بمن اقتدى معذبي

الفضيحة

بعد طلاقي التزمت عدة طلاقي يم خالي هاشم لان بيتهم قريب للكلية ... بالدوام تساهلو ويايه الاساتذة من ناحية الدوام واروح على يوم الاختبارات فقط ..ساعدوني بهالمسألة كلش كنت البس خمار واخفي كامل شكلي هم لان معتدة وهم اخفي ملامحي اللي كانت متشوهة من ضربه لحد ما صارت مشية الاربعين وهم اجتنا عطلة قضيتها غياب واجازات وبعدها تدبرت امري بمعارف خالي

..بعدي عن المنطقة كلها خلاني احس بمامن لان بعيدة عن حيدر وجنونه ..كنت اتختل واخاف على يوم يطلع الي ...ابني ويايه وهالشي كلش ريحني واخيرا حصلت حريتي بس كانت حرية مشروطة ...

خالي هاشم حار بينا اني وزينب اثنينا دوام وحمودي وكرار لازمهم مكان ..شاف النا مره كبيرة تكعد بيهم ...ببداية الامر كنت مقررة ابقى وياهم ما ارجع وحياتي ترتبت بهالاساس ..زينب كلش حبابة وخالي حنين كلش واني ارتاحيت بهاي الفترة بالذات بس مو بوجود حيدر اني ابقى مرتاحة ...

كان بكل اسبوع مرتين يمر لمحل خالي بحجة يشوف كرار وهو يرده ..كان زعلان منه ومتضايق من فعلته وياي ..طلعت من الموت من جوه ايده ومن عرفوا بهالشي ووصلوا للمستشفى بعد ما دخلت الها فاقدة الوعي ايام ..تعاركوا وبالمستشفى صايرة مراكع بوكسات هالشغلات كلهن نقلتهم الي زينب بعد ما صحيت وتطلقت مباشرة ...جدي ابو ابراهيم متدخل بالسالفة ورايح لاهل حيدر وعمامه وبعد الاحراج والكلام يلا طلقني يعني ما كانت بسهولة

بعدها بدت عدتي تقارب نهايتها انقضت وهي حسب الشرع ضمن مذهبنا كانت مدتها ثلاث حيضات اقل من عدة الارملة ...اجتنا عمتي ام حيدر شافت كرار وجايبه النا مصرفنا وملابس لكرار ..هي وعمتي ام يحيى واللي وصلهم هو وبقى بره لان خلص ما عاد بينا صفة لو صلة ...

راد يحجي وياي اول ما اجوي رفضت نهائي اني بهالفترة حتى موبايل ما عندي بقى يمه وما طالبتهم ابد بي هو اصلا كان ما عندي غير كم رقم ودومه يمه ..شكه دمر حياتنا وخلالي بس الذكريات المره اللي ما اجني بس دمعات من ارجع الهن...

عمتي ام حيدر بقت تتوسل ارجع اله واني كنت ساكتة حتى ما علقت عالموضوع من حقها ام قابل اعترض على اعتزازها بخلفتها...بالاخير جرت الفلوس هواي وحطتهم بايدي واني رجعتهم الها

-ما اريد
-هذا حق ابنج !! وحيدر يكول هي مسؤولة مني ما يقبل واذا رفضتي تره يتخبل عليه ما الي خلك بنيتي اخذيهن

سكتت وحطتهن بحضني فعلا كنت بحاجة لان ما عندي مصدر دخل واستحي اطلب من خالي لاحتياجات كرار خاصة لان طفل ويحتاج مصاريف هوايه..وهو ما يقصر بس يبقى ما مجبور بهلكد مصرف

حاجتني عمتي ام يحيى بقلة خلك
-ندى عمج يكول تخلص العدة وترجع شكد باقي الج شكم شهر..كالتها تقلب بعيونها

تذكرت شرطهم ان ابقى يم عمي مقابل طلاقي من حيدر بحجة كرار ما يصير يكون بعيد عن اهله وابوه وبيت جده وهذا كان شرط حيدر الوحيد بالطلاق وكلهم وافقوه واني اصلا ما كنت بوضع يسمح بالتفكير بس ردت اخلص بس هسه ما اريد ارجع وهنا كلش مرتاحة وادري برجعتي مضرة الي جاوبتها بدون تردد