بمن اقتدى معذبي

خيارات صعبة

ندى:

اندكت الباب الدنيا جانت ليل ..حيدر طلع ورجع صاح الي خالي هاشم بره جاي يشوفني ...طلعت اله مفوته بالاستقبال بعد السلام والترحيب ...كعدت يمه ساكت وبيده ورقه ..شكله ما يطمن ابد...باوعت لحيدر مستغرب سكوته وجيته بهيج وقت

-خالو صاير وياك شي انطاني الورقة وسكت ..فتحتها تبليغ محكمة لجلسة طلاق
-زينب رفعت الدعوى

-مو هذا اللي ردته انت
-هذا اللي رادته الحياة مو اختيارنا ...ندى من رخصتك ابو كرار اريد ابقى يمك لباجر للصبح واطلع
جاوبه حيدر بعتب

-افاا عليك تستاذني البيت بيتك واحنا خطارك ..كومي نداوي حضري النا لكمه ناكلها سويه ..خالج بعده بهدوم الشغل طلعي اله دشداشة يريح
ندى:من عيوني هسه كايمه

هاشم:تعاي... اكل ما اريد بس اي جيبي الي هدمه اريد اغسل ..جدج طردني من البيت
-يااا شصاير خالو شبيك والله اني ما تطمنت اول ما شفتك ودخلتك علينا بهالوقت
-ما صار شي مثل ما كنت متوقع جدتج انهارت من عرفت بامر المحكمه وجدج كملها وكال الها عالتبني انهارت بجي ودك ولطم ..يبوو ويبوو عزاا عدهم من غير ميت ..طفل شذنبه هذا وهيج يتخبلون منه شلون لو باجر اريد اجيبه ..وهاي من ملحتهم انرفض طلبي بالتبني لان ما مستوفي شروطه

حيدر:تره اهلك هم حقهم تجيب طفل من الشارع وتنسبه لنسبهم ... اي ناس ما ترضى وخاصة ابوك رجال معروف كلش واله سمعته ومكانته وهم فوك هاي تطلك زوجتك وتريدهم ساكتين اصلا زين بس طردك..وهذا الطفل يبقى مو ابنك لو شتسوي تره وحتى بالشرع حرام تسجله باسمك وباجر لو صارت عندك بنات يحلون عليه

ندى:بالله هوطفل شنو ذنبه
باوعت اله خزرته وخالي سكت ما جاوبه اصلا ..سكتناه اثنينا
ندى:هسه شنو شراح تسوي

-رايح لبغداد وراح ابقى هناك فترة بين ما يتقبلون الموضوع وهم احاول احصل موافقات للتبني الموضوع تعقد من عرفوا زوجتي رافعة دعوى طلاق وتعرقلت الامور.. جدج يكلي ما تفرضه علينا واني ما اريد افرضه اريدهم يتقبلوه واصلا التبني ما راح يتم رسميا اذا مو بموافقتهم

حيدر:ما راح يتقبلوه تره للعلم...وبعدين زينب ما عدها خبر بهالموضوع؟؟
هاشم:لا ما عدها خبر كنت ناوي افاتحها بي شنو ذنبه الطفل واني راغب بي حيل اريده ابني..
حيدر:ذنبه برقبة اللي ما خافت الله على ليلة يعيش هالطفل تعيس بالف ليلة ...اكو دور ايتام حطه بيهن وزينب اذا ما عدها علم شلون تنسب طفل لزواجكم

هاشم:والله انت بطران هي شلونها دور الايتام انت عبالك ما مشينا وين ما توديه مقفليها ..تالي احتفظنا بي ...وما اكدر من يوم لكيناه واني ميت واحتيت ولو اعرف شسوي لازم يصير ابني...يعني دولة القانون بيها ظالم يمنع حق التبني ويصعبه ..ما خليت شي ما سويته ويرفضون طلبي الولد صار الي اشهر من اخذته علمته عليه ويصيح الي بابا وهمه لساهم باجراءات غبية