بمن اقتدى معذبي

❣الاخير❣

#بمن_اقتدى_معذبي
....الجزء الاخير....
⚘للكاتبةRororose2⚘

العفو منك من اعتذاري اقرب.....
والصفح عن زللي بحلمك انسب...
عذري صريح غير اني مقسم...
لا قلت عذرا غير اني مذنب😕
"صفي الدين الحلي،"

ندى:
غاب ايام وماكو منه خبر .. وبقت يمه اني سويت اللي عليه كله بس الموضوع كان زاعجني كلش...

اتصلت زينب وضلت تسأل وتسولف ما جابت سيرة الامر عرفته ما مسولف بي لحد هسه..ليش شمنتظر وشسويله اكثر ..قهرني !!

طلعت بعد ايام دا اروح للسوك ..تلاكيت وياه بالطريق ..عيونه متعلكات عليه ..ابتسمت بوجهه ومشيت يمه قريب كلت يحاجيني لو راح يوكفني واحتمال يجرني للسيارة مثل ما كان قبل جرئ ...مريت من يمه ..ساكت وبس عينه تتبعني ..صعد بسيارته ومشى ما حاجاني كلش ضجت وانقهرت شو مغلس ؟؟

بعدها اجوي اهله وهو مو وياهم بحجة يشوفون كرار واخذوه ..ما طلعت جنت خجلانة منهم مدري شلون تجرأت بيومها ورحت وهيج صار بيه بنص بيتهم ..ما كان امري سهل ..كل عقلي طار طلعوا رحت الم الاستكانات وصواني الضيافة بملل ..عمتي ام يحيى ساكتة وكاعدة تخيط بايدها مندر القنفة ...عمران كاعد يمها ويباوع الي بعصبية صار فترة ما نحجي اني وياه زعلان وعايفته براحته يزعل وبالاخير لازم يفهم موقفي ..مو بالسهل نتحكم بالمشاعر واني ما اكن اله غير مشاعر الاخوة وهو بعد خطب يعني حتى عيب يخاصمني ..بس اليوم نظرته كانت اكثر غضب اربكني؟؟..عمي ما مهتم مشغل تلفزيون مطلع اخبار ويتفرج ..

كملت شغلي واجيت افوت بغرفتي صاح عمي عليه ...رحت يمهم ...حاجاني بملل
-هذا حيدر داز اهله يريد يرجعج واني رديت عنج بالرفض

انعكد لساني ووجهي برد حسيت روحي راح اوكع من القهر طلعت مني كلمة كوه بصوت مرتجف
-ليش؟؟

-لان راح نرجع معناها للخطوة الاولى وبداية الغلط من جديد وانه ما مستعد ابد بعد احير بمشاكل
-لا تحير!!

كلتها بقهر من كلامه فعلا الخذلان مر وخاصة لما تحس اهلك مستثقلينك ..وهو فهم حزني؟؟
-ندى مو قصدي هيج ..بس هذا واحد شايف نفسه باجر عكبه يتفرعن اكثر وهم يرجع لاذيتج واني ما اكدر ارده دا يصعد نجمهم وهسه اخوانه هم كلهم صاروا بعد منو يكدر يحجي وياهم لو يحقهم لو رادوا يأذون بويه احنا مو مثلهم ناس على كد حالنا والحمد لله ما نريد غير الستر والعافية
-ما ياذيني ؟؟

عصب وكال بلهجة امر
-وانه كلت ماكو رجوع وخلصنا بعد
-عمو من رخصتك رايحه لبيت جدي
كلتها ومشيت اشهك النفس بصعوبة ما ردت اتواجه ولا احجي وياه ويعاند اكثر ..جدي يحل مشاكلي ...

صاحني بعدم رضا وكفني
-تعاي هنا ...يعني هسه انت مقتنعة .. تريدين ترجعين

-ابو ابني والرجال مريض ومحتاجني ما ردت ترده بهيج وضع
-كرامتج راحت وهانج وخلانا نندم على تزويجج اله وهسه تكولين ابو ابني ورجال مريض ..عساه وبعد اكثر