بمن اقتدى معذبي

خیبات

صباحكم عافية يا رب متابعيني😘😘

اشكر كل من ساهم بالدعاء الي ولعائلتي ..الحمد لله ازمة وتعدي المهم نبقى بخير ..بس سالفة قاهرتني الشم راح واني كله ولا اشم ورداتي😪😪 الحمد لله على كل حال ..عافيتي احسن اليوم وكدرت اكمل اللي صار ايام احاول اكتبه 🥰

اشكر سؤالكم عليه  وتفقدكم الي ...اخوات واعز من روحي فديتكم😘😘قراءة ممتعة ولا تنسون نجومتي⭐⭐

بمن اقتدى معذبي

¥¥خيبات ¥¥ rororose2 

ندى:

رجعت من بغداد بخيبة كلش قوية بعد الاسقاط كل مرأة تمر بفترة كأبه هاي اذا كان اسقاط بدون مسببات وطبيعي فما بالكم المثل حالتي...روحي تريد اغادرني احسها والدمعة حقيرة صارت وياي كل شوي فاضحتني ...

وصلنا للديرة ردت احجي وياه بهدوء لان اعرفه واعرف اطباعه واعرف تورطت اني بي ووياه
-حيدر وديني لبيت عمي ابو يحيى تعبانه حيل وما بيه بعد اترجاك فدوة اروحلك تعبانه

-حبيبتي اني اخدمج واشيلج بعيوني ...كرص خدي وكمل كلامه ..شوفي شلون ذبلانه اريد ارجعهم للخدود...ادللج دلال والله شتردين اسويلج بس طيعيني نداوي ...دراستج ترجعين الها بعد شتريد حبيبتي ؟؟قدمت الج كلية تربية
بقيت فاتحة عيوني بوجهه مستحيل هالبشر يكون صاحي

-اريد اروح لبيت عمي
-شعندج يا عنري بيت عمج تعبانين وعمج ما بي يكفل ويه عياله احد تره محله كاعد ونسيبه دا يتصدق عليه
-كافي تعيرني بفقر اهلي وعازتهم ..كانوا بيوم ميسورين وحالهم حال بس الوكت هيج سوه خاف ربك لا توكع وكعتهم والزم لسانك عنهم 

-تدعين عليه ندى
-تعرفني وتعرف اخلاقي انت ما ادعي على عدوي ادعي عليك؟؟بس انت كاضيها وياي تجريح واذا عمامي ما يكدرون على عيشتي لا تنسى جدي الحجي ابو ابراهيم واكدر التجأ اله خلي النفوس طيبة واذب ذنبك بغير مكانات واطلع الك اعذار واكول ما متقصد ...تره واضح انت ما تريد خلفتي وخايف يطلعون مثل ابوي ؟؟

بقى فاتح عيونه معصب
-شوفيني زين واسمعيني ترجية وشيليها من اذنج تروحين لاي مكان ...لا جرحتج ولا قصدت شي من اللي تكولينه هذا ولا منتقص من عيشة عمج بس فعلا ما يكدر رجال تعبان وكبر على مشاكلج واصلا المشاكل انت دا تختاريها...ما سويت الج شي اني ..خلينا عايشين حياتنا ومشي الامور لو نوكف عند هالمواضيع للتافهة ونخرب سعادتنا...
-اي سعادة تحجي عنها وانت تريد تحرمني من ابسط حقوقي بكوني ام ..الاطفال والخلفة عندك تفاهة لعد ليش تزوجت .. السعادة بنظرك شنو هي ...انت تره دتأذيني بكل يوم اكثر من القبله
-راح نروح لبيتنا !!
-اروح لبيت عمي!!

سكت ما جاوبني واخذني غصب للبيت ...عمتي لكيتها يمنا والظاهر مخبرها بان اني سقطت وهي مقهورة كلش وتشتغل وتحجي علينا شلون ما كلنا الها عالحمل ...اباوع اله بحقد ما اله حد صرت ..وهو كضاها سكوت تام وعيونه بعيوني ...يدخن وضايج واني اكثر محتركه بعد ..كارهة هالتسلط والاستبداد برأيه والاعتزاز والاصرار عالغلط...