بمن اقتدى معذبي

10

ندى:
رجعنا من الامام كل وحدة ذابه حمولها وشاكية همها ومخلصة دمعاتها....حسيت بطلعتي من الامام براحة عجيبة وكأن اني عندي ثقة اقوى بربي وبعدها بنفسي بان حياتي تستمر ..عمي بعده طيب وجدي وخوالي ..ربنا ما يكطع لازم يحن احد عليه ...

وصلنا السيارة اخر اثنين اني وزينب ...من بعيد شفت حيدر يجادل امه بحدة ومعصب يحجي على تاخيرنا عمتي ام يحيى وامه سبقونا واحنا بقينا جوه هواي ...وصلنا يمهم خزرني الي دون الكل ..ادري منو مصخم وجهك وكال الك وصلنا هيج تضوج من الانتظار ...

صعدنا بالسيارة وهو صعد بمكانه التفت لامه
-نروح مطعم

ام يحيى:لا يمه شلنا بالمطعم نريد نرد لاهالينا
حيدر:خاله من رخصتج اني مدا اسالكم اني دا انطيكم خبر ...فر مرايته عليه ...كانت حواجبه معقودة وضايج طالعة روحه ...اني ما باوعت اله اصلا هذا كل عقله ...

وصلنا لمطعم راقي كلش كان جديد مفتوح ونزلنا ...اختار مكان هادئ بعيد عن الناس كعدوا الكبار واني بعدهم كعدت وهو اجا كعد يمي ...احس روحي اختبصت كل ما يقترب مدري شحس حتى بلاعيمي تكوم توجعني ...اكذب بروحي وكذبتي ما تعبر حتى على نفسي ..اني اكرهه بعدني؟؟؟ بالفتره الاخيرة مواقفه ويانه ومساعدته خلتني المس بي جانب انساني ولو هو مو ظاهر بس موجود ....

طلب هو للكل باستشارتهم الا اني طلب الي مثله سكتت ما علقت وامه ميته فرح وتضحك تباوعلنا وزينب الفطيرة تغمز وتأشر الي كل عقلهم يبوو حتى مو راهمة بيناتنا هو مثل الغول اني ارتبط بواحد مثله مستحيل يصير اللي كاعد يخططون اله لازم اخلي حد وبعد خلص ابتعد عنه ما بيه حوبة جديدة حوبة يحيى بعدها وراي ما امله لان ماكو امل...قطع تفكيري الصحون وهي تنحط عالطاولة..

قدم كدامي صحني وبلهجة امر
-يلا اكلي 

باوعت لعمة ام يحيى مستحية منها اكيد تنقهر شفتها اصلا مو يمنا ملتهيات يحجن وياكلن ...
كرر كلامه وامره

-تره دا اكول ...
ابتسم ونصى صوته هامس الي
-اشتريهن بعمري
-شنو؟؟كلتها بتطلع بوجهه
-هالعيون ونظراتهن وهالصفنة بوجهي ..خجلني وصديت عنه ..ما متعودة هيج اني ومن منو من حيدر لا اكيد يضحك عليه مستحيل حيدر المتعالي المستفز اللي طول عمرنا اني وياه عداوة يحجي وياي بلطف

شويه وكملنا الاكل وطلعنا والطريق كله لو يشغل اغنية محلاها العيون ..لفؤاد سالم حفظتها بوقتها كثر ما شغلها النا ..الثولة تعرف هالاغنية الها بس اني غلست كلش...

وصلنا لبيتنا وطلع لاهله...زينب تبقى عند اهلها خطيه كلش منزعجة واشتكت هواي الي من خالاتي ومن جدة صبحة ...ليش هيج وياها اني اروح يمهم واحجي ويه جدتي ...وشبيه خالو وياها هاي فوك ما كتل نفسه عليها وخسر صاحبه لاجل يحصلها يعاملها بهيج اسلوب ..هم اشوف شبي وياها وليش هيج يتصرف ....