بمن اقتدى معذبي

فاجعة

زينب:
الصبح قبل لا يطلع هاشم لشغله اتصلت امي تبجي ..انخذلت بصوت بجيها وبس اريد افهم شصاير بيهم ...اسمع صوت خالتي ام حيدر تنعى ولدها كلبي انخمط شكد حاولنا نقنعهم ما يروحون صمموا يطلعون ويه الحشد يدورون اخوهم المفقود واللي كلنا متيقنين استشهاده ...
-يمه شصاير ...والله ما بيه بعد هبطات يمه ولد خالتي بيهم شي لكوه لحسنين
-ولج يمه يا ريت لو لاكين واحد الثاني بين الحياة والموت ..يمه حيدرة طاك عليهم هاون بنصهم ومتصوب وهسه طالعين يجيبونه مناك ولج يا يمه يا حيدرة ريت الموت الي ولامك ولا بيك يمه وليدات اخيتي راح يخلصون ..

بجت وبجيت وياها وكالت تعالي خالتج محتاجة احد يمها واني علاقتي بيها كلش قريبة وتعتبرني بنتها وكلتها سابقا هي فعلا كانت ام الي بهواي مواقف امي ابتعدت عني بيها...سديته وطرت اني ودمعاتي لهاشم ابجي على حيدر

-هاشم فدوة وديني لخالتي ابقى يمها
-اي بدلي وبدلي لاحمد واخذكم لهناك محمد بقي هنا يمي

-لا ليش وين يبقى هنا احتمال نبات هناك عند اهلنا
-اي المغرب من اعزل عود نجي يم بيت عمي ابو يحيى يم ندى نبقى

-هاشم تره ما عليه شي ويايه تره اني امه
-حبيبتي اخاف عالطفل احد يضوجه بكلمة
-واني وين رحت

-حبيبتي زنوب ليش ضايجة هيج ما حجينا شي
-كلامك يضوج تره... وعبالك اني مفرقة بين اولادي لو راح انطي مجال لاحد يتجاوز علينا واسكت
مسح وجهه بعصبية

-خلص اخذيه وياج شنو راح تطلعين قهرتج على ابن خالتج بيه ...شبيج؟؟كفرت خو ما كفرت اريد اجنب اولادي كلام سخيف ما حاجه يسمعوه ويتأثرون بي
-هاي عند اهلك تره مو عند اهلي؟؟

باوع بوجهي بزعل وطلع تارك الغرفة النا اني واولادي ..والله فوك ما اخواته ماكلات راسي وما يحجن حجايه بيها حظ ابد يجي يذب التهايم على اهلي صح امي كانت تحجي بس من ربي انطاني خلفة وشافت راحتي صارت تسكت وابد ما تجيب طاري محمد وتكول مو ابني بالعكس تحبه وتعامله حاله حال جهال عامر واخواني البقية ...انقهرت من هاشم واني منا ضايجة للخبر ...

طلعت لكيته يقفل البيت ويطفي الاضوية ..مر من يمي متجاهلني ضايج واني ما اكدر ابد على زعله كمشت ايده ..اندار عليه ببرود شاف دموعي وحالتي جرني لصدره ..هاشم حنون هواي عليه وعلى الاولاد وابد ما اذاني الا ببداية زواجنا ..

-اسفة حبيبي
-لا تتأسفين ولا ابد حبيبتي مقدر وضعج وانت مقهورة على حيدر

-اي والله كلش والاكثر على خالتي يمه شلون راح تحمل هالضربتين هي حسنين لساها ما ترضى تصدك خبره ..خالتي حنينة حيل وخاصة عليه اكثر من امي قريبة... سودة عليه عليها..بجيت وهو حضن راسي لصدره

-هي هاي الحرب وهاي تبعاتها شراح نحصل غير موت هالشباب كل سنتين ثلاثة ياخذون
-هشومي اني راح اضل يمها ما اكدر ارجع واخليها ابقى يم بيت اهلي شكم يوم