟؟… انت عارف ما عندهم غيرك واخوك برا السودان.. طيب انت زاتك عايز تتخارج وتخليهم براهم ولا كيف ؟؟؟…
ابراهيم : والله من قبيل بفكر ف الموضوع دا… قلتا اتخارج اقد مصر ولا دبي… واتكل هناك يا مان… لكن الحاج والحجة ديل كبرو ومافي زول يعتني بيهم غيري… ولو قلتا ليهم سافرو معاي ما ح يرضو يسافرو معاي…ولا ح يخلوني اسافر…
ودحسين : خلاص يا جاح اصلا كاتمة كاتمة… تم الحنك واتزوج الجاحة ولو الامور ما ظبطت معاكم فكها وكدا تكون ارتحتا منها…
ابراهيم : ياخ عرس وجرجرة وتشغيلة… دي الحاجة ال ما بتنفع معاي…
ودحسين : ما عندك حل تاني… والجاحة لو حست بيك ولا سمعت انك عايز تسافر برضو ح تكتمها فيك وتكلم امك وابوك… وبعدين ح تحصل شمكلة يا مان…
ابراهيم ب زهج : اففففففف….
ودحسين طلع من جيبو كيس وقال ل ابراهيم : امسك الحطب دا لفة لينا سجارة خلينا نبرشا…
ابراهيم : ياخ الحطب دا زاااااااتو الجاب لينا الكفاوي…
ودحسين : انت اصلا كنت ح تعمل الشغلة دي لو شارب حطب ولا ما بخور… لانك كنت مرقد ليها من بدري…
ودحسين رمى ل ابراهيم الكيش وقال ليهو : لف لف يا جاح…
ابراهيم مسك منو الكيس وطلع البنقو ولفة ليهم سجارة وقعدو يشربوها في صمت بدون اي كلام…
المهم قاعدين يشربو سجارتهم والجو صااااني مافي اي ازعاج…
شوية كدا وسمعو ليك صوت مراة بتكورك ب اعلى صوتها : الحقونيييييييييي…والله ما افكك… والله ما افكك....
ودحسين : يا زول الكوراك دا وين ؟؟؟…
ابراهيم : دا في الشارع… عليك الله انسى يا مان… برانا الفينا مكفينا…
ودحسين : قوم ياخ خلينا نشوف الحاصل شنو والمرة دي بتكورك مالا…
ودحسين طلع علي الشارع وابراهيم طلع وراهو….
شافو مراة ماسكة الريح بتاع الدكان وخانقاهو من عراقيهو وتلبع فيهو لللللللللب : اقسم بالله ما اخليك… للللللللب…
ابراهيم و ودحسين جو جارين عليهم…وعايزين يحجزوهم…
ابراهيم : دقيقة يا نجوى… كدي اصبري ورينا الحاصل شنو ؟؟؟…
ونجوى خانقة الريح من عراقيهو وما عايزة تفكو : والله ما افكو الا اخوي يجي…
الريح مخنوق وما قادر يتنفس وعيونو طلعو بيض… وطبعا نجوى شبعانة وماكنة….
ابراهيم وود حسين افتكرو انو الريح عاكسها ولا يمكن غلط عليها ب كلمة ولا حاجة…
المهم ابراهيم جا مسك يد نجوى الماسكة بيها الريح وقال ليها : طيب فكي الزول ما قادر يتنفس…ووريني الحاصل شنو… غلط عليكي ف حاجة ؟؟؟…
نجوي : ليه يعمل ل ولدي كدا !!!… هو قايل ما عندو اهل ولا مقطوع من شجرة !!!…
ودحسين شاف جنب باب الدكان في طفل واقف بين باب الدكان والحيطة ودموعو جارية وخايف…ودحسين فهم الحاصل وجا طوالي لطش ليك الريح كف تاااااااااااح لمن وقع ف الارض… ومشى شال ليهو صندوق بارد فاضي وعايز يضرب بيهو الريح…
الريح انسحب من تحتهم وقام صوف…وابراهيم وود حسين جارين وراهو… وانتو عارفين جري الخوف كيف… الريح دا فحط لمن عمل غبار ياخ جرا جري تقول فاكنو بي نبلة وكتل ملف بالشارع الاول والتاني وقطع الزلط ودقش الحلة التانية وعييييك… اختفى عن الانظار…
ابراهيم وودحسين طبعا هم مساطيل وراسهم تقيل ما قدرو يلحقو الريح وفتشو في الشوارع ما لمو فيهو ولا غبارو زانو مافي…
اها جو راجعين الدكان… لقو ناس الحلة كلهم واقفين قدام الدكان ونجوى قاعدة تحكي ليهم…
نجوى : عبدالرحمن اخوي جاني ف البيت وقال عايز جبنة وقام ادا ولدي قروش عشان يجيب سكر و بن … والولد فات الدكان واتأخر…وانا اقول الولد دا مالو اتأخر… لانو مرات بمشي بلعب مع اصحابو… ف قمت لبستا توبي وجيت علي الدكان ما شايفة ولدي… قلت اسال الريح لو ولدي جاهو شال السكر ولا لسه… المهم شايفة الدكان ما فيهو زول… قلت كدا اشوف الريح يمكن راقد ف فرشة تحت ف الارض ولا شغال يعبي ليهو ف حاجة…اها مديت راسي الا اشوف ليك الريح ود الكلب بغتصب في ولدي…
في واحد لابس ليهو رداء وفنيلة حمالات بتنفس شرار شرار… شكلو عبدالرحمن اخو نجوى ..قال : وينو التيت دا… وينو لي ؟؟؟…
ابراهيم : جرا يا عبدالرحمن وما قدرنا نلحقو والله ....
عبدالرحمن ب زعل : جرا علي وين يا ابراهيم ؟؟؟…
ابراهيم : ما لقينا والله نحن فتشنا الشوارع دي كلها وما لمينا فيهو …
عبدالرحمن شال ابنوبة الغاز وفتحها جوة الدكان وطلع من جيبو ولاعة وعايز يولع ف الدكان…
ابراهيم وودحسين جو جارين ومسكوهو بالقوة قبل ما يشعل الولاعة وطلعوهو من الدكان…
ابراهيم : يا زول انت مجنون ولا شنو !!!… عايز تحرقنا انت ؟؟؟…
عبدالرحمن : بحرق الدكان دا والله هو زاتو لو قاعد بحرق تيتو زاتو…
ود حسين قفل انبوبة الغاز وابراهيم ماسك عبدالرحمن…
ابراهيم : كدا استهدى بالله يا عبدالرحمن… عمك بلة ما عندو ذنب عشان تحرق ليهو دكانو…
عبدالرحمن ب غضب : يا زول ما عندو ذنب كيف !!!..مش ود اخوهو وهو الجابو لينا هنا ؟؟؟…
ابراهيم : عم بلة لو كان عارفو كدا ما كان جابو يشتغل معاهو… وانت عارف عمك بلة ليهو في الدكان دا عشرين سنة وعمرو ما غلط علي زول ولا شفنا منو حاجة كعبة….
عبدالرحمن : يا زول يتحمل نتيجة غلط ود اخوهو…وانا اصلو ما بخليهو…
ابراهيم : يا زول ما تتهور … لو حرقتا دكان عم بلة ما ح تستفيد شي … والريح ح يطير وين يعني مصيرك ح تلقاهو… .
عبدالرحمن : والله انا الم فيهو الا اضبحو…ود الحرام….
واحد من الناس الواقفين : هو عم بلة زاتو مشا وين وخلى لينا العواليق دا قاعد ف الدكان؟؟؟…
رد ليهو واحد من الشياب : بلة دا حصلت ليهم وفاة ف البلد وسافر امبارح…
ابراهيم طلع تلفونو واتصل في رقم عم بلة ولقاهو لا يمكن الوصول اليه…
ابراهيم : عم بلة تلفونو مقفول…
الشايب : لا لا شبكتم كعبة بس… لكن لو اتصلتا عليه بعدين يمكن يخش معاك…
المهم شوية شوية الناس بدت تنسحب وعبدالرحمن اخو نجوى لسة زعلان وشكلو ناوي يحرق الدكان… لكن ابراهيم هداهو : انت اتصرف مع صاحب المشكلة وعمك بلة مافي داعي تحرق ليهو دكانو… دا البياكل منو عيش…
اها عبدالرحمن ساق نجوى اختو وولدها ومشو بيتهم…والناس اتفرقو اي زول رجع بيتهم…
ابراهيم قفل دكان عم بلة وطبلو وشال المفاتيح معاهو…وراجعين علي البيت…
ودحسين : شفتا يا عمك… اليوم داك لو كان خليتني جلدتا السان دا بسطونتين واديتو دبل سودان قفل…كان اتأدب وما عمل الحركة دي…
ابراهيم : ما كنت عايزك تتكلم قدام عمو لانو ح ينكر…
ودحسين : اها طيب هسي جاب ل عمو مشكلة… واخو المراة ممكن يجي بالليل ولا اي وكت ويحرق الدكان…
ابراهيم : لا لا م ح يعمل كدا… و…
ابراهيم قطع كلامو لانهم وصلو قدام بيت ناس ريم ... وشاف ريم واقفة ف الباب وبتحمر ليهو…
ريم قالت ليهو : يعني بتخاف علي حق الناس لكن اعراض الناس رخيصة عندك… مش كدا ؟؟…
ابراهيم و ودحسين ساكتين ومشو دخلو بيت ناس ابراهيم…
ابراهيم مسك راسو وقعد محتار…
ودحسين : والله يا مان الجاحة ختتا ليك بالواضح كدا…
ابراهيم : ياخ دي بقت لي كابوس ما عارف اتحل منها كيف !!!!!…
ودحسين : لا لا دي مافيها حل… انت ماسكها يعني ماسكها… اكرب قاشك بس يا جاح…
ابراهيم : شايفك واقف في صفها ونكرتني حطب…
ودحسين : انا بقول ليك كدا عشان ما عندك خيار تاني… والجاحة ما زولة سوق ...ف شنو انت عادي اربطها… لو نفعت معاك واصل… ولو م نفعت معاك جليها…
ودحسين قام علي حيلو وقال : المهم انا قادي يا مان…وانت فكر وشوف ولو لقيت حل تاني يرضي الطرفين جرة لي سلك…
ودحسين طلع وركب عربيتو ومشى…
وابراهيم فكر كداااااااااااااااااااااااا واخد قراو…
####
في مكان تاني…
زينب حاضنة بتها ودموعها جارية… ومعاوية قاعد جنبهم ويعاين ل بتو بكل اسى وحزن…ومازن واقف جنب امو ويعاين ل اختو ما فاهم حاجة لكن برضو حزين عشانها…
زينب : ح تعمل شنو يا معاوية ؟؟؟…
معاوية : والله انا زاتي م عارف اعمل شنو… راسي جايط يا زينب….
زينب : مجاهد يعني م ح تعمل ليهو حاجة وما ح تمشي تفتشو ؟؟…
معاوية : افتشو وين زي الوكت دا !!!… الجامعة وقفلت و انا ما عارف الداخلية القاعد يمشي ليها وين !!…
زينب ب عصبية : لازم تفشتو وتجيبو لو من تحت الارض…ما تقول لي ود عمك ولا ود حبوبتك…
معاوية : بكرة انا بمشي ليهو الجامعة ولو ما لقيتو بسأل من الداخلية بتاعتهم وين وبمشي ليهو هناك… بس قولي ان شاء الله القاهو….
زينب : حتى ولو ما لقيتو… تسافر البلد طوالي وتمشي تفتش ليهو عند اهلك هناك…
معاوية : خلاص خير ... ربنا يحيينا ل بكرة… هسي انتي ادي نسيبة تاكل ليها حاجة واديها تبلع حبتها ورقديها خليها تنوم …
معاوية مشى الحوش التاني واتصل علي اخوهو الاصغر منو اسمو محمد….
محمد : الووو…معاوية كيفك ؟؟؟…
معاوية ب صوت بارد : اهلا محمد ..كيف حالك وكيف ابوي وامي والباقين ؟؟؟…
محمد : كويسين والله الحمد لله… وكيف زينب ومزوني ونسيبة ؟؟؟…
معاوية جرة نفس عميييييق وقال : آااااااه… الحمد لله…
محمد حسة ب اخوهو ما من عوايدو وصوتو زاتو ما ياهو ف قال ليهو : خير يا معاوية مالك يا اخوي ؟؟؟…
معاوية ب صوت حزين : لا لا مافي حاجة… ما تشغل بالك…
محمد : يا زول انا قاعد احس بيك قبل ما تتكلم… كدا وريني انت عيان ولا حاجة عشان اجيكم ف الخرطوم…
معاوية : لا ما عيان… لكن خليها بالنية بس…
محمد : ياخ ما تتكلم… مالك ف شنو ..ولا بقفل منك وبتصل ب زينب اعرف منها…
معاوية : مافي حاجة كدا يقولو عليها… بس مجاهد…
وسكت ..
محمد : مجاهد مالو !!… عيان !!!… حصل ليهو حادث ولا مالو اتكلم ياخ ؟؟؟…
معاوية : مجاهد عمل لينا مشكلة هنا ف الحلة وشرد ما عارفين مشى وين…
محمد باستغراب : مجاهد عمل مشكلة !!!...ومشكلة شنو العملها… الزول دا هنا ف البلد من قام م عمل مشكلة مع زول ولا في زول قال فيهو كلام….
معاوية : ماااا دا الشي الخلاني اتخدع فيهو واخليهو يقعد معاي ف البيت…
محمد ب قلق : كدا وريني عمل شنو !!!…
معاوية : خلي بكرة بحكي ليك الحاصل كلو هسي ما عندي رصيد وتعبان والله… لكن عايز اقول ليك ... لو شفتا مجاهد جا البلد اوع تتكلم معاهو او تجيب ليهو سيرة ولا تكلم اي زول… خليك معاهو عادي وكلمني وخليك مراقبو لحدي ما اجي هناك…
محمد : طيب انت فهمني الموضوع كلو عشان انا اعرف هو عمل شنو…
معاوية : خلاص بتصل عليك بكرة بوريك الحاصل شنو…
معاوية قفل من محمد وقفل تلفونو عشان ما يسألو كتير… ورقد ف سريرو ويعاين للسماء… سرحان يفكر ف بتو نسيبة المسكينة…
المهم الليل كلو ما نام… لانو نسيبة جاتها حمى وبقت تتشنج ولو نامت بتقوم مخلوعة وتبكي وامها تمسكها تلولحها وتبكي معاها… ومعاوية دموعو تنزل… حاني علي بتو…
المهم نتابع ونشوف الحصل شنو…
…
..
.
يتبع
