بمن اقتدى معذبي

نهاية حياة💔

البارت بدون تدقيق حتى لا اخلف موعدي وياكم ..باجر استراحتي حبايب 😘😘

اللي يحجون عن ندى بليز خففوا حدة تعليقاتكم بلا اذى نفسي زيادة وملامة ..اما حيدر فالكم مطلق الحرية براحتكم بس اشو اني وره ما شبعته حجي معدل ورزالة هسه احس بتانيب ضمير🙄🙄

للمره الالف زرت المستشفى بفضل المدعو زوجي ...دخل عيونه عليه ما يحجي كان كلش متضايق وخاصه وضعي الاجيت بي للمستشفى كان مزري ...شالني من الغرفة بعد ما وكعت بدقايق واجو ويانا عمتي واخوانه ...كنت شبه واعية ذهني بدا يشوش لحد ما وصلني وسوولي اللازم وهو طول الوقت واكف يمي كلمه ما نطق ..دخل الطبيب المعالج وضل يحجي عليه وعن فكرة الانتحار فكرة غبية ..كان متوسط العمر واسلوبه راقي ..يرزل بس بالضحك والشقى ...

اندار لحيدر من عرفه زوجي
-ولك هاي انت مضوجها وتنتحر
جاوبه حيدر بتبجح
-النساء ودلالهن يا دكتور !!وقابل اني دلالها

..باوع الي بابتسامه كانت تحمل وراها هواي معاني ...طلعت بنفس اليوم لان كلت الكم الفكرة فاشله وما سببت غير دمار نفسي وجسدي اكبر من اللي جنت بي وملامة الكل...هو ما علق ولا حاجاني عن الموضوع كان سكوته اكثر رعب من كلامه عبالكم وياه اكو راحه ..كنت متحضرة للاسوء منه لان كنت متوقعة منه ضام الي ضميمه

اعتزلت الناس كلها وجان مصادف بداية محرم ماكو دوام وهو ملتهي مثل كل سنه ...دخل من الباب شايل راية جبيرة بعد ما كمل الرايات الجدارية للحيطان ...كعد يسوي بيها عالارض ويعدل يريد يضيفها بالسطح ...كنت كاعدة وبحضني ابني ...باوع بوجهي ورجع يكمل شغله ...حاجاني بهدوء
-نداوي حبيبتي باجر رايح للزيارة تروحين وياي
سكتت ما رديت عليه وهو شال الراية وصعد فوك ..اتصلت بيه زينب تريد تسولف اختصرتها وياها وسديته حتى قبل ما تحجي ...

ثاني يوم من الصبح كعدت صوتهم شايل البيت  فكرت اكرر بس ما صار عندي نفس الدافع ....

-نداوي عمري اجوي بيت خالج كومي يلا ..نروح سويه للزيارة

-ما اروح
-ليش يا عيني ...ندى والله ما اقصد اذيتي الج
-ما اروح

ما لح وياي ابد طلع واجتني زينب للغرفة لان ما طلعت الهم ..فتحت البردات وتحجي وياي
-ندى حبيبتي شنو هالحال اللي وصلتي اله روحج صدك جذب تنتحرين وتودين نفسج لجهنم ..ولج عمري كله اشوفج واكول شكد قوية واقتدي بيج جنت حبيبتي منو اليستاهل نضيع نفسنا لاجله ...زوجج صح عصبي بس والله راح يتخبل عليج ولج اجانا يبجي يكول احجوا وياها
-مريض يروح يتعالج..انتو وابن خالتج دمرتوني

..كنت حاطه ابني بحضني تقربت مني اخذته لمهده وفكت شعري اللي كان معثك ومكوش صار ايام مشط ما حاطه بي ما الي خلكه وهو طويل لحد ركبة رجلي ...فكته وتصلي عالنبي ويه المشط
-شلون شعر حلو عليج عيني باردة