عزالدين : انا…
نسرين قاطعتو وهي بتعاين في الدبلة : دقيقة يا عزالدين قبل ما تتكلم لازم تعرف انت عايز تقول شنو… ولازم تفكر في الوضع ال نحن فيهو حاليا….
عزالدين : انا خلاص يا نسو…. بقيت ما بعاين لي اي حاجة وشايفك انتي بس قدامي…وانا لا عايز الف عليك ولا اي حاجة… انا بحبك …
نسرين سكتت وسرحت بعيييييييد…
عزالدين : بالجد انا حبيتك…وما بهمني شي في الدنيا غيرك… بس لازم برضو اعرف احساسك شنو تجاهي…ف ما ممكن انا اكون حابيك وانتي شايفاني مجرد صديق لانك ما عايزة توضحي لي انا شنو بالنسبة ليكي…وعلاقتنا دي فهمها شنو…يعني صداقة ولا حب ولا شنو بالضبط…
نسرين جرت نفس طويييييل وقالت ليهو بي صوت هادي : طبعا اكيد ما صداقة… لكن ما عارفة اقول ليك شنو يا عزالدين… دا الكلام ال انا كنت خايفة منو…
عزالدين : وخايفة ل شنو يعني اذا كان انتي برضو بتحبيني؟؟؟…
نسرين : انت ناسي اني مخطوبة ولا شنو ؟؟؟…
عزالدين : اكيد ما ناسي !!!…لكن انتي انسانة عندك قلب وعندك احاسيس ومشاعر عايزة تعيشيها وتحسي بيها مع الشخص الببادلك بيها… ف ما تكوني عايشة متجمدة و تكتمي مشاعرك…
عز الدين سكت شوية وقال ليها : تعرفي يا نسو الحب دا احساس جميل بخلي الواحد يشوف الدنيا بطريقة تانية… بكون دايما مبسوط وعايش في احلام وردية…وبعيش امال واحلام جميلة وبتمنى انو يحققها في الواقع…
نسرين : ومرات برضو الواحد بكون عايش في وهم…
عزالدين : احتمال برضو… لكن بالنسبة لينا ..نحن ناس كبار وعاقلين وبنقدر نفرز الحب من الاعجاب…
عزالدين مسك اصابعيها وقعد يدغدغهم بطريقة رومانسية وقال ليها ب رقاد شديد : انا يا نسو مستحيل افرط فيكي ومستعد اعمل اي حاجة عشانك… بس خليكي جنبي…انسي الدنيا كلها وخلينا نكون مع بعض…
نسرين جرت يدها ومسكت الدبلة وقعدت تحرك فيها وقالت : طيب وبالنسبة ل خطيبي ..افسخ خطوبتي معاهو ولا كيف ؟؟؟…
عزالدين نطا : لا لا كيف تفسخي خطوبتك معاهو !!!!… خليكي عادية يا بت وواصلي معاهو…وما تتغيري من ناحيتو… نحن لسه طلبة وبنقرأ…وانتي اصلا ما ح تتزوجي الا بعد تخلصي جامعتك صاح…
نسرين : اااي…
عزالدين : يلا انتي لو فسختي خطوبتك ممكن ناس بيتكم يسألوكي عن السبب… ف ما ح تقدري تقولي ليهم انا بحب لي طالب… وكدا ممكن يضغطو عليكي عشان ترجعي ليهو او ممكن يتقدم ليكي واحد تاني ويجبروكي توافقي عليهو… لكن هسي انتي بتكوني مجحوزة ومافي زول ح يقرب منك…وكدا نحن ح نكون عايشين بسلام…لحدي ما بعدين نشوف البحصل شنو…ولا انتي رايك شنو ؟؟…
نسرين : بس انا خطيبي دا بقيت ما بطيقو والله يا عزو…
عزالدين : يا ستي انا عاااااارفك ما بتطيقيهو وهو ما شغال بيكي كتير… لكن شنو…هو كدا حاميكي من عيون الناس…وانا هسي ما بقدر اخطبك…ولو فسختي خطوبتك حتكوني قاعدة مكشوفة وكدا ما كويس مع علاقتنا…
نسرين : قلت كدا ؟؟؟…
عزالدين مسك يدها ب حنان وقال ليها ب رقاد شديد : اااي والله…انتي اصبري شوية خليني اظبط اموري وبعد داك بقول ليكي افسخي خطوبتك…. بس نحن هسي لازم نلعبها صح ونكون عارفين انو نحن لي بعض…
نسرين : امممم خلاص خير…
تلفون عزالدين رن….
عزالدين شاف تلفونو ولقاها دي رشا متصلة عليهو…
عزالدين : الووو....
رشا : عزو ..نسو دي معاك ؟؟؟…
عزالدين : بتسألي ل شنو ؟؟؟؟…
رشا : ياخ بتصل عليها ما بترد… لو جنبك اديني ليها عايزة اكلمها عندنا بحث…
عزالدين : ابيييت….
نسرين : دي منو ؟؟…
رشا : اها سامعة صوتها اديني ليها ياخ ما تبقى ثقيل…
عزالدين ادا التلفون لي نسرين وقال ليها : دي رشا قالت عايزاكي…
نسرين شالت التلفون : ااااي يا رشو…
رشا : نسو ..اسمعي تعالي الجامعة هسي ضروري…
نسرين : خلاص جاية…مسافة السكة بس…
نسرين قفلت التلفون ورجعتو لي عزالدين وقالت ليهو : يلا انا راجعة الجامعة….
عزالدين : طيب انا بمشي معاك…
عزالدين ونسرين اتحركو مشو علي الجامعة…
وصلو هناك لقو الشلة قاعدين رشا ونضال وبكري…
طبعا نضال لمن شافت عزالدين ونسرين مع بعض جايين من برا الجامعة… اتضايقت… مع انها كانت حاسة ب انو في بينهم حاجة… لانو مرات نسرين لمن تكون قاعدة جنبها في المحاضرة ... بتكون بتدردش وتتبسم في التلفون و عارفاها انها ما بتدردش مع خطيبها لانو عارفة خطيب نسرين شاب قطيم وما بتونس معاها كتير ... والشي ال خلاها تتأكد انو في حاجة بين عزالدين ونسرين مع انهم ما وضحو…لكن لاحظت لمن عزالدين يجيهم في الجامعة… في نظرات خاطفة وابتسامات بينهم… واليوم اتأكدت من الموضوع لمن شافتهم داخلين مع بعض… ف نضال بالجد زعلت من نسرين وقالت في سرها نسرين دي واحدة انانية…مافي داعي لي حركاتها البتعملها دي… هي واحدة مخطوبة وتاني تفتش للحب ليه ؟؟؟… المفروض كان تديها هي فرصة لانها سنقل…
ف نضال كسرت الحنك وقعدت ساكتة وبقت تتحاشىى النظر لي عزالدين…
المهم عزالدين ونسرين سلمو عاي الشلة وقعدو …
رشا قرصت نسرين و همست ليها : يا بت دا شنو البتعملي فيهو دا ؟؟…
نسرين : في شنو يا رشو ؟؟….
رشا : كترتيها لكن… خلاص لحدي هنا كفاية…انتي ناسية الجامعة وناسية انك مخطوبة ولا شنو ؟؟؟…
نسرين : لا لا ما ناسية… انتي شايفاني غلطتا ؟؟…
رشا : اااي غلطتي… انتي بقيتي تدكي المحاضرات وطوالي ماشة مع عزالدين… هسي لو واحد من اخوانك شافكم او خطيبك شافكم… ح تعملي شنو ؟؟؟؟… يا بت احسن ليكي بطلي حركاتك دي…
نسرين : طيب نحن ما قاعدين نعمل حاجة غلط.. بتونس عادي وفي مكان عام ....
رشا : يا بت ما تبقي عنيدة وراسك ناشف… كدا ح تجيبي لي نفسك المشاكل…
نسرين : خلاص كلمي قريبك دا…
رشا : نسو… انا ما عايزاكي تدخلي في دوامة وبعدين ما تعرفي ح تطلعي منها كيف….
نسرين : اسمعي كدا غيري الموضوع… انتي ناديتيني ل شنو ؟؟؟…
رشا : الدكتور ادانا بحث وقال لازم يتسلم بعد بكرة…
نسرين : خلاص ما مشكلة اكتبو لي معاكم…
رشا : يعني انتي تمشي تتصايعي ونحن نكتب ليك… واا حلاتك….
نسرين : انا ما صحبتك يا رشو ؟؟؟…
رشا : اااي صحبتي ..لكن لو كنتي عيانة ولا عندك عذر ..معليش كان بكتب ليكي… لكن انتي تمشي تحبي ونحن نتعب وندخل المكتبة وانتي مرتاحة ولافة من كفتريا لي شارع النيل حبيبتي انا…
نسرين : ومالك زعلانة…انا ماشة مع زول زول غريب… ما ماشة مع ود خالتك وانتي العرفتينا عليهو !!!…
رشا : خلاص ما تمشي معاهو وانتي جاية الجامعة عشان تقري ما عشان تحبي…
نسرين عاينت لي رشا شديد وقالت ليها : انتي بتغيري علي عزو ؟؟؟…
رشا ارتبكت : عزو ؟؟...ا ا ا انا ؟؟؟… واغير علي ل شنو ؟؟؟… انا بتكلم معاكي عشان مصلحتك انتي…
نسرين : لا لا حبيبتي انا مصلحتي عارفاها… وانتي لو بتغيري علي ودخالتك ..هندا ليهو جنبك كلميهو…
رشا ارتبكت زيادة : خلاص انا تاني ما بسألك…ولا شغلتي بيكي… انتي حرة…
رشا سكتت وما اتكلمت مع نسرين تاني…
عزالدين كان بياخد ويدي في الونسة مع بكري ونضال…
طبعا لقى بكري من نوع الشباب ال بحاول يتكلم عن نفسو كتير قدام البنات وانا وانا… ويعمل مساحة لي نفسو… والبنات طبعا ما بحبو الشاب المتعنظز وبتكلم عن نفسو ويعمل هيلمانة ويكبر كومو براهو … بطلعوهو زول نفاخ ساكت…
اها عزالدين لمن شاف بكري كيسو فاضي… نساهو وبقى يتونس مع نضال…
نضال بت سكيتة وما بتتكلم كتير الا مع رشا ونسرين لكن الاولاد ما بتعرف تتكلم معاهم… وعزالدين كان بسألها وهي بتجاوب ليهو… يعني اسئلة عادية عن الجامعة والحياة العامة وكدا…
يلا لمن نضال كانت بترد لي عزالدين… كانت بتكون مرتبكة وكان بتنظر ليهو نظرة سريعة وتدنقر راسها تحت في الارض…
ف عزالدين عرف انو نضال بت خجولة و لسه نضيفة وما عندها علاقة مع الاولاد ولسة محترمة… وهي بتكون سهلة الحنك… لكن دا ما زمنها… هو لسه عندو فهم مع نسرين ما تماهو…
المهم اخر اليوم الجماعة اتفكفكو وعزالدين ورشا ركبو المواصلات راجعين علي البيت…
رشا : عزو انت اخرك شنو مع نسرين ؟؟…
عزالدين : ليه السؤال دا ؟؟؟…
رشا : صحبتي وعايزة اعرفك عايز بيها شنو انت ؟؟؟...
عزالدين : ولا شي…
رشا : طيب خليها في حالها وما تعشمها بي حاجات انت ما بتقدر عليها…
عزالدين : هي اشتكت ليكي مني ؟؟… ولا قالت ليكي خليني ابعد عنها ؟؟؟…
رشا : لا لا ما قالت لي… لكن بالطريقة دي كدا بتضيع البت يا عزو…
عزالدين : اضيع ليها شنو !!!… والله دي تضيع حلة زيي انا…
رشا : البت مسكينة وما عارفاك انت شماسي وصايع… ولو تابعتك لا ح تلم في جامعة ولا خطوبة…
عزالدين : لا حولااااا… انتي شايفاني زول كعب للدرجة دي يا رشا ؟؟؟….
رشا : اااي…بس ابعد من صحبتي…
عزالدين : طيب انتي وكت شايفاني كدا… ليه عرفتيني بيها من البداية…
رشا : اولا انتي اصريت علي… وتانيا انا كنت عايزاها هي تصدك وتوقفك عند حدك عشان تاني ما تفكر فيها…لانها زولة مخطوبة… لكن ما كنت قايلاها ح تنداح معاك للدرجة دي… ياخ دي حاربتنا عديل وحتى في المحاضرات بقت ما بتنتبه… بتكون ماسكة التلفون وبتدردش معاك…وانت من تقول ليها عايز تقابلها طوالي بتطلع وتسيبنا…
عزالدين : وانتي الحارق بصلك شنو ؟؟؟…
رشا بي نرفزة : ياخ ما تقول لي حارق بصلي ولا زيتي…بس قلت ليك ابعد منها….
عزالدين : ابيييييت…كيتا ليكي بس…
رشا بي غيظ : خلاص قابلها بعيد مننا وما تجي تقابلها في جامعتنا….
عزالدين ختا يدو في يد رشا و عاين ليها شدييييد وقال ليها : كدا عايني لي في عيوني…
رشا زحت يدها منو وقال ليهو بي نرفزة : ما بعاين ليك ولا اي حاجة ..وما تلمسني تاني…
عزالدين : اسمعي حنكك دا ما بقسم معاي… لو عندك حنك تاتي قوليهو…
رشا : خلاص لحدي هنا كفاية وما عايزة معاك كلام…
عزالدين باستغراب : مالك يا بت اتقلبنتي علي… ما كنا كويسين الجد شنو يعني ؟؟؟….
رشا وهي محنبكة : خلاص قلت ليك ما عايزة معاك كلام….
عزالدين استغرب في رشا ليه بتتصرف معاهو بالشكل دا… مع انها ارل ما رفضت فكرة انو يحب ضحبتها واتحدتو… لكن لمن الكلام دا خصل…رشا اتغيرت منو وبقت تعاملو بي عصبية…
####
في مكان تاتي…
مجاهد طبعا الشغلة عجبو وكل شوية يكتب لي نسيبة مسألة ويقول ليها حلي وهو عارف انها مخها تخين وما بتخلها… بس هو بكون قاصد يقرصها فيها نظام بعاتبها ويصححها…
…
..
.
يتبع
