زينب:
كاعدة بالحديقة ارش الزرع بعد ما كملت غسل الطرامي والسيارة مالت الحجي ...دخلت للمطبخ اطفي عالجدورة عالنار ..الحجية كاعدة بالكاع وتلكط بالخضرة وتحضرها للغدا ...حاجيتها
-عمه اني صاعدة اتسبح شويه وابدل ملابسي وانزل نصب الغدا يمكن هاشم ما يرجع بعد هاي فاتت ساعه ١٢ وهو ما بين بعده احتمال عنده شغل بالمحل ...
-روحي يمه الله يرضى عليج تعبتي اليوم اذا علينا لا تنزلين اني اغديه للحجي شكو عدنا ..
-لازم ما تردوني اكل وياكم تردون خلوة ههه ...
شاقيتها وهي ضحكت
-ياا عاب هالحلك منو الكال هيج... بس غير اكولج براحتج وتعبانه مصدكه مجذبة عندي هيج وردة ببيتي ما عرفت قيمتج من اول يا حريمه كضيتها وياج مشاكل يا يمه... الله يشهد من يوم عرفت ذيج الحية وشجانت تخجي عليج واني مصدگتها اغدي ها كدوتني من نفسي فشلانة منج اني...بنيتي اعذريني..
-عمه الله يجازيهن ما نجيب سيرتهن المهم ارتاحينا هسه من كل شي الحمد لله
-وضليمة ابني ومرضه اسكت عنه لا والله تحلم عبيران والله لا يجي يوم اخليها تبوس ايدينا وما نلتفت الها ولا ارحمها ..احرمها بنتها مثل ما حرمتني ويلادي
-عمه خل تولي شلنا غرض بيها اخاف عليج وعلى عمي اخاف تاذيكم
-يمه انت طيبة وتريدين كل الناس مثلج لا اذي ولا اتأذى بس تره الدنيا مو هيج لو غالب لو مغلوب وما تعوفج بحالج هالحية خير شر ...صيري سباعية واوكفي ودافعي عن حياتج وبيتج ورجلج واذا خايفة على اذيتنا فهي اذتنا وخلاص ...
بقينا نسولف شويه وصعدت ..فتت اسبح مأمنه قافلة باب السويت عليه وهو اصلا محد يصعد...افكر بكلام الحجية كله صح اني من دخلت لبيتهم واني كافية خيري شري وما افتح حلكي ابد وياهم شحصلت ماكو غير المهانة وقلة القيمة والاذية ..رجلي حصتي واني استحقها تعبت وياه وتعبت بكل حياتي ولازم ادور راحتي واحصلها وراحتي وياه مال اطاوعه بكلامه اللي كاله الي ابد ولا اسويها مخبلة وارد لعامر وسطوته لا والله اموت وما ارجع...
...طلعت امشي لابسة الداخليات ولافه المنشفة هيج بعبث مو كلش مقفلتها كامشتها بايدي ...دخلت للغرفة لكيته متمدد ..فزيت وضحكت وهو هم ضحك تفاجأت برجعته كل ظني يبقى لحد الليل من شافني تعدل وكعد ..وكفت ابدل كدامه قابل راح استحي خل يتفرج ...
لبست ثوب بيتي بسيط وشعري خليته مفتوح حتى ينشف وحطيت براسي ماشات يكمشوه ..بين ما كاعدة ارتب بروحي بالمرايا شفته وكف ورايه ويجر تنهيدات قويه ..انقهرت على نفسي وعليه ..بالوقت اللي المفروض هاي احلى ايام عمرنا اني وياه كاضيها صفنات وحسرة وحيرة ...كعد وراي عالطبلة مالت المرايا سويتله مكان ونباوع لانعكاس صورتنا بوسني من كتفي بوسه مراضاة ...اني وياه اثنينا شكلنا حلو ومتناسبين بكل شي بس مع الاسف هيج صار ويانا وهاي حياتنا..
أنت تقرأ
بمن اقتدى معذبي
Genç Kız Edebiyatıقصة باللهجة العراقية ....عن العنف الاسري اتحدث عن خيارات خاطئة وافكار تستوجب التصحيح
