بمن اقتدى معذبي

جزء بلا عنوان 5

زينب :

بعد الاحتلال ..كل شي تغير بحياتنا ...اهلي اللي جانوا بفقر زاد الخير عليهم...ثائر اخوي كبل صار ضابط وشد رتبة لان متضررين وعدنا مسجون سياسي وابويه ايده تعوقت بزمن البعث والحقيقة ما كان هو لا سياسي ولا شي بس عمتي الله لا ينطيها قدمت بي شكوى وسجنته وتعذب وهي انهزمت ويه حبيبها ...طلع من حلك الموت وبدل ما يتعض ويتوب عن تعذيب الاضعف منه صب كل غضبه عليه ..اني بنته الوحيدة شبيهة عمتي بالشكل وذكراها بيه جنت مقابيله ودفعت ثمن ذنب ما اقترفته ...تسلطوا عليه وجاروا بظلم على امراه لا حول ولا قوة ...شخصيتي انكسرت ونفسيتي انعدمت واحس روحي على شفى الموت يفصل بيني وبينه ضربه ....

مرت ايام وسنين وانتقلنا جار لبيت خالتي ام حيدر ..هنا تغيرت الحياة وعرفت اكو عيشة واكو حب واكو احاسيس والدنيا بيها غير التعذيب اللي كنت اشوفه بايديهم ...

اول مره رحت لبيت ام يحيى يم ندى كنت مستحية واتختل وره امي ...كانوا مسوين شي بسيط مجلس صغير ونفس ملاية بيت خالتي جايبين...ندى صار شهر تحظر بالصواني والشموع فلوس المجلس من خالها اللي فهمته...هالسنة اول سنه الها تسوي ...

دخلت لكيتها كاعده يم الدرج تبجي ما ضال الها مكان بالهول هي وزينب بنت عمها...تعرفت عليها وكعدت وياهن ومره نباوع عالمجلس مره نقدم للناس ماي وجاي وهم مسوين دولمة وكبه ومناقيش ولحم بعجين بصحون للمجلس وزعناهم ودخلنا للمجلس وشاركنا بالعزاء ...حسيت بروحانية المكان وصدق العزاء مو مثل كل مره نلتهي بالثكل والمباهاة وننسى الاساس بالعقائد

مر اليوم وطلعنا من بيتهم ..التقينا بيحيى يم الباب ...شاب كلش خلوق وحباب وبكل مره يسلم عليه باسلوب حلو ..وياه خال ندى عرفته بلا ما احد يكلي عنه لان يشبه ندى نسخه رجالية وطبعه ما يقل رقي عن صاحبه

دخلنا لبيتنا عامر كاعد ونافخ روحه اول ما شافني رزلني بلا ادنى سبب ...دخلت لداخل البيت واني اتصفن بعيشة ندى وعيشتي اهلها فقرة بس عدهم اخلاق وكلامهم عبالك شهد شافي ...ابوها معوق بس بي حنية الدنيا وقلبه يوسع لكل البشر ...يمكن الحسد موجود واني بهاي اللحظه بدون شعور مني حسدت المسكينة ...ثاني يوم داومنا لكيتها تبجي على ابوها مريض واكع بالفراش ..كلش انقهرت عليها...حارت بي ...بيوم الرابع من محرم اندكت الباب من الصبح ..اخواني ماكو طالعين لدوامهم ..فتحتها وصرت خلفها...ندى ويحيى يوزعون ثواب 

دخلت بوستني وانطتني جدر هريسة ...انتظروني افرغه وارجعه الهم ...
كل ما ارفع عيني تجي بعينه...هو يلتفت واني ادنك واستحي من نفسي ..

فاتت ايام محرم ما شفته بعد بس كلام ندى عنه كدامي يخليني انجن بي كل يوم يجيبون النا ثواب لان هي ناذرة هيج ..يحيى شاب متدين وشكله حلو واخلاقه كلش عالية ويدرس بالكلية اي بنية راح تحبه لو كانت بمكاني...كنت اظن بس اني حاسه بشي ولا اجا ببالي هو مثلي ...❤❤