بمن اقتدى معذبي

تكملة ...

ندى:
بمرض خالي هاشم ما كدرت بعد اتركهم وارجع وخاصة بعد ما صار لجته بزينب هو يشوفها لو يطردها لو يسبها لو ياذيها بالكلام ..كدام الكل كان نافرها وخاصة بالايام اللي تلت من محرم خلاها ايام ما تعرف وين تروح ..يطردها وجدي وجدتي ما يخلوها تطلع ...اخذتهم خالتي اشواق وياها لبيت سيد معروف رادته يرقيهم هو اصلا على ما فهمت اقارب زينب من امها واقارب زوج خالتي من بعيد ...

بيومها راحوا ورجعوا متيقنين من خالي مسحور ومو بس مره سوالف سگوة (سحر مشروب) ومسويلهم فراق وصد واشكال سوالف حجتهن خالتي
..جدتي اندارت الي وهاا مو كلت الج تسوي سحورة اباوع لزينب وجهها مثل النومية صار من صفاره وفشلتها تباوع للوجوه وخالتي ابتسام كامت تريد تضربها من نصنا وتشهد زوجة خالي عليها على اساس شايفاتها تسوي سحر 

وكفت بينهم وبينها ما خليت احد يقرب ...جدي كان حاضر هم ما قبل كلامهن وسكتهن بس مشكلته ابد ما يؤمن بالسحر وحتى اندار على خالتي اشواق رزلها ...سكتنا كلنا بعد ما عصب هو وكام يصيح ...اني جريت زينب اللي انتهت من البجي بنصهم واخذتها بغرفة 

-ولج ندى اريد اروح لاهلي عفيه ..شلون كولي لخالج يوصلني ما الي كعدة بعد هنا
-زينب وين تردين وخالي تعوفيه واهلج شتكولين الهم تريدين التهم كلها تثبت عليج
-شسويله كله منه الصار بيه ....تعبت عمار وضربه ارحم والله ولج يتهموني بالسحر ندى باجر يتهموني باقوى ما ابقى ما اكدر عليش اتحمل؟؟

-معليج بالحجي ...
دا اسولف وياها دخل خالي هاشم علينا بعد ما رجعوا كان شويه متحسن وعبالك واعي اكثر ..بالايام اللي فاتت حتى عيونه غارت براسه وكام ما يوكف اي شي ببطنه 

-زينب ابقي هنا لا تروحين اني انام بالديوانية وين ما تردين بس لا ترجعين لاهلج ..زينب تعبان ...كعد عالجودليات بالكاع واحنا كعدنا مقابيله بالطرف المقابل ..اباوع اله يلوب عبالك واحد بالع ببطنه نار ..تمدد ورجع كعد ..
-راح اموت اخ بويه 

كامت زينب اله مقهورة كابلته ما تكدر تتقرب بس تتقرب يتخربط اكثر ..تخلي مسافة وهو حتى بوجهها ما يكدر يباوع ...
-اسويلك اكل هاشم باوع الي شبيك ..شتريد مني اسوي اسوي
ضم راسه ابد ما يباوع الها ...كان حالته ابد مو طبيعية بس جدي رفض بعد يودوه لاي مكان غير المستشفيات ...ايام هو راقد وجدتي وخالاتي مستمرات بتهمة زينب واللي تأجج هالنار زوجة خالي ابراهيم ..عبالك تطلب زينب ثار تكولون كاتله اهلها ...

بهاي الفترة اضطريت ارجع عندي سادس اني والتهيت وياهم ..تركتهم ورجعت لبيت عمي اكمل امتحانات نصف السنة

بالصدفة اجتي ام حيدر وضلت تسالني عن خالي ومرضه واني اجاوب ...عرفت جدي معارض شغلة السحر وضلت تلح عليه بالاسئلة ..راحت واني اعرف ام حيدر ما تعوف السالفة لان زينب بيها والتهمة عليها ...ام زينب عكس خالتها وبدال ما توكف لبنتها كالت الها لا تجيني ولا اشوفج بقى عليج بس السحورة ما سويتيها بيومها شكد حقدت عليها من سمعت ردها على بنتها ..اول مره اشوف ام بهيج صورة