بمن اقتدى معذبي

خطوبة وتعارف

ندى:
كملت امتحانات الفصل الثاني وبعدني اتواصل ويه حيدر بس بسكوت وبقلة هم... مرات قليلة والسبب الاول استحي من عمي لا يعرف وهم هو السبب ما اريده يكول ميتة عليه لان من خلال الاتصالات اكتشفت حيدر كلش كلش طبعه متعالي وما يحب يعترف بغلط ... 

ثكيل ورزن بالكلام والكلمة منه كوه واذا ترخصته شويه قبل لا اكمل كلام يسده واذا ما رديت ما يلح ولا يتصل بعد واني ابد ما اتصلت ولا مره وهواي عاتبني على هالشي يكلي ان ما سألنا ما تسألون؟؟ حتى بهاي يستخدم صيغة الجمع حتى لا اتصور هو يسأل عني!!! .... وهم ما يحجي هواي على كد شكم كلمه ومرات كلش قليلة يتصل مشتاق ويتغزل واكثر غزله بعيوني ...اما الرسائل فهاي بحر ثاني كل شعر يخليني فوك الغيم بمخيلتي واحساسي رغم ما سامعتهن مباشر منه ابد هالكلمات ...كل كلامه رسمي ويحجي الي عن تحضيراته للزواج وللعرس والمشتمل المنفصل اللي رتبه بجانب بيت اهله النا ....

قبل عطلة القراية مالت السادس اتصل وكان كلش ضايج لان بعد ما نتشاوف ولو هي من بعيد بس كانت حلوة ..ابتسامات وهمسات بالعيون من بعيد ...حب كان نظيف حيل وحلو وبصراحة كلش عاجبني هيج ما احب القرب اللي مو بمحله واحنا ماكو شي رسمي بيناتنا ....وهم هو ما طولت هواي لان كام يستعجل يريد بعد امتحاناتي مباشرة زواج ....اتصل بالليل كنت متمددة بفراشي وبايدي كتاب الفيزياء اللي كوه مدبرتها وياه اتصل هو واذا ما رديت يبقى يعاتب ويسمعني كلام ويثكل وجهه يكول هو شمسوي بس اريد اسال عنج ..وفعلا هو ما يتجاوز ابد ...

رديت عليه بثكل وهاي دائما وهو جاوبني بثكل اكبر
-شلونج؟؟
-زينه الحمد لله
-دوم يا رب ...

سكت وسكتت وبقينا فترة ورجعنا حجينا اثنينا سويه

-شعندج هسه /شكاعد تسوي

-ههه الگلوب سواجي اثنينا نفس الكلام يمكن نفس التفكير

-اممم اي يمكن 

-باجر اشوفج..
-بعد ما اداوم !!
-راح اشتاق الج

سكتت ما رديت عليه
-الامتحانات يا يوم تبدي
-يووه بعد هواي 

-ندى ادز امي تحجي وننخطب هسه وبعد الامتحانات زواج ؟؟
-مو حجينا بالموضوع
-شحجينا ؟؟اني ما راح اصبر بعد صبرت هواي وهم اوصلج للامتحان بيدي
-اخلص امتحان ..وما عليه شي اندل

-اعرفج تندلين !!واني شراح يصير بيه ؟؟اكولج قابل شتسوين بالدراسة انت راح تصيرين دكتورة ؟؟
-ههه ...ان شاء الله ليش لا؟؟
-ليش تخليني افشر؟؟

-على منو ؟؟
-على اهلي !!هو بعد اكدر افتح حلكي وياج وانت محملة عليه طلعتي
-من ايدك والله ولا تخلينا نرجع للكلام لان كلش انغث من اتذكر تصرفاتك وياي
-مو اعتذرت

-لا بالله هاي شوكت عيني
-اني عينج؟؟اووف وين اوصل واطول ..فداج زوج العيون
-لا تغير الموضوع...ليش هيج قهرتني