بمن اقتدى معذبي

تطوع 🖤

احبابي متابعيني 😘😘
اشكر اللي سالوني منكم على صحة عمي ...الحمد لله اليوم تحسن واضح بحالته ....

ندى:
كبرت همومي وكبرت وياهن ..لا عاد يطيب الي عيشة ولا الي واهس بشي ...حيدر ملاحكني باقل خطوة ما اكدر بعد اخلص روحي منه ....

كروري كاعد يلعب وحاطته وصافنة عليه ...دموعي تنزل وامسحهم واني اسمع عمي وزوجته يتعاركون ويه عمران لان تعارك ويه هذاك ..

طلعت اخلصه من كلامهم ...
-عمو باجر عود اني اروح لبيت جدي
-انجبي انت وفوتي بغرفتج واذا طلعتي بعد لو وصلتي بيتهم اكسر رجلج وابنج تنطيه لابوه وتخلصينا مو تالي العمر انزل راسي من وراج فضحتينا لا اول ولا اخر ووحده تتطلك ..يريد ابنه ياخذه وكافي فضايح لهنا

-عمي ما اكدر انطيه ربي يوفقك لا تنطيه مجال ياخذه اموت والله ما اكدر
-اسكتي دا اكول ..وانت كوم لغرفتك وباجر تروح لخوالك لا يسويلنا مصيبة هذا السافل ساعة السودة اللي ورطنا روحنا بهيج زواجه

عمران:بويه اني مو صغير ولا حرمه واتختل منه والجاهل امه احق بي منه نسينا ضربه الها لو بوقتها ومخلينا نسوي تقارير طبية ومحكمه جان موقفنا هسه غير ..لو خلفتها اللي جان ما رايدها وهي كالت سقطني اول طفل كافي سكوت

ندى:ما انطيه ابني
ابو يحيى:باوعي ندى احنا مو حمل هالمشاكل وهذا مخبل واذا ما انطيتيه ابنه راح يضل ورانا
-عمو!!!

-لا عمج ولا اعرفج اذا ما تسمعين كلمتي وتاخذين بيها ..بنتي هذا مجنون لا راح يخليج تروحين لغير مكان بابنج ولا يخليج مرتاحة هنا وهو عندج ...انطيه اله وهو اول وتالي ابنج وغصب عنه تشوفيه

-ما اكدر ..كلتها بضعف واني اتمنى اخذه وانهزم من الدنيا كلها ..حضنته على صدري بقوة متمسكة بي

بعد ساعة صارت هوسه بره وعرفته اجا ياخذ الولد..صوته فوك اصواتهم كلهم يعيط عليهم ويكوا عندي امر محكمة ويهدد بينا ...

بوست كرار هوايه ورضعته رضعه جبيرة غيرت ملابسه وطلعته لعمتي ام يحيى تنطيه الهم ...رجعت طبكت بابي وكعدت عالكاع حضني بارد ودمعتي ابرد من براكين الحقد اللي هاجت بيه ...

ايام ما طلعت من الغرفة وكمشني مرض قوي على ابني والفطام ومصاعبه وضعفي كل شويه اريد اروح اتوسلهم ينطوني ابني واسكت واكعد اصبر روحي لان اعرف غايته

..كمت اتخيله لو احلم بي يبجي يدورني واكوم اطلع ادوره بالبيت مثل المخبلة ....بالاخير اوكع مغشية من البجي ...عمران بهاي الفترة ما تركني ابد ...بعد الازمة كلها نشف صدري وحليبي جف ورجعت شويه طبيعية ...

هالمره قويت نفسي لخاطر نفسي ولخاطر عمي واهل بيته اللي تعبوا هواي بيه عمتي ام يحيى تجي بالاكل ليمي وما اكدر ابلع لكمة وابني بعيد وتضل تحاجيني وتصبرني الا اكل ...عمران كل شويه جايب الي شي احبه ويضل يلح الا اكل منه لو اخ من امي وابوي ما يساندني مثل ما سندني هو وكان مو راضي اتنازل بسهولة عن ابني بس سكت من شافني اني اختاريت السكوت