يوميات بيت العيله

الحلقه الثانيه

السلام عليكم اخواتى واحبتى 💗

ويالا نصلى ع الرسول وندخل ع قصتنا ع طوووول💗😊

#يوميات_بيت_العيله_جيهان_سلامه

الحلقه الثانيه🌹

أم محمود:بصوت واطى .....ها يا أم احمد جبتى اللى إتفقنا عليه

أم أحمد : أه يا ختى أهم معايا .. وإنتى يا أم
أزهار عملتى حسابك ولا إيه

ام ازهار: أه يختى أومال إيه ....كنت شايلاهم بعيد عن إيدى لحسن أسحبهم
وفتحت كيسها وطلعتهم....خودى يختى أهم

أم أحمد: وإنتى يا أم صباح فين فلوسك

أم صباح بإحراج: بصراحه يعنى كده😔
الحاله مزنقه معايا أوى اليومين دول
بس ينفع حاجه بسيطه كده على أد الإيد
٥٠ جنيه أهم ..معلش الظروف بقا

أم محمود : ولا تتكسفى ولاحاجه
إحنا إخوات يا حبيبتى ...خودى ٥٠ جنيه كمان أهى من معايا وحطيها عليها يبقوا ١٠٠ ومتتكسفيش أبدا 😁

أم صباح : لاء طبعا.....والله ما ينفع
هاخد من النقطه بتاعتك ولا إيه ....لاء يختى تسلمى

أم محمود : ملكيش دعوه إنتى .. أنا كنت هديها ١٥٠ جنيه ..ميجراش حاجه لما يبقوا ١٠٠ حتى نبقى أنا وإنتى زى بعض... إحنا اخوات يا أم صباح عيب كده

أم صباح : وأكتر ولله يا حبيبتى

أم أزهار : أقولكم بقا على حاجه أحسن من كل ده
إحنا نحطهم كلهم على بعض كده ونقطها بيهم مره واحده..
ولا حد جاب أكتر ولا حد جاب أقل ....ها
قولتوا ايه

أم أحمد: كلامك صح يا أم أزهار.... ال ٢٠٠ جنيه بتوعى أهم.....و فلوسكم إنتو كمان أهى
ولفت الفلوس كلها وإديتهم لأم محمود
خودى حطيهم فى كيسك إنتى يا أم محمود عشان معيش كيس فلوس

أم محمود: هاتى يختى ...وقوموا بينا ندخلها يلا

وقاموا ودخلوا لأم صابرين المطبخ

أم محمود: أم صابرين....إحنا خلصنا كل حاجة العروسه يا حبيبتى 😁ألف هنا على قلوبهم
وهننزل بقا نريح شويه قبل الفرح ...عاوزه حاجه تانى منا

أم صابرين: لا والله مايحصل أبدا ... أنا هحضر الغدا أوام أهو ..حتى بصوا
أدينى محضره حاجة كفتة الرز وهنزل جرى للجزار يعجنها باللحمه

أم محمود: بالهنا والشفا يا حبيبتى
وفتحت كيسها
خدى بقا... نقطة العروسه مننا كلنا وعقبال يا رب
ما نيجى فى سبوع النونو 😀

أم صابرين: إيه ده ...لاء ولله لا ممكن أبدا
إحنا بردوا فى بينا الكلام ده

أم أحمد: بقولك إيه.. إنتى هتزعلينا منك ولا إيه بقااا
إحنا إخوات.. ودى حاجه بسيطه من اخواتك
ربنا يسعدها ...
مش يالا بقا يا أم محمود.... ولا هتكملى قعده للفرح بالعبايه المزيته دى 😀