عزالدين خدع رشا بت خالتو وسلب منها اعز ما تملك ب حنك انتي بت خالتي وانت حقتي وانا ح اكون معاك طول العمر وانتي ما بتثقي فيني والعبارات الرنانة دي…و رشا اكبر غلطة ليها خلتو يلمسها من البداية ويقول ليها دي حاجات خفيفة وعادية بين اي اتنين بحبو بعض والحاجة دي اي بت بتعملها ورشا في لحظة ضعف " هو المفروض ما نقول لحظة ضعف لانو الضعف بريء منهم والبت لو في وسط مية راجل لو ما عايزة زول يلمسها ما في جن بقدر يقرب منها الا كان يغتصبوها و دا بغير ارادتها رغم انها ح تقاوم… فما بالكم من شخص واحد وهي تمكنو من نفسها بإرادتها وتقول في لحظة ضعف ""…
المهم عزالدين ما تاب من رشا ولا عايز يسيبها ف حالها رغم انها قالت ليهو تعمل خطوة وتجي تخطبني…لكن عزالدين قاليها اصبري اكمل الجامعة واجي اتزوجك عديل ورشا برضو صدقت كلامو ورضخت ليهو للمرة التانية… لكن لمن راودها المرة التالتة رفضت رفض قاطع وخافت انها تحمل… وقالت ليهو تاني الا بالحلال ولو انطبقت السماء علي الارض ما بخليك تلمسني الا بعد الزواج…
"طيب بعد شنو !!! بعد الطير اكل العيش"…
عزالدين عرف انو تاني ما ح يلقى فرصة مع رشا بت خالتو وحاول يتهرب منها وانقطع من بيتهم نهائي…ورشا كل ما تتصل عليهو ..بحاول يخارجها ب اي كلام لحدي ما زهج من مكالماتها الكتيرة وحظر رقمها… ورشا بقت تمشي ليهو بيتهم لكن ما بتلقاهو وحتى لو لقتو ما بتقدر تتكلم معاهو قدام ناس بيتهم او تكلم زول تاني… لانها لو كلمت اي زول ح يقول ليها انتي براكي خليتيهو يلمسك واصلا حتكون فضيحة بالنسبة ليها…ف كرهت عزالدين وعرفت انو خدعها وكان بلعب بيها…
رشا اتخرجت من الجامعة ونزلت شغل ولسه قلبها محروق علي نفسها وعلي شرفها الفرطت فيهو مع ود خالتها الرماها زي الكلبة واتجاهلها…
رشا اتقدمو ليها شباب كتار من اهلهم وغريبين ومن زملاءها ف الشغل لكن رشا بترفض وما بتقدر تقبل…عشان عارفة نفسها غلطت ومافي زول ح يقبل بيها وعشان ما تجيب سمعة ل نفسها و ل اهلها…كانت بترفض…
عزالدين عاد في الجامعة كذا مرة عشان هو ما جادي ولا زول قراية…واتخرج بعد تعب لكن لسه لافي ودايش وصايع لا شغل ولا مشغلة ويصطاد ف بنات الناس….
###
رفيدة اختهم الكبيرة حست ب انو عمرها جاري ولسه ودعمها العاقد عليها ما رجع من ليبيا ولا عمل اي خطوة وحتى مصاريف ما قاعد يرسل وبتصل عليها بعد شهور…ورفيدة مسكينة ونفسها عزيزة ما بتقدر تطلب منو حاجة….
المهم اخر مرة اتصل عليها… رفيدة قالت ليهو تعال راجع والعمر جرى تعال نلحق نفسنا نجيب لينا عيال يملو لينا حياتنا… بس ودعمها كان رافض وقال ليها اصبري انا اول ما كنت شغال لانو البلد ف حالة حرب وكل يوم مشاكل… لكن هسي الحمد لله الوضع هادي ونزلنا شغل…وان شاء الله الامور تتسهل وبنزل السودان بتم زواجنا…
اها رفيدة خلتو بي راحتو لكن طوالي بقت تتصل عليهو وكل مرة تلح عليهو عشان يرجع…
عدت ستة شهور وودعمها نزل السودان ومعاهو شوية قريشات للعرس وجاب معاهو عربية بوكو صالون عشان يبيعها هنا…
رفيدة طبعا كانت شغالة ملابس وعدة وكدا بتجببهم من السوق بالجملة وتوزعهم علي ناس الحلة ويدفعو ليها بالاقساط وعملت قريشات حلوة…
المهم رفيدة وودعمها اتزوجو ...وود عمها قال حيقعد معاها شهرين او تلاتة و ح يرجع ليبيا تاني لكن رفيدة اصرت انو تاني ما يسافر ولا حتة الا وهي معاهو… وود عمها هو زول بسيط ومسكين زيها يعني ما النوع الصعب داك… وخاف علي رفيدة زوجتو من الغربة وليبيا طبعا صعبة ولسه فيها مشاكل…
ف قرر يخلي السفر لحين رفيدة تأذن ليهو…
اها اجرو ليهم بيت جنب ناس امها وسكنو فيهو وزوج رفيدة اللي هو ود عمها ما باع العربية الجابية بوكو… ف دفع جماركها ورخصها واشنغل بيها ترحال… ورفيدة شغالة في تجارتها…
المهم رفيدة وزوجها الاتنين شبه بعض يعني هم الاتنين مساكين ويتشاورو في امورهم وعايشين مبسوطين في امان الله…
رفيدة ولدت جابت توأم ولد وبت وزوجها خلى السفر والحمد لله امورهم بااااسطة…
###
ريم طبعا ضغطت علي ابراهيم عشان يتقدم ليها ويتزوجو زواج بس قدام الناس ...وريم ابوها كان رافض انها تتزوج لانها لسة ما كملت دراستها… لكن ريم خلت امها تتكلم مع ابوها وتقول ليهو ح تتم دراستها بعد الزواج… وبرضو كلمت ابراهيم يكلم ابوهو عشان يجي ويتكلم مع ابوها ..ولازم الزواج يتم يعني لازم يتم…
المهم ابو ريم وافق مع انو اخواتها الكبار رشا ورفيدة لسه ما عرسو… لكن ابو ابراهيم صحبو شديد وما بقدر يرفض ليهو طلب…
ابراهيم اتزوج ريم لكن زواج بدون رضا ..زي ما انتو عارفين…بس عشان يسترها لانو هو الغلط معاها… وسكنو في بيت ناس ابراهيم…
ابراهيم وريم اي واحد بنوم براهو لانو عارفين انو زواجهم دا تم غصبا عنهم… وح يكونو مع بعض فترة و ح ينفصلو…
ريم رجعت للغناء تاني بالرغم من انو ابراهيم كان رافض لكن ريم كانت مصرة… ورجعت تغني… وابراهيم ف البداية ما كان بطلع معاها حفلات…لكن لمن شافها بتطلع مع ود حسين وبتاع ساوند تاني…قرر هو يطلع معاها ويشتغلو سوا ويكون مراقبها لكن طبعا لسه اي واحد بنوم براهو…
ابو ريم عرف انو ريم بتو بتغني ف حفلات وزعل شديد من الموضوع دا وكان عايز يمشي يشاكلها لكن امها قالت ليهو بتك في عصمة راجل وهو حر فيها ..مافي داعي تخرب بيت بتك…
ابو ريم برضو كان حاسي بي ضيق ..ف مشى ل ابو ابراهيم ورمى ليهو الكلام من بعيد كدا عشان يكلم ولدو ما يخلي ريم تغني وترجع ل دراستها… لكن طبعا ابو ابراهيم من النوع ال ما بيتدخل في حيات اولادو.... يعني اولادو ماخدين راحتهم في تصرفاتهم… الا لو واحد جا استشارو في حاجة ف بقول ليهو رايو بكل صراحة والولد حر يتصرف زي ما هو عايز…
ريم طبعا كانت بتصرف عاي ناس بيتهم وتدي القروش ل امها وامها بتجيب حاجات اابيت الناقصة ووضعهم اتحسن اكتر من الاول… وابو ريم شاف الشغلة جايبة حقها ف سكت ونسى الموضوع…
المهم ابراهيم بقى يطلع مع ريم حفلات ..وشوية شوية بقى يتضايق لمن الشباب يقربو منها او ينقطو ليها او يحاولو يعاكسوها وهي بتغني…كان بس بعمل نفسو زعلان وما بتكلم معاها… ولمن خلاص فاض بيهو بقى يتكلم مع ريم ويقول ليها ما تخلي زول يقرب منك ووقفيهم ف حدهم والكلام دا ..لكن ريم بتقول ليهو ديل جمهوري ف ما بقدر اصدهم وكدا…
اها ابراهيم بدا يحس بالغيرة تجاه ريم وكل يوم يشاكلها… وريم حست بالكلام دا وعلاقتهم بدت تتحسن وحبو بعض واتعاملو مع بعضهم ك زوجين وريم حملت وقعدت ف البيت لحدي ما ولدت وجابت ولد…
بعد ولدها بقى عمرو 7 شهور رجعت تغني تاني…وبتخلي ولدها مع امها وتمشي حفلتها وترجع ليهو…
اها الجمك طبعا لسه متذكر حركة ريم وابراهيم لمن ساقها من الحفلة والموضوع دا ماكل معاهو جنبة بس ما كان فاضي ليهم…
يلا الجمك اتصرف وجاب رقم تلفون ريم واتصل عليها قال ليها عندي اصحابي عامل ليهم حفلة تعالي غني لينا… ريم طبعا نست موضوع الجمك واعتبرتو عادي زيو وزي باقي المعجبين…
اها كلمت ابراهيم وابراهيم رفض وقال ليها تمشي اي حفلة ما عندي مشكلة الا حفلة للجمك… و ريم كمان راسها ناشف وبتحب القروش ف كانت مصرة وقالت ل ابراهيم المفروض تمشي معاي عشان تكون جنبي لو خايف علي من حاجة… ولو انت ما ماشي بسوق معاي بتاع ساوند تاني…
يلا ابراهيم مشى معاها وهو متضايق شديد…
وصلو عند الجمك ... والجمك طبعا خاتيها ليهم ..ولمن الحفلة اشتغلت الجمك بجي ينقط لي ريم بالقروش ويعاين ليها شديد ويغمز ليها نظام عايزو معاها وكدا ويهمس ليها ف اضانها بكلمات الاعجاب بجسمها وانو عايزها وبدفع اي مبلغ…ريم بتغني عادي ولا شغالة بيهو … وابراهيم طبعا عايز يطق من حركات الجمك…
اها بعد الحفلة انتهت… الجمك ادا ريم ربطة قروش وقال ليها الجمعة الجاية برضو عندي حفلة تجي تغني لينا بالله و ريم وافقت…
بعد رجعو البيت ابراهيم اتشاكل مع ريم وكيف تشيلي منو القروش ودي ما حقتك وبتاع…ريم قالت القروش حق تعبها وشغلها…ويلا النقاش بينهم اشتد وابراهيم قال ليها تاني الجمك نهائي ما تشتغلي ليهو حفلة ... وريم كمان قالت هي حرة تشتغل ب مزاجها..والجمك زبون زيو وزي كل الناس وهي ح تشنغل ليهو…
يلا صوتهم علا وابراهيم ضرب ريم كف وقال ليها ما بتنفعي معاي وريم مشت بيتهم و طلبت الطلاق وابراهيم طلقها….
الجمعة البعديها الجمك اتصل علي ريم عشان الحفلة وريم كلمتو انها اتطلقت ومحبوسة للعدة….
يلا الجمك بقى يتصل عليها كل فترة ويسألها ويتطمن من احوالها وعايز يشوفها رجعت ل ابراهيم ولا ما رجعت ليهو….
بعد ريم انتهت من شهور العدة ..الجمك قال ليها اول حفلة لازم تجي تشتغليها لي…وقال ليها انا جايب بتاع ساوند وعازف ..بس انتي تعالي براكي وعندي ليكي هدية…ووراها العنوان مكان الحفلة…
ريم مشت لنفس العنوان وكان عبارة عن شقة وريم كانت مفتكرة انها حفلة مصغرة او قعدة شباب زي كل مرة ...ف وقفت قدام باب الشقة و اتصلت علي الجمك فتح ليها الباب قاليها اتفضلي…
ريم دخلت الشقة وما لقت فيها اي زول غير الجمك ..
ريم : وين المعازيم ووين الساوند ووين بتاع الارغن ..
الجمك بخبث : انا المعازيم وانا بتاع الاورغن وانا اي حاجة والكل ف الكل…
ريم عرفت انو الجمك قصدو شي تاني…ف حاولت تترجاهو لكن الجمك قاليها عايزك ب اي طريقة وما بخليكي ...
ريم لمن شافتو مصر قالت ليهو خلاص اتزوجني… والجمك قال بدفع ليها اي مبلغ هي عايزاهو لكن ريم قالت ليهو الا بالحلال…
اها الجمك لمن شاف ريم مصرة علي الزواج قاليها خلاص ما مشكلة بتزوجك… وهو اصلا الزواج عندو عادي بتزوج وبطلق…
المهم مشى بيت ناس ريم ودفع ليهم قروش وقاليهم عايزين عرس مبسط عقد وغداء بدون اي جوطة… واتفقو علي الجمعة البعديها…
الجمك جاب معاهو شلتو وجو الجمعة اتغدو مع ناس ريم وبعد الغداء عقدو وساقها ب طفلها الصغير ولد ابراهيم ومشو…
طبعا اجر ليها شقة بعيدة وقعدها هي وطفلها…لكن هو ما بقعد معاهم…لانو زوجتو الكبيرة ما عارفة…
يلا بجي ل ريم يوم او بعد يومين تلاتة ويقعد معاها ساعة ساعتين ويديها قروش ويمشي يخليها…
اها استمر الوضع كدا لمدة ستة شهور والجمك زهج منها وطلقها واداها عربية وقال ليها اتوكلي ارجعي اهلك…
الجمك طبعا زواجو زواج متعة بتزوج البنات الما بقدر يوصل ليهم ويقعد معاهن شهر شهرين تلاتة لحدي ما يزهج منها ويديها قروش ويقول لياها اتخارجي… وهو البنات البتزوجن كلهن بخت ليهن حبوب في العصاير عشان ما يحملن… يعني برنامجو كدا بس…
ريم هي كانت مفتكرة انو الجمك عايزها بالجد وفرحت لانها اتزوجت تاني وح تعمل اسرة وتستقر والجمك زول عندو قروش ومبسوط يعني هي ح تعيش مبسوطة واي حاجة عايزاها بتجيها… لكن طبعا انصدمت لمن الجمك طلقها ورجعت بيت اهلها ومعاها طفلها والعربية….
قضت شهور العدة وطلعت عايز ترجع للغناء تاني…
لكن في يوم مشت الدكان وراجعة ..شافت واحد بشبه ابراهيم لابس جلابية وعندو دقن وشايل ليهو سبحة وماشي ومدنقر ف الارض ل حدي ما خشة بيت ناس ابراهيم…طبعا ريم استغربت يكون دا اخو ابراهيم ال في السعودية رجع ولا شنو…
المهم مشت بيتهم وسالت امها عن ناس ابراهيم اخوهو جا ولا شنو لانها شافت ليها واحد بشبه ابراهيم شكلو جاي من الجامع ومربي دقن…
امها قالت ليها دا ابراهيم طليقك زاتو لو شفتيهو اتغير وباع الساوند وبقى من الجامع للبيت وما بطلع مكان تاني وطوالي قاعدة تسمعو بقرا قرآن والليل كلو يذكر الله…
ريم استغربت : معقولة دا ابراهيم يمة ؟؟؟…
امها : ااي والله… ولو شفتيهو بمشي ويعاين في الارض… وطوالي بجي بسأل من ولده…والله اتغير 180 درجة…
المهم ابراهيم ربنا هداهو وبقى انسان دغري وزول الله…
ابو ابراهيم لمن شاف ابراهيم كدا قال ليهو رجع طليقتك وخلي ولدك يتربى وسطكم…
ابراهيم : لا لا يا ابوي طليقتي ماشة في طريق الضلال وولدي انا مسؤول منو… لكن طليقتي حد الله ما ببني وبينها…
ابو ابراهيم : يا ولدي،انت كنت اكبر زنديق وشماسي ومن حفلة لي حفلة وكل يوم مع فنانة والحمد لله ربنا هداك… ان شاء الله كمان ريم ربنا يهديها…
ابراهيم رفض لكن ابوهو اصر عليهو وقال ليهو اول مرة انا اتدخل ف حياتك و دا كلو عشان طفلكم يتربى وسطكم ..
المهم ابو ابراهيم مشى اتكلم مع ريم وقال ليها ابراهيم ح يرجعك بس قال تسيبي الغناء…
ريم قعدت مع نفسها و فكرت ف الموضوع وقالت فعلا الغناء دا طريقو وعر ومحفوف بالمخاطر وكلو ذنوب وسيئات….
المهم ريم وافقت انها تخلي الغناء وترجع ل ابراهيم… وابراهيم قروش الساوند الباعو كان خاتيها ف البنك… وشالها فتح ليهو محل جوالات واكسسوارت واخوهو ال في السعودية قدم ليهو مساعدات ... والحمد لله شغال وماسك اسرتو الصغيرة…وريم كمان ربنا هداها و باعت العربية بتاعت الجمك وفتحت خلوة تحغيظ القرآن للسيدات…
####
رامي اخو ريم ورفيدة ورشا… طبعا ما اتكلمنا عنو كتير لكن انتو عارفين اخواتو قاعدات يعاملنو معاملة بنات ومرات يعملن ليهو روج وقلم حواجب ويقعدو يصوروهو لانو وجيه…
يلا لمن رامي كبر بقى عندو ميول انثوي ..يعني بقى عندو اضطراب الهوية الجنسية… يعني هو ولد لكن حاسي كانو بت… بيتكلم زي البنات ويتمسح ويتملس ب كريمات البنات…و اي زول بشوفو او يتكلم معاهو بقول الولد دا ما كويس… لدرجة انو رامي بقى معقد وما بخالط الناس كتير واغلب وكتو بقعد مع البنات لانو بحس انهن بفهمنو وما بضحكو فيهو ولا بنبزوهو زي الاولاد… و دا الشي الخلاهو يميل للاناث اكتر من الاولاد…والحاجة الغريبة انو ما كان بحس اتجاهن ب اي مشاعر…
ابوهو تعب معاهو وبقى يخجل منو ..ف لمن الامر استعصى عليهو سفرو البلد ل اختو…
يلا رامي مشى قعد مع عمتو ودرشتو ليك درش زراعة وغنم… لحدي ما بقى راجل اغبش واتزوج بت عمتو… ولسه كلامو وحركاتو حركات بنات لكن شدة حيلو شوية…وزوجتو بت عمتو عرفت انو طبعو كدا عشان مربى بنات… وعاشت معاهو في البلد ومبسوطين…
####
عباس اشترى الساوند بتاع ابراهيم ومسك الشغل مع القونات…
ودحسين بعد ابراهيم التزم وكان طوالي بقول ليهو خلي العزف والكلام الفارغ دا وشوف ليك شغلة تانية وربنا يهديك…
قام سافر الامارات واشتغل نفس شغلو ف الامارات يعني عازف وكدا بعيد من ابراهيم وكلامو الكتير زي ما ود حسين شايف…
####
نسرين حاولت تصلح علاقتها مع خطيبها وقالت ليهو خلي الجفاء وحسسني بوجودي في حياتك… يعني اتكلم معاي وريني انت عملت شنو وجهزتا شنو وقول لي كلام رومانسي وخلي الاسئلة الروتينية دي بتاعت انتي كيف وناس البيت كيف وتقفل من غير ما اسمع منك كلمة حلوة…
المهم خطيب نسرين اعتزر ليها عن الماضي وقال ليها عشان كنت مشغول وبجهز ف ترتيبات الزواج وكدا… وكل يوم بقى يتصل عليها ويسمعها كلام جميل وكلام رومانسي ونسرين حبتو وندمت علي علي علاقتها مع عزالدين واتزوجو وعايشين مبسوطين…
نضال بت البلد الهادية وراسية….الحمد لله ربنا ابعدها من عزالدين وامثالو ورجعت لي طبعها واصلها وكملت جامعتها من غير اي علافة مع اي شاب ورجعت البلد نضيفة وعفيفة ورفعت راس ابوها الرباها وصرف من اجلها الغالي والنفيس عشان تتعلم…واشتغلت في البلد واتزوجت واحد من اهلها وعايشين في امان الله…
بكري اتخرج واشتغل لكن ما اشتغل في نفس مجالو… لكن امورو ماشة تمام الحمد لله… وامو خطبت ليهو بت خالتو…
####
عبدالرحمن اخو نجوى طبعا اصحابو كلهم ف البوليس ولما كلمهم بالحاصل...قالو ح يتصرفو… وفتحو بلاغ ف الريح وسافرو البلد وعبدالرحمن معاهم وقابلو عم بلة…
وعم بلة طبعا لمن كلموهو بالشي العملو الريح ود اخوهو طبعا اتفاجأ وزعل منو شديد واعتذر ل عبدالرحمن…وقال ليهم فعلا الريح جا البلد لكن قال جا عشان البكاء… لكن ارح نفتشو معاكم اقبضو طوالي…
الريح لقوهو قاعد في بيتهم وما كان متخيل انو عبدالرحمن يجيهو البلد… ف قبضو عليهو ورحلوهو جابوهو الخرطوم… وبعد التحري معاهو وجابو الطفل المجنى عليه وحكى ليهم كل الحصل ..والريح طلع اغتصب نص اطفال الحلة… واتحاكم ب غرامة واتسجن 10 سنة ….
####
معاوية مشى حرك البلاغ الفاتحو في مجاهد… وفتشو مجاهد واستقصو عنو وبعد تعب لقوهو قاعد مع خالتو وقبضوهو… والقاضي حكم عليهو اعدام… لكن عملو استرحام وخففو ليهو الحكم واتسجن 15 سنة….
معاوية ومحمد… عمهم واولادو زعلانين منهم وحصلت بناتهم مشاحنات وانقطعو من بعض فترة طويلة… لكن خشو الاجاويد والعلاقة بيناتهم رجعت لكن لسه في حساسية بينهم وما بيتعاملو مع بعض زي الاول…
مازن رغم انو مجاهد كان بتحرش بيهو لمن كان صغير…و لمن كبر اتجاوز الحتة دي… لكن كان بيتضايق لمن يتذكر الكلام دا….
نجي ل نسيبة…
نسيبة عشان تتعافى من الكوابيس والخلعة البتجيها اخدت فترة طويلة لانها كل مرة بتتذكر مجاهد والعملو معاها…
يلا بعد كبرت وبلغت اتنقبت وبقت زولة صعبة شديد… و بقت تكره حاجة اسمها رجال… اي راجل ف الدنيا بقت تكرهو كره ما عادي…ما عدا ابوها وعمها محمد مع انها اول ما كانت بتثق فيهو ولا بتقرب منو لكن محمد عمها زول فاهم وحاسي بيها وحاول يتقرب منها لحدي ما بقت تثق فيهو… وكدا تاني نهائي لا بتسلم علي راجل ولا بتتكلم مع راجل.. الا التلاتة ديل ابوها معاوية واخوها مازن وعمها محمد بسسسس…
ولو جات ماشة ف الشارع براها وفي راجل او ولد شاب ماشي ف الشارع… نسيبة بتكون ماشة وخايفة… ما بظهر فيها لكن من جواها خايفة….
اها في ولد خالتها مهندس اسمو سفيان طبعا كان عارف قصتها كلها وهو الوكت داك كان ف الثانوي لمن حصلت لي نسيبة المشكلة دي واتخرج وشغال في شركة وامورو سالكة…المهم سفيان دا شاب دغري من قام ف الدنيا ما عمل علاقة مع بت ولا قرب من بت…وهو كان بجي بيت خالتو زينب كل فترة زيارة يسلم عليهم…لكن طبعا نسيبة ما بتعرفو لانو من قامت ما بتعاين لي راجل ف وشو…
المهم سفيان كلم امو وخالتو زينب انو عايز يتزوج نسيبة… لكن نسيبة رفضت وقالت ما عايزة حاجة اسمها زواج نهائي وكرهت الرجال بسبب مجاهد…
امها قدر ما حنستها ..نسيلة رافضة…
سفيان كلم عمها محمد… ومحمد اتدخل واتكلم معاها وحنسها وقال ليها ما تكسري بخاطري وانا اديت الولد كلمة…
نسيبة سكتت لكن محمد اصر عليها وعقدو ليها مع سفيان ود خالتها…
نسيبة قالت ح تعاملو بطريقة سيئة واصلا ما ح تخليهو يقرب منها لحدي ما يزهج منها ويطاقها…
يلا سفيان ساقها بيتو ونسيبة كانت بتقوم بواجباتها المنزلية لكن ما بتخليهو يلمسها وبتكون قاعدة معاهو مكمكمة ومدمدمة…
سفيان متففهم للوضوع دا كلو وكل يوم بتونس معاها ويحاول يضحكها عشان تتعود عليهو واصلو ما حاول يجبرها علي شي…
نسيبة بقت تميل ليهو عشان هو مرح… بس لمن تتذكر هو زوجها يعني عايز منها حقو الشرعي… طوالي بتتذكر مجاهد بتقوم تبكي وبتجيها حالة نفسية وبتتخيل انو نفس الحصل ليها من مجاهد ونفس الالم برضو ح يحصل ليها مع سفيان عشان كدا بتخاف…
يلا سفيان بقى يذكر ليها ايات واحاديث عن الزواج ويقول ليها انو هو عندو حق عليها ولازم تمكنو من نفسها وكدا…وفي النهاية قال ليها انتي زوجتي وانا عافي ليكي كل حقوقي عليكي… بس ما تطولي علي كتير يا بت خالتي…
المهم بعد مسايسة وتحنيس ومزح…نسيبة رضت ليهو وسفيان عشان هو زول فاهم… ما خلاها تخاف وشوية شوية حتى نسيبة عرفت انو الموضوع عادي والكابوس راح منها…وعاشت مع ود خلتها سفيان ف امان الله…وانجبو بنات واولاد…
#النهايـــــــــــــة…
#بقلم :عادل عبد السلام
شكر كتير وكل التحايا للناس الادتني من زمنها الغالي وتابعو الرواية …
الرواية من وحي الخيال يعني منجورة نجر من راسي الماكن دا… لكن بالتأكيد هي احداث حاصلة في حياتنا ونتمنى زوالها…وما عايز اطول عليكم في الخلاصة لكن نحاول نختصرها في بعض النقاط…
يا جماعة افهمو افهمو افهمو ..ما تقفلوها معانا ياخ…مافي شي اسمو ود خاتي وود عمي وود حبوبتي وبتاع…الناس البجو خاشين البيت تووووش ومعتبرين الحالة واحدة ويدخلو علي البنات ويقعدو يتونسو معاهم….شفتو ديل هم زاتهم البخربو البنات ....
والزمن العلينا دا النفوس ما واحدة يا جماعة ... ف ما تثقو في زول نهائي واغلبية الناس بتظهر خلاف ما تبطن… ف عشان كدا لازم اي زول تتعامل معاهو في حدود وخلي بالك منو شديد مهما كان علاقتك او قرابتك معاهو…
طبعا في بنات بغلطن وبعد م الفاس تقع في الراس تجي وتقول انا في لحظة ضعف غلطه…مافي حاجة اسمها لحظة ضعف ..انتي براكي عايزة كدا…ولو ما عايزة مافي زول بقدر يلمسك….
ف ما تخلي ولد يغشك ويقول ليك انتي حقتي وانتي ملكي ..كضاااااب لن يتزوجكي ... ف مافي حاجة في الدنيا بتثبت ملكية الزول ل اي شي الا بورق… وهو لو ما جاب قسيمتو في يدو ف يبقى انتي لا حقتو ولا اي حاجة…
وبالمناسبة انا قاصد اخلي عزالدين كدا لانو في شباب كتار امثال عزالدين… وعشان البنات ياخدن حذرهن من امثالو…
ورشا كمان في بنات كتار زيها… الواحدة غلطت مع واحد قريبها ولا مع اي ولد ومشى خلاها… وهي بقت قاعدة معلقة وما قادرة تتزوج خايفة من الفضيحة وكلام الناس…
بالنسبة للبنات العندهم اخو واحد… عليكم الله ما تخربو الولد وما تعاملوهو معاملة البنات… لانو لمن يكبر بيتأثر ب معاملتكم دي وبكون عندو ميول انثوي…ف بالله ..خلوهو في حالو ..ربنا خلقو راجل ..خلوهو يبقى راجل…
وفي نقطتين مهمات لازم تاخدو بالكم منهم…
اولا بالنسبة للاغتصاب ..القانون وضع عقوبات رادعة للجرايم ضد الاطفال…و اي مجرم لازم ياخد عقابو عشان يتأدب وما يتمادى في فعلو…
يلا اغلبية البنات لمن يكونن اطفال ويحصل ليهن اغتصاب…لمن يكبرن ما ح تنسى الحصل ليها وبتدخل في حالة نفسية .. ويحصل ليها نفس الحصل ل نسيبة ..وعشان تطلع من الحالة دي وتتأقلم مع الناس وتعيش حياة عادية… عايزة ليها فترة طويلة…
وبالنسبة للاولاد البحصل ليهم اغتصاب وهم اطفال... يلا لمن يكبرو ويتذكرو الحصل ليهم دا ..اغلبيتهم بتجيهم عقدة نفسية ...يعني بقول هو راجل كيف يحصل ليهو كدا… ف بعضهم بيحقد علي المجتمع وبحاول ينتقم ف ح يغتصب اطفال صغار وفي البنحرف ويستمر في الطريق دا….
ومنهم ال بنسى لكن برضو بتكون في نقطة سوداء في حياتو كل ما يتذكرها بيتضايق شديد…
ف شنو… خلو بالكم من اطفالكم والتربية ما هي انك توفر ليهم الاكل والشراب والسكن واللبس …
بالعكس لازم تقعد معاهم وتستمع ليهم ..يعني الطفل في مرحلة بتحس بيهو انو بتكلم كتير ف بيحتاج ل زول يسمع ليهو… ف لازم تسمعو ل اطفالكم خلوهم يحكو ليكم عن يومهم في المدرسة او مع اصحابهم كان كيف وما تكبتوهم…
يلا لمن تخليهو يتكلم وتنتبه معاهو ممكن تلقى حاجة غلط اثناء كلامو عشان توعيهو…وبالطريقة دي كدا ح تعرف طفلك الحصل عليهو شنو…وتكون متابعو وعا ف عنو كل حاجة…واهم شي انك ما تخوفو وتنهرو وتخليهو يتحاشاك….
ف اسمعو ل اطفالهم وحذروهم انو في خطوط حمراء واماكن مافي احد يقرب منها…
وربنا يحفظنا ويحفظ اطفالنا…
كدا خلاص انا زاتي فترتا من الكتابة…
المهم لو في نقطة نسيتها في الخلاصة برضو بتكون موجودة داخل الرواية
واهم حاجة رايكم في الرواية بكل شفافية…
#مع_مودتي _عدووووول
حومي في خاطر حبيبك… كوني في زحمة ظروفو
شعري من بهجة عيونك… من حنانك ضي حروفو
دنيا فيها الريدة قسمة ...وكل زول كايس وليفو
ريدي مكتوب ف الجبين… بكرة يا ما العين تشوفو
