بمن اقتدى معذبي

13

زينب :
بعد ما رجعتني الحجية كنت كلش متأذية جسمي كله يون عليه من ضرب عامر وابوي الي ..عائلة مرضى نفسيين ما اكدر بعد اعيش وياهم والحل رجوعي يم هاشم عالاقل بايام اللي يكون بيها صاحي يكضيها مهزوم مني حتى ما يشوفني ولا اشوفه وهو مسحور وما عليه العتب العتب عالصاحين ويسعون باذيتي مسعى ...المهم ما اتعرض لتعنيف مثل هذا بعد..

دخلت للغرفة كان هاشم منطرح عالسرير كلش قهرني شكله... عابس وجهه بالم ويون وايديه طابكهن اثنينهن تحت بطنه الله ينتقم من كل وحدة تسعى باذية بشر هيج ...رفع راسه شافني وسكت ورجع راسه عالمخدة ما يحجي وياي سلمت ما يرد ومو غريب عاللي مسوينه فراق وكره وكل سحر يفرقنا زين منو الهيج رايدته والله مستعدة اعوفه الها بس لا تأذيه ..

كام وكف عافلي الغرفة وطلع ...شويه واجتي اخته اشواق وياها احلام الجبيرة هم مالت بجانبنا من شافته هيج تأذى ...كالوا نفتش الغرفة...بقينا بالساعات نغتش ما خلن شي حتى ملابسي الداخلية فتشنها بس ما لكينا اي شي كعدتني اشواق تفهمني شسوي...

-بعد دوشك السرير السيد كال لا تخلون اي شي ...اكو بالغرفة لازم نطلعه وهم نمسحها بخل وهذا الماي نرشه باركانها اليوم ووصاني لازم كل يوم تنمسح لو بالخل لو بمي وملح ..وهاي دزوها كالوا انت تسبحين بيها وقت الغروب ..سورة البقرة عالدوام تشغليها وخاصه وقت الغروب ....ابد لا تتركون القرأن شفاؤكم باذن الله بي... سحركم مدفون بمقبرة وهالشي صعب الا ينفك السحر ...

-والحل يبقى هاشم هيج
-لا يصير زين ان شاء الله لا تفاولين اهم شي هالفترة ترجع عافيته شويه ويوكف لحيله هو اكو اكثر من واحد وواحد بغرفتكم واني شاكه بفراشكم لان ديكول من انام بالغرفة اختنك جنت...زنوبه لازم تصبرين
-زين ليش هو تأثر واني لا

-انت محافظه عالصلاة هو صلاته مكطعه
طمني كلامها شويه واتبعت اللي كالت عليه كله ومثل ما توقعوا فتحن دوشك عرسنا طلع بي لفافة ومن فتحوها تخوف كانت عبارة عن احرف مكتوبة بدم نجس ...بفانيلته مسوينه واسمي واسمه وشغلات اظافر وشعر ومنظر بشع مصوره السيد زوجها وشوفه النا..

بهاي الفترة اول ما رجعت هاشم كلش منتهي ويكضي الليل يتقيأ ويبجي من الم بطنه...عزلناه بغير غرفة وحده وفارغه ما بيها بس فراشه واكله وشربه كله اني اسوي اله ...نبهوا عليه محد غيري يسويه ...فترة وشويه استعدلت حالته واستقرت ....اجتنا ندى وساعدتني هواي بي كانت عدها عطلة نهاية اسبوع ...

التهيت وياها شويه ..دخلنا بغرفتي وكعدت تحجي الي عن حيدر ومغامراتهم واني اضحك عليهم قبل شهر دز ناس يخطبون للمرة الالف وهالمره ندى الها قبول فانطوهم موعد لحد ما تكمل السادس كنت اتمنى نخلصه سويه بس ما رهمت واني ما ينفع بعد ادرس بهيج وضع ...

ندى:حيخبلني هذا ابن خالتج
-شبي شصاير
-ولج طلعت للدوام الصبح يوم الخميس منا عندي امتحان شهري رياضيات وتعرفين شكد اني احبها ..لكيته منتظرني وجايب الي موبايل كل عقله اخذه منه واحاجيه وين صرنا ؟؟