بمن اقتدى معذبي

مستفز😒

بالسنة اللي توفت امي بيها كنت على وشك الانهيار ماتت مقابيل البيت وكدام عيوني شفت دمها لما سال بعد الحادث وشفت انهيار ابوي ولمة الناس كل شي مثل الحلم صار ..كنا اني وياه لاحكيهانتبعها دنروح لبيت جدي ..استعجلتنا وتاخرنا احنا لحظات عنها طلعت قبلنا للشارع ...صوت الناس والسيارة بلحظة الخادث وكل شي شلون ارتفعت عن الارض وسقطتها المميته كله بعيوني صار ...

ما كدرت انساها ولا انسى منظرها ...ايديه تخضبت بدمها وبابا اشوفه مثل اللي وكعت عليه صاقعة ما يعرف شيسوي ..ماتت امي بلحظتها حتى ما لحكت اشبع منها وابوي اكثر مني ...

مرت ذيج الايام بصعوبة ما اكدر حتى اطلع للشارع كنت بعدني طفلة ومحتاجه امي حيل انكسرت وغابت عني الحياة ويه غيابها ..الحمد لله كان الي اب يساوي دنيا ويسد مكان الشمس وبيت عمي كانوا اهل حقيقيين زينب وعمه ام يحيى احتووني وهواي داروني ..

يعد ايام من وكعتي ذيج بوفاة امي طلعت للشارع برفقة عمه ام يحيى بعد اصرار منها تاخذني للسوك اشتري ملابس مدرسية ..طلعنا وهناك شفتهم دينزلون اغراضهم براس الفرع ...عائلة جدد يحيى من اول يوم ذب الميانة ويه ولدهم بعمره واكبر واصغر ..ينزل اغراضهم ويسولفون وضحكهم تارس الشارع ...وكفت عمتي سلمت عليهم وسالتهم عن امهم وهمه منين ورحبت بيهم وطلعت الحجية وكانت اول مره اشوفها ..مره حلوة وجهها حلو وكلامها احلى ..مره واولادها بس اسمها ام حيدر وعدها من الاولاد سته زوجها ما موجود مدري ارملة مدري وين رايح المهم هاي عائلتهم والفقر باين على اغراضهم وعلى هيئتهم ..اني كنت لابسة كلادة امي الذهب الناعمه سلسلة وبيها قران صغير ولابسه ثوب احمر بلا اكمام ..التفتت الي المره وملامحها دلت على انبهارها

-اللهم صلي على محمد وال محمد محروسة من عين البشر يمه شلون بنية هاي حليوة هاي بنتج داده
-لا بنت حمايه يتيمة ام وحاسبتها بنتي 

-ربي يبارك بيج ويبارك الج بيها عين النبي تحرسها لبسوها خرزة بلون عينها من الحسد دادة
-ههه يا مو عاد لهالدرجة

-هاي تصير كمر من تكبر

ابتسمت وهي مستمرة تحاجي عمتي عني...مشينا بعد ما اخذنا فاصل تعريفي عنهم وتداولن اسماء الجوارين والقابهم  وبعض الاخبار والاحداث والتفاصيل

...

وصلنا للسوك وكصت عمتي الي قماش ثوب ابيض بي نقشه خضرة ناعمه كان نوعه يسمونه كريشه وهاي اول مره يجينا قماش غير الكودري والكشمير بعد ايام الحصار القاسية ...فرحت بذاك الثوب كلش وخيطته الي ثوب يسموه ابو بلوز هههه عود نفنوف بدلة مدري شتسموه بس خياطات قبل يسمونه ابو بلوز ...ولشترت الي قماش صداري جان نوعه ثخين وحلو مو من الكبس اللي كل سنه نشتريه ...كان بابا موصيها تاخذلي احلى ما موجود وناطيها فلوس تكفي مشتراهن