رفيدة قاعدة مع امها في العريشة يشربو في... الجبنة… سمعو صوت الباب بدق…
ام رفيدة : قومي يا بت شوفي منو ال في الباب دا…
رفيدة كوركت لي رشا : يااا رشا… يااا بت… يا حيوانة انتي ما سامعاني…
ام رفيدة : قومي انتي رشا دي لو الباب اتكسر عديل ما ح تمشي تڤتحو…
رفيدة قامت وبتطنطن : والله يا امي بتك دي كسلانة خلاص… لا بتخدم في البيت ولا بتعمل اي حاجة ..دا كلو منك انتي دلعتيها… .
رفيدة وصلت الباب وفتحتو لقتو دا ود خالتهم اسمو عزالدين…
رفيدة : عزووو…
عز الدين : رفو يا رفو كيفك يا بت الخالة ؟؟؟…
رفيدة : تمام الحمد لله وين انت طولتا مننا…
عزالدين : والله جري بس يا ستي…
رفيدة : اتفضل اتفضل…
رفيدة ساقت عزالدين وجابتو العريشة لي امها…
رفيدة لي امها : دا عزو يا امي…
ام رفيدة : اهلا عزو كيفك وكيف ناس امك ؟؟؟…
عزالدين : كويسين الحمد لله بسلمو عليك يا خالتو…
ام رفيدة : الله بسلمهم…
رفيدة : حصانك جراي وصلتا مع الجبنة تقول شميت ريحتها….
عزالدين : والله جبنة خالتي دي ما بتتفوت… انا من بيتنا جاي اقول ليها اعملي لي جبنة…
ام رفيدة : طوالي يا عزو تجي اي وكت واعملها ليك…
عزالدين : تسلمي يا احلى خالة في الدنيا…
ام رفيدة كبت الجبنة لي عزالدين ومدتها ليهو ..
عزالدين : وين رشا و ريم ؟؟؟…
رفيدة : ريم دي طلعت مشت لي صحبتها ..،و رشا راقدة جوة في الغرفة…
عزالدين وقف وقال : كدي امشي اسلم عليها…
ام رفيدة كبت كباية تانية وقالت لي عزالدين : هاك امسك ودي ليها معاك الجبنة… هي كسلانة وما عايزة تجي تشيل جبنتها…
عزالدين شال كبايتو وكباية رشا ومشى دخل الغرفة لقى رشا مدمدمة ونايمة… قام ضربها في رجلها لمن رشا قامت مخلوعة….
عزالدين : قومي يا معاقة انتي،...
رشا نهرتو : ياخ مالك مصحيني يا حيوان انت ؟؟؟…
عزالدين : هههه اصلو ما بتشبعي من النوم انتي ؟؟..
رشا : ما بشبع انت مالك ومالي نايمة في بيتكم ؟؟..
عزالدين : انتي قايلة نفسك هناك بتنومي مع الجوطة بتاعت خالتك ؟؟؟….
رشا : انا زاتي بيتكم ما بمشي ..اصلا امك نضامة وكلامها كتير…
عزالدين : هههه ما هو عشان كدا خالتك بتسأل منك لانك ما قاعدة تمشي ليها….
رشا : انت زاتك كلامك كتير… عليك الله اطلع خليني اتم نومي…
عزالدين : والله طول ما انا قاعد في بيتكم ما بخليكي تنومي… يا بت النوم بقصر عمرك…
رشا : خلي يقصر عمري بس كدا ضر وحسادة وكيتا ليك…
عزالدين : قومي امسكي جبنتك دي حرقتني…
رشا : ما عايزة جبنة هسي بشربها بعدين…
عزالدين : قومي طيب عايزك في موضوع جاااامد كدا…
رشا طوالي قعدت في السرير وشالت منو الجبنة وقالت ليهو : اها خير ان شاء الله احكي !!!…
عزالدين قعد جنبها في السرير وقال ليها : مالك ما جيتيني في الجامعة ؟؟..مش قلتي ح تسجلي لي زيارة انتي وصحباتك المزز ديل ؟؟؟…
رشا : ابييييييت اصلو ما بجيبهم ليك…
عزالدين : عليك الله يا بت الخالة ...انا ما عارف البنات المزز الحلوات ديل مصاحباتنك كيف يا شينة انتي ؟؟..
رشا بي غيظ : انا شينة يا حيوان ؟؟؟… والله تشمهم قدحة… تاني الا كان تشوفهم في حلمك…
عزالدين : خلاص خلاص انتي عثل ....
رشا : برضو ابيييييت…. كلام الاول ما بتحول…
عزالدين : يا رشا يا كحييييل غيثني .....هواك سباني… تريتتاتترم… رشا يا كحييييييل غيثن…
رشا قاطعو : اسكت عليك الله ما تغني لينا بي صوتك القبيح دا ضرستني زاتو…
عزالدين خت يدو في خشمو وقال ليها : خلاص سكتا… يلا اوعديني انك ح تجيبي لي صحباتك الجامعة …
رشا : تعال هنا… انت قايل صحباتي المزز ديل بعاينو ليك انت يا اب تفة يا صايع يا شماسي ؟؟…
عزالدين : انتي بس جيبيهم لي في الجامعة ... وانا اتحداك اني ح اثبتهن كلهن… ولا اقول ليك ح اشوف احلى واحدة فيهن واحنك معاها….
رشا : انت قايل صحباتي روسينهن خفاف زي بناتك البتعرفهن… والله صحباتي ديل صعبات وبقطعو من الاولاد…
عزالدين : انتي ما عندك دخل… دي حاجة خليها علي انا…
رشا : طيب وانا استفيد شنو يا حلو انت ؟؟…
عزالدين : والله اعزك عزة من امها…وما ح اقصر معاكم...
رشا بعد تفكير : اممممم… لكن جامعتكم بعيدة يا عزو…
عزالدين : لا لا حق المواصلات علي انا ..ولمن تجو هناك بعزمكم علي الاكلة البتحبيها ومعاها التحلية كمان…
رشا : احلف…
عزالدين : قسما بالله….
رشا : لا لا انا ما بصدقك ..كدي اديني حق المواصلات اول وبعدين بجيبهم ليك…
عزالدين : هههه انتي قايلاني فارة ؟؟؟… تعالي هناك وبديكي حقك يا منقة…
رشا : وعد ؟؟؟..
عزالدين : اااي وعد… ووعد المؤمن دين عليه…
رشا : غايتو انت كضاب… لكن نشوف… يلا قوم خليني اتم نومي…
عزالدين ضربها في كتفها وقال ليها : يا شيخة عايز اتونس معاكي مالك انتي غياظة كدا ؟؟؟….
رشا اتألمت وقالت : ايييييييي… مالك بتضرب يا حيوان انت يدك حارة ياخي…
عزالدين مسح ليها مكان الضربة وقال ليها : خلاص معليش…بس قلت ليك نوم ليكي مافي طول ما انا موجود في بيتكم….
رشا غطت وشها بي يديها وقالت ليها : ما معليش،ولا اي حاجة… بس زعلانة منك….
عزالدين : طيب اراضيكي ب شنو ؟؟؟…
رشا رفعت راسها وقالت : امممم جيب لي شكولاتة…
رامي الصغير جا داخل الغرفة وبمسح في عيونو…
رامي بي دلع : انا كمان عايز شكولاتة…
عزالدين اتلفت لي رامي ولقى شعرو ممشط… قام مسكو من كتفو وجراهو عليهو وقال ليهو : دا شنو دا ؟؟… المشط ليك شعرك منو كدا ؟؟…
رامي : دي رفو "رفيدة "…
عزالدين : اوعك تخليها تمشط ليك تاني… انت راجل والمشاط دا حق نسوان… سامع ؟؟؟…
رشا : خليهو في حالو… هو لسه طفل ما بعرف ليك حاجة….
عزالدين جر رامي عليهو وهزاهو وقال : لازم من هسي يكون ناشف عشان بعد يكبر …
عزالدين قطع كلامو لانو شما ريحة كريم في رامي… ف قام قرب عليهو وشماهو كويس وفعلا رامي كان متمسح بي كريم…
عزالدين : وكمان ممسحنك بي كريم… ليه كدا يا رشا ؟؟؟… والله الولد دا بالطريقة دي كدا بتخربوهو…
رشا : نخرب ليهو شنو ..يعني عايزنا نخليهو اغبش زي ما بتقول انت ؟؟؟…
عزالدين : ما حكاية تخلوهو اغبش لكن مافي داعي تمسحوهو بي كريمات بنات… ما ممكن يا رشا… وبعدين انتو زاتكم ما بتخلوهو يطلع الشارع يلعب مع الاولاد…
رشا : هييي والله دا اخونا الوحيد ولا بنفرط فيهو ولا شتين….
عزالدين : اخوكن الوحيد ما قلنا حاجة لكن يبقى رابعكن…ويبقي لين وسحسوح زي البنات…
رشا : هم وينهم الرجال… ما كلهم بقو يتمسحو بالكريمات ويسبسبو شعرهم وبقو يطعنو حقن عديل والواحد فيهم جسمو انضف من وش البنات… احسن خليني ساكتة والرجال ماتو في كرري…
عزالدين ضربها تاني في كتفها : ماتو في كرري ؟؟؟… وانا ما عاجبك ولا شنو ؟؟…
رشا اتألمت ومسكت كتفها وقالت : ايييي… وشالت المخدة ضربت بيها عزالدين وصرخت بي صوت عالي : يماااا… يا اميييي…يا امييي…
امها من العريشة : في شنو يا بت بتكوركي مالك ؟؟؟…
رشا : تعالي سوقي مني ود اختك الكريه دا… قاعد يضربني ياخي…
امها : تستاهلي خليهو يضربك لانك كسلانة… اصلا مافي زول بعرف ليكي غيرو …
المهم عزالدين قعد في بيت خالتو ويتونس مع رشا ومع خالتو ورفيدة لحدي اذان العصر وطلع مشى قال عندو تمرين…
يلا شفنا كيف تعامل عزالدين مع بنات خالتو وكيف بدخل عليهن ويمزح معاهن …
نتابع ونشوف بعد داك البحصل شنو !!!…
####
في مكان تاني…
ابراهيم دخل الصالون وريم دخلت وراهو… لكن ريم مجرد ما شافت ود حسين وعباس قاعدين…كانت عايزة ترجع ....
ابراهيم وقفها وقال ليها : خشي يا ريم….
ريم : لا لا يا ابراهيم انا راجعة البيت…
ابراهيم : انتي بتخجلي وعايزة تبقي فنانة كيف ؟؟؟...الفن دا اهم شي فيهو الشجاعة الادبية… ولو ما بقيتي شجاعة عمرك ما ح تبقي فنانة… يلا تعالي ادخلي…
ريم دخلت معاهو الصالون بخطى ثقيلة وهي مترددة…وقالت ليهم : سلام عليكم ..
ود حسين وعباس : وعليكم السلام ....
ريم قعدت ليها في كرسي بعيد في الركن وهي مغطية وشها وخجلانة…
ود حسين طبعا عايش مع الاورغن ومع الوزنة بتاعتو قاعد يعزف ليهو مقطوعات ويتجدع…
ابراهيم قال لي ريم : اها جاهزة نبدا البروفة ؟؟؟…
ريم هزت راسها بالنفي…يعني ما جاهزة…
ابراهيم : بطلي خجلك دا وغني يا بت… مافي زول غريب هنا… ود حسين دا العازف ال حتعملي معاهو بروفات وعباس دا صحبي وطوالي بتشوفيهو معاي… وكلنا تلاتة وانت ما قادرة تغني قدامنا ..طيب بعدين ح تقيفي قدام الناس كيف ؟؟؟…
ود حسين وقف عزف وعاين لي ريم مساااافة وريم مدنقرة راسها… ف قال ليها : اسمعي يا اختنا نتكلم معاكي بالعربي الواضح كدا…عايز اسالك سؤال وتجاوبيني بصراحة… انتي عايزة تبقي فنانة ؟؟؟..
ريم هزت راسها بالموافقة…
ودحسين : ايوااا كويس انك عندك الرغبة تبقي فنانة… لكن برضو لازم يكون عندك عزيمة وارادة وتبدي في مشوارك عشان توصلي لي هدفك وتحققي حلمك….وعايز اقول ليكي حاجة كل الفنانات القبلك وهسي بقن مشهورات بدو بنفس طريقتك… يعني الواحدة بتبدا تدندن في البيت وتاني مع صحباتها وشوية شوية تتشجع وتغني مع فنانات وبعديها تعمل بروفات وتحاول تغني براها ومنها تنطلق للشهرة…وطبعا ابراهيم قال صوتك جميل و ح يكون عندك مستقبل في الفن… وابراهيم ما قاعد يقول كلام ساي… فااا شنوو حاولي سمعينا صوتك وانا ما ح اقصر معاكي. ..لانو انتي جاية من طرف ابراهيم وهيما دا حبيبنا… وان شاء الله نشوفك مشهورة وكل الناس بتسمع ليكي…و شنو… بداية الغيث قطرة يا بتنا…
ريم ساكتة وما قالت حاجة…
ودحسين : اول حاجة افتحي وشك خلينا نشوفك عشان نعرفك….
ابراهيم : اااي صاح يا ريم افتحي وشك دا… انتي عايزة تبقي فنانة كيف ومتدمدمة بالتوب كدا !!… يلا يا ريم افتحي وشك…
ريم براحة عدلت التوب وفتحت وشها…
ودحسين عاين ليها وقال : وي وي وي وي… يا شيخة انتي داسة مننا الجمال دا ليه… لكن تمام… عندك وجه فني يعني ما شاء الله تستاهلي تبقي فنانة ... وكدا نجحتي في اول اختبار… يلا نشوف الاختبار التاني والاهم ...سمعينا صوتك…
ابراهيم : يلا غني يا ريم….
ريم لسه خجلانة وما عايزة تغني…
ودحسين بقى يعزف ليهو في اغنية مشهورة كل الناس حافظنها ....وقال ليهم : يلا ارحكم نغني كلنا…
يلا ودحسين بعزف وبغني وعباس وابراهيم بغنو معاهو ومنطربين ..لكن طبعا اصواتهم قبيحة لكن عايزين يشجعو ريم… وفعلا ريم بدت تغني معاهم بي صوت واطي وشوية شوية اندمجت لكن لسه برضو شوية خجلانة….
بعد الاغنية انتهت ود حسين قال لي ريم : يلا غني انتي براكي… وغني الاغنية البتحبيها وحافظاها ...وغمضي عيونك عشان ما تعايني لينا وتخجلي… بس خليكي عايشة مع الاغنية بكل احاسيسك…. يلا ابدي دندني عشان انا اظبط التون بتاعك…
ريم غمضت عيونها واتشجعت وبدت تغني اغنيتها الحافظاها وبتحبها… وودحسين بعزف ليها…
طبعا في البداية صوتها كان فيهو رجفة لكن شوية شوية وصوتها بقى ثابت وهي غنت وعاشت مع اغنيتها…
وبعد ما انتهت ود حسين قال ليها : يلا تعالي نعيد الاغنية تاني بس خليكي فاتحة عيونك لكن ما تعايني لينا… عايني في اتجاه تاني….
اها ريم غنت المرة التانية والتالتة بثبات والشباب انبهرو بي صوتها وبعد انتهت صفقو ليها بي اعجاب ..
ودحسين : يلا كدا تمام وبالجد صوتك جميل وعندك ملكات وحليات فنية.. ولو واصلتي بالطريقة دي وفي عمرك دا ح تستلمي الساحة الفنية… بس شوفي يا بتنا…عايز اقول ليكي نصيحة من اخ قديم في مجال الفن … طريق الفن دا طريق عفن وصعب ومليان عثرات وانتي لو عايزة توصلي للشهرة لازم تضحي بحاجات كتيييييرة لانو الشهرة ما بالساهل يا بتنا… وانا عايزك تفكري كويس قبل ما تدخلي المجال دا …وعلي العموم انا جاهز في اي وكت لو ما عندي شغل بجي بعمل ليك بروفات ....بس حاولي احفظي اغاني كتيرة وغني طوالي في البيت… تمام ؟؟…
ريم : تمام…
ريم ودعتهم و طلعت مشت بيتهم وهي فرحانة بي كلام ود حسين وما مصدقة انها غنت….
ودحسين ضرب ابراهيم في رجلو وقال ليهو : الزاموكة عجيبة يا جاح…
ابراهيم : والله يا مان انا متاكد انو اي سان يسمع ليها بقول السانة دي دنعها فيوتشر… لكن شايفك عامل مولانا…
ودحسين : ما مولانا ولا جاحة لكن السانة لسة قرمبوزة… ولو بقت قونة ح تضيع يا جاح… انت ناقش القونات كيف…
ابراهيم : يا مان الشغل دا تبعي انا ...ما تخرب لينا القفلة…
ودحسين : لا لا منتهي...
ودحسين وقف وشال الاورغن بتاعو وقال : يلا يا راسطات انا بعمل كش … عبتان ماشي ابطلها….
####
في مكان تاني…
مجاهد طبعا شوية شوية بدا يتغير وبدا يفتح…لكن ما بالطريقة البعرفوها الشباب انو الولد المفتح هو الشاب المحنك البقدر يحنك مع البنات ويتكلم معاهن عادي ويثبت ليهو كم بت وامورو واضحة مع المزز… لكن مجاهد فتح بطريقة تانية او فتح عيونو لي حاجات تانية…
اهااااا…
...
..
.
يتبع
