بمن اقتدى معذبي

15

زينب:
من طلعت ندى من البيت حسيت بخوفة وخاصة هاي اخت زوجة ابراهيم كلش حقيرة ولسان ...استغربت وجودها رغم اختها كل شي ما تشكي بس هي بحجة اختي مريضة بقت بالبيت ويانا الحجية ما صدكت كلام ندى عنهن وسدت عيونها مأمنة بس اني ابد ما غفلت وراها ...لان اعرف ندى ونظرتها ومعرفتها بالبشر ومستحيل تواجه احد لو تتهم احد بدون دليل ...

اجت اشواق وسولفت الها الصار ووصتني ادير بالي زين منهن وهي هم صدكت كلام ندى وابتسام من سمعت طاردها ابراهيم تخبلت شلون يطرد بنت اختهن المرحومة من وره مرته واجتي انعام الجبيرة هم انهدت تحجي ..وضلن يحجن براس الحجية والحجية تسمع منهن حيل اصلا هي الحجية كلمه توديها وكلمة تجيبها بس الاهم عدها بناتها واولادها وحتى لو غلطانين تساندهم ...واني ما الومها عالاقل توكف الهم...

حطيت صينية الغدا كدامهن وانعام حجت
-روحي يم رجلج داده احنا مو خطار احنا نسوي اكل انت بس ابقي ويه هاشم...يمه هذيج هي واختها شنو وما ينزلن يشتغلن اشو من يوم اجت هالبنية والكراب كله عليها هالنوب جايه هاي يمها كعدتها شنو ببيتكم
بقيت صافنة على التغيير بتصرفاتهن ..بس الظاهر عارفات شي عن زوجة ابراهيم واكو كلام بينهن ديدور ما يريدني اسمعه ...يتداولنه بينهن بس..

ترخصت وفتت بالغرفة يم هاشم كان متمدد عالفراش وعيونه بالسكف ...مسويه اله عصير خليته يمه صاح بيه اشيله وما الح عليه يشربه لان فعلا اني هواي الح ...انهضمت من صاح بيه ..شلت الكلاص واجيت اطلع وصلت الباب صاح وراي

-زينب جيبي اشرب
جاوبته والغصة واكفه بزردومي
-مو ما تريد
-ولج تعالي اكعدي يمي اني مريض ...رحت يمه حايرة شسويله يستعطفني بمرضه ...جر ايدي خلاها على راسه
-فرچيلي زينب 

تقربت اله وبديت اسويله مساج بهدوء وهو يون ..اجتي مرات اصفن اكول وبعدين لشوكت يبقى هيج يصيبني جزع وارجع استغفر ربي هو المهم يصير زين عالاقل ما انضرب وعايشة مثل البشر ..افكار هواي براسي قطعها بوسته لكفي
-لا تزعلين زينب
ابتسمت بوجهه

-مو كلت الك ما ازعل منك تصير زين واعرف شلون اخذ حقي هههه ....
-طالت زينب وخايف لا تملين مني

-شكد صارلنا من تزوجنا تره مو هواي عود اذا تعدينا سنوات صبر النبي ايوب وزوجته عود نكول طالت...هسه تصير زين وتاخذني ازور ابو الجوادين اطلبك زيارة
-زينب ليش انت ما شايفته

-ههه ما طالعة بره النجف اني
-صدك؟؟
-شبيك تفاجأت اصلا ما شايفة كل النجف ...

- دراستج تحبيها
-حلمي اكمل دراسة بس يمكن الحلم حرام ههه ...ضحكت بارتباك اول مره نسولف هالنوب يسالني عن الدراسة تمنيت يكول تكملين بس ما كال ...سكت وتمدد وعيونه للسكف ساكت رجع حاجاني
-منو يريد فراقنا ؟؟